Read kirikeni 1 Kọrịntapụ 6 Bible Online

1 Kọrịntapụ 6 - kirikeni bible

1 Kọrịntapụ 6

¹Nemikase ọ́mịna ḅụ gbọrịḅọ iniḅọ pembe Kraịst ḅe ḅereniḅọ na ịgbanịaye nyana ọkụma, cheye gose ori iniḅọ se dada oru ḅẹrẹnemi ḅẹrẹkọn apụ tọrọkọ mun, iniḅọ se Tamụnọ tomonima tọrọkọ mun ka se ini ḅẹrẹ mị famaka?

²Ó nemika na Tamụnọ tomonima ḅẹrẹkọn tomonikiri mị pịrịḅịa ọkụ? Anịọkụma ọ́ ḅẹrẹkọn tomonikiri mị pịrịḅịa ọkụma, cheye gose ómine ineda ḍọkọḍọkọ-a ḅẹrẹkọn ẹka?

³Ó nemika na wa ḅẹrẹkọn enjẹlapụma pịrịḅịa ọkụ? Nde anịọkụma wa ineda mị ḍumo mị ḅe ḅẹrẹkọnka ḅara!

⁴Nemikase ọkọsime-a ḅẹrẹ pakaḅo ọkụma, ómine àrị se chọchị mị ḅie chịẹkiri nyanaka apụ pịrị se ini fama ḅe?

⁵Ḅụgerere sime ọ́ pịrị! Pikipikiye ofori-ẹ, anị sime la-ọkụ la-ọkụ sọnị, ọ́mịna ḅie gbọrị yenemiḅọ pa pakaḅoḅịa ineda Kraịst Ḅe ḅereniapụma ogboku jineaye famaḅịaḅọ.

⁶Anịnakaraka Kraịst Ḅe ḅereni gbọrịḅọ iniḅọ pembe ḅọ se ḅẹrẹkọn warị mun se ḅereni nyanaka apụma ḅẹrẹkọn ini pịrị-ao!

⁷Ye mị mgba ḅe tịḅị anị, ọ́mịna ogboku oloko gboloma ḅẹrẹ ịgbanị mịẹmịẹye omi-ẹ ḅẹsịkị goyegoye ó jokoma ḅịkịsam. Jịnḅọ ọ́ mịẹirima mị ọ́ ḅụ anị iḅitẹịnka? Anị ómine na deinka ini kụrọ ḅara se ọ́ ḅara ye pọkọ ọkị ọkụma?

⁸Anịnakaraka, ómine anị jịnḅọ jịnḅọ mịẹirima pịkị kụrọ ḅara se jịnḅọ jịnḅọ ye pọkọ ọkịarịye-ẹ, pịkị ọ́mịna mịnapụ sọnị!

⁹Pikipikiye ofori-ẹ, ó nemimẹ na sitịḅị nyanaḅọ Tamụnọ Amanyanakiri mị ḍieọkị ẹkẹ. Ómine oḅori se ọ́ ḅụ chịnma; sẹfịapụ anịkanịka oru tẹkẹapụ anịkanịka jịn apụ ere ḍọkịapụ anịkanịka owuḅọ na owuḅọ na gboloma

¹⁰anịkanịka kụrọḅara se yepọkọ ọkịapụ, anịkanịka opu fịye ḍọkịapụ anịkanịka iruḅu tọrụḅaamapụ, anịkanịka jịn apụ ḍukosimapụ, anịkanịka furuapụ—mịna apụma ḅie gbọrịḅọ sọ Tamụnọ Amanyanakiri mị ḍieọkị ẹkẹ.

¹¹Ọ́mịna ḅụ dapụ ḅọrọsa sịkị ọkọsimemẹ. Ọkụma si ḅụ ini ọ́ sịkịrị fịafịamasam; ini ó se osiḅụ wẹrị Tamụnọ Ḅe pịrịsam; ini ọ́ mịẹse Nyanaḅọ Jizọs Kraịst Ḅe ḅụ na pịkị mịna Tamụnọ Tẹmẹ Ḅe na ḅụ ḅọrọ Tamụnọ Ḅe na karakarasam.

¹²Gbọrịḅọ nwọ ḅẹḅịa, “Ini ḅereni ị̀ pịrịmẹ ị̀ ḅụḅẹlẹye goyegoye à nwọ mịẹ.” Iin; ọkụma yegoyegoye ị́rị́ na iḅi famakẹ. Àrị ineda ḅẹḅịa na ini ḅereni ị̀ pịrịmẹ na ị̀ ḅụḅẹlẹye goyegoye à nwọ mịẹ, ọkụma àrị omoniḅọ sọ pịrịḅịaye ofori-ẹ.

¹³Jịnḅọ pịkị nwọ ḅẹḅịa, “Fịye mị sime ḅụlọ pịrịmẹ, ḅụlọ mị pịkị sime fịye pịrịmẹ.” Iin; ọkụma Tamụnọ Ḅe mịẹse maịn mamgba kulumaḅịa. Tomoniḅọ oju mị anị se sẹfịḅịayekẹ, ọkụma anị se fịrịnwẹngị Nyanaḅọ Ḅe pịrị; se Nyanaḅọ Ḅe pịkị oju mị nyana na gbẹịnye se anị pịrịḅịa.

¹⁴Tamụnọ Ḅe fị ḅụ Nyanaḅọ Ḅe sịsẹmamẹ, ọ̀ pịkị mine sọnị nwọ sịsẹmaḅịa, oria kụrọ ḅụ.

¹⁵Ó nemimẹ na ọ́mịna ojuma Kraịst Ḅe oju mị ḅụ pẹkẹrẹ-ẹ. À Kraịst Ḅe oju mị ḅụ pẹkẹrẹ nwọ ọkị se sẹfịḅọ oju ḅụ pẹkẹrẹ nwọ mịẹ ḅe? Anị ineda mịẹ ẹkaye-ẹ!

¹⁶Anịkanịka sosi ma ó nemikẹ, na mịna oju se sẹfịḅọ na gboloma ḅọ ojumịnị ḅụ árị na gbọrịye mịẹmẹ nwọ ḅẹye mị? Fịafịa ḍiri mị iḅiọkụ ḅelema ḍuko pakụmamẹ, “Ini mama apụma ḅo gbọrị oju sọḅịa.”

¹⁷Ọkụma mịna oju se Nyanaḅọ Ḅe na gbolomaḅọ, tẹmẹ ḅụ ori na gbọrịye mịẹsam.

¹⁸Ọ́ sẹfị ḍiki ḅụtọn. Tomoniḅọ mịẹ jịn si goyegoye iniḅọ oju mị na mịẹgboloma nyanakẹ; ọkụma sẹfị ḅẹrẹ ḅarasi nyanaḅọ goyegoye si se mịna ḅụ mịẹmẹ.

¹⁹Ó nemika na ọ́mịna ojuma anị Fịafịa Tẹmẹ Ḅe warị-ẹ, ori anị Tamụnọ Ḅe se ọ́ pịrị pịkị ọ́mịna ḅie anga ḅọ ḅe-ẹ? Ó sime ọ́ ḅụ pịrịkẹ ọkụma ó sime Tamụnọ Ḅe pịrịmẹ;

²⁰ò yelaye se ọ́ fẹmẹ. Anịgose ómine ọ́mịna ojuma se Tamụnọ Ḅe boma fịrịnwẹngị.