Read kirikeni Ẹfịsọsịapụ 4 Bible Online

Ẹfịsọsịapụ 4 - kirikeni bible

Ẹfịsọsịapụ 4

¹Ị̀rị̀, ikoliḅọ ḅe, à fịrịnwẹngị Nyanaḅọ Ḅe pịrịye gose, àrị ọ́ tẹkẹaḅẹ na, Tamụnọ Ḅe ọ́ chịn ḅo lamasa kiri mị gbẹịn ḍumo ọ́ nwọ kọn.

²Sịkịmamgba ọ́ ḅụ iderima, ḅụnemi, pịkị ye-inema. Ómine ọ́mịna ḅẹlẹma nwọ ḍiepakụma yesẹlẹka ḍumo nyana jịnḅọ jịnḅọ pịrị ḅụ.

³Ọ́mịna ịnyọ la-ọkụ ọ́ nwọ mịẹ se Tẹmẹ Ḅe seni ọ́ pịrị gbọrịḅụ sime mị nwọ koko, ómine fịna gboloma deinma mị ḅụ.

⁴Gbọrị ojumịnị omi-ẹ, pịkị gbọrị Tẹmẹ Ḅe na, anị Tamụnọ Ḅe gose ọ́ chịnye mị ḅụ gbọrị tọrụseḍikiarịye pịkị simeọkụ mị-ẹ.

⁵Gbọrị Nyanaḅọ, gbọrị ḅereni, na gbọrị mengisara, mị omiye-ẹ;

⁶gbọrị Tamụnọ pịkị nweni mamgba Ḅe Ḍaḅọ omi-ẹ, anị nwenimgba Nyanaḅọ Ḅe-ẹ, ò nweni mamgba ḅụ ḅọrọ pịkị fịrịnwẹngị pịkị nweni mamgba ḅie fịrịnwẹngịmẹ.

⁷Mịna ḅụ, ọrụḅọḅọ sosikima ḍiepịrịye nwọ ọkịsam, Kraịst Ḅe anị pịrị na gbẹịn ọkụ.

⁸Fịafịa Ḍiri mị ḍuko ḅara ḅụ, “Ori iwo mun gele nyọma lasịkị, ọ̀ tọn-a ọmụ ḅie kunḅoapụ se ọ̀ ḅụ chụa mun mẹ; ò ḍiepịrịaye seni tomoni pịrịmẹ.”

⁹Mịọkụ, “ori iwo mun mẹ” mị anị che fie? Anị fiemẹ na, tatarị, ò koroḅomẹ, anị mị fiearịye na ọ̀ tatarị koro sẹkiri chuku ḅie gbuntẹịn nyọma nwọ mun mẹ.

¹⁰Anịọkụma ideri ḅo ḅọ ḅe mị pịkị iwo mun gbọrịḅọ ḅe-ẹ, so mị sọ ḅọrọ ḅọ ḅe-ẹ, ọ̀ tọrụkuḅu mị se tomonikiri mị ḅeinmaḅịaye gose.

¹¹Ori, mị “ḍiepịrịaye se tomoni pịrịye-ẹ,” ọ̀ dapụ tọnmẹ, ini okunwẹngịapụ nwọsọ, ísíapụ ịkịankoroapụ sọmẹ, da apụ iḅi ḅẹrẹ ḍuko wasamapụ nwọsọ, da apụ ananaḍikiḍiki na yeḍieapụ na nwọsọ.

¹²Ọ̀ mịn mị mịẹmẹ, Tamụnọ-a tomoni mamgba nwọ karakarama Kraịst ḍukonwẹngịapụ fịrị mị nwọ pịrịḅịa ḅara, Kraịst Ḅe oju mị nama chịẹmaḅịa ẹrẹchị.

¹³Mịẹse mine mgba ḅo gboloma gbọrịye mịẹḅịa ọkụ, mịna ḅereni ḅụ na pịkị Tamụnọ Tọkụ Ḅe ḍawọ nemi mị ḅụ na, wa ḅo ogulasa apụ sọ ḅịaḅara, gbọtụḅara gele mun Kraịst Ḅe la-ọkụ mị laḅịa ḅara.

¹⁴Anịsịkị wa ḅarị awọmẹnị ḅara sime ẹkẹ, se oḅori se nweni chịẹma ḍieaye ma ambura ḅara seni wa suma pịkị fọrụ ḅara seni wa vukumama ḅọrọ ẹka ḅara, anị inia epelema se jịn apụ se mun siye ḅie chuarịapụ ma.

¹⁵Anịnakaraka, ye wa ḅẹlẹma tẹmẹ ḅụ wẹrị kọkọmaye mị ḍuko, wa ḅọkọ goyegoye ḅụ sẹnị mun Kraịst Ḅe laḅịa, anị tịḅịnịḅọ ḅe.

¹⁶Oria ḅẹrẹtọn chuku mị ḅie anị oju mị ḅụ sime kịrịkịrị-a pẹkẹrẹ mamgba ḅo gbolomaye-ẹ, se bebe oju mị mgba ọlọ gbolomamẹ ini se anị pịrị anda-na iko na ma ḅụ. Anịọkụma, sikima sime pẹkẹrẹ goyegoye anị nwẹngị na iḅi fịrị nwọ nwẹngị ọkụma, bebe oju mị mgba sẹnị se ḅẹlẹma ḅụ anịa ḅụ nama chịẹmaḅịa.

¹⁷Anị gose à Nyanaḅọ Ḅe ẹrẹ ḅụ ó ḅeri jineaḅẹ, na ọ́ ḅarị oruḅẹrẹnemi apụ ḍumokọn ḅara kọnma munma, anị inia koroma ma yeḅụsọkapụ ma

¹⁸pịkị inia kuḅie ma kanakana ḅie sime apụma. Tamụnọ Ḅe pịrị ḍumo ḅụ ini kiri nyanakẹ, anịatịḅị ngịsị ini nemiye ofori-ẹ, ini pịkị kọngọ kụrọmamẹ.

¹⁹Ini ḅarị ḅụgerere nemikẹ, ini inia ḅụ ma se simịẹmịẹye pịrịsam se ḅụọlọka ḅara se ḅụgbẹịnka aye nwọ mịẹ-aḅẹ.

²⁰Anị Kraịst Ḅe ḅụ ọ́ ḍawọye mị anịkẹ!

²¹Pikipikiye ofori-ẹ ómine ò gbolomaye nwọ naamẹ, se ò ḍukonwẹngịapụ ḅara ḅụ Jizọs Ḅe ḅie sime karakara mị ini nwọse ó ḍiemẹ.

²²Anịẹrẹchị, ómine ọ́mịna olomu oju mị ḅụ ḅarasin, ọ́ mịẹse ómine olomuma kọnkọn ḍumo ḅara mị kọnye mị—oḅori se anị chịn-arị pụkọsolima ayema ḅiarị olomu oju mị.

²³Ọ́mịna kuḅie na ọ́mịna koroma ma na ọ́ gbọtụḅara nwọ mịẹ ịwọma,

²⁴pịkịna ịwọ oju mị chụa, anị Tamụnọ Ḅe ọ̀ ḅụ kịkẹ ḅara se tẹmẹye mị, pịkịna mịna ḅụ ḍiepakụmaye mị karakara ḅụ na fịafịa ḅụ na.

²⁵Anịọkụma iruo kọn ḅarị ofori-ẹ! Ḅẹḅọ ḅẹḅọ karakaraye mị ḍuko iniḅọ juo ḅereni nyanaḅọ pịrịḅịa, anịatịḅị mine mgba Kraịst oju mị ḅụ gbọrị apụ-ẹ.

²⁶Ị́ ịganị-aḅẹ ḅẹḅẹ ḅerenima se ị́ya ịganị mị ị́ se mun si ḅie chu; pịkị bebe ene mị mgba se ịganị ḅụ simema.

²⁷Ẹmbẹ se Oru ḅe pịrịma.

²⁸Ye furufuru ḅọ ḅe ọ̀ ḅarị furuma, se ọ̀ sakị fịrịnwẹngị se furuka ḅụ ò seni ọ̀ ḅụ ḍikiḍikiḅịaye nwọ mịẹ ọ̀ ḅụ pịrị, pịkị ineda ḅarachụa igwein apụ pịrị.

²⁹Ye seni nweni lamaḅịa ọkwẹịn kọnma, ọkụma ị́ ọkwẹịn àrị sịkị, ḅarachụaḅịa ọkwẹịn kẹngẹ nwọ kọn, jịnḅọ nama chịẹma pịkị ḅụpalịmaye mịẹ iniḅọ pịrịḅịaye, mịẹse ị́ ḍukoḅịaye mị iḅiyemịẹ naa apụma pịrịḅịa ḅara.

³⁰Pịkị mịẹse Tamụnọ Fịafịa Tẹmẹ Ḅe kururuma; anịatịḅị Tẹmẹ Ḅe ori elekima nwọsọ ị́ pịrịmẹ na Tamụnọ Ḅe ị́ nyanamẹ, anị mị onyechịẹmaye-ẹ na, gbọrị Ene ḅoḅịa Tamụnọ Ḅe ị́ mịẹ se ị́ ḅụ nyanaḅịa.

³¹Kuḅie akụ na, owoi kuḅie na, ịganị na ḅụ ị́ ḅụ sin. Oloku na wọlọ na ḅarị ofori-ẹ, taraka kuḅie chụa ḅarị ofori-ẹ.

³²Anịnakaraka iḅi mịẹ kuḅie na dein kuḅie na ọ́ nwọ nyana jịnḅọ jịnḅọ pịrị; pịkị ye ḅụ ḅarasin jịnḅọ jịnḅọ pịrị, Tamụnọ Ḅe Kraịst Ḅe ḅụ ḅọrọ ḅarasin ọ́ pịrịsa ḅara mị.