Read kirikeni 2 Kọrịntapụ 8 Bible Online

2 Kọrịntapụ 8 - kirikeni bible

2 Kọrịntapụ 8

¹Mịnapụ, wa ḅimẹ Tamụnọ Ḅe seni Masidonia ḅie sime chọchị ma pịrị ḍikiḅụgerere mị mịẹsaye ma ọ́ nwọ nemi.

²Ini siḅara nwọse ini ḍaḍikisam ini ọrị ḅọrọsa ḅụfụkama gose; ọkụma inia ḅieḅẹlẹ so-ọkụma, ini ọḅụḍikika ḅara nwọ seni ḅara sarasarama ye pịrịmẹ, ini opuma igweinmẹ nwọ ḅẹ sọnị.

³Àrị ineda ḍuko kụrọma ọ́ pịrịḅịa, na ini ineda pịrịḅịa ọkụ ini nwọ pịrịmẹ, pịkị anị ḅara mị nẹngịma ḅara ini ḅereni inia ḅụ pịrị ḅara ḅụ.

⁴Ini opuma wa tẹkẹmẹ, na wa pa ẹmbẹ se ini pịrị, ini sọ pa ḅarachụa Judia ḅie sime Tamụnọ-a tomonima pịrị.

⁵Anị wa se ḅietọn ḅara mị nẹngịmẹ! Tatarịye ini inia ḅụ ma seni Nyanaḅọ Ḅe pịrịmẹ, anịsịkị Tamụnọ Ḅe ḅereni ḅara ḅụ ini pịkị inia ḅụ ma seni wa pịrịmẹ.

⁶Anị mịẹse wa Taịtọs ḅe ḅẹmẹ, mị fịrị mị nwọ sakị ḅọ ḅe, na ori anị nwẹngịmamun se ḅarachụa ọ́ pịrị, mị ḅẹlẹma fịrị mị ọ́ nwọ nwẹngị karama.

⁷Ọ́ pẹrẹ waraḅẹ ọ́ nyanaye mamgba ḅụ, ḅereni ḅụ na, ọkwẹịn ḅụ na, ḍawọnemi ḅụ na, ḅarachụa gose kuḅie chịẹ-chịẹ-chịẹ ḅụ na, ọ́ pịkị nyana wa pịrị ḅẹlẹma ḅụ na. Anị mịẹse wa ḅimẹ ọ́ pịkị mị ḅẹlẹma fịrị mị ḅie sọnị ḅara sarama.

⁸À chụa ọ́ pịrịarị gbọrị oloko ofori-ẹ. Ọkụma jịn apụ ḅarachụa ḅịa ḅara gose kuḅie chịẹ-chịẹ-chịẹ àrị ḅara nwọse ó ḍie mị-ẹ, à ḅụkụrọma ḍọkịḅo ḅiaḅẹ ọ́mịna ḅẹlẹma mị kọkọmaye otuḅo.

⁹Wa Nyanaḅọ Jizọs Kraịst Ḅe ḍikiḅụgerere mị ó nemi waraḅẹ; Ọ̀ pẹrẹ la-ọkụ mị mgba Ori ómine gose Ọ̀ ḅụ se igweinḅọ mịẹmẹ, mịẹse Ori Oria igwein mị ḅụ ḅọrọ ó seni alakọn apụ mịẹḅịa ḅara.

¹⁰Ị̀ kuḅie ọkụma anị iḅitẹịnḅịa ḅọrọsa kụra mị ḅie ọ́ sakịye mị mịọkụ ọ́ nwọ mịẹkarama. Ómine mị tatarị mịẹye-ẹ nwọ ḅẹye kẹngẹkẹ, ọkụma tatarị anị mịẹ mị nwọ ḅereni ọkịye-ẹ.

¹¹Anị-ẹ nwọ ḅẹ sịkị, ómine anị mịẹmamun, se fịrị mị nwọ nwẹngị karama! Ó kuḅie chịẹ-chịẹ-chịẹ ḅara ḅụ wẹrị anị mịẹḅịa ẹrẹchị tọn ḅara mị, ọ́ pịkị nwọse kuḅie chịẹ-chịẹ-chịẹ ḅara ḅụ anị mịẹkarama, ọ́ pịkị mịọkụ ọ́ nyanaye nwọse anị mịẹ.

¹²Pịrị ḅụ ọ́mịna kuḅie nemikase chịẹ-chịẹ-chịẹ ḅara nwọ simemẹ ḅẹḅẹ, Tamụnọ Ḅe Ori ọ́ nyana se pịrịḅịaye mị ọkịḅịa, ọ́ nyanaka yekẹ.

¹³Anị ḅẹkẹ na à jịn apụ sin sikimaḅịa ḅara ḍọkịaḅẹ, se ikuye seni ọ́ pụnụmaḅẹ, ọkụma ọ́ nwọ mịọkụ tọn-aye nyana warasịkị, anị ḅụgbẹịnmẹ ọ́ ḅarachụa ye ḅụpalịma apụma pịrị. Anịsịkị ye ọ́ ḅụ palịmamẹ ḅẹḅẹ ini tọn-aye nyana sịkị ḅụ ini ḅarachụa ọ́ pịrịḅịa. Mị ḅara mị ḅụ mama angama gbasịaḅịa.

¹⁵Fịafịa ḍiri mị ḍuko ḅara ḅụ na, “Ḅakama ye koḅiriḅọ ḅe nyana kuku ḅakaye ofori-ẹ, pịkị bokaye koḅiriḅọ ḅe, oria ye ịrụtẹịnkẹ.”

¹⁶Wa mịẹḅaka se Tamụnọ Ḅe ḅẹmẹ, Ọ̀ Taịtọs ḅe mịẹse wa ḅi ḅara mị se kuḅie chịẹ-chịẹ-chịẹ ḅara ḅụ, ḅarachụa ọ́ pịrịye gose!

¹⁷Ori iḅiọkụ se wa ḅiye mị ḅereni ọkịmẹ nwọ ḅẹye kẹngẹkẹ; ọkụma ò kuḅie chịẹ-chịẹ-chịẹ so-ọkụma ḅarachụa ọ́ pịrị gose ori ngẹrị ḅereni se ọ́ damaḅo mị ḍuko pẹlẹmẹ.

¹⁸Wa ini, opu osi se chọchịma ḅie mgba pịrị mịnaḅọ ḅe seni ọ̀ ḅụ chụa ọ́ fịrịmaḅẹ, Oria iḅiọkwẹịn mị ḍuko mị ḅụ.

¹⁹Anị mị sikima ọkụma, chọchịma pịkịna ọ̀ sẹlẹ se ọ̀ tọn pakụma waraḅẹ na ọ̀ mịna ḅụ sọ se nwẹngịma ḅọrọ wa Nyanaḅọ Ḅe boma gose mị ḅẹlẹma fịrị mị pụra nwẹngị pịkị se ḍiepakụma na wa ḅimẹ wa ḅarachụa.

²⁰Wa opuma abala ḅara nwọse mị ḍikiḅụgerere ḍiepịrịye fịrị mị nwẹngịaḅẹ, mịẹse ḍukoye anịa ḅie pakaḅo ẹka ḅara.

²¹Wa se kuḅie chụa ye anị karakaraye mị mịẹ, Nyanaḅọ Ḅe tọrụkuḅu ḅụ kẹngẹkẹ, ọkụma pịkị tomoniḅọ ḅe tọrụkuḅu ḅụ sọnị.

²²Anịẹrẹchị wa mịna mịnaḅọ ḅe seni inia ḅụ chụa fịrịmaḅẹ; wa tọn-a sịkị nwọse ọ̀ ḍaḍikisam se ḍọkịḅosam na ḅarachụa gose ò kuḅie chịẹ-chịẹ-chịẹmẹ. Mịọkụ ò kuḅie ọ́mịna ḅụgbana warasịkị, ò kuḅie pịkị chịẹ-chịẹ-chịẹ tẹịnḅịa ḅarachụa ḅụ.

²³Taịtọs ḅe ọkụma ori ị̀ya arụḅọ-ẹ, se ị̀rị̀ na gboloma fịrịnwẹngịaḅẹ ḅarachụa ọ́ pịrịḅịa ẹrẹchị, ísí-a mịnapụma, ọ̀ ḅụ sọ se mun-arị apụma ọkụma ini chọchị ma tọrụ ḍinma waraḅẹ, se boma ọkịḅo Kraịst Ḅe pịrịaḅẹ.

²⁴Ómine ọ́mịna ḅẹlẹma se ini ḍie, mịẹse chọchị mamgba ḅereniḅịa ḅara na wa karakaraye ḅụ ó se ḅụbomamẹ.