Read kirikeni Romapụ 1 Bible Online

Romapụ 1 - kirikeni bible

Romapụ 1

¹Mịn fịrịfịrịmaḍiri mị Pọl ḅe ḅara ḅomẹ, Kraịst Jizọs fịrịnwẹngịḅọ, pịkị okunwẹngịḅọ, Tamụnọ Ḅe sẹlẹọkị se oria Iḅi Ḅẹrẹ mị ḍuko nwọ ḅẹ ḅọ ḅe-ẹ.

²Tamụnọ Ḅe ḅọlọ sịkị ngịsị oria ịkịankoroapụma ḅụ ḅọrọ Iḅi Ḅẹrẹ mị ḅereni nweni pịrịmẹ, anị Fịafịa ḍiri ma ḅie gịẹịn ḅara ḅụ.

³Oria Tọkụ Ḅe gboloma iḅiọkwẹịn mị, wa Nyanaḅọ Jizọs Kraịst Ḅe: ḅo tomoniḅọ sọ mị, Devid furo ḅie ini oyi pakụmaḅomẹ;

⁴oria fịafịa Tamụnọ kiri mị, opu kụrọ ḅụ anị anịa ḅụ ḍiepakụmamẹ na, ori Tamụnọ Tọkụ-ẹ, fị ḅụ ọ̀ sịsẹma mị ḅụ.

⁵Ọ̀ ḅụ ḅụ Tamụnọ Ḅe ị̀ mịẹse à ḅo okunwẹngịḅọ nwọ sọmẹ, Kraịst Ḅe tịḅị gose, mịẹse à sẹ mamgba ḅe-a tomonima se tọrọkọ ịsụn se ini ḅereni se ḅịpịpokiḅịa ḅara.

⁶Mịn mị anị pịkị ómine Rom ḅie anga apụma nwọse chụa waraḅẹ, ómine Tamụnọ Ḅe chịn na ó sime Jizọs Kraịst Ḅe pịrị-ẹ nwọ ḅẹ apụma.

⁷Anịẹrẹchị à gịẹịn ómine Rom ḅie sime apụ mamgba nwọ fịrịmaḅẹ, ómine Tamụnọ Ḅe ḅẹlẹma, pịkị chịn se oria tomoni nwọ mịẹ apụma: Ye Tamụnọ mịna Ḍaḅọ Ḅe na pịkị Nyanaḅọ Jizọs Kraịst Ḅe na ḍikiḅụgerere na deinma na se ọ́ pịrị.

⁸Tatarịye, à mịẹḅaka se Jizọs Kraịst Ḅe ḅụ ḅọrọ ị̀ Tamụnọ Ḅe ḅẹmẹ, ómine mgba tịḅị gose, anịatịḅị bebe tomonikiri mị mgba ọ́mịna ḅereni mị gbolomaye nwọ na aḅẹ.

⁹Tamụnọ Ḅe ị̀ya onyechịẹḅọ-ẹ na à ḍukoye mị kọkọmaye-ẹ; àrị ị̀ kuḅiemgbọlụ mgba se fịrịnwẹngị pịrị Tamụnọ Ḅe, Iḅi Ḅẹrẹ mị ḍukopakụma mị ḅụ oria Tọkụ Ḅe gbolomaye mị. Tamụnọ Ḅe ò nemimẹ na à sịkịmamgba ó se ḅiekoromamẹ

¹⁰à tẹkẹ sịkị goyegoye. À ḅimẹ, na Tamụnọ Ḅe, ò ḅietọn ḅara mị ḅụ, mịẹse anị sarasara ị̀ pịrị à ḅo mịọkụ ọ́ la.

¹¹Anịatịḅị à kpọma ḅimẹ àrị ómine ọrị mịẹse àrị ómine na tẹmẹ anga ḅe ḅẹlẹma nwọ ḍiaḅịa ḅara, ịnyọ se ọ́ ḅụ chụaḅịa ẹrẹchị.

¹²À fiearịye anị mịẹse ómine na ị̀rị̀ na anị gbọrị sịkị ḅụ ḅarachụa nwọ nyanaḅịa ḅara, ómine ị̀ya ḅereni ḅụ ḅọrọ anị nyana, ị̀rị̀ pịkị ọ́mịna ḅereni ḅụ ḅọrọ anị nyanaḅịa ḅara.

¹³Ọ́ mịn mị nwọ nemi ị̀ya mịnapụ, na tọn-a sịkị à tọnmẹ na à ḅo ọ́ laḅịa, ọkụma mịẹmịẹye sịkịmamgba ị̀ kikikikimẹ ọkọ mịẹ. À ḅimẹ àrị ọ́mịna ogboku sọnị, tomoni mịẹse ini si ḅụ vinpịkị, ísí Jịnsẹapụma ḅie à mịẹsa ḅara mị.

¹⁴Anịatịḅị à tomoni mamgba ḅara sa ọlọ waraḅẹ, tọrụ finjisa apụma na tọrụ ma finjika apụma na, ḍiri-nemi-apụ ma na pịkị ḍiri-nemikapụ ma na.

¹⁵Mịn mị gose ị̀ kuḅie chịẹ-chịẹ-chịẹmẹ Iḅi Ḅẹrẹ mị nwọ ḍuko ómine Rom ḅie anga apụma sọ pịrị.

¹⁶Ị̀ kuḅie mgba à nwọse Iḅiọkwẹịn mị ḅụ gbanamẹ, anịatịḅị anị mị Tamụnọ Ḅe se ḅereniapụ goyegoye ḍụaḅọrọmaḅịa kụrọ mị-ẹ, Juapụma tatarị-ẹ, ọḅụkọ Jịnsẹapụma na.

¹⁷Mịn iḅiọkwẹịn mị ḅụ Tamụnọ Ḅe pịkị tomoni mịẹ karakarama ọ̀ ḅụ pịrị ọkụ mị nwọ ḍieḅelemamẹ; ḅereni ḅụ anị sakị mun kuluma lamẹ. Fịafịaḍiri mị ḍuko ḅara ḅụ, “Ḅereni ḅụ ini ḅọrọ se Tamụnọ Ḅe na mịẹ karakaramaḅọ ḅe ò ḍumoḅịa.”

¹⁸Anịatịḅị, Tamụnọ ịganị mị soḅie ḅo Tamụnọ nemika apụma na sitịḅịnyana apụma na ọgọnọ gbanasam, anị inia sitịḅị ma se karakaraye mị pụnụma apụma.

¹⁹Tamụnọ Ḅe fomuḅara se ini pịrịmẹ, anịatịḅị tomoni Tamụnọ ḅụ ineda nemiḅịaye ḅelemapaka ini pịrịmẹ, Tamụnọ Ḅe na mịnaḅụ na anị mịẹḅelema ini pịrịmẹ.

²⁰Tamụnọ Ḅe tomonikiri mị tẹmẹ sịkị ngịsị, ori ḅe ineda tọrụ se ọrịka simeḅara mị, na oria simegbaso kụrọ mị na, pịkị ori Tamụnọ-ẹ nwọ ḅẹ simeḅara mị, ini ḅelema nwọ ọrịmẹ. Tamụnọ Ḅe mịẹsaye ma ḅụ tomoni ineda ḅọrọ àrị ọrịḅịa. Anịẹrẹchị ini nyana se inia ḅụ ḍụaḅịaye ngịsị ofori-ẹ!

²¹Tamụnọ Ḅe ini ó nemimẹ, ọkụma ini sime ọ̀ pịrị osi mị nwọse ọ̀ pịrịkẹ, ini pịkị mịẹḅaka se ọ̀ ḅẹkẹ. Anịnakaraka, inia koromama ḅie iniḅo nemi ngịsị ofori apụ sọmẹ.

²²Ini nwọ ḅẹmẹ na ini yenemimẹ, ọkụma ini oḅori apụ-ẹ;

²³ini fịfịka Tamụnọ Ḅe nwọ tẹkẹ nakaraka, ini ini karaye ma anị fịḅịa tomoniḅọ anịkanịka feni, anịkanịka nama, anịkanịka ikiriarịye kịkẹye ma re tẹkẹaḅẹ.

²⁴Anịatịḅị tomonima oḅori sọye gose, Tamụnọ Ḅe saḅama inia ḅụ ḅarasin inia kuḅiemgbọlụma ḅi ịlọlị ḅụḅein-aye ma nwọ pịrịmẹ, se ini ḅụgererema mịẹmịẹaye ma nwọse jịnḅọ jịnḅọ na mịẹmẹ.

²⁵Ini Tamụnọ ḅụ kọkọmaye mị nwọse iruoaye na ḍinmamẹ, ini Tamụnọ Ḅe tẹmẹayema nwọ tẹkẹ pịkị fịrịnwẹngịarị pịrịmẹ, ini Tẹmẹḅọ Ḅe ḅoju nwọ tẹkẹ nakaraka, anị ini tokoni ḅẹsịkị ḅẹsịkị laḅịa ḅọ ḅe! Amẹn.

²⁶Tomonima mịn mị nwọ mịẹye gose, Tamụnọ Ḅe ini ḅọrọma ḅụgererema pụkọtarịaye nwọ pịrịmẹ. Eremeni ma sọnị inia ḅụ ma seni mịẹmịẹka mịẹaye ḅie chusam.

²⁷Anị gbọrị ḅara ḅụ owuapụma ama na ere na mịẹmịẹye ḅụ ḅarasin se tọrụ pịkị inia juo owuapụ ḍa se inia pụkọtarịye na kọrị paka se jịnḅọ jịnḅọ ḅụgererema ama na ere na nwẹngị kọn aḅẹ. Anị ḅara mị nwọ mịẹ gose ini na inia ḅụ na anịḅe fomuḅara nwọ da aḅẹ, anị ini gbẹịn ḅara ḅụ inia mịẹirima ma gose.

²⁸Anịatịḅị tomonima kọkọma Tamụnọ nemi mị nwọse inia kuḅie wẹrị ḍụkụka ẹrẹchị, ori ini saḅama ḅụrụsa kuḅie pịrịmẹ, anịgose ini mịẹgbẹịnkaye ma ini nwọ mịẹma ḅọrọaḅẹ.

²⁹Sitịḅị ḅara ḅara mamgba inia ḅie ḅeinmẹ, si, ngẹrịfịḍọkị, simịẹmịẹye, jịnḅọ ḍiki pụkọsoli inia ḅụ ḅeinmẹ, nweniḅaa, owusọḍọkị, oḅori se nweni chịn, pịkị ḅieakụ na. Ini nweni se fiemẹ,

³⁰se jịnḅọ jịnḅọ ḅụ siye ḍukomẹ ini taraka nyana Tamụnọ Ḅe pịrị, ọ̀ wọlọ, opuayemịẹ, ḅụboma, siye mịẹḅịa koroma ini nwọ nyanatẹịnmẹ; ini ini yiapụ ma ḅịpịpokikẹ;

³¹fịafịaka ḍumo kọn apụ; ḅereniye mịẹkapụ, ini iḅi mịẹ jịn apụ pịrịpịrịkẹ, pịkị jịn apụ ḍikiḅụgererekẹ.

³²Ini nemimẹ na Tamụnọ oloko mị nwọ ḅẹmẹ, na mịn ḅara mị se ḍumokọn apụ fị gbẹịnmẹ. Anị sọnị, ini pa mayema nwọ mịẹmamun-aḅẹ nwọ ḅẹye kẹngẹkẹ, ọkụma ini pịkị àrị mịẹarị jịn apụ mịẹkụrọmamẹ.