Read kirikeni 1 Kọrịntapụ 2 Bible Online

1 Kọrịntapụ 2 - kirikeni bible

1 Kọrịntapụ 2

¹Àrị ómine damaḅo sịkị, ị̀ya mịnapụ, Tamụnọ Ḅe oria kọkọma ḅọịaye ma ḍuko ọ́ pịrị-ẹ ḅo sịkị, à kpokoro ọkwẹịn kọnkẹ, à pịkị opu ḍawọye ḍiekẹ.

²Anịatịḅị àrị ómine na sime sịkị, àrị ị̀ kuḅie ḅụ tọnpẹlẹmẹ na, à yegoyegoye se ḅieḅaramaḅịa, ọkụma yeḅụtẹịnye anị Jizọs Kraịst Ḅe na mgbẹsẹchịn ọgọnọ ọ̀ kọn fị mị na sikima ọkụma.

³Anịgose ịnyọfa na ḅụgeregere na ye mamgba ḅụ ḅalafa na mị à se ọ́ damaḅoye-ẹ.

⁴Pịkị à ḍieye na à ḍuko oku mị na, tomoni opu nemi ḅụ àrị àrị ḍukokẹ, ọkụma Tamụnọ Tẹmẹ Ḅe kụrọ laḅara mị ḅụokoro pịkị bele ḅara à nwọ ḍiepakụmamẹ.

⁵Ọ́mịna ḅereni mị, anịọkụma, tomoni nemi ḅụ anị sẹrẹrẹkẹ, ọkụma Tamụnọ Ḅe kụrọ mị ḅụ-ẹ.

⁶Anị-ẹ nwọ ḅẹ sọ, nemi oku mị à nwọ ḍukopakụma se kọkọma tẹmẹ ḅụ ogulasapụ ma pịrịmẹ. Ọkụma tomonikiri ḅe nemikẹ anịkanịka sime ḅẹrẹtọn mị tomonikiri pịrịarị kụrọmakẹ—ngẹrị mịna ịnyọ famarị kụrọma.

⁷À ḍukopakụma nemi mị anị Tamụnọ Ḅe ḅie ḅọị nemi mị-ẹ, anị tomoni-a ḅụ kikimaye mị, ọkụma mịna boma gose tomonikiri mị ma pakaka sịkị ngịsị ọ̀ sẹlẹọkịye mị.

⁸Mịn tomonikiri mị ḅie ḅẹrẹtọn apụma ḅie ḅụ oria nemi mị nemi gbọrịḅọ sọnị ofori-ẹ. Ini anị nemimẹ nwọ ḅẹ ọkụma, mgbọkụ boma Nyanaḅọ Ḅe ini ọ̀ kakịḅaa ẹkẹ.

⁹Anị-ẹ nwọ ḅẹ sọ, fịafịa ḍiri mị ḍuko ḅara ḅụ, “Gbọrịḅọ sọ ma ọrịka pịkị ma naakaye, gbọrịḅọ sọ ngịsị koromaka na pakaḅịaye, anị Tamụnọ Ḅe tẹlịma koroma ọ̀ ḅẹlẹma apụma pịrịye-ẹ.”

¹⁰Ọkụma mine mị Tamụnọ Ḅe oria ḅọịye mị ọ̀ Tẹmẹ Ḅe ḅụ ḅọrọ nwọse ḍieye-ẹ. Tẹmẹ Ḅe yegoyegoye nwọ ḍọkị ḍikiḍikimẹ, pịkị Tamụnọ Ḅe tọn koroma gbun ḅọịaye ma sọnị.

¹¹Tomoniḅọ ḅe ò ḅie sime tẹmẹ ḅe kẹngẹ anị ò simeọkụ mị mgba nwọ nemiye-ẹ; anị gbọrị ḅara anị, Tamụnọ Tẹmẹ Ḅe kẹngẹ, Tamụnọ Ḅe gbolomaye mamgba nemi ọkụ-ẹ.

¹²Mịn tomonikiri mị ḅe tẹmẹ wa nwọ ọkịkẹ, anịnakaraka Tamụnọ Ḅe se fịrịma Tẹmẹ Ḅe mị wa ọkịsaye-ẹ, mịẹse Tamụnọ Ḅe se wa pịrịsaye mamgba wa nwọ nemiḅịa ọkụ.

¹³Anịọkụma, wa kọn ọkwẹịn mị tomoniḅọ nemi ḅụ ḅo ḍieyekẹ, ọkụma Tẹmẹ Ḅe ḍie ọkwẹịn ḅụ-ẹ, anị wa tẹmẹ anga ḅe karakaraye ma ḍuko ḅelema Tẹmẹ Ḅe nyanasa apụma pịrị ḅara ḅụ.

¹⁴Tẹmẹ Ḅe nyanaka ḅọ goyegoye ineda Tamụnọ Tẹmẹ Ḅe ḅụ ḅo ḍiepịrịye nwọ ọkị ẹkẹ. Ọkọ sime ḅọ kọkọma àrị kaịnḅo ẹkẹ; ọ̀ ḅụ àrị yesọkẹ, anịatịḅị Tẹmẹ Ḅe ḅụ kẹngẹ anị ini ineda àrị laye nwọ nemiḅịaye-ẹ.

¹⁵Tẹmẹ Ḅe nyanaḅọ goyegoye, anị pịkị ineda Tẹmẹ Ḅe ḅụ ḅo yegoyegoye nwọ nemiḅịaye-ẹ, ọkụma gbọrịḅọ sọ ineda ḅẹrẹkọn ọ̀ pịrị ẹkẹ.

¹⁶Fịafịa ḍiri mị ḍuko ḅara ḅụ, “Tụḅọ Nyanaḅọ Ḅe kuḅie nemi? Tụḅọ ineda tetema se ọ̀ pịrịḅe?” Anị-ẹ ḅẹ sọ, wa Kraịst Ḅe kuḅiemgbọlụ nwọ nyanamẹ.