Read kirikeni Romapụ 9 Bible Online

Romapụ 9 - kirikeni bible

Romapụ 9

¹À ḍukoye mị kọkọmaye-ẹ, à sime Kraịst Ḅe pịrịmẹ, à pịkị iruokọnkẹ. Kuḅiewarị mị, Fịafịa Tẹmẹ Ḅe ḅẹrẹtọn pịrịarịye mị, pịkị mịẹse anị ị̀ ḅụokoromẹ na àrị iruokọnkẹ,

²ị̀ya kururu mị ḍụḅa la-ọkụ ḍiki, ị̀ kuḅiemgbọlụ ḅie sime ḅụfụka mị kuluma nyanaka ḅara ḍiki à nwọ ḅẹ sịkị;

³ị̀ya ama apụma gose, ini anị ị̀ya ojumịnị mị na pulo mị na-ẹ! Inia tịḅị gose àrị ineda ḅiḅịa na ye à ḅo Tamụnọ Ḅe worinime chuku ḅie sime, se Kraịst Ḅe ḅụ pusikima.

⁴Ini anị Tamụnọ Ḅe sẹlẹọkịsa tomoni-ẹ, ori ini se oria owuapụ awọ nwọ mịẹmẹ se ini na oria boma nwọ ḍiaọkịmẹ ori ini na oria ọḅọkụ ma nwọ fịmẹ se Oloko mị nwọse ini pịrịmẹ. Ini kọkọma tẹkẹ ọkụ mị nwọ nyanamẹ; Tamụnọ Ḅe ḅereni ini pịrịye ma inia ḅara lasam;

⁵ini anị ḍapụma furoḅie pakaḅo apụ ma-ẹ, se Kraịst Ḅe tomoniḅọ ḅara ḅụ sime inia sẹ mị pịrị waraḅẹ. Ye Tamụnọ Ḅe, ḅẹrẹtọn nweni mgba pịrịarị ḅọ ḅe ini nwọ tokoni gbaso! Amẹn.

⁶À ḅẹkẹ na Tamụnọ Ḅe ḅereniye mị gbakịsam, anịatịḅị Izrẹlapụ mamgba Tamụnọ Ḅe nwọ sẹlẹọkịkẹ.

⁷Ebraham ḅe furoḅie pakaḅo apụ mamgba Tamụnọ awọkẹ. Tamụnọ Ḅe nwọse Ebraham ḅe ḅẹmẹ, “Aịzịk ḅe furoḅie pakaḅo apụma ini nwọse ị̀ya tomoni nwọ kịẹnmaḅịa.”

⁸Mịn mị ḍieaḅẹ na tomoni yiyi ḅara ḅụ ini yi awọma ini Tamụnọ awọkẹ; anịnakaraka, Tamụnọ Ḅe yeḅereniḅịpị ḅụ yi awọma mị ini se kọkọma furoawọ nwọ kịẹnma apụ ma-ẹ.

⁹Anịatịḅị Tamụnọ Ḅe yeḅereniḅịpị mị ma ọkwẹịn ma nwọ nyanamẹ: “Karakara sịkị mị ḅụ à vinpịkị ḅoḅịa se Sera ma owutọkụ nwọ nyanaḅịa.”

¹⁰Pịkị mịn mị kẹngẹkẹ. Anịatịḅị Ribeka mama owuapụ awọma gbọrị ḍaḅọ awọ-ẹ, anị mịna ḍa Aịzịk ḅe-ẹ.

¹¹Ọkụma mịẹse gbọrị owutọkụ nwọ sẹlẹọkị mị Tamụnọ Ḅe yetọn ḅara nwọ pakaḅịa ẹrẹchị, Tamụnọ Ḅe nwọse á ḅẹmẹ, “Sẹnịḅọ ḅe fịrịnwẹngị kalaḅọ ḅe pịrịḅịa.” Ọ̀ mịn mị nwọ ḍukomẹ ma ini ini yika simeogbo, ma ini gbọrịye sọnị nwọ mịẹka simeogbo, ma ini iḅiye anịkanịka siye mịẹka simeogbo; anịẹrẹchị Tamụnọ Ḅe sẹlẹọkị ḅọ anị ori ḅarana chịn ọkị ḅọ-ẹ, ini ma mịẹ ye ḅụkẹ.

¹³Fịafịa ḍiri mị ḍukosa ḅara ḅụ, “À Jekọb ḅe ḅẹlẹmamẹ, ọkụma àrị Isọ ḅe tarịkẹ.”

¹⁴Anịọkụma, wa nwọ ḅẹ ḅe, na Tamụnọ Ḅe ọ̀ karakarakẹ? Ngịsị ọkọ pakakẹ.

¹⁵Anịatịḅị ọ̀ nwọse Moziz ḅe ḅẹmẹ, “À ḍikiḅụgerere nyana pịrị ḅi ḅọ, à ḍikiḅụgerere nyana iniḅọ pịrịḅịa à ḍikitịḅịfoin nyana pịrị ḅi ḅọ, àrị iniḅọ ḍikitịḅịfoinḅịa.”

¹⁶Anịọkụma anị tomoniḅọ ḅi ḅara na anịkanịka iniḅọ mịẹ ye na ḅụ pẹlẹkẹ, ọkụma Tamụnọ Ḅe ḍikiḅụgerere ḅụ kẹngẹ-ẹ.

¹⁷Anịatịḅị fịafịa ḍiri mị nwọse Fẹro Ijipt amanyanaḅọ ḅe ḅẹmẹ, “Mịn mị gose àrị ị́ se Amanyanaḅọ mịẹmẹ, ị́ se fịrịnwẹngị se ị̀ya kụrọ mị ḍiepakụmaḅịa ẹrẹchị, pịkị mịẹse bebe tomonikiri mị ḅie mgba ini ị̀ya ẹrẹ nemiḅịa ḅara.”

¹⁸Anịẹrẹchị Tamụnọ Ḅe ò ḍikiḅụgerere nyana ori ọkọ ḅiḅọ nwọ pịrịmẹ, pịkị ori ọkọ ḅikaḅọ, mịẹse iniḅọ ininachịnmẹ.

¹⁹Anịọkụma ọ́mịna ḅụ gbọrịḅọ nwọse ị̀ ḅẹḅịa, “Mịn ḅọrọ anị-ẹ nwọ ḅẹ ọkụma nde Tamụnọ Ḅe gose tomoniḅọ ḅụ siye ḍọkịarịye? Tụḅọ ineda Tamụnọ Ḅe ḅiarịye nwọ dachịẹma ḅe?”

²⁰Ọkụma ị́rị́ tụḅọ, tomoniḅọ, se Tamụnọ Ḅe ḅịpị nwọ pẹkẹrẹ ḅe? Aḅaịn ḅẹlẹ ineda anị tẹmẹḅọ ḅe gbela ẹkẹ, “Nde ị́ gose nwọse ị̀ tẹmẹ ye?”

²¹Anịḅe kuluma ḅẹlẹ ma tẹmẹḅọ ḅe ọ̀ kụrọ nyanamẹ aḅaịn mị seni ò ḅi ḅara nwọ mịẹ, gbọrị aḅaịn oḅolo mị nwọ seni mama ḅẹlẹ tẹmẹ, gbọrịye tẹmẹ se osi nyana fịrị nwọ pịrị, se ísíye mị tẹmẹ se ọrịfịrị ọrịfịrị nwọ pịrị.

²²Anị gbọrịye mị Tamụnọ Ḅe kọkọma nwọ mịẹmẹ. Ò ḅimẹ ori oria ịganị nwọ ḍiepakụma, pịkị ḅimẹ ini oria kụrọ nwọ nemi. Ọkụma ori opuma inema nyana ori ịganịmaye mịẹ apụma pịrịmẹ, ḅụkarakarama ḅaa pịrị apụma.

²³Ọ̀ pịkị ḅimẹ ori oria ḅeinwatawata boma mị nwọ ḍieḅelema, ini seni mine oria ḍikiḅụgerere mị sime pịrị apụma ọgọnọ saraye mị, mine ọ̀ karakarama koroma oria boma ọkịḅịa apụma.

²⁴Anịatịḅị, mine anị ọ̀ chịn apụ ma-ẹ, Juapụma ogboku kẹngẹkẹ, ọkụma pịkị Jịnsẹapụma ogboku sọnị-ẹ.

²⁵Mịn mị anị Hosia ḍiri ḅie ò ḍukoye mị-ẹ: “Sime ị̀ pịrịka tomonima ‘Ị̀ya Tomoni,’ à nwọse ini chịnḅịa. À ḅẹlẹmaka sẹ mị ‘À ḅẹlẹma Apụ,’ à nwọse ini chịnḅịa.

²⁶Se anị gbọrị nyọ ḅụ ini ḍuko ini pịrị na, ‘Ómine ị̀ya tomonikẹ,’ nwọ ḅẹ nyọ mị, anịju ḅụ, ḍumo Tamụnọ Ḅe awọ ini nwọse ini chịnḅịa.”

²⁷Aịzaya ḅe Izrẹl mị na gbolomaye ọ̀ nwọ ḍukomẹ, “Izrẹlapụma nemikase tọrụ aka sime onwun mgbọlụ ḅaka ọkụ nwọ ḅaka sọnị, inia ḅụ boka apụ kẹngẹ mị ḍụaḅọrọma nyanaḅịaye-ẹ;

²⁸anịatịḅị Nyanaḅọ Ḅe ḅo ḅẹrẹkọn tomonikiri mị mgba ḅọlọka sịkị nwọ pịrịḅịa.”

²⁹Anị Aịzaya ḅe tarị ḍukosa ọkụ mị nwọ sime waraḅẹ, “Kụrọmamgba Nyanaḅọ Ḅe nemikase ḍapụma furoḅie pakaḅo ḍapụ nwọ kọnma wa pịrịkẹ ḅẹ ọkụma, mgbọkụ wa Sọdọm mị simeọkụ sime se, wa pịkị Gomọra mị simeọkụ simesam.”

³⁰Anịọkụma, cheye wa nwọ ḍuko ḅe? Mịn mị-ẹ na Jịnsẹapụma anị Tamụnọ Ḅe na ḅẹrẹ nyana apụma, ini ḅereni ḅụ ḅọrọ ḅo Tamụnọ Ḅe na karakarasam;

³¹sẹlẹọkịsa apụma, se Tamụnọ Ḅe na ḅo karakaraḅịa oloko nwọ ḍọkịsime apụma ini anị ḍọkịḅokẹ.

³²Anịọkụma cheye ẹrẹchị? Anịatịḅị ḅereniḅụ ini sẹrẹrẹkẹ, ọkụma ini mịẹaye ḅụ re-ẹ. Anịẹrẹchị inia ḅụọ ḍụparị bịan se ini tọmbụlọmẹ,

³³anị mị gbolomaye fịafịa ḍiri mị nwọ ḍukomẹ: “Ḍiki, à Zaịyọn ḅie gbọrị ḍụparị nwọse koromamẹ anị mịẹse tomoni tọmbụlọḅịa, ini ḅịkịmaḅịa ịkụ. Ọkụma ò ḅereniḅọ goyegoye iniḅọ gbarịḅịaye ofori-ẹ.”