Read kirikeni Galesia 4 Bible Online

Galesia 4 - kirikeni bible

Galesia 4

¹Ọkụma ḍukomamun ḅụ—ḍaḅọ ye nwọ ḍiaọkịḅịa tọkụ ḅe, ini omoniḅọ mịẹ ọkụ nwọse ọ̀ mịẹḅịa oria boka sịkị mị ḅụ, ori kọkọmaye goyegoye nwọ nyanamẹ ḅẹ sọnị.

²Ma ò boka sịkị ḅụ, ò ḍikiḍiki pịkị ye se ọrụtọn koroma ọ̀ pịrị apụma chuku ḅie ò simemẹ ọkịmun ḍawu ḅe tọn sịkị mị la.

³Anị gbọrị ḅara mị ḅụ, mine mgba omoniapụ sọ se tomonikiri ḅie sime ḅẹrẹtọn-arị tẹmẹ ma nwọ pịrịmẹ se ḅo tẹmẹ anga ḅe ogulasa apụ nwọ sọmẹ.

⁴Se karakara sịkị mị kuluma ḅụ ḅo lasịkị, Tamụnọ Ḅe oria tọkụ ḅe se fịrịmamẹ. Eremeniḅọ yiḅọ ḅara ọ̀ nwọse ḅomẹ, se Juapụma Oloko mị chuku ḅie simemẹ,

⁵se Oloko mị chuku ḅie sime apụma nwọ pẹkẹrẹ pakụmamẹ mịẹse wa ḅo Tamụnọ awọ nwọ sọḅịa ḅara.

⁶Se ḍiepakụma na ómine Tamụnọ awọ-ẹ nwọ ḅẹye gose, Tamụnọ Ḅe oria Tọkụ Ḅe Tẹmẹ nwọse mịna kuḅiemgbọlụma fịrịmamẹ, mịn ḅara mị nwọse oloku Tẹmẹ Ḅe, “Ḍaḅọ, Ị̀ Ḍa.”

⁷Anị-ẹ nwọ ḅẹ sịkị, ị́rị́ ḅarị omoniḅọkẹ ọkụma furo tọkụ-ẹ. Anịọkụma ị́rị́ oria tọkụ-ẹ nwọ ḅẹ warasịkị, Tamụnọ Ḅe ọ̀ nyana oria awọma pịrịye mamgba nwọse ị́ pịrịḅịa.

⁸Ḅọrọsa sịkị mị ḅụ Tamụnọ Ḅe ómine ò nemikẹ, anị mịẹse ómine omoniapụ sọ tamụnọka yema nwọ pịrịmẹ.

⁹Ọkụma mịọkụ ọ́ Tamụnọ Ḅe nemisam nwọ ḅẹ sịkị—anịkanịka à nwọḅẹḅịa, mịọkụ Tamụnọ Ḅe ó nemisam nwọ ḅẹ warasịkị—nde ó gose vinpịkị àrị, ịnyọ nyanaka tịḅịfoinma ḅẹrẹ tọn ọ́ pịrị sime tẹmẹ ma nwọ damamunḅịaye? Nde ó gose vinpịkị kpoto mun arịa omoniapụ nwọ sọḅịaye?

¹⁰Ó sosikima tọrụ se kịrị enema na, akalụma na, sịkịma na nwọ ḍikiḍikimẹ, pịkị kụrama na.

¹¹Ó gose ị̀ ḅụ ḅalaḅalamẹ! Anị ḅẹ-ao na, à nwẹngị ọ́ pịrị fịrị mamgba papa fa nọ?

¹²Àrị ọ́ tẹkẹmẹ, ị̀ya mịnapụ, ómine à simeọkụ sime. Ị̀rị̀, à kọkọ ó simeọkụ sime. Ó seni ị̀ mịẹsa siye ofori-ẹ.

¹³À gose tatarị sịkị iḅiọkwẹịn mị ḍuko ọ́ pịrịye ọ́ nwọse ḅiekoroma; anịatịḅị ị̀ ḅụ iḅikẹ.

¹⁴Ị̀ya oju ḅụ à sime ḅara mị ḍaḍiki sọ ọ́ pịrịmẹ nwọ ḅẹ sọnị, ómine ị̀ ḍikisimakẹ, ọ́ pịkị ị̀ sịkịkẹ. Anịnakaraka, soḅie enjẹlḅọ ọkịḅịa ḅara ọ́ nwọse ị̀ ọkịmẹ; ọ́ Kraịst Jizọs Ḅe ọkịḅịa ḅara ọ́ nwọse ị̀ ọkịmẹ.

¹⁵Ọ́mịna ḅie opuma ḅẹlẹmẹ! Cheye pakasa? Ị̀rị̀ na mịnaḅụ na ineda ḅẹḅịa na ómine mgbọkụ ọ́mịna tọrụmgbọlụma nwọ sọkị ị̀ pịrịsam, ómine ineda mịẹḅịa nwọ ḅẹ ọkụma.

¹⁶Mịọkụ à ḅo ómine na tarakaḅọ nwọ sọ sa, à kọkọmaye mị nwọ ḍuko ọ́ pịrịye gose?

¹⁷Ísíapụma ini ó gose anịkanịka ḅẹaḅẹ, ọkụma ọ́mịna ḅụ iḅi gosekẹ. Ini bebema ḅiarịye anị ị̀ ḅụ ómine pusikima mị-ẹ, mịẹse ómine ini gose anịkanịka nwọ ḅẹḅịa ọkụ, anị ini ó gose anịkanịka ḅẹarị ọkụ mị.

¹⁸Mịọkụ, anị iḅimẹ anị ọkọ sime anịkanịka nwọ ḅẹye mị, gose ọkọ mịẹarịye mị nemikase iḅiye-ẹ nwọ ḅẹḅẹ—mịn mị kọkọmaye-ẹ sịkịmamgba, àrị ómine na sime sịkị kẹngẹkẹ.

¹⁹Ị̀ ḅụ yela awọ! À pịkị, yi jikearị nyengiḅọ ḅara nwọse ḅụfụka nyanaḅẹ, à pịkị anị gbọrị ḅụfụka mị nyanamẹ, ó gose ọkịmun Kraịst Ḅe sime ḅara mị ọ́mịna ḅie sọ sịkị laḅịa.

²⁰Mịọkụ, à pa ḅọrọ ómine na omi ọkụma, ị̀ ḅụḅẹlẹḅịa, mịẹse ọ́mịna ḅụ à jịn kịrị ḍumokọnḅịa ọkụ. Àrị opuma ó gose kpalakpalaḅẹ!

²¹Ye àrị ómine Oloko mị chuku ḅie sime ḍọkịarịapụ ma nwọ gbela: Oloko mị ḍukoye mị ọ́ naaka?

²²Anị nwọ ḅẹmẹ, na Ebraham ḅe mama owuapụ awọ ọ̀ nwọ nyanamẹ, omoniḅọ ma gbọrịḅọ nwọ yimẹ, ísí ḅọ ḅe furo tọkụ ma ò yimẹ.

²³Tọkụ yiyi ọkụ ini nwọse omoniḅọ ma yi ọ̀ pịrị tọkụ ḅe yimẹ, ọkụma furo tọkụ ma yi ọ̀ pịrị tọkụ ḅe Tamụnọ Ḅe ḅereni ọ̀ pịrị tọkụ-ẹ.

²⁴Tomoni ineda ye otoma ye nwọse mayema kaịnḅoḅịa: Mama eremeni ma mama ọḅọkụ tọrụ nwọ ḍinmamẹ. Omoniḅọ ma yi awọma, anị Hega ma-ẹ, árị anị Saịnaị Tụndụ ọgọnọ mịẹ ọḅọkụ mị-ẹ.

²⁵Hega ma, nwọ anị Arebia ḅie sime Saịnaị Tụndụ mị ọgọnọ chịẹsimeḅọ ma anị mịọkụ ḅe Jerusalẹm opuama mị ḅe mbuḅọ-ẹ, anịa tomonima na omoni ḅie simeḅọ ma.

²⁶Ọkụma soḅie Jerusalẹm mị anị mịnaḅụ nyanamẹ, árị mị mịna nyengiḅọ ma-ẹ.

²⁷Anịatịḅị fịafịa ḍiri mị nwọ ḅẹmẹ, “Ḅieḅẹlẹ, ị́rị́ ma awọ nyanaka eremeniḅọ! Oloku, ḅieḅẹlẹ ḅụ oloku owu, ị́rị́ jịn sịkị ma tọkụ yi ḅụfụka nyanaka eremeniḅọ! Anịatịḅị ini sịkị eremeniḅọ ma awọ nyanatẹịn deḅọ koroma soka eremeniḅọ ma nẹngịḅịa.”

²⁸Mịọkụ, ómine ị̀ya mịnapụma, ómine Tamụnọ awọ-ẹ, yeḅereniḅịpị ḅụ ḅoye ḅara ḅụ, Aịzịk ḅe ḅara mị.

²⁹Anịsịkị mị ḅụ, yemịẹmịẹḅara ḅụ ini yi tọkụ ḅe tọrụsiọrị seni Tamụnọ Tẹmẹ Ḅe ḅụ wẹrị yi Tọkụ Ḅe pịrịmẹ, se mịọkụ sọnị anị anị sime gbọrị ọkụ mị-ẹ.

³⁰Ọkụma fịafịa ḍiri mị anị che ḍuko? Anị nwọ ḅẹmẹ, “Omoniḅọ ma na árịa tọkụ ḅe na desin; anịatịḅị omoniḅọ ma yi tọkụ ḅe na furo tọkụ ma yi tọkụ ḅe na ḍaḅọ ḅe ngọ nwọ ḍiaọkị ẹkẹ.”

³¹Anịẹrẹchị, ị̀ya mịnapụ, mine omoniḅọma awọkẹ, ọkụma furo tọkụ ma awọ-ẹ.