Read kirikeni Okunwẹngịapụ 9 Bible Online

Okunwẹngịapụ 9 - kirikeni bible

Okunwẹngịapụ 9

¹Ọkụma Sọl ḅe, ọḅụḍukoapụ pa nwọ ẹrẹmaḅẹ na ori ini ḅaaḅịa gose. Ò so Gele Agbamịẹḅọ ḅe damamunmẹ,

²se ọ̀ ḅara gịẹịn ḍiri ḅimẹ, ò se Damaskọs ḅie sime Juapụ tẹkẹwarịma ḅie ḍieḅịa ḍiri, mịẹse ò nemikase anịnyọ Nyanaḅọ Ḅe Ateli mị ḍukonwẹngịapụ ọrịmẹ ḅẹḅẹ, anị ḅọrọ owuapụ-o anịkanịka eremeni-o ori ini kun se ini se vinpịkị Jerusalẹm ḅoḅịa ḅara.

³Ò so Damaskọs mun-arị ateli ḅie, ò ḅo opuama mị na kpeki sịkị sotọrụ ḅo enekuḅu ḅịa ò kelemamẹ.

⁴Ọ̀ ḅịkị kiri koro se pụkọ naamẹ, nwọse ọ̀ ḅẹaḅẹ, “Sọl, Sọl! Nde ị́ gose ḅụọ se ị̀ chụarịye?”

⁵Ò gbelamẹ, “Nyanaḅọ, ị́rị́ tụḅọ?” Pụkọ mị nwọ ḅẹmẹ, “Ị̀rị̀ anị Jizọs Ḅe-ẹ, ị́ ḅụọ se chụarị ḅọ ḅe.”

⁶“Ọkụma sịsẹ so ama mị ḅie mun, ini ị́ mịẹḅịaye nwọ ḍuko ị́ pịrịḅịa.”

⁷Sọl ḅe na nwẹngịma mun sime owuapụma da chịẹmẹ, gbọrị ọkwẹịn sọnị kọnka ḅara ḅụ ini pụkọ mị naamẹ, ọkụma ineda gbọrịḅọ sọnị ọrịkẹ.

⁸Sọl ḅe kiri sịsẹmẹ, ori ọ̀ tọrụmgbọlụma finjimẹ, ọkụma ori ineda yeọrịkẹ. Anị ini ḅara ḅụ ori ọlọ se ò se Damaskọs ḅie sọ mun ye-ẹ.

⁹Tẹrẹ-a ḍin na gbasịye ḅụ ori ineda yeọrịkẹ, anịsịkị mị ḅụ ọ̀ pịkị ineda ye fịkẹ, ọ̀ pịkị mengi ḅukẹ.

¹⁰Gbọrị ọḅụḍukoḅọ Damaskọs ḅie simemẹ, ori ẹrẹ Ananayas. Ori ịkịan ọrịmẹ, anịa ḅie ḅụ Nyanaḅọ Ḅe nwọse ọ̀ ḅẹmẹ, “Ananayas!” Ọ̀ pẹkẹrẹmẹ, “Mị ị̀rị̀-ẹ, Nyanaḅọ.”

¹¹Nyanaḅọ Ḅe nwọse ọ̀ ḅẹmẹ, “Ḅụkarakarama Gonogono Ateli mị ḅie mun, Judas warị ḅie Tasọs ama mị ḅie ḅo gbọrị owuḅọ nwọ gbela, Sọl nwọ chịnḅọ. Ọ̀ tẹkẹaḅẹ,

¹²se ịkịan ḅụ Ananayas nwọ chịn owuḅọ ọ̀ nwọ ọrịmẹ, sọ ḅo ḅara se ọ̀ tịḅị ọgọnọ gbanamẹ, mịẹse ọ̀ pịkị yeọrịḅịa ọkụ.”

¹³Ananayas ḅe pẹkẹrẹmẹ, “Nyanaḅọ, tọn-a tomoni ḅe ḅọ ḅe na gbolomaye nwọ ḍuko ị̀ pịrịsam, ò seni ị́ya tomonima mịẹsa ḅalafamaye ma Jerusalẹm ḅie.

¹⁴Se ọ̀ tịḅịnị agbamịẹapụma ḅara kụrọ ọkị Damaskọs ḅosam ị́ tẹkẹarị apụ mamgba nwọ kunḅịa ẹrẹchị.”

¹⁵Nyanaḅọ ḅe nwọse ọ̀ ḅẹmẹ, “Mun, anịatịḅị àrị ọ̀ sẹlẹ ọkịsam fịrịnwẹngị ị̀ pịrịḅịa ẹrẹchị, ọ̀ mịẹse Jịnsẹapụma na amanyanapụ na, pịkị Izrẹlapụma na ị̀ya ẹrẹ nemiḅịa.

¹⁶À ḅarana ị̀ gose ori ọrịḅịa tọrụsiọrị nwọse ò ḍieḅịa.”

¹⁷Anị Ananayas ḅe mun warị mị ḅie sọ, se ọ̀ ḅarama se Sọl ḅe ọgọnọ gbanaye-ẹ. Ọ̀ nwọ ḅẹmẹ, “Mịnaḅọ Sọl, Nyanaḅọ Ḅe ị̀ se fịrịmamẹ, Jizọs Ḅe na mịnaḅụ na, ateliogbo ọ̀ ḅụ se ị́ ḍieḅọ ḅe, ị́ mịanga ḅoarị sịkị. Ori ị̀ se fịrịmamẹ, mịẹse ị́ pịkịna yeọrị se Fịafịa Tẹmẹ Ḅe na ḅeinḅịa ḅara!”

¹⁸Anị kirikiri inji ẹfẹfẹrị ọkụ simeaye Sọl ḅe tọrụmgbọlụ ḅie sokoro koromẹ se ori ineda pịkị yeọrịmẹ. Ọ̀ sịsẹ se mengi saramẹ;

¹⁹se ò yefị so sịkị ịnyọ ọ̀ ḅụ sọmẹ. Sọl ḅe Damaskọs ḅie ḅereniapụma na boka ḍin nwọse simemẹ.

²⁰Ọ̀ dada tẹkẹwarịma ḅie mun se sakị ḍukopakụmamẹ na Jizọs Ḅe Tamụnọ Tọkụ-ẹ.

²¹Ò poki apụ mamgba ijira inia ḅụ saramẹ, se gbelamẹ, “Ḅe ḅọ ḅe orika, Jerusalẹm ḅie ori Jizọs Ḅe tẹkẹarịapụ ma nwọ ḅaa simeḅọ ḅe? Pịkị mị gbọrịye mị gose ọ̀ mịnyọ ḅoka, ini kun se ini ọkịmun tịḅịnị agbamịẹapụma pịrịḅịa ẹrẹchị?”

²²Ọkụma Sọl ḅe oria Tamụnọ ḅẹrẹ ḍuko mị pịkị ḅo kụrọ nyanatẹịnye sọmẹ, Jizọs Ḅe anị Mẹsaya Ḅe-ẹ nwọ ḅẹye mị ori anị ḍiepakụma ḅara mị ḅụokoro so-ọkụma, Damaskọs ḅie sime Juapụma ini ineda ye se ọ̀ pẹkẹrẹkẹ.

²³Tọn-a ḍin ḅo ḅọrọ sịkị, Juapụma koḅirima Sọl ḅe ḅaaḅịa ọkụ nwọ ḅia,

²⁴ọkụma ini mịẹḅịa ẹrẹchị ḍọkịye mị ọ̀ nwọ naamẹ. Ḍin na enekaka na ḅụ ini ama mị ḅe onu ḅọkọ ma nwọ korumẹ mịẹse ini ọ̀ ḅaaḅịa ḅara.

²⁵Ọkụma gbọrị ene ḍin ḅie Sọl ḅe ḍukonwẹngịarịapụ ma ama mị ḅe onu mị ḅụ finji sime nyọ ḅie ò se kana ḅie chụa toluma koromamẹ.

²⁶Sọl ḅe Jerusalẹm mun mẹ, se ọḅụḍukoapụma ḅie sọḅịa ḅara nwọ ḍọkịmẹ. Ọkụma ini ḅerenikẹ na ori ọḅụḍukoḅọ-ẹ nwọ ḅẹye, se inimgba ò ḍikiḅalafamẹ.

²⁷Anịsịkị Banabas ḅe ḅo ḅarachụa ọ̀ pịrị, se ori ọkị mun okunwẹngịapụ ma nwọ pịrịmẹ. Ò ḍuko ḅelema ini pịrịmẹ Sọl ḅe wẹrịḅo Nyanaḅọ Ḅe ọrị ḅara mị ateliogbo ḅụ, na Nyanaḅọ Ḅe pịkị ọkwẹịn ọ̀ pịrịsam. Ọ̀ pịkị ḍuko ini pịrịmẹ, Sọl ḅe ḅara wẹrịma kụrọ kuḅie nyana Jizọs ẹrẹ mị se ọkwẹịn kọnsa ḅara Damaskọs ḅie.

²⁸Anị Sọl ḅe inia ḅụ sọ simeye-ẹ, se nwẹngị bebe Jerusalẹm mị mgba kelema, ḅalafaka ḅara se Nyanaḅọ Ḅe ẹrẹ mị se ọkwẹịn kọnmẹ.

²⁹Ọ̀ pịkị Grik ọkwẹịn kọn-arị Juapụma na ọkwẹịnma se ini na ḅẹrẹ piki-amẹ, ọkụma ini ọ̀ ḅaaḅịa ḅara ḍọkịmẹ.

³⁰Ḅereniapụ ma mịn mị gbolomaye nwọ ḍọkịḅo sịkị, ini Sọl ḅe ọkị Sizaria mun mẹ se ò se Tasọs fịrịmamẹ.

³¹Anị anị sime ḅara mị-ẹ, se chọchị mị Judia na Galili na, pịkị Sameria ḅie mgba deinma sịkị nwọ nyanamẹ. Anị ịnyọ chụamẹ, pịkị kịẹnḅịpị ḅụ sẹnịmẹ Fịafịa Tẹmẹ Ḅe ḅe ḅarachụa ḅụ, anị nwọ Nyanaḅọ Ḅe mangịma ḅụ sime warasịkị.

³²Pita ḅe mun nyọ nyọma nwọ lamẹ, gbọrị sịkị ò mun Tamụnọ-a tomonima la-ẹmunmẹ, Lida ama ḅie anga apụma.

³³Anịnyọ ọ̀ gbọrị owuḅọ na ịrịamẹ Eneas nwọ chịnḅọ, ḅụọ na ḅara na fị obi kọnḅọ, nine-a kụra na gbasịye nwọse obi iḅila ọgọnọ simeḅọ.

³⁴Pita ḅe nwọse ọ̀ ḅẹmẹ, “Eneas, Jizọs Kraịst Ḅe ori ị́ gwọsam. Sịsẹ se ị́ya mọnọye tẹlịma.” Anịkirikiri Eneas ḅe sịsẹmẹ.

³⁵Lida na Sharọn na ḅie anga apụ mamgba ori ọrịmẹ, se ini vinpịkị Nyanaḅọ Ḅe damaḅomẹ.

³⁶Jọpa ḅie gbọrị eremeniḅọ omi-ẹ, Tabita nwọ chịnḅọ, árị ḅereniḅọ-ẹ. (Grik ọkwẹịn ḅie árịa ẹrẹ anị Dọkas, anị mị fiearịye “tụḅụra!” nwọ chịn nama-ẹ.) Arịa sịkị mamgba á se iḅi mịẹ ḅụ na ḅarachụa igwein apụ pịrị ḅụ famamẹ.

³⁷Anịsịkị mị ḅụ árị obi se fịmẹ. Ini árịa oju sịkịrị se anị se ọgọnọ warị ḅie gbọrị jukuru ḅie koromamẹ.

³⁸Jọpa na Lida na sasakẹ, se Jọpa ḅie sime ọḅụḍukoapụma naamẹ na, Pita ḅe ò Lida ḅie omi-ẹ nwọ ḅẹ sịkị, ini mama owuapụ se ọ̀ fịrịmamẹ, mị oku mị-ẹ, “Pasisi, fịkịrị wa damaḅo.”

³⁹Anị Pita ḅe ḅụkarakarama se inia ḅụ sọmunye-ẹ. Ò ḅo lasịkị ini ò se iwo ọgọnọ warị mị ḅie sime jukuru mị ḅie mun mẹ. Deapụ fịsa eremeni mamgba koḅirima ò kelemamẹ, owuaḅẹ, pịkị Dọkas ma ḍumo sime sịkị á gbin ini pịrị ḅụchụayema nwọse ò ḍiemẹ.

⁴⁰Pita ḅe jukuru mị ḅie inimgba depakụmamẹ, se kpẹrẹkị tẹkẹmẹ, anịsịkị ò vinpịkị oju mị da se nwọ ḅẹmẹ, “Tabita, sịsẹ!” Árị á tọrụmgbọlụma finjimẹ, á Pita ḅe ọrị sịkị á kpọnjị simemẹ.

⁴¹Pita ḅe mun se ḅarachụa á deki sịsẹmamẹ. Anịsịkị ò ḅereniapụma na deapụ fịsa eremeni ma na chịnmẹ, se ḍumo ḅụ á se ini pịrịmẹ.

⁴²Mịn mị gboloma ḅẹrẹ wasama Jọpa mgba kelemamẹ, se tọn-a apụ Nyanaḅọ Ḅe ḅerenimẹ.

⁴³Pita ḅe tọn-a ḍin nwọse Jọpa ḅie simemẹ, nama apụra se fịrịnwẹngịarịḅọ, ini Saịmọn nwọse chịnḅọ ḅe warị ḅie.