Read kirikeni Romapụ 14 Bible Online

Romapụ 14 - kirikeni bible

Romapụ 14

¹Ọ́mịna ogboku ó ḅereni ḅụ ịnyọ nyanakaḅọ ḅe ọkị, ọkụma ómine ò kuḅie ye ḅụ sime ḅara nwọse ori na jinea ma.

²Gbọrịḅọ nyana ḅereni ọ̀ mịẹse ò yegoyegoye nwọ fị pịkị pẹịḅịa, ọkụma ḅereni ḅụ ịnyọ nyanakaḅọ ḅe fụlọ chụọ ịnyanya kẹngẹ mị iniḅọ pẹịpẹịye-ẹ.

³Yegoyegoye nwọse fịye mịẹ fị ḅọ ḅe, ye ori anị ḅara mịẹka ḅọ ḅe ḍikisimama, fụlọ chụọ ịnyanya kẹngẹ pẹị ḅọ ḅe pịkị ḅẹrẹkọn yegoyegoye pẹịarị ḅọ ḅe pịrị ma, anịatịḅị Tamụnọ Ḅe ori ọkịsam.

⁴Ị́rị́ tụḅọ se ḅẹrẹkọn jịnḅọ fịrịnwẹngịḅọ nwọ pịrị ḅe? Ọ̀ Nyanaḅọ Ḅe mị ḍukopẹlẹḅịaye-ẹ ori iḅiọkụ mịẹmẹ anịkanịka ori iḅiọkụ mịẹkẹ. Ọ̀ pịkị iḅiọkụ mịẹḅịa, anịatịḅị Nyanaḅọ Ḅe ori ineda ọ̀ mịẹ se ori iḅiọkụ mịẹḅịa.

⁵Gbọrịḅọ nwọ koromaḅịa na, gbọrị ene yeḅụsọ ísí enema nẹngịmẹ, jịnḅọ koromarị sịkị na, ene mamgba gbasịmẹ. Ḅọḅọ kụrọma iniḅọ kuḅie ḅereniye mị nwọ ọlọ wẹrị.

⁶Opu ene ḅara nwọse gbọrị ene kịẹnma ḅọ ḅe, ori anị se osi se Nyanaḅọ Ḅe pịrịmẹ, yegoyegoye nwọ fị pịkị pẹịarị ḅọ ḅe, ori anị se osi se Nyanaḅọ Ḅe pịrịmẹ, anịatịḅị ọ̀ mịẹḅaka se Tamụnọ Ḅe ḅẹmẹ fịye mị gose. Daye pẹị ka pịkị fị ḍụkụka ḅọ ḅe sọnị, se osi se Tamụnọ Ḅe pịrị gose ori ọkọ mịẹmẹ, ọ̀ pịkị mịẹḅaka se Tamụnọ Ḅe ḅẹmẹ.

⁷Mịna ḅụ ḍumo ngẹrị iniḅọ ḅụ pịrịḅọ ofori-ẹ, fị ngẹrị iniḅọ ḅụ kẹngẹ pịrịḅọ pịkị ofori-ẹ.

⁸Wa ḍumomẹ ḅẹḅẹ, Nyanaḅọ Ḅe mị wa ḍumo pịrịye-ẹ, wa pịkị fịmẹ ḅẹḅẹ, wa pịkị fị Nyanaḅọ Ḅe nwọ pịrịmẹ. Wa ḍumo-o, anịkanịka fị-o, wa sime Nyanaḅọ Ḅe pịrịmẹ.

⁹Anịatịḅị Kraịst Ḅe fị se pịkị sịsẹ ḍumomẹ mịẹse ọ̀ Nyanaḅọ sọ ḍumoapụ na fịapụ na pịrịḅịa ḅara.

¹⁰Anịọkụma ị́ che gose ḅẹrẹpẹlẹ ị́ mbire ḅe ọgọnọ gbana? Se ị́rị́ che gose ị́ mbire ḅe ḍikisima-ao? Mine mgba Tamụnọ Ḅe tọrọkọ chịẹsimeḅịa ọ̀ ḅẹrẹkọn wa pịrịḅịa ḅara.

¹¹Anịatịḅị fịafịa ḍiri mị nwọ ḅẹmẹ, “À ḍumo warasịkị, Nyanaḅọ Ḅe nwọ ḅẹmẹ, ḅẹḅọ ḅẹḅọ ị̀ tọrọkọ kpẹrẹkịḅịa, ḅẹḅọ ḅẹḅọ pịkị ḍukopakụmaḅịa na ị̀rị̀ Tamụnọ-ẹ.”

¹²Anịọkụma mịnaḅụ ḅọḅọ iniḅọ opoli tọn Tamụnọ Ḅe pịrịḅịa.

¹³Anịọkụma ó ye wa ḅarị ḅẹrẹkọn jịnḅọ jịnḅọ pịrị ma. Anịnakaraka, mịn mị tọnpẹlẹ na ị́ mbire ḅe ị́ nwọ mịẹse ọ̀ ḅụọ tọmbụlọ ẹkẹ pịkị ḅịkị si ḅie koro ẹkẹ.

¹⁴Ị̀ Nyanaḅọ, Jizọs Ḅe na gbọrịye mịẹ mị, mịẹse anị ị̀ ḅụokorosam na, mịn ọkụma fịafịakẹ nwọ ḅẹ fịye ofori-ẹ, ọkụma gbọrịḅọ nemikase ḅerenimẹ na da fịye fịafịakẹ nwọ ḅẹḅẹ, ọ̀ ḅụ mị anị fịafịakaye-ẹ.

¹⁵Ị́ nemikase fịarịye ḅụ wẹrịye se ị́ mbire ḅe lamamẹ ḅẹḅẹ, anị ị́ ḅarị ḅẹlẹma ḅụ ḅọrọye mịẹkẹ. Ḅereni se ị́ fịarị fịye mị fa ọkịḅo Kraịst Ḅe fị pịrị ḅọ ḅe nwọ pịrị ma!

¹⁶Ḅereni se ị́ se iḅiye chịn ye mị si ẹrẹ ọkịḅo ma.

¹⁷Anịatịḅị Tamụnọ Amanyanakiri mị anị fịfịye na ḅuḅuye na ḅụ ofori-ẹ, ọkụma karakara mịẹmịẹye na deinma na, pịkị Fịafịa Tẹmẹ Ḅe pịrịarị ḅieḅẹlẹ na-ẹ.

¹⁸Se mị ḅara mị se fịrịnwẹngị Kraịst Ḅe pịrị ḅọ goyegoye Tamụnọ ḅụḅẹlẹye nwọ mịẹmẹ, pịkị tomoni ḅụḅẹlẹye nwọ mịẹsam.

¹⁹Anịẹrẹchị, wa sịkịmamgba deinma ọkịḅoḅịaye ma nwọ ḍọkị mịẹḅịa, pịkị ḅarachụa ịnyọ se jịnḅọ jịnḅọ pịrịḅịaye ma na.

²⁰Fịye gose Tamụnọ Ḅe mịẹsaye nwọ sima ma. Fịye mamgba ini ineda nwọ fịḅịa, ọkụma anị kurakẹ tomoniḅọ mịẹse iniḅọ si ḅie sọḅịa fịye ḅara nwọ fị.

²¹Mịẹ gbẹịnye anị nama pẹị ḅụ ḅarasin, pịkị ḅuḅuye na, pịkị ị́ya mịnaḅọ ḅịkịmaḅịa jịnye goyegoye ḅụ ḅarasin.

²²Mịn ḅẹrẹ mị ḅụ ị́ ḅereniye mị nwọ koko wẹrị, Tamụnọ Ḅe na ị́rị́ na ogboku ḅụ. Ḅieḅẹlẹ sime ori ḅọ ḅe pịrị kuḅie siḅẹrẹ kọn pịrịka ḅọ ḅe ọ̀ ḅụḅẹlẹye mị ọ̀ nwọ mịẹ sịkị!

²³Ọkụma ò kuḅie nemikase maịn maịn mịẹmẹ ḅẹḅẹ ọ̀ fị fịye mị ḅụ, Tamụnọ Ḅe ḅẹrẹsi pẹlẹ se ọ̀ pịrịmẹ ori anị fị sịkị, anịatịḅị ọ̀ mịẹye mị ḅereni ḅụ anị ofori-ẹ. Ḅereni ḅụ oforika mịẹmịẹye goyegoye si-ẹ.