Read kirikeni Romapụ 5 Bible Online

Romapụ 5 - kirikeni bible

Romapụ 5

¹Mịọkụ ḅereni ḅụ ini wa se Tamụnọ Ḅe na deinma mịẹsam wa Nyanaḅọ Jizọs Kraịst Ḅe ḅụ.

²Ò ḅereni ḅụ ḅọrọ wa ọkịḅo mị Tamụnọ ḍikiḅụgerere kiri mị lamasam, wa mịọkụ sime ḍumo mị ḅie. Anịgose wa ḅieḅẹlẹmẹ ọ̀ ḅụ wa tọrụseḍikiye mị ḅụ, na wa Tamụnọ Ḅe boma nwọ ḍiaọkịḅịa!

³Wa pịkị mịna ḅụfụkama ḅie bomaḅẹ, anịatịḅị wa nemimẹ na ḅụfụka inema mịẹpakụmaḅoḅomẹ,

⁴inema pịkị tomoniḅọ yemịẹḅara mịẹpakụmapakụmamẹ, tomoniḅọ yemịẹḅara pịkị tọrụseḍikiye mịẹpakụmapakụmamẹ.

⁵Tọrụseḍikiye mị pịkị wa gbakị ẹkẹ, anịatịḅị Tamụnọ Ḅe ḅẹlẹma mị ini nwọse mịna kuḅiemgbọlụma ḅie sarasam, Tamụnọ Ḅe seni wa pịrịsa Fịafịa Tẹmẹ Ḅe ḅụ.

⁶Anịatịḅị wa pa ḅarachụa nyanaka ḅụ simearị sịkị, Kraịst Ḅe fị sitịḅịnyana apụma pịrịmẹ, Tamụnọ Ḅe sẹlẹọkị sịkị mị ḅụ.

⁷Opuma ḅụfụkamaye-ẹ tomoniḅọ fị karakaraḅọ nwọ pịrị, sosi anị ineda ọkọ pakaḅịa, tomoniḅọ fị iḅiḅọ nwọ pịrị.

⁸Ọkụma Tamụnọ Ḅe ọ̀ wa ḅẹlẹma laḅara mị ọ̀ nwọse wa ḍiesam wa pa si ḅụ simearịogbo—Kraịst Ḅe fị wa pịrịmẹ!

⁹Oria pulo mị ḅụ wa ḅọrọ ḅo Tamụnọ Ḅe ḅụ karakarapụ sọsam, anịọkụma, anị nẹngịma ḅara ọ̀ nwọse Tamụnọ ịganị ḅụ wa ḍụaḅọrọmaḅịa.

¹⁰Tamụnọ na tarakapụ wa nwọ sọmẹ, ọkụma ò mine seni ikiapụ nwọ mịẹsam oria Tọkụ Ḅe fị mị ḅụ. Wa mịọkụ Tamụnọ ikiapụ nwọ sọsa sịkị, anị mị Kraịst Ḅe ḍumo mị nwọ seni ḅakatẹịn ḅara se wa ḍụaḅọrọmaḅịa!

¹¹Ọkụma anị mị kẹngẹkẹ, wa pịkị gose ḅieḅẹlẹye anị Tamụnọ Ḅe wa Nyanaḅọ Jizọs Kraịst Ḅe ḅụ ḅọrọ mịẹsaye mị-ẹ, anị wa se Tamụnọ ikiapụ mịẹ ḅọ ḅe.

¹²Si gbọrị tomoniḅọ ḅụ ḅọrọ tomonikiri mị ḅie ḅomẹ, se oria si mị fị nwọ se chụa ḅomẹ. Anịa ḅụ fị ḅọrọ wasama bebe tomoni mamgba nwọ kelemasam, anịatịḅị tomoni mamgba si mịẹsam.

¹³Si tomonikiri mị ḅie simearịogbo Oloko mị ḅomẹ, ọkụma oloko oforika nyọ si kịẹn ofori-ẹ.

¹⁴Ọkụma Adam sịkị mị ḅụ ọkịmun Moziz sịkị mị la, fị ḅẹrẹtọn tomoni mamgba pịrịmẹ, ọkịmun Adam ḅe mịẹ si mị mịẹka apụma sọnị nwọ lamẹ, Tamụnọ Ḅe tọnye ọ̀ nwọ mịẹka sịkị ḅụ. Adam ḅe anị ḅoḅịa nwọ ḅẹ ḅọ ḅe se nwọ otomaḅọ-ẹ.

¹⁵Ọkụma mama apụma ini gbọrị ḅara simekẹ, anịatịḅị Tamụnọ Ḅe oria igbikigbẹịnka ḍiepịrịye mị anị Adam ḅe si mị simeọkụ simekẹ. Kọkọmaye-ẹ na tọn-a tomoni fịmẹ ori gbọrịḅọ ḅe si mị gose, ọkụma Tamụnọ ḍikiḅụgerere mị ḍụḅatẹịnmẹ, anị oria igbikigbẹịnka ḍiepịrịye mị, ò seni tọn-a tomoni pịrịye mị pịkị simeọkụ-ẹ, gbọrị tomoniḅọ Jizọs Kraịst Ḅe ḍikiḅụgerere mị ḅụ ḅọrọ ḅo ye mị.

¹⁶Kịrịye pịkị omi-ẹ, Tamụnọ Ḅe igbikigbẹịnka ḍiepịrịye mị na, gbọrị tomoniḅọ si mị na ḅụ. Anị si mị ḅọrọ so, mị “Ḅẹrẹḅarasi”; mị ḅe ḅẹrẹkọn ḅo ye-ẹ, ọkụma tọn-a si ḅọrọsịkị, anị ḅụgbẹịnka “Ḅẹrẹḅarasika” mị ḅe ḍiepịrịye mị ḅo ye-ẹ.

¹⁷Kọkọmaye-ẹ na gbọrị tomoniḅọ si ḅụ fị wẹrị sakị ḅẹrẹtọnmẹ, ori gbọrị tomoniḅọ ḅe gose. Ọkụma ísí gbọrịḅọ ḅe anị Jizọs Kraịst Ḅe mịẹye mị ḅụ pakaḅoye mị ḍụḅatẹịn ọkụ ḍiki! Ḅakama Tamụnọ Ḅe oria ḅeinwatawata ḍikiḅụgerere mị na oria igbikigbẹịnka ḍiepịrịye mị na ọkị apụ mamgba Kraịst Ḅe ḅụ ḅọrọ ḍumo se ḅẹrẹtọnḅịa.

¹⁸Anị-ẹ nwọ ḅẹ sịkị, gbọrịḅọ si nwọ ḅẹrẹsi ọkịḅo nweni mamgba pịrị ọkụ mị, anị gbọrịḅọ karakara mịẹmịẹye mị pịkị nweni mamgba mịẹse ini inia ḅụ nyana pịkị ḍumo se ini pịrị ọkụ-ẹ.

¹⁹Gbọrị tomoniḅọ ḅe ḅịpịpokika ḅụ nweni mamgba ḅọrọ ḅo siapụ sọ ọkụ mị, anị gbọrị ḅara ḅụ, anị nweni mamgba gbọrị tomoniḅọ ḅe ḅịpịpoki ḅụ ḅọrọ Tamụnọ Ḅe ḅụ karakarapụ sọḅịa ọkụ-ẹ.

²⁰Oloko mị gose chụaye anị, se si mị mịẹsumaḅịa ẹrẹchị-ẹ, ọkụma si mị nwọ su ḅaka nyọ mị, anị Tamụnọ Ḅe ḍikiḅụgerere mị pịkị su ḅakatẹịn anga-ẹ.

²¹Anị-ẹ nwọ ḅẹ sịkị, si mị nwọ fị se ḅẹrẹtọn-arị ḅara, anị Tamụnọ Ḅe ḍikiḅụgerere mị pịkị karakaramịẹmịẹye ḅụ ḅọrọ wẹrị ḅẹrẹtọn-arị ọkụ-ẹ, wa Nyanaḅọ Jizọs Kraịst Ḅe ḅụ ḅọrọ wa pamun simegbaso ḍumo ḅie chuaḅẹ.