Read kirikeni Filipaị 1 Bible Online

Filipaị 1 - kirikeni bible

Filipaị 1

¹Mịn fịrịfịrịma ḍiri mị Pọl ḅe na Timoti ḅe na ḅara anị ḅomẹ, Jizọs Kraịst fịrịnwẹngịapụma— Seni Filipaị ama mị ḅie sime Tamụnọ-a tomonima na, chọchị mị ḅe tịḅịnịma na pịkị ḅarachụapụ ma na sẹịnmamẹ: anị Kraịst Jizọs Ḅe na gbọrịye mịẹsa apụma.

²Ye mịna Ḍa Tamụnọ Ḅe na Nyanaḅọ Jizọs Kraịst Ḅe na ḍikiḅụgerere na deinma na se ọ́ pịrị.

³Ómine gose à mịẹḅaka se Tamụnọ Ḅe ḅẹmẹ, àrị ó se ḅiekoroma sịkị goyegoye ḅụ,

⁴à pịkị tẹkẹ ómine mgba pịrị sịkị goyegoye, ḅieḅẹlẹ ḅụ à wẹrị tẹkẹtẹkẹmẹ,

⁵ọ́ ḅara wẹrịma tatarị ene mị ngịsị ọkịḅo mịọkụ la iḅiọkwẹịn mị ḅe fịrị ḅụ ḅarachụa ị̀ pịrị ḅara mị ẹrẹchị.

⁶Anịẹrẹchị à nemi kpaịnmamẹ, na Tamụnọ Ḅe, ọ́mịna ḅie ḅụ iḅi fịrịma sakị ḅọ ḅe, anị nwẹngịma mun anị Kraịst Jizọs Ḅe ḅụ ḅọrọ nwẹngị sọḅịa Ene mị laḅịa.

⁷Sịkịmamgba àrị ó se ḅiekoromaḅẹ! Anịẹrẹchị anị ị̀ ḅụ karakaraye nwọ sọmẹ, ọkọ sime koroma kọn ọ́ pịrị mị. Anịatịḅị ómine mgba Tamụnọ Ḅe finji ị̀ pịrị ẹmbẹ mị nwọ ḍiaọkịmẹ, à mịọkụ ikoli ḅie simearị sịkị mị na à pịkị ị̀ ḅụ nyana se iḅiọkwẹịn mị nwọ ḍie se pịkị kụrọma chịẹarị sịkị mị sọnị.

⁸Tamụnọ Ḅe ị̀ya onyechịẹḅọ-ẹ na à kọkọmaye ḍukoaḅẹ, na àrị ọ́ ḅụ nyana gbun koroma mị ḅarana Kraịst Jizọs Ḅe kuḅie anị pakaḅomẹ à nwọ ḅẹye mị.

⁹À tẹkẹmẹ na ọ́mịna ḅẹlẹma mị sẹnịma sẹnịma tọrọkọ mun, kọkọma ḍawọnemi na yeḅụkarasa ḅẹrẹkọn na nwọse chụa sẹnị,

¹⁰mịẹse ómine ineda ye ḅụ iḅitẹịnye nwọ sẹlẹọkịḅịa ḅara. Anịsịkị mị ómine ineda fịafịakaye na ḅẹrẹsi na ḅie pọkọḅịaye-ẹ Kraịst Ene mị ḅie.

¹¹Anịsịkị ọ́mịna ḍumo ma kọkọma iḅi-a mịẹye na ḅeinḅịa, Kraịst Ḅe kẹngẹ ineda pịrịḅịaye mị, Tamụnọ Ḅe boma na tokoni na gose.

¹²À ḅimẹ ó nemi, ị̀ya mịnapụ, na ị̀ ḅụ pakasaye ma àrị kọkọma ḅarachụa iḅiọkwẹịn mị ḅe tọrọkọ mun mị nwọ pịrịsam.

¹³Anị gose, bebe amanyanaḅọ odo koruarịapụ ma na mịọ sime jịn apụ na nemisam na à gose ikoliḅọ sọye anị ị̀rị̀ Kraịst Ḅe fịrịnwẹngịḅọ ẹrẹchị-ẹ.

¹⁴Se ị̀rị̀ ḅe ikoli ḅie sime mị pịkị ḅakatẹịn apụ, mịnapụma ḅie nwọ mịẹse ini kuḅie se Nyanaḅọ Ḅe ḅụgbanatẹịnsam, anịẹrẹchị, ḅalafa nyanaka ḅara ḅụ ini kụrọ kuḅie nwọ nyana oku mị ḍukotẹịnsam.

¹⁵Anị sime ḅara inia ḅie dapụ Kraịst Ḅe ḅẹrẹ mị ḍukomẹ, yesọlị pịkị kamụ ḍọkị ḅụ, ọkụma ísíapụma karakara iḅi kuḅie ḅụ wẹrị ḅẹrẹ mị ḍukomẹ.

¹⁶Mịna apụma ini ọkọ mịẹmẹ ḅẹlẹma ḅụ, anịatịḅị ini nemimẹ na Tamụnọ Ḅe iḅiọkwẹịn mị ḍụaḅịa fịrị mị nwọse ị̀ pịrịsam.

¹⁷Ísíapụma ini fịafịa kuḅie se Kraịst Ḅe ḅẹrẹ mị nwọ ḍukokẹ, ọkụma inia ḅụ ḍiepakụma tẹmẹ ini nwọ nyanamẹ; ini nwọ chịnmẹ na ini mịẹse à jịn ḅụfụka nyanaḅịa àrị ikoli ḅie simearị sịkị.

¹⁸Anị ḅẹrẹ nyanakẹ! Àrị anịgose ḅieḅẹlẹmẹ—ini Kraịst ḅẹrẹ mị pa nwọ ḍukoarị sịkị anị sarasara achọ goyegoye ḅụ, anị ḅọrọ karakara-o anịkanịka karakaraka kuḅie ḅụ sọnị. Ị̀ ḅie pa pịkị ḅẹlẹma munḅịa,

¹⁹anịatịḅị à nemimẹ na ọ́mịna tẹkẹma ḅie na Jizọs Kraịst Tẹmẹ Ḅe ḅụ wẹrị ḅoḅịa ḅarachụa ḅụ ini ị̀ ḅụ ḅarasinḅịa.

²⁰Àrị opuma ḅi se tọrụseḍikiarịye anị ị̀ya fịrị ḅụ à gbarịma ma, ọkụma sịkịmamgba, anịtẹịn anga mị sịkị mị ḅụ à ḅakama kụrọ kuḅie nyana se ị̀ ḅụ mgba nwọse osi ọkịḅo Kraịst Ḅe pịrị, à ḅọrọ ḍumomẹ anịkanịka à fịmẹ nwọ ḅẹ sọnị.

²¹Anịọkụma ḍumo ḅọrọ cheye? Ị̀ ḅụ ọkụma, anị Kraịst Ḅe-ẹ. Anị-ẹ nwọ ḅẹ sịkị, fị mị ḅakaye ọkịḅotẹịnḅịa.

²²Ọkụma ḍumo ma mun mị ḅụ àrị iḅi fịrịnwẹngịtẹịnḅịa ḅẹḅẹ, anịọkụma à sẹlẹọkịḅịaye à ḅarị nwọ nemi kpaịnmakẹ.

²³Mama anga ḅụ ini ị̀ jineaḅẹ. Àrị opuma ḅiaḅẹ à mịn ḍumo mị koroma so mun Kraịst Ḅe na sime anị iḅitẹịnye mịẹ-ẹ:

²⁴ọkụma ómine gose anị pịkị opuma ye sọmẹ na à ḍumo sime-ẹ.

²⁵À mịn mị nwọ nemi kpaịnmamẹ, anịẹrẹchị à nemimẹ na à simeḅịa. Àrị ómine mgba na simema munḅịaye seni ọ́mịna tọrọkọ mun na, ḅieḅẹlẹ na ḅụ chụa ḅereni mị ḅie,

²⁶mịẹse à pịkịna ómine na simeḅịa sịkị, ó gose ị̀ se opuaye mịẹḅịaye ọ́ nwọ nyanatẹịnḅịa ḅara ọ́mịna ḍumo ma ḅie, Kraịst Ḅe na gbọrịye mịẹ mị ḅụ.

²⁷Mịọkụ, ye ḅụ kụrọtẹịnye, anị ọ́ mịẹse ó ḍumo kọnḅịa ḅara, Kraịst Ḅe iḅiọkwẹịn mị ḅi ḅara mị nwọ sime, anịọkụma àrị ineda ḅo ómine ọrị anịkanịka àrị ineda ḅoka sọnị, ye à naa na, ọ́ kụrọma gbọrịye ḅụ chịẹ waraḅẹ, pịkị gbọrịye kẹngẹ nwọ ḅiaḅẹ anị ó gboloma owusọ pịrịarịye mị, iḅiọkwẹịn mị ḅe ḅereni mị gose.

²⁸Ómine ómine na taraka apụma ḍikiḅalafa ma; ọ́ sịkịmamgba kụrọ kuḅie nyana, mịn mị ḍiepakụma ini pịrịḅịa na ini ḅịkịḅịa, ómine anị chịẹḅịaye-ẹ, anịatịḅị Tamụnọ Ḅe ọmụḅaraiḅi mị seni ọ́ pịrịmẹ.

²⁹Anịatịḅị ini ẹmbẹ finji ọ́ pịrịsam se fịrịnwẹngị Kraịst Ḅe pịrị, papa ò ḅereni mị kẹngẹkẹ, ọkụma pịkị tọrụsiọrị ọ̀ pịrị mị sọnị-ẹ.

³⁰Mịọkụ ómine ineda ị̀ ḅụ sọ owu mị sọḅịa. Ḅọrọsa sịkị à sọ sime se ómine ị̀ ọrị gbọrị owu mị anị-ẹ, ọ́ naa ḅara ḅụ à pa pịkị sọarị gbọrị owu mị-ẹ.