Read kirikeni 2 Kọrịntapụ 13 Bible Online

2 Kọrịntapụ 13 - kirikeni bible

2 Kọrịntapụ 13

¹Mịn ị̀rị̀ ḅe ḅo ọ́ la mị ḅe tẹrẹ-a sịkị karamaye-ẹ. “Mama apụ anịkanịka tẹrẹ-a onyechịẹapụ sime ḅẹrẹ goyegoye ineda chịẹḅịa”—gịẹịn fịafịa ḍiri mị ḍuko ḅara ḅụ.

²À ḅimẹ à ḍuko ómine ḅọrọsa sịkị simịẹapụma pịrị, pịkị ísíapụ mamgba na; à tatarị anị ḍukosam à maịn karama ḅo ọ́ lasịkị mị ḅụ, ọkụma à pịkịna anị ḍukoḅịa mịọkụ, àrị ọ́mịna ḅie sikima warasịkị ḅụ à jịn sịkị se ḅomẹ ḅẹḅẹ, ḅụfụka ḅụ pọkọsoḅịa ḅọ ofori-ẹ.

³Kraịst Ḅe ị̀ ḅụ ḅọrọ ọkwẹịn-aḅẹ nwọ ḅẹye ḍiepakụmaḅịaye mamgba ọ́ nyanaḅịa. Ori ómine na mịẹye mamgba, Ọ̀ ḅụ lọkọkẹ; anịnakaraka, Ori ọ́mịna ogboku Oria kụrọ ḍiepakụmamẹ.

⁴Anịatịḅị ịnyọfa ḅụ ini wẹrị mgbẹsẹchịn ọgọnọ Ọ̀ ḅaamẹ nwọ ḅẹ sọnị, Tamụnọ Ḅe kụrọ ḅụ Ọ̀ ḅọrọ se ḍumomẹ. Wa Ori na gbọrịye mịẹ ḅụ mine sọnị wa ịnyọ nyanakẹ; ọkụma mine na ómine na ḅe gboloma mị ḅụ wa Oria ḍumo ḅie sime Tamụnọ kụrọ mị ḍiaọkịḅịa.

⁵Ómine ọ́mịna ḅụ ma pekeleḍiki se ḅẹrẹkọn ọ́mịna ḅụ ma pịrị, se ḍọkịḅo ọrị nwọfa Oria ḅereni mị ḅie ọ́ wẹrị ḍumoarị otuḅo, pikipikiye ofori-ẹ, ó nemimẹ na Kraịst Jizọs Ḅe Ori ọ́mịna ḅie omi-ẹ? Anị ómine okorona okorona ḅịkịsam nwọ ḅẹye sikima ọkụma.

⁶À kuḅie se gbanamẹ na ó nemiḅịa na mine ḅịkịsa apụkẹ.

⁷Wa Tamụnọ Ḅe tẹkẹmẹ na ó ye mịẹirima ẹkẹ—ye mịna ḅarasọsam nwọ ḅẹye ḍiepakụmaḅịa ẹrẹchịkẹ, ọkụma ọ́ pa karakaraye mị mịẹḅịa ẹrẹchị-ẹ; wa yeḅarasọka apụ simeọkụ nwọ sime waraḅẹ nwọ ḅẹ sọnị.

⁸Anịatịḅị wa ineda kọkọmaye mị na tụḅụrụḅịaye nwọ mịẹ ẹkẹ, ọkụma sime anị kẹngẹ nwọ pịrịmẹ.

⁹Mịna ḅieḅẹlẹmẹ mịna ḅụ ịnyọ ofori sịkị, ọkụma ómine ma ọ́ kụrọmẹ. Anị mịẹse wa pịkị tẹkẹmẹ mịẹse ọ́ karagbasịḅịa ḅara.

¹⁰Anị mị mịẹse à mịn mị nwọ gịẹịnye-ẹ, àrị ọ́ wẹrị sikima warasịkị ḅụ, mịẹse à ḅo ọ́ laḅịa sịkị àrị ómine na kụrọye mịẹ ẹka ḅara, Nyanaḅọ Ḅe se ị̀ pịrị kụrọ mị se fịrịnwẹngị ḅụ—ọ́ nama chịẹmaḅịa kụrọ-ẹ, seni ó sumagbinḅịaye kẹ.

¹¹Mịọkụ, ị̀ya mịnapụ ọ́ ḅaḅa. Ọ́ ḅụkụrọma, mịẹse ọ́ karagbasịḅịa ḅara; àrị ọ́ tẹkẹ se ḍukoarịye ma ọ́ nwọ poki; ó jịnḅọ jịnḅọ na kura; ó deinma ḅụ anga. Ḅẹlẹma na deinma na ḅụ ḅein Tamụnọ Ḅe pịkịna ómine na simeḅịa.

¹²Ọ́ mịnapụ ḅịpị nọnjụ ḅara se jịnḅọ jịnḅọ kereni. Tamụnọ-a tomoni mamgba inia kereniḅịpị seni ọ́ fịrịmamẹ.

¹³Nyanaḅọ Jizọs Kraịst Ḅe ḍikiḅụgerere mị, Tamụnọ Ḅe ḅẹlẹma mị, Fịafịa Tẹmẹ Ḅe ḅe mịẹgboloma mị na ómine mgba na sime.