Read kirikeni 1 Kọrịntapụ 14 Bible Online

1 Kọrịntapụ 14 - kirikeni bible

1 Kọrịntapụ 14

¹Anịọkụma ḅẹlẹma mị, anị ó jua tẹịnḅịaye-ẹ. Ómine ọ́mịna kuḅiemgbọlụma se tẹmẹ anga ḅe ḍiepịrịayema ọgọnọ gbana, anị tẹịn anga mịẹse ómine ịkịankoroḅịa ọkụ.

²Kịrị ḅẹlẹ se ọkwẹịn àrị ḅọ ḅe ori ọkwẹịn tomoni pịrịkẹ, ọkụma Tamụnọ Ḅe mị ori ọkwẹịn pịrịarịye-ẹ, anịatịḅị ọ̀ kaịnḅo ḅọ ofori-ẹ. Ḅọị kọkọma ọkwẹịn mị ọ̀ kọn-arịye-ẹ, Tẹmẹ Ḅe se ọ̀ pịrị kụrọ ḅụ.

³Ọkụma ori nwọ ịkịankoroarị ḅọ ḅe mị ọkwẹịn tomoni pịrịarịye-ẹ, se ḅarachụa ini pịrị, inia kuḅie kụrọma pịkị inia kuḅie deinmamẹ.

⁴Kịrị ḅẹlẹ se ọkwẹịn àrị ḅọ ḅe ọ̀ ḅụ kẹngẹ mị ọ̀ ḅarachụa pịrịye-ẹ, ọkụma ịkịankoroḅọ ḅe ḅarachụa bebe chọchị mị nwọ pịrịmẹ.

⁵Anị ị̀ ḅụḅẹlẹḅịa ómine mgba kịrị ḅẹlẹ nwọse ọkwẹịn; ọkụma anị ị̀ ḅụḅẹlẹtẹịnḅịa ómine mgba ịkịankoro ọkụma. Anịatịḅị ịkịankoroḅọ ḅe ori yesọtẹịn kịrị ḅẹlẹ se ọkwẹịn kọn ḅọ ḅe nẹngịmẹ—kọn ọkwẹịn mị fieye nwọ ḍuko pakụmaḅịa ḅọ anịnyọ ḅụ sime sikima ọkụma, mịẹse bebe chọchị mị ḅarachụa nyanaḅịa ḅara.

⁶Anịọkụma àrị ọ́ damaḅoḅịa sịkị, ị̀ya mịnapụ, à nemikase kịrị ọkwẹịn ḅẹlẹ nwọse ḅẹrẹ ḍuko ọ́ pịrị ọkụma, che sọye à nwọ mịẹ ọ́ pịrị? Gbọrịye sọ ofori-ẹ Tamụnọ Ḅe ḅụ ḅo ḅọịaye à nwọ ḍuko ḅelema ọ́ pịrị anịkanịka ḍawọnemi anịkanịka ịkịankoro ḅụ anịkanịka ye se ó ḍie ḅụ sikima ọkụma.

⁷Ḍumo ḅụ ofori nime chuaye ma sọnị, se otoma ḅụ oḍu na ọbọ na ọkụ simeye ma—nde nweniḅọ arịa pụkọ nwọ nemi kịrịmaḅịa ọkụ, ini iḅiọkụ se àrị farịka ọkụma?

⁸Oḍu ofuroarịḅọ ḅe nemikase anịa pụkọ nwọ ofuro pakụmaka ọkụma tụḅọ ḅụkarakarama ọmụ pịrị ḅe?

⁹Anị gbọrị ḅara ḅụ, nde tomoniḅọ ị́ ḍukoarịye mị kaịnḅoḅịa ọkụ, kịrị ḅẹlẹ ị́ nwọse ḍukoarị oku mị ini nwọ pufinjika ọkụma? Ị́ya ọkwẹịnma àrị papa fọrụ ḅie ịmaịnfaḅịa!

¹⁰Kịrịkịrị tọn-a ọkwẹịn omi-ẹ tomonikiri mị ḅie; anị-ẹ ḅẹ sọ arịa ḅụ ye fiekaye ofori-ẹ.

¹¹Ọkụma à nemikase kọn-arị ọkwẹịn mị nwọ nemikẹ ḅẹḅẹ, anị ọkwẹịn ḅọ ḅe ị̀ ḅụ igoniḅọ nwọ sọḅịa, ị̀rị̀ pịkị ọ̀ ḅụ igoniḅọ nwọ sọḅịa.

¹²Ọ́mịna kuḅiema nwọ chịẹ-chịẹ-chịẹarị sịkị Fịafịa Tẹmẹ Ḅe ḍiepịrịayema nwọ nyanaḅịa ẹrẹchị, anịọkụma chọchị mị namachịẹmaḅịaye ma ọ́ nwọ ḅitẹịn jịnye nẹngị.

¹³Kịrị ḅẹlẹ se ọkwẹịn ḅọ ḅe ye ọ̀ tẹkẹ se pịkị ò se anị ḍuko ḅelemaḅịa ḍiepịrịye mị nwọ nyana.

¹⁴Anịatịḅị à ḅọrọ nemikase mị ḅara se kịrị ḅẹlẹ nwọse tẹkẹmẹ ḅẹḅẹ ị̀ tẹmẹ mị kọkọma tẹkẹmẹ, ọkụma ị̀ kuḅie anịa ḅụ ofori-ẹ.

¹⁵Anịọkụma, cheye à nwọ mịẹ ḅe? Àrị ị̀ tẹmẹ na tẹkẹḅịa, ọkụma à pịkị ị̀ kuḅie se chụa tẹkẹḅịa; àrị ị̀ tẹmẹ na nime chuḅịa, ọkụma à pịkị ị̀ kuḅie na se nime chuḅịa.

¹⁶Ị́ tẹmẹ ḅụ kẹngẹ mịẹḅaka nwọse Tamụnọ Ḅe ḅẹarị sịkị, nde ómine na koḅiria mị ḅie papa simearị ḅọ ḅe nemi se “Amẹn” nwọ ḅẹḅịa ọkụ, ị́ya mịẹḅaka ḅẹ tẹkẹ mị ḅụ? Ọ̀ ḅọrọ se ị́ ḍukoarịye mị nwọ nemiḅịa ḅara ofori-ẹ.

¹⁷Ị́ya mịẹḅaka se Tamụnọ Ḅe ḅẹ tẹkẹ mị iḅimẹ nwọ ḅẹ sọnị, anị ngịsị ḅarachụa ísíḅọ ḅe pịrịkẹ.

¹⁸À mịẹḅaka se Tamụnọ Ḅe ḅẹmẹ na ị̀rị̀ kịrị ḅẹlẹ se ọkwẹịntẹịn ọ́mịna ḅụ ḅẹḅọ ḅẹḅọ nẹngịmẹ.

¹⁹Ọkụma chọchị ḅie tẹkẹ sịkị ḅụ, à nweni mgba naaḅịa sọnọ ọkwẹịnmgbọlụ nwọ kọnḅịa ye seni jịn apụ ḍieḅịa ẹrẹchị, à mun kịrị ọkwẹịnmgbọlụ ḅụ mẹndẹ oyiasi fịnjị ḅe tọn-a kịrị ọkwẹịn nwọ kọn nakaraka.

²⁰Ị̀ya mịnapụ, ómine awọmẹnị koroma nwọ nyana ma, si mịẹmịẹye ḅụ ómine awọmẹnị sọ, ọkụma koroma ḅụ ómine ogulasa apụ nwọ sọ.

²¹Fịafịa ḍiri ma ḅie anị gịẹịnmẹ, “À kịrị ọkwẹịn kọn-arị apụ ḅụ ḅọrọ ọkwẹịn ị̀ya tomonima pịrịḅịa, Nyanaḅọ Ḅe nwọ ḅẹmẹ. Igoniapụ ḅịpị pẹkẹrẹma ḅụ à ḅọrọ ọkwẹịn ini pịrịḅịa, ọkụma anị sọnị ị̀ya tomonima ini ị̀ poki ḍụkụ ẹkẹ.”

²²Anịọkụma kịrị ḅẹlẹ se ọkwẹịn ḍiepịrịye mị anị ḅereni nyanakapụ elekima-ẹ, ḅereni nyanapụ ḍiepakụmaye kẹ. Anịsịkị Tamụnọ ịkịankoro ḍiepịrịye mị anị ḅereni nyanapụye-ẹ, ḅereni nyanakapụye kẹ.

²³Anịọkụma bebe chọchị mị mgba nemikase koḅirimamẹ, se ḅọḅọ sakị kịrị ḅẹlẹ se ọkwẹịn kọn-aḅẹ—se papa apụ anịkanịka ḅereni nyanakapụ nemikase sọ ḅo ọkụma, ini ḅẹ ẹka, na mịna apụma nọmụapụ-ẹ?

²⁴Ọkụma inimgba nemikase Tamụnọ ịkịan nwọ koroaḅẹ ḅẹ ọkụma, ḅereni nyanakaḅọ anịkanịka papa jịnḅọ sọ ḅo ọkụma, oria si mị ọ̀ ḅụokoroḅịa ọ̀ naasaye ma ḅụ. Ọ̀ naarịye mamgba ḅẹrẹkọn ọ̀ pịrịḅịa.

²⁵Ọ̀ ḅọịma koromarịye ma ḅelema pakaḅịa, se ọ̀ kpẹrẹkị Tamụnọ Ḅe tẹkẹḅịa, ḍukopakụma se ḅẹḅịa, “Kọkọmaye-ẹ Tamụnọ Ḅe mịọ ori ómine na omi-ẹ!”

²⁶Ị̀ya mịnapụ mị à fiearịye mị-ẹ. Tẹkẹḅịa ẹrẹchị ó ḅo koḅirima sịkị gbọrịḅọ nime nyanamẹ, jịnḅọ yeḍieaḅẹ, ísíḅọ Tamụnọ Ḅe ḅara ḅo ḅọịaye ḍuko ḅelema, jịn gbọrịḅọ kịrị ọkwẹịn ḅẹlẹ mị ḅe oku, pa pịkị jịnḅọ kịrị ọkwẹịn ḅẹlẹ mị ḍuko ḅelemaḅẹ. Yegoyegoye ḅarachụa chọchị mị pịrịḅịaye nwọ sọ.

²⁷Gbọrịḅọ nemikase kịrị ọkwẹịn ḅẹlẹ ḅụ ḅẹrẹ ḍukoḅịa ḅẹḅẹ, ye mama apụ, anịkanịka ḅakatẹịn-tẹịn, tẹrẹ apụ ọkwẹịn, ḍukoma ḍukoma ḅụ se ye ísíḅọ ḅe kọn ọkwẹịnma nwọ ḍuko ḅelema.

²⁸Ọkụma anị ḍuko ḅelemaḅịaḅọ ofori-ẹ ḅẹḅẹ ye ọkọ sime kịrị ọkwẹịn ḅẹlẹ mị kọnḅịa ḅọ ḅe koḅirima mị ḅie yawụma sime, se ọkwẹịn ngẹrị ọ̀ ḅụ na Tamụnọ Ḅe na nwọ pịrị.

²⁹Ye maịn anịkanịka tẹrẹ-a ịkịankoroapụ, Tamụnọ oku mị ḍuko anịsịkị kirikọn apụma inia ọkwẹịnma pekele ḍiki.

³⁰Ọkụma koḅirima mị ḅie kpọnjị simearị gbọrịḅọ nemikase Tamụnọ Ḅe ḅara oku nyanaḅomẹ ḅẹḅẹ, ye ọkwẹịn simearị ḅọ ḅe dachịẹ.

³¹Sosi ómine mgba ineda Tamụnọ oku mị nwọ ḍukoḅịa, gbọrịḅọ, gbọrịḅọ, mịẹse nweni mgba ye ḍawọḅo se kụrọ kuḅie nyanaḅịa ḅara.

³²Ịkịankoro tẹmẹma ịkịankoroḅọ ḅe chuku ḅie àrị omi-ẹ.

³³Anịatịḅị Tamụnọ Ḅe ò ḅikẹ wa galagala ḅụ sime ọkụma wa ḅịpịogbosọ na deinma na ḅụ sime. Anị Tamụnọ-a tomoni chọchị mamgba ḅie sime ḅara mị,

³⁴eremeni ma ini chọchị koḅirima ḅie yawụma sime na iḅimẹ. Ḅereni ini pịrị se ini ọkwẹịn na iḅikẹ, Juapụ Oloko mị ḅe sime ḅara ḅụ, ini pịkị ye ḅụ tịḅịda ma.

³⁵Ini nemi ḍọkịarịye omi-ẹ ḅẹḅẹ ini inia deapụ ma gbela warị ḅie. Anị opuma ḅụgereremamẹ eremeniḅọ chọchị koḅirima ḅie ọkwẹịn.

³⁶Anị ḅẹ-ao na Tamụnọ ọkwẹịn mị ọ́mịna ḅara ḅomẹ? Anịkanịka ómine kẹngẹ anị nwọ damaḅo?

³⁷Nemikase iniḅọ Tamụnọ ịkịankoroḅọ-ẹ nwọ ḅẹ koroma nyanaḅọ omi-ẹ ḅẹḅẹ, anịkanịka iniḅọ tẹmẹ anga ḅe ḍiepịrịye nyanamẹ ḅẹḅẹ, ye iniḅọ nemi kpaịnma na à gịẹịn àrịye mị Nyanaḅọ Ḅe tọnmẹ.

³⁸Ò nemikase mịn mị se ye chịnkẹ ḅẹḅẹ, ómine ò se ye chịnma.

³⁹Anịẹrẹchị, ị̀ya mịnapụ, ómine ọ́mịna kuḅiemgbọlụma se Tamụnọ oku ịkịankoro ḅụ gbana, ọkụma ó kikichụa kịrị ḅẹlẹ se ọkwẹịn mị pịrị ma.

⁴⁰Mịẹka mịẹka ḅara ḅụ ye mamgba karakara ḅara ḅụ na ọrụtọn ḅara ḅụ na ómine àrị mị-ẹ.