Read kirikeni 1 Kọrịntapụ 10 Bible Online

1 Kọrịntapụ 10 - kirikeni bible

1 Kọrịntapụ 10

¹Mịnapụ, à ḅimẹ Moziz ḅe ḍukonwẹngị mịna ḅieju-aḍapụma ḅụ pakaye ma ọ́ nwọse ḅiekoroma. Inimgba soḅuno mị chukuḅie sime se deinma Awụwụ Tọrụ mị saḅamẹ.

²Soḅuno mị ḅie na tọrụ mị ḅie na ḅụ inimgba mengi saramẹ, anị Moziz ḅe ḍukonwẹngịapụ ḅara ḅụ.

³Inimgba anị gbọrị tẹmẹ anga ḅe fịturu mị fịmẹ

⁴se pịkị anị gbọrị tẹmẹ anga ḅe mengi mị ḅumẹ. Ini ḍukonwẹngị tẹmẹ anga ḅe ịkụ mị ḅie pakaḅo mengi mị ini nwọ ḅumẹ, anị ịkụ mị anị Kraịst Ḅe ḅụoju-ẹ.

⁵Anị-ẹ ḅẹ sọ, inia ḅụ opu pẹkẹrẹ Tamụnọ Ḅe ḅieḅumaye mịẹmẹ, anịẹrẹchị inia fịsa oju-imgbe ma piri-ele mị ḅie papa galagala famẹ.

⁶Mịọkụ mamgba elekima sọ wa pịrịsam, mịna ḅeri ma jineaḅẹ na wa siaye ḅi ma, anị ini ma mịẹ ọkụ mị.

⁷Anịkanịka wa oru tẹkẹma anị inia ḅụ dapụ mịẹ ọkụ mị. Fịafịa ḍiri mị ḍuko ḅara, “Nweni ma ini kpọnjị sime se fị na ḅu na ḅụ simemẹ, mịn mị pịkịḅo opu iruḅu na sẹfị ḅụ na sọmẹ.”

⁸Ó ye wa sẹfị mị ḅe ḅẹrẹḅarasi nwọ nyanama, anị inia ḅụ dapụ mịẹ ọkụ mị, anị mịẹse gbọrị ene kịnị mẹndẹ oyiasi fịnjị ofori kịnị tẹrẹ-a poku sokoro fịye mị.

⁹Ó ye wa Nyanaḅọ Ḅe ḍaḍiki ma, anị inia ḅụ dapụ mịẹ ọkụ mị; se oruwu ini gbọ ḅaamẹ.

¹⁰Ó ye wa mukumukuma ọkwẹịnma anị inia ḅie dapụ mịẹ ọkụ mị, anịgose nweni ḅaaḅaa enjẹlḅọ ḅe inimgba ḅaa famamẹ.

¹¹Elekima sọ jịn apụ pịrị gose mamgba inia ḅụ pakamẹ, ini pịkị ḅerijine ḅara ḅụ àrị gịẹịn koroma wa pịrịmẹ. Anịatịḅị kuluma mị la-ẹ ḅoaḅẹ nwọ ḅẹ ḅụọ ḅụ wa omi-ẹ.

¹²Anịgose koroma na ọ̀ kụrọma chịẹ waraḅẹ nwọ ḅẹ ḅọ goyegoye ọbị, mịẹse ị́ ḅịkị ẹka ḅara.

¹³Ọ́ la ḍaḍiki goyegoye anị pịkị jịn apụ lalaye ma-ẹ. Ọkụma Tamụnọ Ḅe ò ḅereniye mị mịẹmịẹmẹ, se ọ̀ pịkị ḍụkụ ẹkẹ ómine ineda inema ẹka ḍaḍiki ḅo ọ́ la; ori ịnyọ se ọ́ pịrịḅịa ó se anị inema, se pịkị ẹmbẹ finji ọ́ pịrịḅịa ó se anịa ḅie pakaḅo.

¹⁴Anịgose, ị̀ ḅụ yela ikiapụ, ómine oru tẹkẹ ḍikiḅụtọn.

¹⁵Yenemiapụ ḅara mị à se ọkwẹịn kọn ọ́ pịrịarịye-ẹ, ómine à ḍukoye ma pekele ḍiki.

¹⁶Wa Nyanaḅọ Saso Fịye mị ḅụ wa ọkị ọmọngọ mị, anị wa gose mịẹḅaka se Tamụnọ Ḅe ḅẹye mị: wa anịa ḅie ḅuḅu sịkị Kraịst Ḅe pulo mị anị wa ḍiaọkịarịye-ẹ. Se wa pu fịturu mị: wa anị fịarị sịkị, Kraịst Ḅe oju mị anị wa ḍiaọkịarịye-ẹ.

¹⁷Anịatịḅị anị gbọrị fịturu okpokpo mị ḅụ, mine kịrịkịrị apụ-ẹ ḅẹ sọ, wa gbọrị oju sọsam, anịatịḅị mine mgba anị gbọrị okpokpo mị ḍiaọkịmẹ.

¹⁸Ómine Izrẹlapụma se ḅiekoroma ini agbamịẹ fịayema fị apụma, inimgba gboloma agbamịẹ ẹbẹ mị ḅụ fịrịnwẹngị Tamụnọ Ḅe pịrịmẹ.

¹⁹Anịọkụma cheye à nwọ ḅẹ-ao, oru anịkanịka ini se anị pịrị fịye ye ḅụ omi?

²⁰Ẹn-ẹn! À ḍukoarịye mị anị, oru ḅẹrẹ nemiapụ ma ḍẹmanga mịẹ agba mị ini mịẹ oru pịrịmẹ, ini mịẹse Tamụnọ Ḅe pịrịkẹ. À pịkị ḅikẹ, ó mun oru na mịẹgboloma nyana.

²¹Ómine ineda Nyanaḅọ Ḅe ọmọngọ ḅie na pịkị oru ḅe ọmọngọ ḅie na mengi ḅu ẹkẹ; ómine ineda Nyanaḅọ Ḅe dẹbụl ọgọnọ na oru ḅe dẹbụl ọgọnọ na yefị gboloma ẹkẹ.

²²Anịkanịka wa Nyanaḅọ Ḅe ịganịma ḍọkị-ao? Wa kụrọ ọ̀ nẹngị wa koroma ḅara?

²³“Ye goyegoye wa mịẹ na iḅimẹ,” ini nwọ ḅẹmẹ. Anị kọkọmaye-ẹ, ọkụma yegoyegoye mine na iḅi famakẹ. “Ye goyegoye wa mịẹ na iḅimẹ”—ọkụma yegoyegoye ḅarachụa nyanakẹ.

²⁴Ye gbọrịḅọ sọ mịnaḅụ iḅi kẹngẹ nwọ ḍọkị ma, ọkụma jịn apụ ḅụ iḅi nwọ ḍọkị.

²⁵Nama dẹrị ọgọnọ ini dẹrịarị nama goyegoye pẹị, ḅẹrẹ gbela ma, ị́ya koroma ḅụ.

²⁶Anịatịḅị, fịafịa ḍiri mị ḍuko ḅara ḅụ, “Tomonikiri mị na anịa ḅie simeaye mamgba Nyanaḅọ Ḅe oriaye-ẹ.”

²⁷Ḅereni nyanakaḅọ nemikase fịye gose ị́ chịnmẹ, se ị́ mun ḅimẹ ḅẹḅẹ, ini se ị́ tọrọkọ koromaye goyegoye fị, ḅẹrẹ gbela ma, ị́ya koroma ḅụ.

²⁸Ọkụma gbọrịḅọ ḅọrọ nwọse ị́ ḅẹmẹ, “Mịn oru pịrị fịye-ẹ,” anị fị ma, mịn mị ḍuko ị́ pịrịḅọ ḅe na pịkị tomoniḅọ koroma mị na gose—

²⁹ị́ya koroma à nwọ ḅẹkẹ, ọkụma ísíḅọ ḅe koroma mị-ẹ. “Anịọkụma,” nweniḅọ ine gbelaḅịa, “Nde jịnḅọ koroma kikichụa ị̀ pịrịḅịa ọkụ à mịẹ ḅiye ḅụ?

³⁰À nemikase à gose mịẹḅaka se Tamụnọ Ḅe ḅẹ fịye mị fị ọkụma, cheye ẹrẹchị à mịẹḅaka ḅẹso sa fịye mị gose ini ị̀ fiesima-ao?”

³¹Iḅimẹ, ị́rị́ nyana se mịẹarị yegoyegoye, ị́ ḅọrọ fịa-o anịkanịka ị́ ḅua-o, Tamụnọ Ḅe boma ḅụ anị mịẹ.

³²Ḅụḅalaḅala se Juapụ anịkanịka Jịnsẹapụ anịkanịka Tamụnọ chọchị mị pịrị ẹka ḍumo nwọ kọn.

³³Ómine pa à mịẹ ọkụ mịẹ, à mịẹ ye mamgba ḅọḅọ ḅụḅẹlẹḅịaye à ḅụkụrọma nwọ mịẹmẹ, ị̀ ḅụ iḅi ḍọkịka ḅara ḅụ, ọkụma nweni mgba ḅe iḅi gose, mịẹse ini ḍụaḅọrọma nyanaḅịaye gose.