Read kirikeni Ẹfịsọsịapụ 6 Bible Online

Ẹfịsọsịapụ 6 - kirikeni bible

Ẹfịsọsịapụ 6

¹Awọmẹnị, ọ́mịna fịrị-ẹ, Nyanaḅọ Ḅe ḅie ḅụ, ómine ó yiapụ ma ḍukoye mịẹ, anịatịḅị mịn mị anị mịẹ gbẹịnye-ẹ.

²“Ị́ ḍa na ị́ nyengi na osi” mịn mị anị ḅereniye pịrị nyana tatarị oloko mị-ẹ:

³“mịẹse ye mamgba ị́rị́ na iḅiḅịa ḅara, ị́ pịkị ama mị ḅie anga ḅọlọmaḅịa ọkụ.”

⁴Awọ yiapụ ómine ọ́mịna awọma ịganịmaḅịaye nwọ mịẹma. Anịnakaraka, ọ́ Nyanaḅọ Ḅe ḅụ wẹrị ini ḍikiḍiki se ini dagbụkụkụma se ye seni ini ḍiepakụmaḅo.

⁵Omoniapụ, ómine sẹkiri ḅie ọ́ nyana apụma ḍukoye nwọ mịẹ ḅalafa na ḅụgeregere na ḅụ, pịkị iḅi kuḅiemgbọlụ ḅụ wẹrị anị mịẹ, ọ́ fịrịnwẹngị Kraịst Ḅe pịrịaḅẹ nwọḅẹ ḅara ḅụ.

⁶Ọ́ mịn ḅara mị nwọ mịẹ, ini tọrụse ó ḍikiarị sịkị kẹngẹkẹ, inia tọrụ iḅi fẹ gose; ọkụma ómine ọ́mịna kuḅie mgba seni Tamụnọ Ḅe ḅi ḅara nwọ mịẹ, Kraịst omoniapụ ḅara.

⁷Ómine omoniapụ ḅara nwọse tọrụḅẹlẹma ọ́mịna fịrịnwẹngị, ọ́ fịrịnwẹngị Nyanaḅọ Ḅe pịrịaḅẹ nwọḅẹ ḅara, nwẹngị papa tomoni pịrịka ḅara.

⁸Se ḅiekoroma na Nyanaḅọ Ḅe ḅẹḅọ ḅẹḅọ gbẹịnḅịa, anị ḅọrọ omoniḅọ-o anịkanịka furotọkụ-o iniḅọ nwẹngị iḅi fịrị gose.

⁹Nweni nyanapụ, ómine sọnị anị gbọrị ḅara mị nwọse yemịẹ ọ́mịna omonima ḅụ se ọ́ ḅarị ini ẹrẹmama ḅọrọma. Ó se ḅiekoroma na ómine na ọ́mịna omonima na ó sime soḅie sime gbọrị Nyanaḅọ Ḅe pịrịmẹ, anị gbọrị ḅara se ḅẹrẹkọn ḅẹḅọ ḅẹḅọ pịrịarị ḅọ ḅe.

¹⁰Anịḅe kuluma Nyanaḅọ Ḅe na gbọrịye mịẹ ḅụ ómine ọ́mịna ịnyọ mị nwọ nama chịẹma, ye oria opu kụrọ mị ḅụ ọ̀ wẹrị anị ḅara mị mịẹ ọ́ pịrị.

¹¹Tamụnọ Ḅe seni ọ́ pịrị owuniaye mamgba ọ́ nwọ ḅiri, mịẹse ómine ineda Oru ḅe si epelema ḅie chịẹḅịa ḅara.

¹²Anịatịḅị wa tomoni na owusọkẹ, ọkụma sitịḅịnyana tẹmẹ anga ḅe owunima-ẹ, soḅie ḅụ, ḅẹrẹtọn apụma na, kụrọ nyanapụ ma na pịkị mị kanakana ḅụọ mị ḅe kụrọ ma na-ẹ.

¹³Anịẹrẹchị mịọkụ, ọ́ Tamụnọ Ḅe owuniaye ma ḅiri! Se si ene mị ḅo lasịkị, ómine ineda tarakaḅọ ḅe, se ọ́ pakaḅịa owu mị dachịẹmaḅịa ḅara se ọ́ sọmun anịa kuluma laḅịa sịkị, ọ́ pa ọ́mịna kiri ḅụ chịẹsimeḅịa ọkụ.

¹⁴Anịẹrẹchị ọ́ ḅụkarakarama chịẹsime, karakaraye mị nwọse ḅirikunye mịẹ ọ́mịna konju ma ọlọ kụrọma, karakara mịẹmịẹye mị seni agbọ mịẹ ọ́mịna ekpe ma gbẹịn,

¹⁵ḅụkarakarama Iḅi Ḅẹrẹ mị ḅe deinma mị ḍuko mị, seni akpaka mịẹ chụa.

¹⁶Sịkịmamgba ḅereni mị se agbọ mịẹ se anị pụra gbaso; anịatịḅị ómine ineda anị seni Si Ḅọ ḅe tẹịn fịnị kọrị ọkụ kọrị-a ḍẹịn mamgba nwọ binmaḅịa.

¹⁷Pịkị ḍụaḅọrọma mị nwọse okpochu mịẹ ọkị; pịkị Tamụnọ ọkwẹịn mị se kongo-agiji mịẹ, anị Tẹmẹ Ḅe se ị́ pịrịye mị.

¹⁸Tẹkẹ ḅụ mịn mị mgba nwọ mịẹ, Tamụnọ Ḅe ḅarachụa nwọ ḅi, pakaye goyegoye gose tẹkẹ Tẹmẹ Ḅe dagbụkụkụma ḅụ. Mịn mị gose ọbị ḅụ sime, se ngịsị ịnyọ lọkọmama. Sịkịmamgba Tamụnọ tomoni mamgba gose tẹkẹ.

¹⁹Ọ́ pịkị tẹkẹ ị̀ pịrị mịẹse Tamụnọ Ḅe oku seni ị̀ pịrịḅịa ḅara, à ḅụkarakarama ọkwẹịnḅịa sịkị ḅalafaka ḅara se ọkwẹịn pịkị mịẹse ini iḅi ḅẹrẹ mị ḅe ḅọịye mị nemiḅịa ọkụ.

²⁰Mịn iḅi ḅẹrẹ mị gose àrị okunwẹngịḅọ nwọsọmẹ, mịọkụ àrị ikoli ḅie omi-ẹ nwọ ḅẹ sọnị. Ọ́ tẹkẹ, mịẹse à tọrụ kụrọma iḅi oku mị ḍuko àrị anị mịẹ gbẹịn ḅara ḅụ.

²¹Tikikọs ḅe, mịnaḅụ yela mịnaḅọ ḅe, pịkị kuḅie se ḅụgbana gbẹịn Nyanaḅọ Ḅe fịrịnwẹngịḅọ ḅe, ị̀ gbolomaye mamgba nwọ ḍuko ọ́ pịrịḅịa, mịẹse à simeọkụ ọ́ nwọ nemiḅịa ḅara.

²²Anị à gose ò seni ọ́ fịrịmarịye-ẹ; wa simeọkụ ọ̀ nwọ ḍuko ọ́ pịrịḅịa ẹrẹchị, pịkị ó kuḅie kụrọmaḅịa ḅara.

²³Ye Tamụnọ Ḍaḅọ Ḅe na Nyanaḅọ Jizọs Kraịst Ḅe na deinma na, ḅẹlẹma na, pịkị ḅereni na nwọ seni Kraịst Ḅe ḅie sime mịnapụ mamgba pịrị.

²⁴Ye Tamụnọ Ḅe ḍikiḅụgerere mị ómine mgba na sime, ómine fịẹka ḅẹlẹma nyana wa Nyanaḅọ Jizọs Kraịst Ḅe pịrị apụma. Amẹn.