Read kirikeni 1 Kọrịntapụ 13 Bible Online

1 Kọrịntapụ 13 - kirikeni bible

1 Kọrịntapụ 13

¹Sosi àrị ineda tomoni ọkwẹịn mamgba nwọ kọnḅịa, pịkị enjẹlapụ ọkwẹịn sọnị, ọkụma à nemikase ḅẹlẹma nyanakẹ ḅẹḅẹ ị̀ya ọkwẹịnma, jịnyekẹ, nyọ fiemarị igila pụkọ, anịkanịka, pusa gbụmụ pụkọ na kịkịnamẹ.

²Sosi ịkịankoro oku ḍiepịrịye à nwọ nyana waraḅẹ, à ḍawọnemi mamgba nwọ nyana waraḅẹ, se ḅọịaye mamgba nwọ kaịnḅoḅịa, à sosi tụndụma suma gbinḅịa ḅereni nwọ nyana waraḅẹ—ọkụma à ḅẹlẹma nyanakẹ ḅẹḅẹ, ị̀rị̀ papaye-ẹ.

³Sosi à nyanaye mamgba à nwọ seni ḍie nweni pịrịḅịa, pịkị ị̀ya oju mị sọnị nwọ pịrịḅịa ini anị dọkịma—ọkụma à nemikase ḅẹlẹma nyanakẹ ḅẹḅẹ mịn mị seni ị̀ mịẹḅịa iḅi ofori-ẹ.

⁴Ḅẹlẹma mị anị ye inema pịkị iḅi mịẹmịẹmẹ: anị pịkị tọrụkụn nyanakẹ anịkanịka ḅụboma bomakẹ, anịkanịka pịkị opuaye mịẹmịẹkẹ;

⁵ḅẹlẹma mị anị siyemịẹḅara nyanakẹ, anịkanịka, ngẹrị fị ḍọkị ḍọkịkẹ, anị fịkịrị ịganị ịganịkẹ, ḅẹlẹma mị anị mịẹirimaye nwọ kịẹnkịẹnkẹ.

⁶Ḅẹlẹma siye ḍikiḅieḅẹlẹ-ḅẹlẹkẹ, ọkụma kọkọmaye mị nwọ ḍikiḅieḅẹlẹ-ḅẹlẹmẹ.

⁷Ḅẹlẹma mị anịa ḅụ ịnyọ fafakẹ, anịa ḅereni na tọrụseḍikiye na, ye-inema na, gbakị-gbakịkẹ.

⁸Ḅẹlẹma mị sime gbasomẹ. Ịkịankoro oku omi-ẹ, ọkụma simegbaso ẹkẹ; kịrị ọkwẹịn kọnḅịa ḍiepịrịaye omi-ẹ, ọkụma àrị kunoḅịa ḍawọnemi omi-ẹ, ọkụma anị ḅọrọsoḅịa.

⁹Anịatịḅị mịna ḍawọnemi ḍiepịrịye mị na ịkịankoro mị na pẹkẹrẹmẹ;

¹⁰ọkụma karagbasịye mị ḅo laḅịa sịkị, anị pẹkẹrẹye mị ḅarị sime ẹkẹ.

¹¹À kala tọkụ ḅụ simearị sịkị ị̀ya ọkwẹịn na, ye ḅụokoro na, koroma na, arịmgba awọmẹnị-aye-ẹ; mịọkụ, à ḅo ogulasa sịkị, àrị awọmẹnị-a mịẹmịẹye se mịẹḅịaye ḅarị ofori-ẹ.

¹²Mịọkụ wa ọrịarịye mị tẹmẹḍikiye ḅie gẹrịgẹrịma ọrị tẹmẹ simeọkụ simemẹ, ọḅụkọ wa tọrụ na tọrụ na ọrịḅịa. Ọkụma mịọkụ pẹkẹrẹ ḅụ mị à nemi waraye-ẹ; anịsịkị la Tamụnọ Ḅe nemi mị ị̀ ḅụ kara ọkụ—anị anị karagbasịḅịa ọkụ-ẹ.

¹³Mịn kirikiri ma tẹrẹ-aye ma mị omiye-ẹ: ḅereni, tọrụseḍikiye na, ḅẹlẹma na, arịa ḅụ mgba yelatẹịnye anị ḅẹlẹma mị-ẹ.