Read kirikeni 2 Kọrịntapụ 4 Bible Online

2 Kọrịntapụ 4 - kirikeni bible

2 Kọrịntapụ 4

¹Tamụnọ Ḅe Oria ḍikiḅụgerere ḅụ mịn fịrị mị nwọse wa pịrịsam, na wa nwẹngị-ẹ anịgose mịna kuḅie lọkọkẹ.

²Wa ḅọịaye ma na ḅụgererema mịẹmịẹaye mamgba nwọ seni anga pịrịsam; wa epele seni ye mịẹkẹ, wa pịkị iruo seni Tamụnọ ọkwẹịn mị ḅie chụakẹ. Ḅeinsa enekuḅu ḅe kọkọmaye ḅụ wa wẹrị Tamụnọ Ḅe tọrụkuḅu mịna ḍumoma nwọ kọn aḅẹ, se ḅụkụrọma mịna ḅụ ma seni tomoniḅọ goyegoye ḅe iḅi na si na nemi iḅi tọrụkuḅu ḅụ wẹrị waraḅẹ.

³Anịatịḅị wa ḍukoarị iḅiọkwẹịn mị ḅọịmẹ ḅẹḅẹ, anị ḅọị farị apụma kẹngẹ nwọ pịrịmẹ.

⁴Ini ḅerenikẹ, anịatịḅị mị tomonikiri mị ḅe si oru ḅe inia kuḅie ma se kanakana mị ḅie chu waraḅẹ. Ori ini sikima waraḅẹ ḅịa inia ọgọnọ sararị enekuḅu mị ọrị ḅụ, Iḅi Ḅẹrẹ mị ḅụ wẹrị ḅo enekuḅu mị, Kraịst Ḅe boma mị gbolomaye mị, Tamụnọ Ḅe simeọkụ mị jokoma nwọ sime ḅọ ḅe.

⁵Anịatịḅị wa mịna ḅụ ḅẹrẹ nwọ ḍukokẹ, Jizọs Kraịst Ḅe ḅẹrẹ mị wa ḍukoarịye-ẹ, na ori Nyanaḅọ Ḅe-ẹ, na mine pịkị ọ́mịna fịrịnwẹngịapụ-ẹ Jizọs Ḅe gose.

⁶“Kanakana mị ḅie, enekuḅu mị ḅịa pakaḅịa!” nwọ ḅẹ Tamụnọ Ḅe, Ori gbọrị Tamụnọ Ḅe mị mịẹse Oria enekuḅu mịna kuḅiemgbọlụma ḅie ḅịapakaye-ẹ, Tamụnọ boma mị ḅe ḍawọ nemi mị enekuḅu mị nwọ ọkịḅo wa pịrịmẹ, Kraịst Ḅe tọrụ ḅịarịye mị.

⁷Anị sọnị mine mị tẹmẹ anga ngọ nyana apụma-ẹ, wa aḅaịn se tẹmẹ ḅẹlẹ simeọkụ sime waraḅẹ, se ḍiepakụma na kụrọtẹịn kụrọ mị sime Tamụnọ Ḅe pịrịmẹ, sime mine pịrịkẹ.

⁸Wa ḅọlọka ḅọlọka ḅụfụka nyanamẹ, ọkụma ini gbọtụḅara wa kọsịmakẹ; dasịkị wa makuḅie makuḅie nyanamẹ, ọkụma wa kuḅie sinkẹ;

⁹tọn-a tarakapụ omi-ẹ, ọkụma wa ikia nyanaka sịkị ofori-ẹ; dasịkị ye si ḅara se wa lamẹ nwọ ḅẹ sọnị, ini wa ḅaakẹ.

¹⁰Sịkịmamgba wa mịna fịḅịa ojuma nwọse Jizọs fị mị pụra pụramẹ, mịẹse ini mịna ojuma ḅụ oria ḍumo mị sọnị nwọ ọrịḅịa ḅara.

¹¹Mịna ḍumo mamgba ḅụ wa sịkịmamgba fị ḅie omi-ẹ Jizọs Ḅe tịḅị gose, mịẹse mịna fịḅịa oju mị ḅụ ini oria ḍumo mị nwọ ọrịḅịa ḅara.

¹²Mịn mị fieaḅẹ na fị mịna ḅie fịrịnwẹngịaḅẹ; ọkụma ḍumo ọ́mịna ḅie fịrịnwẹngịaḅẹ.

¹³Fịafịa ḍiri mị nwọ ḅẹmẹ, “Àrị ọkwẹịnmẹ anịatịḅị à ḅerenimẹ.” Anị gbọrị ḅereni tẹmẹ mị ḅụ mine sọnị wa ọkwẹịnmẹ anịatịḅị wa ḅerenimẹ.

¹⁴Wa nemimẹ na Tamụnọ Ḅe, wa Nyanaḅọ Jizọs Ḅe nwọ sịsẹma se ò ḅo ḍumo ḅọ ḅe, pịkị mine sọnị nwọse Jizọs Ḅe ḅụ chụa sịsẹmaḅịa, se mine na ómine na nwọ ọkị gboloma ọ̀ tọrọkọ ḅoḅịa.

¹⁵Mịn mị mgba ọ́mịna tịḅị gose-ẹ; se Tamụnọ ḍikiḅụgerere mị nwọ jịn ḅakatẹịn tomoni nwọ lama lama mun-arị sịkị, ini pịkị ḅakatẹịn mịẹḅaka tẹkẹ kọn Tamụnọ Ḅe boma mị nwọ pịrịḅịa.

¹⁶Mịn mị gose mịna kuḅie ngịsị lọkọkẹ. Tọrụ se ọrị na mịna oju mị kelekelema ḅụrụmamun-aḅẹ nwọ ḅẹ sọnị, mịna tẹmẹ anga ḅe oju mị ini nwọ mịẹ ịwọmaḅẹ ene-ḅene-ḅene ḅụ.

¹⁷Wa mịọkụ ọrịarị simegbaso ẹka boka ḅụfụka mị, anị mine ọkịḅo simegbaso opu boma ḅie chuḅịa, ḅakama ḍụḅatẹịn ḅụfụka mị nẹngịye mị.

¹⁸Anịatịḅị wa tọrụ se, wa ọrịarịye ma ḅụ wẹrịkẹ, ọkụma tọrụ ma ọrịkaye ma ḅụ-ẹ. Ineda ọrịḅịaye ma àrị sime ḅọlọmakẹ ọkụma ineda ọrị ẹkaye ma àrị simegbasomẹ.