Read kirikeni Romapụ 4 Bible Online

Romapụ 4 - kirikeni bible

Romapụ 4

¹Anịọkụma cheye wa nwọ ḍuko ḅe, Ebraham, mịna ḅieju-ḍaḅọ ḅe ḅụ? Cheye ọ́ nwọ ọrị ò ḍumo ḅụ?

²Ọ̀ mịẹye ḅụ ọ̀ wẹrị nemikase Tamụnọ Ḅe ḅụ karakaraḅọ sọmẹ nwọ ḅẹ ọkụma, ọ̀ nyana se ḅụbomaḅịaye omi-ẹ. Ọkụma ori ineda Tamụnọ Ḅe tọrọkọ ḅụboma ẹkẹ.

³Fịafịa ḍiri mị nwọ ḅẹmẹ, “Ebraham ḅe Tamụnọ Ḅe ḅerenimẹ, se oria ḅereni mị gose Tamụnọ Ḅe ori ọkịmẹ na ọ̀ karakaramẹ.”

⁴Fịrịnwẹngịḅọ ḅe ini ọ̀ gbẹịn gbẹịnmẹ, ini seni ọ̀ gbẹịnye mị, ini ḍiepịrịye ḅara se anị kịẹnmakẹ; ọkụma ọ̀ nwẹngị fịrị ḅụ ḅoye-ẹ.

⁵Ọkụma nwọ ḅereni nyana se fịrị ḅụ sẹrẹrẹka ḅọ ḅe, nwọ Tamụnọ Ḅe ḅereniḅọ ḅe, anị ḍukoḅelema na ḅẹrẹsi nyanaḅọ ḅe ọ̀ mịẹye ofori-ẹ nwọ ḅe Tamụnọ Ḅe, tomoniḅọ ḅe ḅereni mị, mị ọ̀ kịẹn se ò seni ori na karakaraḅọ mịẹye-ẹ.

⁶Mịn mị anị Devid ḅe fiearịye mị-ẹ, na ḅieḅẹlẹ sime Tamụnọ Ḅe ọkịsa ḅọ ḅe pịrị ọ̀ nwọ ḅẹ sịkị, iniḅọ nwẹngị fịrị goyegoye nwọ kịẹnka ḅụ:

⁷“Ḅieḅẹlẹ sime ini pịrịmẹ, Tamụnọ Ḅe inia siḅụ-ḅarasin pịrịsa apụma, anị inia sima ọ̀ nwọ dekisinsa apụma!

⁸Ḅieḅẹlẹ sime oriḅọ ḅe pịrị, Tamụnọ Ḅe iniḅọ sima nwọ kịẹn pịrị ẹka ḅọ ḅe!”

⁹Devid ḅe ḅẹrẹ ḅẹ ḅieḅẹlẹ mị anị sime ḅụpẹlẹapụ kẹngẹ nwọ pịrị? Ẹn-ẹn, ọkọkẹ ngịsị! Anị pịkị sime ḅụpẹlẹkapụ ma sọnị pịrịmẹ. Anịatịḅị wa fịafịa ḍiri mị nwọse otomasam, na “Ebraham ḅe Tamụnọ Ḅe ḅerenimẹ, se oria ḅereni mị gose Tamụnọ Ḅe karakaraḅọ ḅara nwọse ori ọkịmẹ.”

¹⁰Nde sịkị ḅụ mịn mị mịẹ? Ebraham ḅe ma ḅụpẹlẹka sịkị mụnọ se ọ̀ ḅụpẹlẹ so sịkị anị mịẹ? Ma ọ̀ ḅụpẹlẹka simeogbo-ẹ, ọ̀ ḅụpẹlẹ so sịkị anịkẹ.

¹¹Anị mị ḅọrọ mị ọ̀ ḅụpẹlẹye-ẹ, ori ḅe ḅụpẹlẹ mị elekima nwọ sọmẹ, anị ḍiepakụmamẹ na Ebraham ḅe ọ̀ Tamụnọ Ḅe ḅereniye gose Tamụnọ Ḅe karakaraḅọ ḅara nwọse ọ̀ kịẹn ọkịmẹ, anị sịkị re mị ò ḅo ḅụpẹlẹye-ẹ. Anị ḅara mị ḅụ Ebraham ḅe ọ̀ tẹmẹ anga ḍaḅọ sọ Tamụnọ Ḅe ḅereniapụ mamgba pịrịmẹ, ini karakarapụ ḅara se kịẹn ọkịsa apụma, ini ḅụpẹlẹkẹ nwọ ḅẹ sọnị.

¹²Ori pịkị ḅụpẹlẹ apụma ḍa-ẹ, ini ḅụpẹlẹmẹ nwọ ḅẹye gosekẹ, ọkụma ini anị gbọrị ḅereni ḍumo mị nwọ kọnye gose-ẹ, mịna ḍa Ebraham ḅe ma ḅụpẹlẹka sịkị kọn gbọrị ḍumo mị.

¹³Tamụnọ Ḅe ḅereni Ebraham ḅe na ò furo ḅie pakaḅo apụma na pịrị sịkị na tomonikiri mị sime ọ̀ pịrịḅịa, ori ọkọ mịẹmẹ, Ebraham ḅe ori Oloko mị kokoye gosekẹ ọkụma ò ḅerenimẹ, Tamụnọ Ḅe pịkị karakara ḅara se ori ọkịmẹ.

¹⁴Anịatịḅị Tamụnọ Ḅe ḅereniye ini nemikase, nwọse Oloko mị ḍukoye mịẹ apụma nwọ pịrịḅịa nwọ ḅẹ ọkụma, anịọkụma tomoniḅọ ḅereni mị papaye-ẹ, Tamụnọ ḅereni se tomoniḅọ pịrịḅịaye mị sọnị anị yelakẹ.

¹⁵Oloko mị anị Tamụnọ ịganị nwọ ọkị ḅoḅomẹ anịọkụma oloko oforika anga oloko ḍukoye mịẹka pịkị ofori-ẹ.

¹⁶Ḅereni mị ḅereni ḅụ mị anị gbanaye-ẹ mịẹse, Tamụnọ Ḅe papa ḅerenipịrịye mị ḅereni Ebraham ḅe furoḅie pakaḅo apụma nwọ pịrịḅịaye gose—Oloko mị ḍukoye mịẹapụ ma kẹngẹkẹ, ọkụma pịkị Ebraham ḅe ḅereni ọkụ mị nwọ ḅereni apụma sọnị-ẹ. Anịatịḅị Ebraham ḅe mine mgba tẹmẹ anga ḅe ḍaḅọ-ẹ;

¹⁷fịafịa ḍiri mị ḍuko ḅara ḅụ. “Àrị ị́ se tọn-a sẹ ḍaḅọ nwọ mịẹsam.” Anịọkụma ḅereni mị anị iḅimẹ Tamụnọ Ḅe tọrụkuḅu ḅụ, anị Ebraham ḅe ḅereni Tamụnọ Ḅe, fịapụma sịsẹma sịsẹma Tamụnọ Ḅe, ḅẹrẹtọn oforikaye pịrị se anị pakaḅo simeye nwọ sọ sọ ḅọ ḅe.

¹⁸Ebraham ḅe ḅereni pịkị tọrụse ye ḍikimẹ tọrụse ḍikiḅịaye oforika sịkị ḅụ, “anị ḅara mị ḅụ ḅọrọḅo tọn-a sẹ ḍaḅọ nwọ sọmẹ.” Fịafịa ḍiri mị ḍuko ḅara ḅụ, “Ị́ furoḅie pakaḅoḅịa apụma lolia ma ḅaka ọkụ anị ini ḅakaḅịa ọkụ-ẹ.”

¹⁹Kalaye kọnmẹ ò ḅo kụra sọnọasi la, ọkụma oria ḅereni ḅụ ịnyọ fakẹ ori oria oju mị nwọse koroma ḅụ chu sịkị; anị anịa sime ḅara mị gbọtụḅara fịsaye ọkụ, simeye anịkanịka na Sera ma á ḅarị ineda awọ yi ẹkẹ nwọ ḅẹ ḅara mị sọnị.

²⁰Oria ḅereni ọ̀ ḅụ sokẹ, ọ̀ pịkị Tamụnọ Ḅe ḅereni ọ̀ pịrịye mị nwọ pikikẹ; oria ḅereni mị anị kụrọ se ò ḅie chu ḅeinmamẹ, se ò tokoni se Tamụnọ Ḅe pịrịmẹ.

²¹Ò nemi kpaịnmamẹ na Tamụnọ Ḅe ineda ò ḅerenisaye mị nwọ mịẹḅịa.

²²Anị mịẹse, Ebraham ḅe ḅereni ḅụ ḅọrọ, “Tamụnọ Ḅe karakaraḅọ ḅara nwọse ọkịḅo sọye-ẹ.”

²³“Karakaraḅọ ḅara se kịẹn ọkị” nwọ ḅẹ ọkwẹịn ma, gịẹịn ori kẹngẹ nwọ pịrịkẹ.

²⁴Àrị pịkị gịẹịn mine sọnị nwọ pịrịmẹ, ini karakara apụ ḅara nwọse ọkịḅịa apụma, nwọ ò ḅereni apụma, fị ḅụ wa Nyanaḅọ Jizọs Ḅe sịsẹmaḅọ ḅe.

²⁵Mịnea sima gose ọ̀ fịmẹ, ini pịkị ọ̀ sịsẹma se ò ḍumomẹ, mịẹso sịkị wa ḅo Tamụnọ Ḅe ḅụ karakarapụ sọḅịa ọkụ.