Read kirikeni 2 Kọrịntapụ 3 Bible Online

2 Kọrịntapụ 3 - kirikeni bible

2 Kọrịntapụ 3

¹Mịn mị anị fie-ao na wa pịkịna mịna ḅụ ma bomaḅẹ? Anị ineda ọkọ paka ḅe, dapụ mịẹarị ḅara mị na, mine seni ó ḍie anịkanịka ọ́ mịẹ, wa seni nweni ḍieḅịa ḍiri gịẹịn mị, wa nwọ ḅimẹ?

²Ómine na mịnaḅụ na anị wa nyana ḍiri mị-ẹ, mịna kuḅiemgbọlụma ọgọnọ gịẹịn waraḅẹ ḅẹḅọ ḅẹḅọ nemi se goḅịaye mị.

³Anị ḅelepakamẹ na Kraịst Ḅe ḅarana mị ḍiri mị gịẹịnmẹ se pịkị mịna ḅara ḅụ anị se sẹịnmẹ. Ini inki seni gịẹịnkẹ, ọkụma ḍumo Tamụnọ Ḅe Tẹmẹ mị ḅụ-ẹ pịkị ḍụparị pẹkẹrẹma ọgọnọ ḅụkẹ, ọkụma tomoni-a kuḅiemgbọlụma ọgọnọ ḅụ-ẹ.

⁴Wa mịn mị nwọ ḅẹmẹ, anịatịḅị wa Kraịst Ḅe ḅụ ḅọrọ kuḅie se Tamụnọ Ḅe ḅụgbana waraḅẹ.

⁵Mịna ḅie sime se wa ọkị na anị ma mịẹse wa mị fịrị mị nwẹngịaḅẹ nwọ ḅẹḅịaye ofori-ẹ. Wa nyana se anị nwẹngịarị ịnyọ mị Tamụnọ Ḅe ḅụ ḅomẹ;

⁶ori mị wa mịẹse wa ịwọ oloko mị ḅe fịrịnwẹngịarịye-ẹ, mịn mị gịẹịn oloko mị ḅụ anị ḅokẹ ọkụma Tẹmẹ Ḅe ḅụ ḅomẹ, anịatịḅị gịẹịn oloko mị fị ọkịḅomẹ, ọkụma Tẹmẹ Ḅe mị ḍumo pịrịye-ẹ.

⁷Oloko mị ini ḍụparị pẹkẹrẹ ma ọgọnọ ḅụ anị soku gịẹịn koromamẹ, pịkị Tamụnọ boma mị mịna ḅụ ḍiepakụmamẹ, ini anị pịrị sịkị. Moziz ḅe tọrụ mị ḅe ḅịa mị sịkịrị fa aḅẹ nwọ ḅẹ sọnị, anị opuma kụrọmẹ, nwọ ḅe sọ tomonima ineda tọrụ se dadama anị ḍikikẹ, mịẹka mịẹka ḅara ḅụ fị ọkịḅo Oloko mị ọkọ sime boma nwọse ḅo ọkụma,

⁸ḍụḅatẹịn boma Tẹmẹ Ḅe fịrị mị nwọ ọkịḅoḅịa ọkụ ḍiki!

⁹Tomoni-a ḅẹrẹḅarasi ọkịḅo fịrị mị boma nyanamẹ, anịọkụma tomoni-a karakaraye se ḅoḅịa fịrị mị ọkịḅoḅịa ḍụaḅọrọma mị ḍụḅa laḅịa ọkụ ḍiki!

¹⁰Wa pa nwọ ḅẹḅịa na mịọkụ sime ḅịatẹịn boma mị gose ḅọrọsa sịkị opuma ḅịa boma mị anị sosam.

¹¹Anịatịḅị ḅọlọka sịkị se simeye mị nemikase boma nyanamẹ nwọ ḅẹ ọkụma, simegbasoye mị ḅie simeḅịa boma ḅakatẹịnḅịa ọkụ ḍiki!

¹²Wa mị tọrụseḍikiye mị nwọ nyanaye gose, wa opuma kuḅie kụrọ nyanamẹ.

¹³Moziz ḅe sime ḅara wa nwọ simekẹ, tọrụgbẹịnye nwọse ọ̀ tọrụ gbẹịnḅọ ḅe, mịẹse Izrẹlapụma ọ̀ tọrụ mị ọrị ẹka ḅara, ḅịarịye mị sịkịrị se ḅarị anịa ḅụ ḍiepakụmakẹ.

¹⁴Inia kuḅie ma kọkọmaye ḍuko ḅụ, àrị gbẹịnmẹ; ọkịḅo mịmgba ene mị la sọnị ini anị gbọrị tọrụgbẹịnye mị nwọ seni inia kuḅie ma gbẹịn waraḅẹ, ini olomu ọḅọkụ ḍiri mị nwọ go-arị sịkị. Tomoniḅọ ḅo Kraịst Ḅe na gbolomaka simeogbo tọrụgbẹịnye mị anị soẹkẹ.

¹⁵Mịmgba sọnị, ini Moziz Oloko mị go-arị sịkị, tọrụgbẹịnye mị pa inia kuḅie ma gbẹịn waraḅẹ.

¹⁶Ọkụma anị ineda soḅịa, gịẹịn ḍiri mị ḍuko ḅara ḅụ: “Moziz ḅe oria tọrụgbẹịnye mị somẹ ọ̀ tọrụ pịkị Nyanaḅọ Ḅe da sịkị.”

¹⁷Mịọkụ mị ḍiri tọrụ mị ḅie, “Nyanaḅọ Ḅe” nwọ ḅẹarịḅọ ḅe, anị Tẹmẹ Ḅe-ẹ, se Nyanaḅọ Ḅe Tẹmẹ sime nyọ ngẹrị-ḅụ-nyana omi-ẹ.

¹⁸Anịọkụma mine mgba nwọ ye seni tọrụ gbẹịnka apụma, wa Nyanaḅọ Ḅe boma mị nwọ ḍiepakụmamẹ, se anị gbọrị boma mị, Nyanaḅọ Ḅe Tẹmẹ Ḅe ḅara wẹrị ḅo boma mị, wa ḍinma ò sime gbọrị ḅara mị ḅụ wẹrịmẹ, simegbaso opu boma kiri mị ḅie.