Read kirikeni Filipaị 2 Bible Online

Filipaị 2 - kirikeni bible

Filipaị 2

¹Ọ́mịna ḍumo Kraịst Ḅe ḅie ọ́ mịẹse ọ́ kụrọmẹ, oria ḅẹlẹma pịkị ó kuḅie deinmamẹ. Ọ́ Tẹmẹ Ḅe na mịẹgboloma nyanamẹ, se ómine iḅi mịẹmịẹye na ḍikitịḅịfoin na nyana jịnḅọ jịnḅọ pịrịmẹ.

²Àrị ọ́ tẹkẹmẹ, ómine ị̀ya ḅieḅẹlẹ mị mịẹ ḅeinma, gbọrị koroma nwọ nyana na, jịnḅọ jịnḅọ ḅẹlẹma na, gbọrị tẹmẹ na pịkị gbọrị kuḅie na nwọ nyana.

³Ọ́ ḅụ kẹngẹ ọ́ nwọ jua ḍọkịma, ọ́ pịkị ḅụboma ḍọkịma, ọkụma ọ́ ḅụiderima jịnḅọ jịnḅọ pịrị; jịn apụ ḅụ iḅi ọ́ nwọ ḍọkịtẹịn ọ́ ḅụ nẹngị sịkịmamgba.

⁴Ọ́ jịnḅọ jịnḅọ ḅụ iḅi ḍọkị, ọ́mịna ḅụ iḅi kẹngẹkẹ.

⁵Ọ́ nyana gbẹịn yemịẹḅara anị Kraịst Jizọs Ḅe nyanaye mị-ẹ:

⁶Sakị sịkị ngịsị Tamụnọ Ḅe na ori na gbọrị oju nyanamẹ nwọ ḅẹ sọnị, ò koroma sịkị ofori-ẹ na; ọ̀ kụrọ ḅara se ḅo Tamụnọ Ḅe na gbasịḅịa.

⁷Anịnakaraka, ori ngẹrị ḅereni ọkịmẹ ọ̀ nyanaye mamgba ḅụḅarasin, se fịrịnwẹngịḅọ kiri nwọ ọkịmẹ. Ò ḅo tomoniḅọ nwọ sọmẹ se tomoniḅọ kịkẹ ḅara se pakaḅomẹ.

⁸Ọ̀ ḅụiderimamẹ, se ḅịpịpoki ḅụ ḅọrọ mun fị ḅụ sọmẹ— anị mgbẹsẹchịn ọgọnọ ọ̀ kọn fị mị-ẹ.

⁹Mịn mị ẹrẹchị Tamụnọ Ḅe ò deki gololoma mun ọgọnọju geletẹịn kiri mị nwọ lamẹ se geletẹịn ẹrẹ mamgba nẹngị ẹrẹ mị nwọse ọ̀ chịnmẹ.

¹⁰Anị mị ḅụ, osi seni Jizọs ẹrẹ mị pịrị gose ḍumo nyanaye mamgba soḅie na, tomonikiri ḅie na, pịkị tomonikiri mị chuku ḅie mị na arịa ḅụọịkpụkụma se kpẹrẹkịḅịa,

¹¹àrịmgba pịkị ḅelema ḍukopakụmaḅịa na Jizọs Kraịst Ḅe anị Nyanaḅọ Ḅe-ẹ, Tamụnọ Ḍaḅọ Ḅe boma mị ḅụ.

¹²Anịẹrẹchị ị̀ ḅụ yela ikiapụ, ọ́ sịkịmamgba à ḍukoarịye mịẹmịẹḅara ḅụ àrị ómine na sime sịkị ḅụ, anị pịkị mịọkụ kụrọtẹịnmẹ na ómine à ḍukoye nwọ mịẹ, àrị ómine na ofori sịkị ḅụ sọnị. Ọ́ pa pịkị ḅalafa na ḅụgeregere na se fịrịnwẹngị mun ọ́mịna ḍụaḅọrọma mị nwọ karama.

¹³Anịatịḅị sịkịmamgba Tamụnọ Ḅe ọ́mịna ḅie ọ̀ fịrịnwẹngịaḅẹ, ọ́ mịẹse ó ḅereni pịkị ineda ḅịpịpoki ḅụ ọ̀ tọnye mịẹḅịa ẹrẹchị.

¹⁴Ḅẹrẹsuaka, pịkị yejineaka ḅara ḅụ ó yegoyegoye nwọ mịẹ,

¹⁵mịẹse ó siye mịẹka pịkị ḍukoye ḅụ ofori apụ nwọ sọḅịa ḅara, karasa Tamụnọ awọ ḅara ḅụ, se ḅụrụsa si ḅụ ḅein-a tomoni na tomonikiri ḅie anga apụ ḅara ḅụ, inia ogboku lolia sotọrụ ḅịa paka ọkụ ọ́ nwọse ḅịa paka.

¹⁶Ó ḍumo oku mị nwọ daḅọrọma ini pịrịarị sịkị, ó nemikase anị ḅara mị nwọ mịẹmẹ ḅẹḅẹ, Kraịst Ḅe Ene mị ḅie àrị ó se opuaye mịẹḅịa, anịatịḅị anị ḍiepakụmaḅịa na àrị ịnyọ fama nwẹngịarị fịrị mamgba papa fakẹ.

¹⁷Sosi ị̀ya ḍumo mị ḅe pulo ini nwọ ọsụn ọ́mịna ḅereni mị mịẹ Tamụnọ Ḅe pịrị agba mị ọgọnọ saraḅịa. Anị ọkọ pakamẹ ḅẹḅẹ, ị̀ ḅieḅẹlẹmẹ à pịkị ị̀ya ḅieḅẹlẹ mị se ómine mgba na ḍiamẹ.

¹⁸Anị gbọrị ḅara mị ḅụ, ómine sọnị ọ́ ḅieḅẹlẹ, se pịkị ọ́mịna ḅieḅẹlẹ mị se ị̀rị̀ na ḍia.

¹⁹Nyanaḅọ Ḅe nemikase ọkọ ḅerenimẹ ḅẹḅẹ, à tọrụse ḍikimẹ na à ḅọlọka Timoti ḅe nwọse ọ́ fịrịmaḅịa, mịẹse ị̀ kuḅie kụrọḅịa ḅara ó gbolomaye à nwọ naaḅịa sịkị.

²⁰Ori kẹngẹ mị ị̀ ḅụ sọ ó gboloma koroma nwọ kọn pịkị ómine gbolomaye nwọse iḅiọkụ yechịnye-ẹ.

²¹Inimgba ọrụ ḅọḅọ iniḅọ na gbolomaye kẹngẹ nwọ abalamẹ, Jizọs Kraịst Ḅe ḅụḅẹlẹye mịkẹ.

²²Ómine na mịnaḅụ na nemimẹ ọ̀ wẹrị ọ̀ laye nwọ ḍiepakụmasa ḅara mị, ori na ị̀rị̀ na, tọkụ na ḍaḅọ na ḅara ḅụ, gboloma fịrịnwẹngị iḅiọkwẹịn mị nwọ pịrị lasa ḅara mị.

²³Anịẹrẹchị à tọrụ se ḍikimẹ na àrị ò se ḅọlọka sịkị ḅụ ọ́ fịrịmaḅịa, ye ị̀rị̀ na simeḅịa ḅara à nwọ nemi kirikiri.

²⁴À kuḅie se Nyanaḅọ Ḅe ḅụ gbanamẹ na ị̀rị̀ na mịnaḅụ na ḅọlọka sịkị ḅụ àrị ọ́ damaḅoḅịa.

²⁵À koromamẹ na mịẹka mịẹka ḅara ḅụ anị omi-ẹ, mịna mịnaḅọ Ipafroditọs ḅe nwọse ọ́ fịrịma, ị̀ ḅụ sọ fịrịnwẹngị pịkị ị̀ juo owuniḅọ ḅe, pịkị ọ́mịna okunwẹngịḅọ ḅe ḅarachụa ị̀ pịrị ḅụ.

²⁶Ò kuḅie chịẹ-chịẹ-chịẹaḅẹ ómine mgba ọrịḅịa ẹrẹchị, anị pịkị opuma ori na deinkorokẹ anịatịḅị ọ́ naamẹ na ori obimẹ.

²⁷Kọkọmaye-ẹ ori obimẹ, kalaye kọnmẹ ọ̀ fịsam. Ọkụma Tamụnọ Ḅe ò ḍikiḅụgereremẹ, ori kẹngẹ ọ̀ nwọ ḍikiḅụgererekẹ, ọkụma ọ̀ pịkị ị̀rị̀ sọnị nwọ ḍikiḅụgereremẹ, pịkị ḍụḅatẹịn kururu ḅụ ị̀ ḍụamẹ.

²⁸Anịgose ị̀ kuḅie pịkị ọfịrịtẹịnmẹ, ò se ọ́ fịrịma mị ḅụ, mịẹse ọ́mịna ḅie pịkịna ḅẹlẹḅịa ọkụ, ómine ori ọrịḅịa sịkị, ị̀ya kururu mị pịkị soḅịa.

²⁹Anịẹrẹchị, Nyanaḅọ Ḅe ḅie ḅụ mịnaḅọ ḅara ḅụ, ó ḅieḅẹlẹ ḅụ wẹrị ori ọkị. Ọ̀ nwọ simeọkụ sime apụma ómine osi se ini pịrị,

³⁰anịatịḅị ori ò ḍumo se yechịnkẹ, se kalaye kọnmẹ ọ̀ fịsam Kraịst fịrị mị tịḅị gose, mịẹse ọ̀ pa ḅarachụa ị̀ pịrịḅịa ẹrẹchị, ómine ineda nyana ị̀ pịrịkaye mị.