Read kirikeni Ẹfịsọsịapụ 1 Bible Online

Ẹfịsọsịapụ 1 - kirikeni bible

Ẹfịsọsịapụ 1

¹Pọl anị, Tamụnọ kụrọ ḅụ, Kraịst Jizọs okunwẹngịḅọ ḅe ḅara ḅomẹ— Ò seni Ẹfịsọsị ḅie sime Tamụnọ-a tomonima, anị inia ḍumo ḅụ Kraịst Jizọs Ḅe na gboloma mị ḅereni nyana apụma sẹịnmaḅẹ:

²Ye Tamụnọ, mịna Ḍaḅọ ḅe na pịkị Nyanaḅọ Jizọs Kraịst Ḅe na, ḍikiḅụgerere na deinma na nwọse ọ́ pịrị.

³Ó ye wa mịẹḅaka se Tamụnọ Ḅe ḅẹ anị wa Nyanaḅọ Jizọs Kraịst Ḍaḅọ Ḅe! Anịatịḅị ò mine ḅẹlẹmasam wa Kraịst Ḅe na gbọrịye mịẹ ḅụ, tẹmẹ anga ḅe ḍiepịrịye goyegoye ọ̀ nwọse wa pịrịye gose, soḅie ḅụ.

⁴Tomonikiri mị ma tẹmẹka sịkị ngịsị, Tamụnọ Ḅe mine ḅe Kraịst Ḅe na gbọrịye mịẹ ḅụ ḅọrọ wa sẹlẹ ọkị se oria tomoni mịẹ ḅọrọsam, mịẹse wa ọ̀ tọrọkọ Fịafịa pịkị mịẹirima nyana ẹka ọkụ. Oria ḅẹlẹma mị gose

⁵Tamụnọ Ḅe ọ̀ gbọtụḅara ḍukopẹlẹsam na ò Jizọs Kraịst Ḅe ḅụ ḅọrọ mine ọkị ọ̀ ḅụ pịrịḅịa oria owuapụ awọ ḅara ḅụ—mị anị ọ̀ ḅụḅẹlẹ se ọ̀ pịkị tọn wẹrị ọkụ mị-ẹ.

⁶Ó ye wa Tamụnọ Ḅe tokoni oria boma nyana ḍikiḅụgerere mị gose, ori oria yela Tọkụ Ḅe ḅụ gbẹịnye ofori ḅara ḅụ se wa pịrịye mị gose!

⁷Anịatịḅị Kraịst Ḅe pulo mị gose, wa pọkọsam, anị mị ḅẹaḅẹ na, mịna sima ḅụ wa ḅarasin nyanasam. Tamụnọ Ḅe ḍikiḅụgerere mị ḍụḅa la-ọkụ ḍiki,

⁸anị ò se wa pịrịye mị ḅaka ḅara ḅụ! Oria nemi na ye kaịnḅo na ḅụ mgba

⁹Tamụnọ Ḅe ò yetọn wẹrị ọkụ ọ̀ nwọ mịẹmẹ, pịkị anị se wa ḍiemẹ, ọ̀ ḅọịma tọn pẹlẹsa fịrị mị, na ọ̀ Kraịst Ḅe ḅụ anị nwẹngịḅeinmaḅịa.

¹⁰Mịn tọnye mị, anị Tamụnọ Ḅe sịkị mị ḅo karakaraḅịa sịkị; ò mịẹ karamaḅịaye mị, anị tẹmẹaye mamgba nwọ ọkịḅo koḅirima, soḅie na sẹkiri na ḅie simeye goyegoye mamgba, Kraịst Ḅe arịa tịḅịda ḅụ.

¹¹Tamụnọ Ḅe ọ̀ tọn wẹrị ḅara na ò ḍukopẹlẹ ḅara na ye mamgba ọkọ simemẹ, se Tamụnọ Ḅe wa sẹlẹọkị se oria tomoni nwọ mịẹmẹ, wa se Kraịst Ḅe na gbọrịye mịẹ ḅụ, ori anị ḅara mị nwọ ḅiye gose, sakị mị ngịsị ò ḍukopẹlẹsa ḅara mị ẹrẹchị.

¹²Ye anịọkụma mine tatarị tọrụ se Kraịst Ḅe ḍiki apụma Tamụnọ Ḅe boma mị tokoni!

¹³Ómine sọnị ḅo Tamụnọ tomoni nwọ sọmẹ ọ́ kọkọma oku mị nwọ naa sịkị, anị ḍụaḅọrọma ọkịḅo ọ́ pịrị Iḅi Ḅẹrẹ mị. Ọ́ Kraịst Ḅe ḅerenimẹ, se Tamụnọ Ḅe ori ọ́ nyanamẹ nwọ ḅẹ elekima se ọ́mịna ḅụ chụamẹ, Fịafịa Tẹmẹ Ḅe nwọse ọ́ pịrị mị ḅụ, ò ḅereni ọ́ pịrịye mị.

¹⁴Tẹmẹ Ḅe anị onyechịẹmaye-ẹ na wa Tamụnọ Ḅe ḅereni oria tomonima pịrịsaye mị nwọ nyanaḅoḅịa, pịkịna mịn mị mine mịẹkụrọmamẹ na Tamụnọ Ḅe karasa ngẹrị tịḅị nyana nwọse oria tomonima pịrịḅịa. Ó ye wa oria boma mị tokoni!

¹⁵Mịn mị ẹrẹchị, à sakị ọ́ Nyanaḅọ Jizọs Ḅe ḅụ nyana ḅereni mị, na pịkịna ọ́ nyana Tamụnọ-a tomoni mamgba pịrị ḅẹlẹma mị nwọ naa sịkị ngịsị,

¹⁶ma à kunokẹ, ó gose mịẹḅaka se Tamụnọ Ḅe ḅẹ. Ị̀ya tẹkẹma ḅie àrị ó se ḅiekoromaḅẹ

¹⁷à pịkị wa Nyanaḅọ Jizọs Kraịst Ḅe Tamụnọ Ḅe, boma nyana Ḍaḅọ Ḅe ḅara ḅiaḅẹ na, ọ̀ Tẹmẹ Ḅe seni ọ́ pịrị, anị ọ́ mịẹse ó yenemiḅịa ḅọ ḅe, pịkị Tamụnọ Ḅe ḍieḅelema ọ́ pịrịḅịa ḅọ ḅe, mịẹse ómine ò nemiḅịa ḅara.

¹⁸À ḅimẹ mịẹse ọ́mịna kuḅiema finji, se ómine enekuḅu ọrịḅịa ḅara, mịẹse ò gose ọ́ chịn tọrụseḍikiarịye mị ọ́ nwọ nemiḅịa ḅara, ò ḅereni oria tomonima pịrị ḅụgbiripuma ḅẹlẹma mị yela ọkụ ọ́ nwọ nemiḅịa ḅara,

¹⁹pịkị nde oria opu kụrọ mị mịna ḅie fịrịnwẹngịarị ọkụ, mine ò ḅereni apụma. Mịn, mịna ḅie fịrịnwẹngịarị kụrọ mị, anị pịkị iku ịnyọ mị,

²⁰anị ori ọkị se fịapụma ḅie Kraịst Ḅe sịsẹma se ò se soḅie amanyanakiri ḅie oria amaḅara anga koroma kụrọ mị.

²¹Kraịst Ḅe anị anịnyọ ḅẹrẹtọn soḅie-amanyanakiri ḅẹrẹtọn apụ mamgba, kụrọ mamgba, ịnyọ mamgba, alapụ mamgba pịrịarị ḅọ ḅe-ẹ. Ori ẹrẹ nyanamẹ, ḍụḅatẹịn mị sẹkiri na, ḅoḅịa sẹkiri sime kụrọnị ẹrẹ mamgba nẹngị ẹrẹ.

²²Tamụnọ Ḅe ye mamgba nwọse Kraịst Ḅe ḅụọ chuku koromamẹ, se ò seni chọchị mị pịrịmẹ, geletẹịn ye mamgba nẹngị Nyanaḅọ ḅara ḅụ.

²³Chọchị mị anị Kraịst Ḅe oju-ẹ, ori mị anịa karagbasị mị-ẹ, ori mị nyọ goyegoye ḅụ ye mamgba nwọ mịẹ karama ḅọ ḅe-ẹ.