Read kirikeni Romapụ 13 Bible Online

Romapụ 13 - kirikeni bible

Romapụ 13

¹Tomoniḅọ goyegoye sẹ mị ḍikiḍikiarịapụ ma ḍukoye ma nwọ mịẹ, anịatịḅị Tamụnọ Ḅe kụrọ pịrịka simeogbo kụrọ nyana gbọrịḅọ ofori-ẹ, se nwọ sime kụrọnyanapụ ma Tamụnọ Ḅe ini se koromamẹ.

²Nwọ sime wararị kụrọnyanaḅọ ḅe na tụḅụrụ ḅọ goyegoye iniḅọ Tamụnọ Ḅe tọn koromaye na tụḅụrụaḅẹ; se ọkọ simeye mịẹḅọ goyegoye ḅẹrẹkọn ọkịḅo iniḅọ ḅụ pịrịaḅẹ.

³Anịatịḅị iḅiye mịẹapụ ḅẹrẹtọn apụ ḍikiḅalafa ẹkẹ, ọkụma siye mịẹapụ re-ẹ. Kụrọnyanaḅọ ḅe ḍikiḅalafaka mị ị́ ḅụḅẹlẹ? Anị-ẹ ḅẹḅẹ iḅiye mị mịẹ anịsịkị ori ị́ tokoniḅịa.

⁴Anịatịḅị ori Tamụnọ fịrịnwẹngịḅọ-ẹ ị́ya iḅi gose. Ọkụma ị́ nemikase siye mịẹmẹ ḅẹḅẹ, ò ḍikiḅalafa, anịatịḅị oria ḅụfụka se tomoniḅọ pịrị mị karakaramẹ. Ori Tamụnọ fịrịnwẹngịḅọ-ẹ se Tamụnọ ịganị nwọse siye mịẹapụ ma ọgọnọ gbanaḅịa.

⁵Mịn mị gose ọ́ kụrọnyana apụma ḍukoye nwọ mịẹḅịa—Tamụnọ Ḅe fomuḅara mị kẹngẹ gosekẹ, ọkụma pịkị sina iḅina nemi kuḅie mị na gose-ẹ.

⁶Mịn ọ́ pịkị gose amaochoaye gbẹịn-arịye mị tịḅị-ẹ, anịatịḅị kụrọnyana apụma ini fịrịnwẹngị Tamụnọ Ḅe pịrịaḅẹ, ini nwẹngị na iḅi fịrịma ini nwọ nwẹngị ḅeinmarị sịkị.

⁷Ị́ inia ḅara ọlọ sa se ini gbẹịn, ị́rị́ ḅarana nyana ngọma ḅe amaocho igbiki ma se ini gbẹịn, se ini osi pịkị kụn se inimgba pịrị.

⁸Gbọrịḅọ ḅara sọnị sa ọlọma—ómine ọlọḅịa sa, anị jịnḅọ jịnḅọ ḅẹlẹma kẹngẹ-ẹ. Iniḅọ juo tomoniḅọ ḅẹlẹmaḅọ goyegoye Oloko mị ḍukoye nwọ mịẹsam.

⁹Tọn koroma na mịẹ ma-ẹ nwọ ḅẹ ayema, “Sẹfị ma, nweni ḅaa ma, furu ma, jịnḅọye sọlị ma” ma mamgba na pịkị jịn aye na, arịmgba tọn koroma na mịẹ ma-ẹ nwọ ḅẹ aye-ẹ, “Ị́ ḅụḅẹlẹma ḅara nwọse ị́ juo tomoniḅọ ḅẹlẹma.”

¹⁰Mịna juo tomoniḅọ ḅẹlẹmaḅọ goyegoye ngịsị siye se iniḅọ juo tomoniḅọ mịẹ ẹkẹ. Anịọkụma, ḅẹlẹma nyana mị, anị bebe Oloko mị mgba ḍukoye nwọ mịẹ mị-ẹ.

¹¹Ọ́ mịn mị nwọ mịẹḅịa, gbarịmaka ḅara ḅụ, anịatịḅị ó nemimẹ na ọ́ mọnọ ḅụ sịsẹḅịa sịkị mị lasam. Anịatịḅị wa ḍụaḅọrọma nyanaḅịa sịkị mị, mịọkụ anị kpekitẹịn wa tatarị ḅereni sịkị mị nẹngịmẹ.

¹²Kalaye kọnmẹ ḍin mị ḅọrọḅịa, eneḅa mị kpekisam, ó ye wa ḅarị sime kanakana pịrịaye nwọ mịẹma, se wa se enekuḅu ḅie owusọḅịaye ma nwọ deki ọlọ.

¹³Ó ye wa iḅiọkụ mịna ḅụ wẹrị kpaịnma enekaka ḅie simearịapụ ḅara ḅụ, kamụsọ, oloko abalaka ḅụtima na iruḅu tọrụḅaama na ḅụkẹ, pịkị sẹfị na ichipịnị-a si nwẹngị ḅụkẹ, pịkị ḅụgbẹịnka mịẹmịẹye ḅụkẹ, owusọ na jịnḅọ ḍikitọrụfụka na ḅụkẹ.

¹⁴Ọkụma Nyanaḅọ Jizọs Kraịst Ḅe owuniayema ọkị ḅiri, se ḅarị ojumịnị mị ḅiarị siaye ma nwọ abalama anị anị ḅiarịyema mịẹ anị pịrị ḅụ.