Read kirikeni Romapụ 7 Bible Online

Romapụ 7 - kirikeni bible

Romapụ 7

¹Karakaraye-ẹ, à ḍuko ḍọkịarịye mị ọ́ kaịnḅoḅịa, ị̀ya mịnapụ, anịatịḅị ómine mgba oloko mị na gbolomaye ó nemimẹ. Oloko mị tomoniḅọ ḍumo sịkị kẹngẹ mị anị kụrọ nyanaye-ẹ.

²Se otoma ḅụ, owuḅọ sime eremeniḅọ ma dewu ḅe oloko árị ọlọmẹ ò ḍumo warasịkị ḅụ, ọkụma ò nemikase fịmẹ ḅẹḅẹ, árị ọlọ oloko mị ḅụ á pọkọsam.

³Anịọkụma dewu ḅe ḍumosimearị sịkị á nemikase jịn owuḅọ nyanamẹ ḅẹḅẹ, ini deḅọ nyana sẹfịḅọ nwọse á chịnḅịa, ọkụma deḅọ ḅe nemikase fịmẹ ḅẹḅẹ, árị oloko ọlọka eremeniḅọ nwọ sọsam; á pịkị deḅọ nyana se mun sẹfị eremeniḅọ ḅarị nwọ sọ ẹkẹ, á nemikase mun jịn owuḅọ na simeọkụma.

⁴Anị ḅara mị anị nwọse ómine na simesam, ị̀ya mịnapụ. Ómine sọnị ọ́ fịsam oloko mị gbolomaye ḅụ, anịatịḅị ómine Kraịst oju mị ḅe pẹkẹrẹ-ẹ; se mịọkụ ó sime ọ̀ pịrịmẹ, ini fị ḅụ sịsẹma ḅọ ḅe mịẹse wa Tamụnọ Ḅe fịrị ḅụ yesọḅịa ẹrẹchị.

⁵Anịatịḅị wa tomoniḅọ sime ḅara nwọ ḍikima ḍumo kọn sịkị, si ḅụ ḅein pụkọtarịaye ma oloko mị nwọ jike sịsẹma se mịna ojuma fịrịnwẹngịye sọ fị ọkịḅoḅịaye ma pịrịmẹ.

⁶Mịọkụ anị simeọkụ simeọkụ sọnị, oloko mị ḅara wa pọkọsosam, anịatịḅị wa fị anị pịrịsam, gbọrị sịkị ikoliapụ ḅara nwọse mine ọlọye mị. Wa ḅarị olomu ḅara mị nwọse fịrịnwẹngị gịẹịn oloko mị pịrịkẹ, ọkụma wa ịwọ ḅara nwọse Tẹmẹ Ḅe fịrịnwẹngịaḅẹ.

⁷Anịọkụma, cheye wa nwọ ḍuko ḅe? Wa nwọ ḅẹ ḅe, na Oloko mị na mịnaḅụ na si-ẹ? Wa ngịsị ọkọ ḅẹ ẹkẹ! Ọkụma mịn mị mịẹse à si nwọ nemiye-ẹ. Mgbọkụ jịnḅọye “Sọlị mị,” à nwọ nemi ẹkẹ, oloko mị nemikase ọkọ ḅẹ ka ọkụma.

⁸Ọkụma anị oloko mị ḅụ si mị ḅọrọ ẹmbẹ nyana se ị̀ ḅie ḅụ tọrụkịrịkịrịaye sọlị ọkịḅomẹ. Oloko mị sikima ọkụma si mị fịsaye-ẹ.

⁹Ị̀rị̀ na mịnaḅụ na gbọrị sịkị ḅụ oloko na gbolomaka ḍumo à nwọ kọnmẹ; ọkụma oloko mị ḅo lasịkị si mị pakaḅo ḍumo ḅụ sọmẹ,

¹⁰se à fịmẹ. Se ḍumo ọkịḅoḅịa nwọ ḅẹ oloko mị, ị̀rị̀ anị fị ọkịḅo ị̀ pịrịmẹ.

¹¹Si mị ẹmbẹ ḍọkịḅo, pịkị oloko mị ḅụ ḅọrọ oḅori se ị̀ chịn se ị̀ ḅaamẹ.

¹²Anịọkụma Oloko mị na mịnaḅụ na anị fịafịamẹ; tọn na mịẹ ma-ẹ nwọ ḅẹye mị sọ pịkị fịafịa, karakara, se iḅimẹ.

¹³Anị fie-ao na iḅimẹ nwọ ḅẹye mị anị fị ọkịḅo ị̀ pịrịye-ẹ? Anịkẹ ngịsị! Si mị anị mị mịẹye-ẹ; iḅiye mị si mị nwọse fị ọkịḅo ị̀ pịrịmẹ mịẹse anị kọkọma sime ḅara mị na anị si-ẹ nwọ ḅẹye mị ḍieḅelemaḅịa ẹrẹchị. Anịẹrẹchị, tọn na mịẹ ma-ẹ nwọ ḅẹye ḅụ, si mị ḅalafama ḅara ḅụ anịa si na ḅein mị nwọ ḍiepakụmasam.

¹⁴Wa nemimẹ na Oloko mị tẹmẹ angaye-ẹ; ọkụma ị̀rị̀ anị fịḅịa tomoniḅọ-ẹ, seni omoniḅọ ḅara si mị dẹrịsaḅọ-ẹ.

¹⁵À mịẹye à nwọ kaịnḅokẹ, anịatịḅị ị̀ ḅụḅẹlẹ se à mịẹḅịaye mị à nwọ mịẹkẹ, anịnakaraka à taraka se wẹrịma ye re, mị à mịẹye-ẹ.

¹⁶À ḅikaye mị re à nwọ mịẹarị sịkị, anị ḍiemẹ na à nwọ ḅerenimẹ na Oloko mị anị karakaramẹ.

¹⁷Anịọkụma ị̀rị̀ kọkọma anị ye mị nwọ mịẹ ḅikẹ, anịnakaraka ị̀ ḅie sime si mị, mị anị mịẹye-ẹ.

¹⁸À nemimẹ na ị̀ya oju mị ḅie iḅiye simekẹ, ị̀ ḅie sime si mị gose, anịatịḅị iḅiye mịẹ mị ị̀ pụkọtarịaḅẹ nwọ ḅẹ sọnị, àrị ineda anị mịẹkẹ.

¹⁹À mịẹ ḍọkị iḅiye mị à mịẹkẹ, anịnakaraka à mịẹ ḍọkịka siye mị re, mị à mịẹarịye-ẹ.

²⁰À nemikase à mịẹ ḍọkịkaye nwọ mịẹ ọkụma, anị mị fieaḅẹ na ị̀rị̀ ḅarana anị mịẹkẹ, anịnakaraka ị̀ ḅie sime si mị, mị anị mịẹye-ẹ.

²¹Anịẹrẹchị, à ḍọkịḅomẹ na mị oloko mị anị fịrịnwẹngịaḅẹ; àrị iḅiye mị nwọ mịẹ ḍọkị sịkị, siye mị kẹngẹ mị à sẹlẹọkịye-ẹ.

²²Ị̀ ḅie sime ḅọ ḅe Tamụnọ oloko mị nwọ ḍikiḅieḅẹlẹmẹ.

²³Ọkụma àrị ị̀ya oju ḅụ kịrị oloko ọrịmẹ, ị̀ kuḅie ḅereni ọkị oloko na owusọarị oloko. Anị ị̀ se ikoliḅọ mịẹ si mị ḅe oloko mị pịrịmẹ anị ị̀ya oju ḅie fịrịnwẹngịarịye mị.

²⁴À ḅieḅẹlẹ nyanaka ọkụ ḍiki! Tụḅọ mị oju mị ḅara ḅie ị̀ ḍụa ḅe, ị̀ ọkị fị ḅie chuarịye mị?

²⁵Mịẹḅaka sime wa Nyanaḅọ Jizọs Kraịst Ḅe ḅụ ḅọrọ Tamụnọ Ḅe pịrị! Mịn, anịọkụma ị̀ya simeḅara mị-ẹ: ị̀rị̀ ọkụma, àrị ineda ị̀ kuḅie se fịrịnwẹngị Tamụnọ oloko mị kẹngẹ nwọ pịrịḅịa, ị̀ya tomoniḅọ oju simeḅara mị fịrịnwẹngị si mị ḅe oloko mị nwọ pịrịarị sịkị.