Read kirikeni 1 Kọrịntapụ 16 Bible Online

1 Kọrịntapụ 16 - kirikeni bible

1 Kọrịntapụ 16

¹Mịọkụ, ocho se ḅarachụa Judia ḅie sime Tamụnọ-a tomonima pịrịḅịa igbiki mị gbolomaye ḅụ ọ́ gịẹịnye mị, à ḍuko Galesia ḅie sime chọchị ma pịrị na ini mịẹ nwọ ḅẹ ḅara mị ómine sọ ọ́ nwọ mịẹ.

²Chọchị ene goyegoye ọ́mịna ḅụ ḅọḅọ iniḅọ nyanaḅo ye laḅara kịẹnma igbiki sin koroma se anị koko mịẹse à ḅoḅịa sịkị igbiki ocho ḅarị ḅụpalịmaye sọ ẹka ḅara.

³À ḅo lasịkị ọ́ tọn pakụmaḅo ḍiepịrịye mị se munḅịa owuapụma à ḍiri gịẹịn nwọ pịrịḅịa ini se Jerusalẹm mị munḅịa.

⁴Nemikase à mun na iḅimẹ ḅẹḅẹ anịọkụma ini ị̀ ḅụ sọ se ị̀rị̀ na munḅịa.

⁵Masidonia ḅie mị à ḅọrọ ḅo ọ́ laḅịaye-ẹ—anịatịḅị Masidonia ḅie mị à ḅọrọḅịaye-ẹ.

⁶À pa sosi kele ómine na simeḅịa, sosi bebe fọngụ sịkị mị mgba, anịsịkị ọ́ ḅarachụa à kọnḅịa nwẹngị mị ḅụ ị̀ pịrịḅịa, à munḅịa nyọ goyegoye ḅụ.

⁷À ḅiaḅẹ àrị iḅiọkụ se ómine na ịrịama papa nwẹngị ḅọrọ ḅaraḅụkẹ. À tọrụseḍikiaḅẹ na àrị ómine na sime ḅọlọ sịkị nwọ laḅịa, Nyanaḅọ Ḅe nemikase ḅerenimẹ ḅẹḅẹ.

⁸À mịọ Ẹfịsọsị ḅie sime mun Pẹntikọst ene mị laḅịa.

⁹Kọkọmaye-ẹ, se ḅụgbẹịn opu fịrị nwẹngịḅịa sịkị mịanga omi-ẹ, ḅụọchụa apụ ḅakamẹ ḅẹ sọ.

¹⁰Timoti ḅe nemikase ḅo ọ́ lamẹ ḅẹḅẹ, ọ́ mịẹse anị ọ̀ ḅụ okoro na ómine iḅiọkụ seni ori ọkịmẹ ọ́mịna ogboku ḅụ, anịatịḅị ọ̀ fịrịnwẹngị Nyanaḅọ Ḅe pịrịaḅẹ, ị̀rị̀ sọnị nwẹngị ọkụ mị.

¹¹Gbọrịḅọ sọnị ò ḍikisimama ọkụma ọ́ ḅarachụa ọ̀ pịrị se ò deinma ò go se ḅo fịrị mị nwọ nwẹngịmamun, mịẹse ò vinpịkị ị̀ damaḅoḅịa ḅara anịatịḅị à tọrụ se ori na mịnapụma na ḅe vinpịkịḅo mị ḍikiaḅẹ.

¹²Mịọkụ, Apọlọs mịna mịnaḅọ ḅe gbolomaye mị, à sịkịmamgba ò kuḅie kụrọma-kụrọmamẹ na ori ísí mịnapụma ḅụ sọ se ḅo ọ́ la, ọkụma ma anị gbọtụḅara ori na dein korokẹ na ọ̀ mị sịkị ḅụ mun. Anị simeọkụ simeọkụ sọnị achọ paka ọ̀ pịrị sịkị ò munḅịa.

¹³Ọbị ḅụ ó sime, ḅereni ḅụ ọ́ kụrọma chịẹ, ọ́ ḅalafa nyanama, kụrọ ḅụ ó sime.

¹⁴Ḅẹlẹma ḅụ ọ́mịna fịrị mamgba ọ́ nwọ nwẹngị.

¹⁵Stifanas ḅe na ò furo mị na gbolomaye ó nemimẹ. Ini anị Akaya mị ḅie tatarị Kraịst Ḅe ḍukonwẹngịapụ ma-ẹ, se ini pịkị inia ḅụ se fịrịnwẹngị Tamụnọ-a tomonima pịrịsam. Àrị ọ́ tẹkẹmẹ ị̀ya mịnapụ,

¹⁶ọ́ mịna tomonima simeọkụ sime tomoni nwọ ḍikimaye mịẹ. Ini kẹngẹkẹ, ọkụma inia ḅụ sọ fịrịnwẹngịarị ḅọ goyegoye.

¹⁷Stifanas ḅe na, Fọtunatọs ḅe na, pịkị Akaịkọs ḅe na ḅe ḅo mị, ị̀ ḅieḅẹlẹmamẹ, ini ọ́mịna ofori mị tọrụḍinmamẹ,

¹⁸ini ị̀ ḅụ ọbịrịmamẹ ini ọ́mịna ḅụ ọbịrịma ọkụ mị. Nwọ sime tomoni ḅụ elekima chụa gbẹịnmẹ.

¹⁹Esia ḅie sime chọchịma inia kereni ḅịpị se ọ́ sẹịnmamẹ; Akwila ḅe na Prisila ma na pịkị inia warị ḅie sime chọchị mị na Kraịst Ḅe ḅereniapụ nwananwana kereniḅịpị se ọ́ sẹịnmamẹ.

²⁰Mịọ sime mịnapụ mamgba kereniḅịpị se ọ́ sẹịnmamẹ. Mịnapụ, fịafịa ḅịpị nọnjụ ọ́ nwọ seni jịnḅọ jịnḅọ kereni.

²¹Ị̀rị̀ ị̀ ḅarama se mịn mị gịẹịnmẹ: Pọl ḅe ḅara ḅo kereniḅịpị.

²²Nyanaḅọ Ḅe ḅẹlẹmakaḅọ goyegoye—worinime sime iniḅọ pịrịmẹ! Maranatha—Wa Nyanaḅọ, Ḅo!

²³Nyanaḅọ Jizọs Ḅe ḍikiḅụgerere mị ómine na sime.

²⁴Ye ị̀ya ḅẹlẹma mị ómine mgba na sime Kraịst Jizọs Ḅe ḅie. Amẹn.