Read kirikeni Ẹfịsọsịapụ 2 Bible Online

Ẹfịsọsịapụ 2 - kirikeni bible

Ẹfịsọsịapụ 2

¹Ḅọrọsa sịkị tẹmẹ anga ḅụ ọ́ fịmẹ ọ́mịna ḅịpịpokika na sima na gose.

²Anịsịkị mị, ọ́ sẹkiri ḅie si-a mịẹmịẹyema ḍuko nwẹngịmẹ; ọ́ fọrụ ḅie sime kụrọ-a tẹmẹ ma ḅe ḅẹrẹtọn ḅọ ḅe ḅịpịpokimẹ, anị mịọkụ Tamụnọ Ḅe ḅịpịpokika apụma ḍikiḍikiarị tẹmẹ ḅe.

³Ini sime ḅara kọkọmaye-ẹ anị mine mgba wa sime ọkụ-ẹ, se ojumịnị mị ḅi ḅara se mịna ḍumo kọnmẹ, mịna ojumịnị ma na koroma ma na ḅi ḅara wa nwọse yemịẹmẹ. Mịna ojumịnị mịẹmịẹye sime ḅara ḅụ, mine-o, pịkị ḅẹḅọ ḅẹḅọ sọnị, anị tọn wẹrị wa pịrịmẹ na wa Tamụnọ ịganị mị chuku sime tọrụsiọrịḅịa.

⁴Ọkụma Tamụnọ Ḅe ḍikiḅụgerere mị opuma ḅakamẹ, ọ̀ nyana wa pịrị ḅẹlẹma pịkị opuma ḍụḅa so ọkụma,

⁵wa tẹmẹ anga ḅụ mịna ḅịpịpokika ḅụ fị simearịogbo, ò mine se Kraịst Ḅe ḅụ chụa se wa ḍumomamẹ. Tamụnọ Ḅe ḍikiḅụgerere ḅụ mị ọ́ ḅọrọ ḍụaḅọrọma nyanaye-ẹ.

⁶Wa Kraịst Jizọs Ḅe na gbọrịye mịẹ mị ḅụ ò mine se ọ̀ ḅụ chụa sịsẹmamẹ, wa ọ̀ ḅụ sọ soḅie ḅụ ḅẹrẹtọnḅịa ḅara.

⁷Ọ̀ mịn mị nwọ mịẹmẹ se ḅoḅịa sịkị mị mgba ḅụ oria ḅaka saḅasa opu ḍikiḅụgerere mị nwọ ḍiepakụmaḅịa ẹrẹchị-ẹ, ò se mịna ḅụ ḍiepakụma ḅẹlẹma mị Kraịst Jizọs Ḅe ḅie ḅụ.

⁸Ọkụma Tamụnọ Ḅe ḍikiḅụgerere ḅụ mị ọ́ ḅọrọ ḍụaḅọrọma nyanaye-ẹ ḅereni ḅụ. Ómine mịẹ ḅo ye ḅụkẹ, ọkụma Tamụnọ ḍiepịrịye-ẹ, anịẹrẹchị anị se ḅụbomaḅịa gbọrịḅọ sọ ofori-ẹ.

¹⁰Tamụnọ Ḅe anị wa se mị ḅara wẹrịye-ẹ, se mine se Kraịst Jizọs Ḅe na gbọrịye mịẹ mị ḅụ, ọ̀ wa tẹmẹ se iḅi mịẹmịẹye nwọ pịrịsam; anị ọ̀ karakarama koroma wa pịrị na wa mịẹ nwọ ḅẹye mị-ẹ.

¹¹Ómine Jịnsẹapụma yi ḅara ḅụ Juapụma—“ḅụpẹlẹkapụ” nwọse chịn apụma; anị ḅụpẹlẹapụ nwọse inia ḅụ chịn apụma, (anị owuapụ se inia oju mịẹye anị anị fieaye-ẹ)—ḅọrọsa sịkị ó sime ḅara mị ọ́ nwọse ḅiekoroma.

¹²Anịsịkị mị ọ́ Kraịst Ḅe ḅụ sikimamẹ. Ómine igoniapụ-ẹ, Tamụnọ Ḅe sẹlẹọkị-a tomonima ḅie ómine ofori-ẹ, ọḅọkụ ma ḅie ó ḍiekiri nyanakẹ, anị Tamụnọ Ḅe ḅereni oria tomonima pịrịaye ma ḅụ sẹrẹrẹ-aye ma, se mịn tomonikiri mị ḅie tọrụseḍikiye nyanaka pịkị Tamụnọ nyanaka ḅara ḅụ ó simemẹ.

¹³Ọkụma mịọkụ ḅụ Kraịst Jizọs Ḅe na gbọrịye mịẹ ḅụ, ómine sasama simeapụma, ini nwọ ọkịḅo kpekimasam Kraịst Ḅe agbamịẹ fị mị ḅụ.

¹⁴Anịatịḅị Kraịst Ḅe na mịnaḅụ na deinma ọkịḅosam Juapụma na Jịnsẹapụma na nwọse gbọrịapụ mịẹ mị ḅụ, ori oria oju mị nwọse ini pusikima warịagbagba mị, anị ini se taraka apụ mịẹye mị sumagbinsam.

¹⁵Ò Juapụ Oloko mị nwọ kansinmẹ anị tọnkoroma ayema na pịkị ama ḍikiḍiki olokoma na; mịẹse, mama sẹma ḅie nweni gbọrị ḅụḅụ Kraịst-ḅe-na-gboloma ịwọ-a tomoni nwọ tẹmẹpakụmaḅoḅịa ọkụ, mịn ḅara ḅụ ò deinma mị nwọ mịẹmẹ.

¹⁶Mgbẹsẹchịn ọgọnọ ọ̀ kọn fị mị ḅụ Kraịst Ḅe inia taraka mị nwọ ḅaamẹ mgbẹsẹchịn mị ḅụ ọ̀ ḅọrọ mama sẹma nwọ ọkịḅo gbọrị oju mịẹmẹ, se ini pịkịmaḅo Tamụnọ Ḅe pịrịmẹ.

¹⁷Anị Kraịst Ḅe ḅo Iḅi Ḅẹrẹ mị ḅe deinma ọkwẹịn nwọ kọn nwenimgba pịrị ọkụ-ẹ—ọ̀ kọn ómine Jịnsẹapụma pịrịmẹ anị Tamụnọ Ḅe ḅụ sasa apụma, pịkị Juapụma na, anị ori na kpekima sime apụma.

¹⁸Kraịst Ḅe ḅụ mị mine mgba, Juapụ na Jịnsẹapụ na ineda ḅo gbọrị Tẹmẹ ḅụ Ḍaḅọ Ḅe tọrụkuḅu ḅụ ịrịaye-ẹ.

¹⁹Anị-ẹ nwọḅẹ sịkị, ómine Jịnsẹapụma, ómine ḅarị ḅoapụkẹ anịkanịka igoniapụkẹ; ómine mịọkụ, mine Tamụnọ-a tomonima na gbọrị ama apụ-ẹ, pịkị Tamụnọ Ḅe furo apụ-ẹ.

²⁰Ómine sọnị okunwẹngịapụ ma na ịkịankoroapụma na ḍipi chuku sẹkẹ ḍụparị mị ọgọnọ ini ọ́ nama chịẹmasam, Kraịst Jizọs Ḅe na mịnaḅụ na anị ịkọlị mị ḅe ḍụparị Ḅe-ẹ.

²¹Ori anị bebe warị mị mgba nwọ ọlọ gboloma Ḅọ Ḅe-ẹ, pịkị mịẹse anị sẹnị mun Tamụnọ fịafịa opuwarị nwọsọ Ḅọ Ḅe-ẹ se anị se osiḅụ wẹrị Nyanaḅọ Ḅe pịrị Ḅọ Ḅe-ẹ.

²²Ori na gbọrịye mịẹ ḅụ, ómine sọnị ini ó se ísíapụ mamgba ḅụ chụa nama gboloma, se Tamụnọ Ḅe ọ̀ Tẹmẹ Ḅe ḅụ ḅọrọ anga nyọ nwọ mịẹ-aḅẹ.