Read kirikeni 1 Kọrịntapụ 1 Bible Online

1 Kọrịntapụ 1 - kirikeni bible

1 Kọrịntapụ 1

¹Pọl, anị Tamụnọ Ḅe ḅi ḅara ḅụ ini chịnḅo Kraịst Jizọs Ḅe okufịrịnwẹngịḅọ sọ nwọ ḅẹ ḅọ ḅe pịkị mịna mịnaḅọ Sọstẹnịs ḅe na ḅara ḅụ ḅo ḍiri mị —

²Ini se Kọrịnt ḅie sime Tamụnọ chọchị mị na, ini chịnḅo osiḅụ-sime Tamụnọ-a tomoni sọ nwọ ḅẹ apụ mamgba na, Kraịst Jizọs Ḅe na gboloma gbọrịḅụ sime Tamụnọ Ḅe pịrị apụma na, pịkị nweni mamgba nyọ goyegoye ḅụ wa Nyanaḅọ Jizọs Kraịst Ḅe tẹkẹarị apụ mamgba na, ini na mine na Nyanaḅọ Ḅe:

³Ye Tamụnọ mịna Ḍaḅọ Ḅe na pịkị Nyanaḅọ Jizọs Kraịst Ḅe na ḍikiḅụgerere na deinma na se ọ́ pịrị.

⁴Ọ́ tịḅị gose à sịkịmamgba mịẹḅaka se ị̀ Tamụnọ Ḅe ḅẹḅẹmẹ, anịatịḅị Kraịst Ḅe ḅụ ọ̀ ḅọrọ nyana ọ́ pịrịsa ḍikiḅụgerere mị ẹrẹchị.

⁵Anịatịḅị Kraịst Ḅe na gbọrịye mịẹ ḅụ ó ye mamgba ḅụ alakọnsam, ọkwẹịn mamgba na ḍawọnemi mamgba na se chụa.

⁶Kraịst Ḅe gboloma oku mị ọ́mịna ḅie kuno chụa so-ọkụma

⁷anị mịẹse gbọrị ḅẹlẹma sọ ọ́ gbarịkẹ, ọ́ wa Nyanaḅọ Jizọs Kraịst Ḅe ḍieḅelema mị koruarị sịkị.

⁸Ọ̀ pịkị mịẹse ọ́ kụrọma chịẹsime mun kuluma mị laḅịa, mịẹse wa Nyanaḅọ Jizọs Kraịst Ḅe ene mị ḅụ ini ọ́ ḅụ si ḍọkịḅo ẹka ḅara.

⁹Kuḅie se Tamụnọ Ḅe ḅụgbana na iḅimẹ, ori anị ọ́ chịnḅo oria Tọkụ Jizọs Kraịst wa Nyanaḅọ Ḅe na nwẹngị gboloma Tamụnọ Ḅe.

¹⁰Wa Nyanaḅọ Jizọs Kraịst Ḅe kụrọ ḅụ à ḍuko ómine mgba pịrịaḅẹ, ị̀ya mịnapụ, ó ḍukoye ḅụ ọ́ ḅịpịogbosọ nyana, mịẹse pua ọ́mịna ogboku sime ẹka ḅara. Ómine mgba ọ́ gbọrị ḅụ sime, koroma ḅụ na pịkị ọ́ tọn se mịẹḅịaye ḅụ na.

¹¹Anịatịḅị Kilo furo mị ḅie dapụ ḅelema ḍuko ị̀ pịrịmẹ, ị̀ya mịnapụ, na kamụ ọ́mịna ogboku omi-ẹ.

¹²Ye à mị ḅara se anị ḍuko: ọ́mịna ḅie ḅọḅọ kịrịkịrị ḍukoye nwọ nyanamẹ. Gbọrịḅọ nwọ ḅẹmẹ, “À Pọl ḅe ḅụ omi-ẹ”; ísíḅọ, “Apọlọs ḅe ḅụ àrị omi-ẹ”; jịnḅọ, “À Pita ḅe ḅụ omi-ẹ”; ísíḅọ, “À Kraịst Ḅe ḅụ omi-ẹ.”

¹³Kraịst Ḅe ini ó se kirikiri pumẹ! Pọl ḅe mgbẹsẹchịn ọgọnọ fị ọ́ pịrị? Pọl ọḅụḍukoapụ ḅara ḅụ ini mengi se ọ́ sara?

¹⁴À mịẹḅaka se Tamụnọ Ḅe ḅẹmẹ na à mengi se ọ́mịna ḅụ gbọrịḅọ sọ sarakẹ Krispọs ḅe na Gaịọs ḅe na sikima ọkụma.

¹⁵Ọ́mịna ḅụ gbọrịḅọ sọ ineda ḅẹ ẹkẹ na ị̀rị̀ mengi se ọ̀ saramẹ, ị̀ya ọḅụḍukoapụ ḅara ḅụ.

¹⁶(Iin karakaraye-ẹ, à pịkị Stifanas ḅe na ò furo na mengi se nwọ saramẹ; ọkụma àrị ineda ḅiekoromakẹ nwọfa à mengi se sara jịnḅọ omi-ẹ tụḅọ.)

¹⁷Kraịst Ḅe à mengi se nweni sara ọ̀ nwọse ị̀ fịrịmakẹ. Ọkụma àrị Iḅi Ḅẹrẹ mị ḍuko anị ò se ị̀ fịrịmaye-ẹ, se pịkị tomonikiri ḅe yenemi ọkwẹịn ḅara nwọse anị ḍukoma, mịẹse Kraịst Ḅe mgbẹsẹchịn ọgọnọ kọn fị mị ḅe kụrọ mị papa fa ẹka ọkụ.

¹⁸Kraịst Ḅe mgbẹsẹchịn ọgọnọ fịmẹ nwọ ḅẹ oku mị fa àrị apụma ḅụ anị yesọkẹ, ọkụma mine ini ḍụaḅọrọmasa apụma ḅụ anị Tamụnọ kụrọ nwọ sọmẹ.

¹⁹Fịafịa ḍiri mị nwọ ḅẹmẹ, “À nemi nyana apụma nemi mị famaḅịa se pịkị opu ḍiriḍawọ apụma ḅe yekaịnḅo mị se anga pịrịḅịa.”

²⁰Anịọkụma, nemi nyana apụma nde anga ḅụ ini omi? anịkanịka opu ḍiriḍawọ apụma? anịkanịka mịn tomonikiri yema na tụḅụrụ kụrọ nyana apụma? Tamụnọ Ḅe ḅelema ḍiepakụmasam na mịn tomonikiri ḅe nemi mị anị nemika-ẹ!

²¹Anịatịḅị, Tamụnọ Ḅe oria nemi ḅụ mịẹse anị sarasarakẹ tomoni inia ḅarakuḅu nemi ḅụ ḅọrọ ò nemi. Anịnakaraka, ḅẹmẹ na “nemi nyanaka” oku-ẹ nwọ ḅẹ se wa ḍukoarịye mị ḅụ re, anị Tamụnọ Ḅe tọn pẹlẹye-ẹ, anịa ḅụ ọ́ ḅọrọ ḍụaḅọrọma se ḅereni apụma pịrịḅịa.

²²Juapụma se anị ḍuko finjiḅịa ḅụgbiripumaye nwọ ḅimẹ, pịkị Grik apụma nemi nwọ ḍọkịmẹ.

²³Mine ọkụma, ini mgbẹsẹchịn ọgọnọ ḅakụḅaa Kraịst Ḅe mị wa oloku ḍukopakụmaye-ẹ, anị Juapụma ḅụ ḅụọchụaye sọye mị pịkị Jịnsẹapụma ḅụ oḅori ḅara simeye mị.

²⁴Ọkụma ini Tamụnọ Ḅe chịnsa apụma, Juapụ na Jịnsẹapụ na ḅụ, mịn oku mị anị Kraịst Ḅe-ẹ, ori anị Tamụnọ Ḅe kụrọ mị na nemi na-ẹ.

²⁵Anịatịḅị Tamụnọ Ḅe ḅụ oḅori kịkẹ mịẹmịẹye anị nemi nyanatẹịn tomoniḅọ nemi nẹngịmẹ, pịkị Tamụnọ Ḅe kụrọka mị, kụrọtẹịn tomoniḅọ kụrọ mị nẹngịmẹ.

²⁶Mịọkụ, tatarị sịkị ó simeọkụ ọ́ nwọse ḅiekoroma, ị̀ya mịnapụ, Tamụnọ Ḅe ómine chịn sịkị. Tomoni ye ḍikiḍiki ḅara ọkụma ọ́mịna ḅụ boka apụ kẹngẹ anị nemi nyanaye-ẹ anịkanịka kụrọ nyanaye-ẹ anịkanịka gololo chịẹ kiri nwọ nyanaye-ẹ.

²⁷Tamụnọ Ḅe nemima tomonikiri mị ḅẹ na yesọkẹ nwọ ḅẹ apụma sẹlẹọkịmẹ, ḅụgerere se yenemi apụma tọrụchụaḅịaye gose. Ọ̀ pịkị tomonikiri mị ḅẹ na, ịnyọ nyanakẹ nwọ ḅẹ apụma sẹlẹọkịmẹ, ḅụgerere se kụrọ apụma tọrụchụaḅịaye gose.

²⁸Ọ̀ pịkị tomonikiri mị ḍiki iderima pịkị ḍikisima apụma, pịkị yesọkẹ nwọ ḅẹ koroma nyana pịrị apụma sẹlẹọkịmẹ, mịẹse tomonikiri mị se yechịnye ma famaḅịaye gose.

²⁹Mịn mị fieaḅẹ na, gbọrịḅọ sọ Tamụnọ Ḅe tọrọkọ ineda ḅụboma-ẹkẹ.

³⁰Ọkụma Tamụnọ Ḅe ómine ọkịḅo Kraịst Jizọs Ḅe na gbolomasam, Tamụnọ Ḅe Kraịst Ḅe mịẹsam, ọ̀ ḅụ wa ḅọrọ nemi apụ nwọ sọsam. Ọ̀ ḅụ mị wa ḅọrọ Tamụnọ Ḅe na ḅẹrẹfamaye-ẹ; wa ḅo osiḅụ sime Tamụnọ-a tomoni nwọ sọ pịkị mịna ḅụ nyanasam.

³¹Anịọkụma, fịafịa ḍiri mị ḍuko ḅara ḅụ, “Ḅụbomaḅịa ẹrẹchị ḍọkịarịḅọ goyegoye mịẹka mịẹka ḅara ḅụ Nyanaḅọ Ḅe nwẹngị sa fịrị mị nwọ boma.”