Read kirikeni Romapụ 10 Bible Online

Romapụ 10 - kirikeni bible

Romapụ 10

¹Ị̀ya mịnapụ, ị̀ kuḅiemgbọlụ ḅụ à ḅiarịye se pịkị Tamụnọ Ḅe tẹkẹ ini pịrịarịye anị ini pa ḍụaḅọrọma nwọ nyana!

²Àrị ineda onyechịẹ ini pịrịḅịa na ini gbunma ḅụ se Tamụnọ Ḅe pịrịmẹ. Ọkụma inia ḅụ se Tamụnọ pịrị mị, anị kọkọma ḅara se ọ̀ ḍawọ nemi ḅụ sẹrẹrẹkẹ.

³Tamụnọ Ḅe ḅara wẹrịma mịẹse tomoniḅọ ori na karakaraḅịa achọ mị ma ini anị nemikẹ, anịnakaraka ini inia ḅarakuḅu achọ tọn pakụmamẹ; anịẹrẹchị ini ḅarị ḅụ se Tamụnọ Ḅe ḅara wẹrịma mịẹse tomoniḅọ ori na karakararị achọ mị pịrịkẹ.

⁴Anịatịḅị Kraịst Ḅe ori Oloko mị ọkịḅo anịḅe kuluma mị nwọ lasam, mịẹso ọkụma ḅereniḅọ goyegoye Tamụnọ Ḅe ori iniḅọ na karakarasam.

⁵Mịn Moziz ḅe gịẹịn ye mị-ẹ, Tamụnọ Ḅe na karakara mị gbolomaye ḅụ, anị Oloko mị ḍukoye mịẹ mị ḅụ: “Oloko mị tọnye mịẹ ḅọ goyegoye iniḅọ ḍumoḅịa.”

⁶Mịn ḅereni ḅụ ḅọrọ Tamụnọ na karakara mị gbolomaye ḅụ fịafịa ḍiri mị ḍukoye mị-ẹ: “Nwọse ị́ ḅụ gbela ma, Tụḅọ iwo soḅie mun ḅe?” (anị fiearịye, mun Kraịst Ḅe sin koroma mị).

⁷“Pịkị nwọ gbela ma Tụḅọ ideri sẹkiri chuku ḅie mun ḅe?” (anị fiearịye, mun fịapụma ḅie Kraịst Ḅe ọkị iwo ḅo ḅe).

⁸Mịn anị ḍukoarịye mị-ẹ: “Tamụnọ oku mị ị́rị́ na kpekimẹ, ị́ ḅịpịpẹkẹrẹ ma ọgọnọ na pịkị ị́ kuḅiemgbọlụ mị ḅie na” anị mị fiearịye, mịn wa ḍukoarị ḅereni oku mị-ẹ.

⁹Ị́ nemikase ị́ ḅịpịpẹkẹrẹ ma se ḍukopakụmamẹ, na Jizọs Ḅe anị Nyanaḅọ Ḅe-ẹ, pịkị ị́ kuḅiemgbọlụ ḅụ ḅerenimẹ na Tamụnọ Ḅe fị ḅụ ọ̀ sịsẹmamẹ ḅẹḅẹ, ị́ ḍụaḅọrọma nyanaḅịa.

¹⁰Anịatịḅị mịna ḅereni ḅụ wa ḅọrọ Tamụnọ Ḅe na karakaramẹ; wa ḅịpị se ḍukopakụmaye ḅụ wa ḅọrọ ḍụaḅọrọma nyanamẹ.

¹¹Fịafịa ḍiri mị nwọ ḅẹmẹ, “Ò ḅereniḅọ goyegoye iniḅọ gbakịḅịaye ofori-ẹ.”

¹²Mịn mị ḅẹḅọ ḅẹḅọ nwọse chụamẹ; anịatịḅị kịrịye ofori-ẹ Juapụ na Jịnsẹapụ na ogboku. Tamụnọ Ḅe ori anị nweni mgba Nyanaḅọ Ḅe-ẹ, pịkị ḅaka ḅara nwọse ọ̀ chịn apụ mamgba nwọ ḅẹlẹmamẹ.

¹³Fịafịa ḍiri mị ḍuko ḅara ḅụ na, “Nyanaḅọ Ḅe ẹrẹ mị nwọ chịn ḅọ goyegoye ḍụaḅọrọma nwọ nyanaḅịa.”

¹⁴Ọkụma nde ini ḅarachụa gose ọ̀ chịnḅịa ọkụ, ini nemikase ma ḅerenika ọkụma? Se nde ini ineda ḅereniḅịa ọkụ ma ini oku mị naaka ọkụma? Nde ini pịkị naaḅịa ọkụ, ini nemikase oku mị nwọ ḍukopakụmaka ọkụma?

¹⁵Nde oku mị ḍukopakụmaḅịa ọkụ, nemikase fịrịnwẹngịapụ nwọ fịrịma pakụmaka ọkụma? Fịafịa ḍiri mị ḍukosa ḅara ḅụ, “Iḅi Ḅẹrẹ mị ḍukoapụ ma ḅe ḅo mị ḅụgbiripuma ọkụ ḍiki!”

¹⁶Ọkụma inimgba ma Iḅi Ḅẹrẹ mị ọkịkẹ. Aịzaya ḅe na mịnaḅụ na nwọ ḅẹmẹ, “Nyanaḅọ, tụḅọ mịna oku mị nwọ ḅereni?”

¹⁷Anịọkụma, ḅereni mị oku mị na ḅụ anị wẹrị ḅomẹ, oku mị pịkị Kraịst Ḅe ḅẹrẹ ḍuko ḅụ wẹrị ḅomẹ.

¹⁸Ọkụma à gbelamẹ, kọkọmaye ḅụ oku mị ini anị naaka? Anị sime ḅara—ini naamẹ fịafịa ḍiri mị ḍuko ḅara ḅụ: “Inia pụkọ fie mun bebe tomonikiri mị ḅie mgba kelemamẹ; inia ọkwẹịn ma ọkịmun sẹkiri mị ḅe kuluma nyọma sọ lamẹ.”

¹⁹Anịḅe jịnye à pịkị gbelamẹ, Izrẹlapụma ini kaịnḅoka? Moziz ḅe na mịnaḅụ na mị tatarị pẹkẹrẹye-ẹ: “À mịẹse ị̀ya tomonima yeḅụsọka sẹ apụma nwọ ḍikipụkọsoliḅịa; à pịkị mịẹse ị̀ya tomonima yenemika sẹ apụma nwọ ḍikiḅụnwọnwọḅịa.”

²⁰Aịzaya ḅe tọrụkụnka ḅara ḅụ mịn mị nwọ ḅẹmẹ, “Ị̀ ḍọkịka apụma ị̀ nyana ḅomẹ, àrị ị̀ ḅụ seni ị̀ gbelaka apụma nwọ ḍiemẹ.”

²¹Ọkụma Izrẹl mị gbolomaye ḅụ ọ̀ nwọ ḅẹmẹ, “Bebe ene mị mgba à nwọse ị̀ ḅarama ịsụn pakụma se ḅịpịpokika apụma na ininachịn apụma na damẹ.”