Read kirikeni 2 Kọrịntapụ 5 Bible Online

2 Kọrịntapụ 5 - kirikeni bible

2 Kọrịntapụ 5

¹Anịatịḅị wa nemimẹ na wa mịọkụ ḅie simearị warị mị—mịna ojumịnị mị-ẹ mị tomonikiri mị—kansaraḅịa sịkị, Tamụnọ Ḅe soḅie jịn warị nwọ nyana wa pịrịḅịa se wa anịa ḅie angaḅịa, ori ḅara na namaḅịa warị mị, simegbasoḅịaye-ẹ.

²Se mịọkụ wa ḅiedeaḅẹ; soḅie warị mị ḅie sọ angaḅịa ẹrẹchị mịna kuḅie chịẹ-chịẹ-chịẹaḅẹ;

³anị mị nwọ ọkị chụa ḅụ wa ḅarị oju nyanaka apụ nwọ sọ ẹkẹ.

⁴Wa mịn tomonikiri mị ḅe ojumịnị mị ḅie simearị sịkị wa ḅiedeaḅẹ, anị wa pụnụmaḅẹ nwọ ḅẹ ḅara, wa ḅarị anịa ḅie sime ma-ẹ nwọ ḅẹ ḅarakẹ, ọkụma wa ḅimẹ wa soḅie ye mị nwọ nyana chụa, mịẹse ḍumo mị fịḅịaye mị nwọ mịnị ọkịḅịa ḅara.

⁵Tamụnọ Ḅe mị wa karakarama mị ḍinma mị nwọ pịrịarịye-ẹ, Ọ̀ pịkị Ọ̀ Tẹmẹ Ḅe nwọse wa pịrịmẹ, seni onyechịẹma Ọ̀ mịẹ wa pịrịḅịaye nwọ pịrị ḅụ.

⁶Anị mịẹse mịna kuḅie sịkịmamgba kụrọ waraḅẹ. Wa nemimẹ na wa nwọ mị oju mị ḅie simearị sịkị, wa Nyanaḅọ Ḅe ḅụ wẹrị sikima waraḅẹ.

⁷Anịatịḅị mịna ḍumo anị ḅereni ḅụ simeye-ẹ, tọrụ se ọrịyekẹ.

⁸Wa kuḅie kụrọma waraḅẹ, anị pịkị mịna ḅụḅẹlẹtẹịnḅịa wa mị oju warị mị nwọ koroma so se mun Nyanaḅọ Ḅe na sime.

⁹Yegoyegoye nwọ nẹngị ḅụ, anị simeọkụ simeọkụ sọnị wa ḅimẹ wa ọ̀ ḅụḅẹlẹḅịaye nwọ mịẹ, anị ḅọrọ mịọ sime mịna warị mị ḅie, anịkanịka anịnyọ simeḅịaye sọnị.

¹⁰Mine mgba wa Kraịst Ḅe tọrọkọ mịna ḅụ ma nwọ ḍiepakụmaḅịa, ọ̀ ḅẹrẹkọn wa pịrịḅịa ẹrẹchị. Ḅọḅọ iniḅọ gbẹịnye nwọ ọkịḅịa, iniḅọ mịẹ sa ye laḅara ḅụ, iniḅọ ḍumo ḅụ, mịn oju ḅie, anị ḅọrọ iḅiye-o anịkanịka siye sọnị.

¹¹Nyanaḅọ Ḅe ḍikiḅalafa mị fiearịye wa nwọ nemimẹ, anịgose wa ọkwẹịn tomoni pịrị se ini nyana ọkịaḅẹ, Tamụnọ Ḅe ómine nemi karama waraḅẹ, à pịkị tọrụseḍikimẹ na ómine ọ́mịna kuḅiemgbọlụma ḅie iḅiọkụ ị̀ nemi waraḅẹ.

¹²Wa kpoto mịna ḅụ ma tokoni ọ́ pịrịkẹ; anịnakaraka wa ḅụkụrọmaḅẹ ọ́ mịẹse ó gose wa seni opuayemịẹḅịaye ọ́ nwọ nyanaḅo, mịẹse ómine ineda ḍikitọrụ ḅụ, mịẹmịẹye ḅụkẹ tomoniḅọ seni opuayemịẹḅịa apụma ḅịpị nwọ pẹkẹrẹḅịa ḅara.

¹³Wa kọkọma nọmụ wara-ao? Anị Tamụnọ Ḅe gose-ẹ. Mụnọ se mịna tọrụ gbẹlẹ wara-ao? Anị ómine gose-ẹ.

¹⁴Kraịst Ḅe ḅẹlẹma mị ḅụ mị ini ḅẹrẹtọn wa pịrịarịye-ẹ, mịọkụ wa ḅo nemisam na gbọrị tomoniḅọ fị nwenimgba pịrịmẹ nwọ ḅẹ sịkị, anị mị fieaḅẹ na nwenimgba oria fị ḅụ ye ḍiaọkịmẹ.

¹⁵Ọ̀ fị nwenimgba pịrịmẹ, mịẹse ḍumo-arịapụma ḅarị ḍumo ngẹrị inia ḅụ ma pịrị ẹka ḅara, ọkụma ḍumo ini gose fị se ḅo pịkị ḍumo ḅọ ḅe nwọ pịrịḅịa ọkụ.

¹⁶Anịọkụma wa ḅarị tomoniḅọ ḅara se ḅẹrẹkọn tomoniḅọ goyegoye nwọ pịrịḅịa ọkụ ofori-ẹ. Wa sosi gbọrị sịkị tomoniḅọ ḅara nwọ seni ḅẹrẹkọn Kraịst Ḅe pịrịmẹ nwọ ḅẹ sọnị, wa ḅarị ọkọ mịẹ-ẹkẹ.

¹⁷Tomoniḅọ goyegoye Kraịst Ḅe ḅie sọ sịkị, iniḅọ ịwọ ḅọ nwọ sọsam; olomu ḅọ ḅe ọ̀ ḅarị ofori-ẹ ịwọ ḅọ ḅe ḅosam.

¹⁸Tamụnọ Ḅe mị àrịmgba nwọ mịẹsaye-ẹ. Kraịst Ḅe ḅụ ḅọrọ tarakapụ kiri ḅụ wa ḍinma se wa seni oria ikiapụ nwọ mịẹ ḅọ ḅe pịkị jịn apụ mịẹse ini ḅo pịkị oria ikiapụ sọ fịrị se wa pịrị ḅọ ḅe.

¹⁹Mịna oku anị, na Tamụnọ Ḅe Kraịst Ḅe ḅụ ḅọrọ tomoni mamgba na ḅẹrẹfamasam. Tamụnọ Ḅe inia sima ḅe kịẹnḅịpị nwọ kịẹn inia ọgọnọ gbanakẹ, Ọ̀ pịkị ini na ḅẹrẹfamaḅịa oku se wa fịrịmasam.

²⁰Anịọkụma mị mine-ẹ, mịọ Kraịst Ḅe tọrụḍinma ọkwẹịn ọ́ pịrịaḅẹ, Tamụnọ Ḅe mịna ḅụ ḅọrọ ọkwẹịn ọ́ pịrịaḅẹ nwọ ḅẹye ọkụ; Kraịst Ḅe ẹrẹ ḅụ wa ọ́ tẹkẹmẹ, ye Tamụnọ Ḅe tarakapụ kiri ḅụ ó ḍinma oria ikiapụ nwọ mịẹ.

²¹Kraịst Ḅe si Ọ̀ ḅụ ofori-ẹ, ọkụma mịna tịḅị gose Tamụnọ Ḅe Ọ̀ mịẹse Ọ̀ mịna sima nwọ ḍiaọkịmẹ, mịẹse mine, ori na gbọrịye mịẹ ḅụ, Tamụnọ Ḅe iḅimịẹmịẹye mị nwọ ḍiaọkịḅịa ḅara.