Read kirikeni 2 Kọrịntapụ 1 Bible Online

2 Kọrịntapụ 1 - kirikeni bible

2 Kọrịntapụ 1

¹Pọl, Kraịst Jizọs okunwẹngịḅọ ḅe, Tamụnọ Ḅe ḅietọn ḅara ḅụ, pịkịna mịna mịnaḅọ Timoti ḅe na ḅara ḅo ḍiri mị— Ini seni Kọrịnt ḅie sime Tamụnọ chọchị mị na pịkị Akaya ḅie sime Tamụnọ-a tomoni mamgba na fịrịmaye mị:

²Ye mịna Ḍa Tamụnọ Ḅe na, wa Nyanaḅọ Jizọs Kraịst Ḅe na, ḍikiḅụgerere na deinma na se ọ́ pịrị.

³Ó ye wa mịẹḅaka se Tamụnọ wa Nyanaḅọ Jizọs Kraịst Ḍa Ḅe ḅẹ ḍikiḅụgerere ḅụ ḅein Ḍaḅọ Ḅe, ḅarachụa mamgba ḅara ḅo Tamụnọ Ḅe!

⁴Ọ̀ ḅarachụa wa pịrịmẹ mịna ḅụfụka mamgba ḅie, mịẹse wa ineda ḅarachụa tọrụkịrịkịrị ḅụfụkama ḅie sime jịn-apụ nwọ pịrịḅịa ḅara, wa Tamụnọ Ḅe ḅara nyanaḅo ḅarachụa mị ḅụ.

⁵Wa Kraịst Ḅe oria tọn-a ḅụfụkama ḅie ḍiekiri nyanaḅịa ọkụ mị, anị wa pịkị Kraịst Ḅe ḅụ ḅọrọ Tamụnọ Ḅe ḅarachụa ma ḅie ḍiekiri nyanaḅịa ọkụ-ẹ.

⁶Wa nemikase tọrụsiọrịmẹ ḅẹḅẹ, anị ḅarachụa ọ́ pịrị na ọ́mịna ḍụaḅọrọma na gose-ẹ; wa ḅarachụa nyanamẹ ḅẹḅẹ, anịọkụma ómine sọnị pịkị ḅarachụa nyanasam, ini pịkị ómine sọnị se oria tọrụsiọrịma nwọ inemaḅịa ịnyọ nwọse ọ́ pịrịsam.

⁷Anịẹrẹchị wa ọ́mịna ḅụ tọrụseḍikiarịye mị anị ngịsị jike-ẹkẹ; wa nemimẹ na ọ́ nwọ mịna tọrụsiọrịma ḅie ḍiekiri nyana ọkụ mị, anị ọ́ pịkị wa nyana ḅarachụa mị ḅụ ḍiekiri nyanaḅịa ọkụ-ẹ.

⁸Mịnapụ, wa ḅimẹ, Esia pẹkẹrẹ ma ḅie wa nyana ḅụfụka ma se ó ḅiekoroma. Ini se mịna ọgọnọ gbana ikuaye ma ḍụḅa pịkị iku so-ọkụma, wa ḅarị koromakẹ na wa ḍumoḅịa.

⁹Wa ọkịmẹ na ini ḅaa ḅẹrẹ pẹlẹ wa pịrịsam, ọkụma mịn mị mịẹmẹ mịẹse wa kuḅie seni ọ́mịna ḅụ gbana ẹka ḅara, ọkụma kuḅie se Tamụnọ Ḅe ḅụ kẹngẹ gbanaḅịa ḅara, ori anị fịapụma sịsẹma-sịsẹma ḅọ ḅe.

¹⁰Ọkọ sime ḅalafama fị ḅara ḅie ò mine ḍụaḅọrọmamẹ, ọ̀ pịkị wa ḍụaḅọrọmaḅịa, wa pịkị mịna kuḅie seni ọ̀ ḅụgbanasam na ọ̀ pịkị wa ḍụaḅọrọmaḅịa,

¹¹ómine ọ́mịna tẹkẹma ḅie wẹrị ḅarachụa wa pịrịarị ọkụ mị. Tẹkẹ wa pịrị mị ḅụ, anị, anị simeḅịa ọkụ-ẹ na ọ́mịna tọn-a tẹkẹma Ọ̀ nwọ pẹkẹrẹḅịa, Tamụnọ Ḅe pịkị wa ḅẹlẹmaḅịa; tọn-a apụ pịkị inia pụkọ ma nwọ dekichịẹma se mịẹḅaka se ọ̀ ḅẹ wa pịrịḅịa.

¹²Mịn wa seni opuaye mịẹye mị-ẹ: mịna si na iḅi na nemi kuḅie mị mịẹse wa nemi kpaịnmamẹ, na mịn tomonikiri mị ḅie mịna ḍumo mị, anị tẹịn anga mine na ómine na ḅe gboloma mị, anị Tamụnọ Ḅe Oria tọrụkụnka na pịkị karakaraye na ḅie simeye mị, Tamụnọ Ḅe ḍikiḅụgerere kụrọ mị ḅụ anị ḅomẹ tomoni-a nemi ḅụkẹ.

¹³Ómine ineda go, se pịkị kaịnḅoḅịaye kẹngẹ mị wa gịẹịn se ọ́ sẹịnmaye-ẹ. À pịkị tọrụseḍikiaḅẹ na ó ḅo anị kaịnḅo famaḅịa oke nwọ laḅịa.

¹⁴Se Nyanaḅọ Jizọs Ḅe ene mị ḅo laḅịa sịkị ọ́ wa seni ḅụbomaḅịa mine sọnị ó seni ḅụbomaḅịa ḅara mị.

¹⁵Àrị iḅiọkụ seni mịn mị nwọ nemiye gose à tọnmẹ na à tatarị ḅo ọ́ laḅịa, mịẹse ómine mama sịkị se ḅẹlẹma nwọ nyanaḅịa ẹrẹchị.

¹⁶Anịatịḅị à tọnmẹ na à ḅo ọ́ laḅịa à ḅọrọ Masidonia nwọ munḅịa sịkị na à pịkị vinpịkịḅoḅịa sịkị na, ọ́mịna ḅarachụa nwọ nyanaḅịa ẹrẹchị ị̀rị̀ ḅe Judia mun mị ḅụ.

¹⁷À mịn mị nwọ tọn sịkị, à ḅọrọ mama kuḅie nyana? À yetọn àrị sịkị à ḅọrọ ị̀rị̀ ngẹrị iḅi gose tọn, anị gbọrị sịkị ḅụ ḅụkarakarama “Iin, iin” pịkị “Ẹn-ẹn ẹn-ẹn” nwọ ḅẹye gose anị?

¹⁸Tamụnọ Ḅe karakara ọkwẹịn ḅụ, à ḅereni ọ́ pịrịye mị “Iin” anịkanịka “Ẹn-ẹn” kẹ.

¹⁹Anịatịḅị Jizọs Kraịst Tamụnọ Tọkụ Ḅe, Saịlas ḅe na, Timoti ḅe na, ị̀rị̀ na oria ḅẹrẹ nwọ ḍuko ọ́ pịrị ḅọ ḅe “Iin” na “Ẹn-ẹn” na ḅọkẹ. Anịnakaraka, ori Tamụnọ Ḅe anị “Iin-ẹ”;

²⁰anịatịḅị ori anị Tamụnọ Ḅe ḅereniaye mamgba ḅe “Iin Ḅe-ẹ.” Mịn mị mịẹse wa Jizọs Kraịst Ḅe ḅụ ḅọrọ mịna “Amẹn” nwọ ḅẹarịye-ẹ, Tamụnọ Ḅe boma ḅụ.

²¹Tamụnọ Ḅe na mịnaḅụ na mị mịẹse mine na ómine na Kraịst Ḅe ḅie kụrọma chịẹye-ẹ; Tamụnọ Ḅe na mịnaḅụ na mị wa sikima koromaye-ẹ.

²²Ori mị wa nyanamẹ nwọ ḅẹ elekima nwọ seni mịna ḅụ chụaye-ẹ, ori pịkị Fịafịa Tẹmẹ Ḅe se mịna kuḅiemgbọlụma ḅie onyechịẹma ọ̀ nyana wa pịrịye mamgba nwọ pịrịye-ẹ.

²³À Tamụnọ Ḅe se ị̀ya onyechịẹḅọ nwọ mịẹmẹ—ori ị̀ kuḅiemgbọlụ nwọ nemi waraḅẹ! Ḍikitịḅịfoin nyana ọ́ pịrịḅịa ẹrẹchị mị àrị ị̀ kuḅie ḅụ tọnpẹlẹ se ḅarị Kọrịnt mị munkaye-ẹ.

²⁴Ó ḅereniḅịaye wa nwọ tọn ọ́ pịrịkẹ; anịatịḅị wa nemimẹ na ḅereni mị ḅie ọ́ kụrọma chịẹ waraḅẹ. Anịnakaraka, ọ́mịna ḅieḅẹlẹ gose wa ómine na fịrịnwẹngịaḅẹ.