Read kirikeni Galesia 6 Bible Online

Galesia 6 - kirikeni bible

Galesia 6

¹Ị̀ya mịnapụ, ó nemikase ḅẹyeḅẹye ḅụ mịẹkuramaka ḅọ nwọ kunmẹ ḅẹḅẹ, ómine tẹmẹ ḅụ nwẹngịarịapụ ma, iniḅọ datekerema; ọkụma ó dein ḅara se anị mị-ẹ. Se ómine ọ́ ḅụ ọbị mịẹse ómine sọnị mun telima ḅie sọ ẹka ọkụ.

²Ḅụfụka ḅie ọ́ ḅarachụa jịnḅọ jịnḅọ pịrị, se mịn ḅara mị ḅụ ọ́ Kraịst Ḅe oloko mị ḍukoye nwọ mịẹḅịa.

³Tomoniḅọ nemikase koromamẹ na iniḅọ ye sọ waraḅẹ iniḅọ ye ḅụ ofori sịkị ḅụ, iniḅọ papa oḅori se iniḅọ ḅụ chịn-aḅẹ.

⁴Ḅọḅọ iniḅọ yemịẹḅara ḅe ḅẹrẹ nwọ kọn iniḅọ ḅụ pịrị. Anị iḅimẹ ḅẹḅẹ, anịọkụma iniḅọ anị gose opuaye mịẹḅịa, iniḅọ jịnḅọ mịẹye nwọse anị na otoma ḍikiḅịa sịkị.

⁵Anịatịḅị tomoniḅọ goyegoye iniḅọ ikuye nwọ pụraḅịa.

⁶Ye ini Tamụnọ ọkwẹịn mị se ḍiearịḅọ ḅe ọ̀ nyana iḅiaye mamgba seni ye se ò ḍiearịḅọ ḅe na ḍia.

⁷Ómine oḅori se ọ́mịna ḅụ ma chịnma, ineda oḅori se Tamụnọ chịnḅịa ḅọ ofori-ẹ. Tomoniḅọ ḅe ò ḍipiye mị ọ̀ pịkị sokuḅịaye-ẹ.

⁸Oria ojumịnị mị ḅiarịye ḍipi anị pịrị ḅọ ḅe, anịa ḅụ fị anị ò soku ọkịḅịaye-ẹ! Ọkụma Tẹmẹ Ḅe ḅie oria ye ḍipi ḅọ ḅe, ọ̀ Tẹmẹ Ḅe ḅie ḅụ simegbamaso ḍumo soku ọkịḅịa.

⁹Anịẹrẹchị, ye ịnyọ mịnaḅụ fama iḅi mịẹ ḅụ, anịatịḅị ịnyọ nemikase mịnaḅụ faka ọkụma, sịkị lasịkị wa ḍipiye wa nwọ sokuḅịa.

¹⁰Wa sịkị nyanasịkị nyanasịkị, wa iḅi se nweni mgba mịẹ, anịtẹịn-anga kọkọma ḅara se mịna furo mị ḅie ḅereni nyana apụma.

¹¹Mịọkụ, àrị ị̀ ḅara se gịẹịn ọ́ sẹịnma ḍiri mị ḍụḅa la-ọkụ ọ́ nwọ ḍiki!

¹²Pakapaka ḍọkị pịkị tọrụseọrịaye ḅụ wẹrị ḅụboma ḍọkịarịapụ ma mịn pụnụma ọ́ ḅụpẹlẹkapẹlẹka nwọse ọ́ ḅẹ àrịye-ẹ. Ini gose ọkọ mịẹye anị, mịẹse ini Kraịst Ḅe mgbẹsẹchịn mị gose inia tọrụsiọrịma ẹka ḅara.

¹³Ini ḅụpẹlẹ apụma sọnị Oloko mị ḍukoye mị ini mịẹkẹ; ini ḅimẹ ómine ọ́mịna ḅụ ma pẹlẹ, mịẹse ini anị se inia ḅụbomaḅịa ḅara, na ini mịn mịẹse ómine anị mịẹmịẹye mị nwọ mịẹye-ẹ.

¹⁴Ị̀rị̀ ọkụma, anị simeọkụ simeọkụ sọnị, wa Nyanaḅọ Jizọs Kraịst Ḅe mgbẹsẹchịn mị kẹngẹ mịn à seni ḅụbomaḅịaye-ẹ, anịatịḅị oria mgbẹsẹchịn mị ḅụ anị tomonikiri mị fịsaye sọ ị̀ pịrịye-ẹ, ị̀rị̀ sọnị pịkị fịsaḅọ sọ tomonikiri mị pịrị waraḅẹ.

¹⁵Anị ngịsị ḅẹrẹ nyanakẹ tomoniḅọ ḅụpẹlẹ anịkanịka ḅụpẹlẹka mị. Ḅẹrẹ nyanaye anị iniḅọ ḅo ịwọ ḅọ nwọ sọ mị-ẹ.

¹⁶Inia ḍumo ḅụ, mịn oloko mị nwọ ḍuko nwẹngịarịapụ ma, ye deinma na ḍikiḅụgerere na sime ini pịrị—pịkị Tamụnọ-a tomoni mamgba na!

¹⁷Ọkwẹịn kuluma ḅụ: ye gbọrịḅọ sọnị gbọrị ḅụfụka sọ nwọse ị̀ pịrị ma, anịatịḅị ị̀ya oju ḅụ sime elekima ma ḍiepakụmamẹ na ị̀rị̀ Jizọs omoniḅọ-ẹ.

¹⁸Ye wa Nyanaḅọ Jizọs Kraịst Ḅe ḍikiḅụgerere mị ómine mgba na sime, ị̀ya mịnapụ. Amẹn.