Read kirikeni Ẹfịsọsịapụ 5 Bible Online

Ẹfịsọsịapụ 5 - kirikeni bible

Ẹfịsọsịapụ 5

¹Ómine Tamụnọ Ḅe ḅụ yela awọ-ẹ nwọḅẹ sịkị ọ́ ḅụkụrọma ò simeọkụ sime.

²Ḅẹlẹma mị ḅẹrẹtọn ọ́mịna ḍumo ma pịrị, anị Kraịst Ḅe wa ḅẹlẹma se ọ̀ ḅụ se Tamụnọ Ḅe ḅụḅẹlẹ kụnụ ḍiepịrịye agba nwọ mịẹ wa pịrị ọkụ mị.

³Ómine Tamụnọ-a tomoni-ẹ nwọḅẹ sịkị anị karakarakẹ sẹfị mịẹmịẹye anịkanịka, fịafịaka ḍumo, anịkanịka ngẹrịfị ḍọkị mịẹmịẹye ọ́mịna ogboku ḅụ ini nwọ ḍuko.

⁴Anị pịkị ḅụgbẹịnkẹ ḅụgererema ọkwẹịn, yenemika ọkwẹịn, anịkanịka yesọka ḅara ọ́ nwọse ọkwẹịn kọn. Anịnakaraka mịẹḅaka se Tamụnọ Ḅe ḅẹ.

⁵Ó nemi gbẹịnmẹ na sẹfịḅọ, anịkanịka fịafịakaḅọ anịkanịka ngẹrịfị ḍọkịḅọ (anịatịḅị ngẹrịfị ḍọkị mị oru tẹkẹ mịẹmịẹye-ẹ,) ineda Kraịst Ḅe na Tamụnọ Ḅe na amanyanakiri mị ḅie ḍiekiri nyana ẹkẹ.

⁶Ye gbọrịḅọ sọnị yenemika ọkwẹịn se oḅori se ọ́ chịnma anịatịḅị mayema gose mị Tamụnọ ịganị ḅo ọ̀ ḅịpịpokika apụma ọgọnọ gbanaḅịaye-ẹ.

⁷Anị mị gose ngịsị ọkọ sime apụ na mịẹgboloma nyanama.

⁸Ómine na ọ́mịna ḅụ na kanakana ḅie ó simemẹ, ọkụma ó ḅo Nyanaḅọ Ḅe tomoni nwọ sọsa sịkị, ómine enekuḅu mị ḅie omi-ẹ. Anịẹrẹchị, ómine enekuḅu mị ḅie sime apụ ḅara nwọ seni ḍumo kọnḅịa.

⁹Anịatịḅị enekuḅu mị anị iḅi na, karakaramịẹmịẹye na, pịkị karakaraye goyegoye ḅe chịnmgbọlụ chụachụaye-ẹ.

¹⁰Ọ́ ḅụkụrọma Nyanaḅọ Ḅe ḅụḅẹlẹḅịaye nwọ ḍawọ.

¹¹Ó tomoni mịẹarị yeḅụsọka ayema na mịẹgboloma nyanama, sime kanakana mị pịrị ayema. Anịnakaraka, àrị ọkịpakụma enekuḅu mị ḅie ḅo.

¹²Anị kọkọma opuma ḅụgereremamẹ, ini ḅọịma anga ḅụ mịẹarịaye ma nwọ ḍukopakụma mị.

¹³Se ini ye mamgba nwọ ọkịpakụma enekuḅu mị ḅie ḅoḅịa sịkị, mịn ini jokoma sime ḅara mị ḅelema ḅụpakụmaḅịaye-ẹ;

¹⁴anịatịḅị ḅelema ḅụpakụmasaye goyegoye enekuḅu nwọsọmẹ. Anị mị ini gose nwọḅẹye-ẹ, “Sịsẹ mọnọḅọ se fịḅụ sịsẹ, se Kraịst Ḅe ori ị́ya ọgọnọ ḅịaḅịa.”

¹⁵Anịẹrẹchị ọ́ tọrụkweinma ọ́mịna ḍumo kọn. Mịẹye nemikapụ ḍumo ọ́ nwọ kọnma, ọkụma yenemiapụ ḍumo ọ́ nwọ kọn.

¹⁶Ómine ọ́ nyana sịkị mị mgba nwọse iḅi fịrịnwẹngị, anịatịḅị enema àrị si waraḅẹ.

¹⁷Anịọkụma ómine oḅori apụ nwọ sọ ma, ọkụma ọ́ ḅụkụrọma Nyanaḅọ Ḅe ḅi na ọ́ mịẹ nwọḅẹye mị ḍọkị mịẹ.

¹⁸Ómine iruḅu tọrụḅaama ma, anị papa ó simaḅịaye mị; anịnakaraka, ye Tẹmẹ Ḅe ó ḅie ḅein.

¹⁹Fịafịa nime ma na, nime ma na pịkị osi nyana nime ma na ḅe ọkwẹịn ma ọ́ nwọ kọn jịnḅọ jịnḅọ pịrị; ọ́mịna kuḅie ḅụ ḍiri ḅie nime ma na fịafịa nime ma na ọ́ nwọ chu Nyanaḅọ Ḅe tokoni.

²⁰Wa Nyanaḅọ Jizọs Kraịst Ḅe ẹrẹ ḅụ, ọ́ sịkịmamgba yegoyegoye ḅụ mịẹḅaka seni Tamụnọ Ḍaḅọ Ḅe ḅẹ.

²¹Ọ́ Kraịst Ḅe ḅụ nyana mangịma mị gose ọ́ ḅụiderima jịnḅọ jịnḅọ pịrị.

²²Eremeni, ọ́ ḅụiderima Nyanaḅọ Ḅe pịrị ḅara mị ọ́ nwọse ḅụiderima ọ́mịna de apụma pịrị.

²³Anịatịḅị deḅọ ḅe ọ̀ kụrọ nyanamẹ tarọ ma ḅụ, anị Kraịst Ḅe chọchị mị ḅụ kụrọ nyana ọkụ; pịkịna Kraịst Ḅe na mịnaḅụ na anị chọchị mị anịa ḍụaḅọrọmaḅọ-ẹ, anị Oria oju mị.

²⁴Anịẹrẹchị eremeni ma gbọtụma inia ḅụiderima inia de apụma pịrịḅịa, chọchị mị anịa ḅụiderima Kraịst Ḅe pịrị ọkụ.

²⁵De apụ ómine ọ́mịna erema ḅẹlẹma, Kraịst Ḅe chọchị mị ḅẹlẹma, se Ò ḍumo se anị pịrị ọkụ mị.

²⁶Ọ̀ mịn mị nwọ mịẹmẹ chọchị mị seni fịafịa ḅụ wẹrị Tamụnọ Ḅe pịrịḅịa ẹrẹchị oria ọkwẹịn ḅụ, ori anị mịẹfịafịama so sịkị, anị seni mengi ḅie sịkịrị ḅụ,

²⁷ọ̀ chọchị mị ọkị ọ̀ ḅụ pịrịḅịa ẹrẹchị anịa iḅi mị mgba ḅụ—yori-yori na, ḍukosimaḅịaye oforika ḅara ḅụ na, ịlọlị ḅụ oforika ḅara ḅụ na, pụrụkụ-yeḅụ oforika ḅara ḅụ na, anịkanịka jịn kọnmaye nyanaka ḅara ḅụ na.

²⁸Anị ḅara mị de apụma nwọse inia eremeni ma ḅẹlẹma gbẹịn ḅara-ẹ anị ini inia ojuma ḅẹlẹma ọkụ mị. Iniḅọ taḅọ ḅẹlẹma ḅọ ḅe, ori ọ̀ ḅụ ḅẹlẹmamẹ.

²⁹(Gbọrịḅọ sọnị ofori-ẹ taraka seni iniḅọ oju wẹrịmaḅọ. Anịnakaraka, ori anị koko se iḅiọkụ seni anị ḍikiḍikimẹ, Kraịst Ḅe seni chọchị mị mịẹ ọkụ mị,

³⁰anịatịḅị mine oria oju ḅụ sime apụ-ẹ.)

³¹Fịafịa ḍiri mị ḍuko ḅara ḅụ, “Mịn mị gose owuḅọ ḅe ḍawu ḅe na nyọngọrọma na koromasoḅịa, se tarọ ma na gbọrịye mịẹḅịa, se ini mama apụma ḅo gbọrịye nwọ sọḅịa.”

³²Gbọrị gbun karakaraye omi-ẹ, mị fịafịa ḍiri mị mịẹḅelemarịye, àrị anị kaịnḅo ọkụ, anị Kraịst Ḅe na chọchị mị na ḅe gboloma mị-ẹ.

³³Ọkụma pịkị ó gbolomamẹ, deḅọ goyegoye iniḅọ mịnaḅụ ḅẹlẹma ọkụ se iniḅọ eremeniḅọ ḅẹlẹma, pịkị eremeniḅọ goyegoye pịkị iniḅọ deḅọ osi.