Read kirikeni 1 Kọrịntapụ 15 Bible Online

1 Kọrịntapụ 15 - kirikeni bible

1 Kọrịntapụ 15

¹Se mịọkụ à ḅiaḅẹ à se ọ́mịna ḅiekoroma, ị̀ya mịnapụ, à ḍuko ọ́ pịrịsa Iḅi Ḅẹrẹ mị, ómine ọkịsaye mị, ọ́mịna ḅereni pịkị anịa ḅụ kụrọma chịẹ waraye mị.

²Anị iḅiọkwẹịn mị-ẹ, à ḍuko ọ́ pịrị oku mị. Ọ́ ḍụaḅọrọma nyanasam ó nemikase kapụma iḅiọkwẹịn mị ọlọmẹ ḅẹḅẹ—ọ́ papa ḅerenimẹ nwọ ḅẹye sikima ọkụma.

³Àrị ọkị yelatẹịnye mị, à nwọ saḅama ọ́ pịrịmẹ: na Kraịst Ḅe mịna sima gose fịmẹ, Fịafịa ḍiri ma ḅie ini anị gịẹịn ḅara mị;

⁴na ini ò ḍipimẹ, tẹrẹ karama ene mị ḅụ ini ọ̀ sịsẹmamẹ, Fịafịa ḍiri ma ḅie anị gịẹịn ọkụ mị;

⁵na ori ọ̀ ḅụ se Pita ḅe ḍiemẹ, pịkị seni oyimaịn okufịrịnwẹngịapụ fịnjịma na ḍiemẹ.

⁶Anịsịkị ọ̀ pịkị gbọrịkirikiri ọ̀ ḅụ se ò ḍukonwẹngịapụma ḅụ kịnị ẹndẹ sọnọasi fịnjị nwọ ḍiemẹ, inia ḅụ opu pẹkẹrẹ pa ḍumo waraḅẹ, dapụ fịsam nwọ ḅẹ sọnị.

⁷Anịsịkị ori ọ̀ ḅụ seni Jems ḅe ḍiemẹ, pịkị okunwẹngịapụ mamgba na.

⁸Arịmgba ḅe kuluma ọ̀ pịkị ọ̀ ḅụ seni ị̀ ḍiemẹ—ị̀rị̀ ini kịrị ḅara se yi tọkụ ọkụ sime ḅọ ḅe.

⁹Anịatịḅị ị̀rị̀ okunwẹngịapụ mamgba ḅụ kọnjụ ḅe-ẹ—okunwẹngịḅọ se ị̀ chịn mị sọnị ḅụ gbẹịnkẹ, anịatịḅị à tọrụsiọrị se Tamụnọ chọchị mị pịrịmẹ.

¹⁰Ọkụma Tamụnọ ḍikiḅụgerere ḅụ à ḅo à nwọ sime ọkụ simemẹ, se ò seni ị̀ pịrị ḍikiḅụgerere mị ye ḅụ sọkaye kẹ. Anịnakaraka, à kụrọma fịrịnwẹngịtẹịn ísí okunwẹngịapụ mamgba nẹngịmẹ, ị̀rị̀ ị̀ya kụrọ seni kọkọma anị mịẹkẹ nwọ ḅẹ sọnị, ọkụma ị̀ ḅie ḅụ sime Tamụnọ ḍikiḅụgerere mị-ẹ.

¹¹Anịọkụma, anị ḅọrọ ị̀ ḅara ḅo-o, pịkị inia ḅara ḅo-o, anị mine mgba ḍuko Tamụnọ ḅẹrẹ mị-ẹ, mịn mị ọ́ pịkị ḅereniye mị-ẹ.

¹²Mịọkụ mịna oku mị anị Kraịst Ḅe fị ḅụ ini nwọ sịsẹmasam nwọ ḅẹ sịkị, nde ọ́mịna ḅie dapụ gose ḅẹarịye na fịḅọ fịḅụsịsẹ se ḍumo ẹkẹ?

¹³Anị mị nemikase kọkọmaye-ẹ nwọ ḅẹ ọkụma, anị fieaḅẹ na Kraịst Ḅe fị ḅụ ọ̀ sịsẹkẹ;

¹⁴nemikase fị ḅụ Kraịst Ḅe ma sịsẹkẹ ḅẹḅẹ anịọkụma wa nyana se ḍukoḅịa Tamụnọ ḅẹrẹ ofori-ẹ, ómine sọnị nyana se ḅereniḅịaye ofori-ẹ.

¹⁵Anịtẹịn anga ini wa ọkịmẹ na wa Tamụnọ Ḅe se iruokọn-aḅẹ, anịatịḅị wa nwọ ḅẹmẹ na fị ḅụ ọ̀ Kraịst Ḅe sịsẹmamẹ—ọkụma fịapụma kọkọma fịḅụsịsẹ se ini ḅo ḍumokẹ nwọ ḅẹ ọkụma, anịọkụma Kraịst Ḅe sọnị ori ọ̀ sịsẹmakẹ.

¹⁶Anịatịḅị fịapụma nemikase fịḅụsịsẹkẹ ḅẹḅẹ, anị Kraịst Ḅe sọnị ma ọ̀ fịḅụsịsẹkẹ.

¹⁷Pịkị nemikase Kraịst Ḅe fịḅụsịsẹkẹ ḅẹḅẹ ọ́mịna ḅereni mị oḅori se nweni chịnye-ẹ, ọ́ pa pịkị ọ́mịna sima ḅie taḅo waraḅẹ.

¹⁸Anị pịkị fieḅịa na Kraịst Ḅe ḅereni se fịapụma ini papa fị fasam.

¹⁹Mine ḅe tọrụ se Kraịst Ḅe ḍiki mị, mịn ḍumo ḅụ kẹngẹ anị iḅimẹ ḅẹḅẹ, anịọkụma mị tomonikiri ḅie mgba mine anị ini ḍikitịḅịfoin gbẹịntẹịn apụ-ẹ.

²⁰Ọkụma kọkọmaye mị, anị Kraịst Ḅe fịḅụ ini ọ̀ sịsẹmasam, seni onyechịẹma na fị mọnọkọn apụma ini sọnị ini nwọ sịsẹmaḅịa.

²¹Anịatịḅị fị mị nwọ tomoniḅọ ḅụ ḅọrọ ḅo ọkụ mị anị gbọrị ḅara mị, fịḅụsịsẹ mị pịkị tomoniḅọ ḅụ ḅọrọ ḅo ọkụ-ẹ.

²²Anịatịḅị tomoni mamgba nwọ Adam ḅe na gbọrịye mịẹ ḅụ fị ḅara mị, anị gbọrị ḅara mị nweni mamgba sịsẹḅịa ọkụ-ẹ, ini Kraịst Ḅe na gbọrịye mịẹye gose.

²³Ọkụma ḅọḅọ sịsẹḅịa iniḅọ lalama ọrụ ḅụ: Kraịst Ḅe, anị ye mamgba ḅe tarị-ẹ; anịsịkị anị ḅo sime ọ̀ pịrị apụma laḅịa, ò ḅoḅịa sịkị.

²⁴Anịsịkị kuluma mị ḅo laḅịa Kraịst Ḅe tẹmẹ anga ḅe ḅẹrẹtọn apụ mamgba nwọ nẹngịmaḅịa, ini ḅe kụrọ nyana apụma na pịkị kụrọmamgba na, se ori Amanyanakiri mị saḅama Tamụnọ Ḍaḅọ Ḅe pịrịḅịa.

²⁵Anịatịḅị Kraịst Ḅe ọ̀ ḅẹrẹtọnḅịa ọkịmun Tamụnọ Ḅe na taraka apụ mamgba nwọ inumaḅịa sịkị la se ini seni ọ̀ ḅụọ chuku koromaḅịa.

²⁶Ori inumaḅịa kuluma tarakaḅọ anị fị mị-ẹ.

²⁷Anịatịḅị fịafịa ḍiri mị nwọ ḅẹmẹ na, “Tamụnọ Ḅe ye mamgba se Kraịst Ḅe ḅụọ chuku koromamẹ.” Anị ḅelepakamẹ na “ye mamgba” nwọ ḅẹ ọkwẹịnma Tamụnọ Ḅe anịa ḅie ori ofori-ẹ, ori anị ye mamgba se Kraịst Ḅe ḅụọ chuku koromaḅọ Ḅe-ẹ.

²⁸Ọkụma ini ye mamgba nwọ seni Kraịst Ḅe ḅẹrẹtọn chuku ḅie koroma so sịkị Tọkụ Ḅe na, mịnaḅụ na ọ̀ ḅụ se Tamụnọ Ḅe chuku koromaḅịa, anị ye mamgba seni ò chuku koromaḅọ ḅe, se Tamụnọ Ḅe okorona okorona ḅẹrẹtọn ye mamgba pịrịḅịa.

²⁹Mịọkụ, ini fịapụ ẹrẹ ḅụ mengi se sara apụma kwanị? Nde ini tọrụ se ḍiki na ini mịẹ karamaye mị ọkịḅo ini pịrịḅịaye? Anị mị nemikase kọkọmaye-ẹ nwọ ḅẹ ọkụma, dapụ ọkịarị ḅara mị na fịḅọ fịḅụsịsẹ se ḍumo ofori-ẹ? Anịọkụma cheye ẹrẹchị ini fịapụma tịḅị gose mengi se nweni sara?

³⁰Se mine ọkụma—nde wa gose sịkịmamgba mịna ḅụ ma se fị ḅie chuarịye?

³¹Ị̀ya mịnapụ, wa Nyanaḅọ Jizọs Kraịst Ḅe ḅie wa nyana ḍumo mị se ómine gose ị̀ pịrị opuamịẹye mị ị̀ mịẹse à mịn mị nwọ ḍukomẹ, eneḅeneḅene à fịfịmẹ!

³²Ye sime ḅara ḅụ, à mịọ Ẹfịsọsị “owoi-a namama” na owusọmẹ nwọ ḅẹ ọkụma tomoni ọkwẹịn ọkwẹịn ḅara ḅụ che sọye à nwọ nyana ḅo? Ọkụma fịapụma sịsẹ se ḍumo ẹkẹ ḅẹḅẹ, ini ḍuko ḍuko ḅara ḅụ, “Ye wa anịọkụma fị se pịkị ḅu, anịatịḅị ḅa wa fịḅịa.”

³³Ye ini oḅori se ọ́ chịnma. “Si nwẹngị gboloma iḅi mịẹmịẹye sima simamẹ.”

³⁴Ó vinpịkị ḅo Tamụnọ kịkẹ ḍumo ḅie sọ, se ọ́mịna si achọma ḅụ dachịẹ. À mịn ḍukomẹ ọ́mịna ḅụgereremaḅịaye gose; na ọ́mịna ḅie dapụ Tamụnọ Ḅe nemikẹ.

³⁵Gbọrịḅọ gbelaḅịa, “Nde fịapụ ineda sịsẹ se ḍumoḅịa ọkụ? Ndende sime oju ini nwọ nyana ḅe?”

³⁶Ị́rị́ oḅoriḅọ! Ị́ chịnmgbọlụ nwọse kiri ḅie ḍipi sịkị anị ḅịpị toluma ḍumo ẹkẹ anị fịka simeogbo.

³⁷Se ị́ se kiri ḅie ḍipiye mị, papa chịnmgbọlụ-ẹ, sosi ịpịamgba mgbọlụ-ẹ anịkanịka jịn chịnmgbọlụ-ẹ, anị nwọ ọḅụkọ sopakaḅịa chịn nyengi mị ḍipiye mị anịkẹ.

³⁸Tamụnọ Ḅe mị ọ̀ ḅụḅẹlẹ oju nwọ seni anị chịnmgbọlụ mị pịrịye-ẹ; chịnmgbọlụ goyegoye ori anịa oju seni anị pịrịmẹ.

³⁹Se ḍumoarịye mamgba gbọrị ojumịnị ḅara nyanakẹ; tomoni gbọrị ojumịnị ḅara nwọ nyanamẹ, namama jịn ojumịnị ḅara nwọ nyanamẹ, fenima jịn ojumịnị ḅara nyanamẹ, pịkị injima sọnị jịn ojumịnị nyanamẹ.

⁴⁰Soḅie oju omi-ẹ, tomonikiri ḅe oju pịkị omi-ẹ; soḅie ojuma ḅe iḅi mị tomonikiri ojuma ḅe iḅi mị ḅụ kịrịmẹ.

⁴¹Ịrụa mị mịna iḅi nyanamẹ, akalụ mị jịn iḅi nyanamẹ, loliama pịkị iḅi nyanamẹ, loliama ḅie sọnị kịrịkịrị iḅi pịkị omi-ẹ.

⁴²Mịn anị simeḅịa ọkụ-ẹ, fịapụma sịsẹ se ḍumoḅịa sịkị. Ini oju mị ḍipi sịkị, fịfị oju-ẹ; ini anị sịsẹmaḅịa sịkị, fịfịka oju ḅụ-ẹ.

⁴³Ini anị ḍipi sịkị mị, anị si pịkị ịnyọ nyanakẹ; ini anị sịsẹma sịkị anị iḅi pịkị kụrọḅịa.

⁴⁴Ini se kiri ḅie ḍipi sịkị, mịnịchụa ojuakpakpa-ẹ; anị sịsẹḅịa sịkị, anị ḅo tẹmẹ anga oju nwọ sọḅịa. Anị sime ḅara anị, mịnịchụa ojuakpakpa nwọ omi-ẹ ḅẹ sịkị, tẹmẹ anga ḅe oju sọnị simeḅịa.

⁴⁵Anịatịḅị fịafịa ḍiri mị nwọ ḅẹmẹ, “Tatarị owuḅọ, Adam ḅe, ḍumo nyanaḅọ ḅara ini nwọ seni ọ̀ tẹmẹmẹ;” ọkụma kuluma Adam ḅe ḍumo pịrị Tẹmẹ-ẹ.

⁴⁶Anịatịḅị tẹmẹ anga ḅọ ḅe tatarịḅokẹ, ọkụma ojumịnị chụaḅọ ḅe-ẹ, anịseso tẹmẹ anga ḅọ ḅe ḅo ò ḍukomamẹ.

⁴⁷Tatarị Adam ḅe ini aḅaịn se mịẹḅọ ḅe kiri ḅie ọ̀ pakaḅomẹ, maịn karama Adam ḅe soḅie ò ḅomẹ.

⁴⁸Sime tomonikiri mị pịrịapụ ma ini tomonikiri ḅo ye nwọse mịẹḅọ ḅe sime ḅara ini nwọ simemẹ, soḅie apụma pịkị soḅie wẹrị ḅo ḅọ ḅe simeọkụ nwọ simemẹ.

⁴⁹Wa nwọ ini aḅaịn se tẹmẹ ḅọ ḅe na kịkịna ḅara mị, anị wa pịkị soḅie ḅọ ḅe na kịkịnaḅịa ọkụ-ẹ.

⁵⁰Ị̀ya mịnapụ, mịn à fiearịye mị-ẹ, ini ojumịnị na pulo na se mịẹye ineda Tamụnọ Amanyanakiri ḍiaọkị ẹkẹ, fịfịye ineda fịfịkaye ḍiaọkị ẹkẹ.

⁵¹Mịn ḅọị kọkọmaye mị ọ́ nwọ poki: mine mgba fị ẹkẹ, boka kala sịkị ḅụ ini mine mgba nwọ ḍinmaḅịa.

⁵²Tọrụmgbọlụ kparapụ ọkụ kuluma oḍu mị fieḅịa sịkị fịapụma ini nwọ sịsẹma se ini ḅarị fị ẹka apụ nwọ sọḅịa, anịsịkị ini mine mgba ḍinmaḅịa.

⁵³Anịatịḅị fịfịye mị ini nwọ ḍinma ḅo fịfịkaye mịẹḅịa anịsịkị ḅụrụḅịaye mị ini nwọ ḍinmaḅịa ḅo ḅụrụẹkaye mịẹḅịa.

⁵⁴Anịọkụma mịn mị ḅo kiri ọkị sịkị, pịkị fịfịye mị ini nwọ ḍinma ḅo fịfịkaye mịẹsam nwọ ḅẹ sịkị; anịsịkị mị fịafịa ḍiri mị ḅo kọkọmaye sọḅịaye-ẹ: “Fị mị ini anị nẹngịmasam; ọmụḅaraiḅi mị karasam!”

⁵⁵“Fị, nde ị́ya ọmụḅaraiḅi mị? Fị, ị́ya ye se nweni lama kụrọ mị nde anị?”

⁵⁶Fị si ḅụ ḅọrọ ye se nweni lama kụrọ nwọ nyanamẹ se si pịkị Oloko ḅụ ḅọrọ anịa kụrọ nwọ nyanamẹ.

⁵⁷Ọkụma mịẹḅaka sime Tamụnọ Ḅe pịrị wa Nyanaḅọ Jizọs Kraịst Ḅe ḅụ ḅọrọ ọmụḅaraiḅi mị se wa pịrị ḅọ ḅe!

⁵⁸Anịẹrẹchị ị̀ ḅụ yela mịnapụ, ọ́ kụrọma chịẹ, jikeka ḅụ. Se sịkịmamgba Nyanaḅọ Ḅe fịrị mị nwọ nwẹngị, ó nemi warasịkị na Nyanaḅọ Ḅe fịrị nwọ nwẹngị mị ngịsị papa fayekẹ.