Read kirikeni Filipaị 3 Bible Online

Filipaị 3 - kirikeni bible

Filipaị 3

¹Anịḅe kuluma ị̀ya mịnapụ, ọ́ Nyanaḅọ Ḅe na gbọrịye mịẹye mị gose ó ḅieḅẹlẹ. À ḅẹrẹ nyanakẹ, à gịẹịn ḅọrọsaye mị pịkị nwọ gịẹịn, anị ḅụḅọrọmaye sọ ọ́ pịrịtẹịnḅịa à nemikase ọkọ mịẹ ọkụma.

²Ómine ọ́ ḅụ ọbị siye mịẹmịẹapụma ḅụ, ma obirima ḅụ, anị ḅụpẹlẹkapẹlẹka nwọ ịgbanịarịapụma.

³Mine anị kọkọma ḅụpẹlẹ mị nyanasaye-ẹ, inikẹ, anịatịḅị Tamụnọ Ḅe ọ̀ Tẹmẹ ḅụ mị wa wẹrị ọ̀ tẹkẹarịye-ẹ, se mịna ḍumo ḅụ ḅieḅẹlẹaḅẹ Kraịst Jizọs Ḅe na gbọrịye mịẹ mị ḅụ. Wa kuḅie se ojumịnị ḅụ tọrụseọrịarị mịẹmịẹye ḅụgbanakẹ.

⁴Àrị ineda kuḅie se ojumịnị ḅụ tọrụseọrịarị mịẹmịẹye ḅụgbanaḅịa. Koroma na iniḅọ ineda se ojumịnị ḅụ tọrụseọrịarịye ḅụgbanaḅịa ḅọ omi-ẹ ḅẹḅẹ, ị̀rị̀ à gose anị ḅara mị mịẹḅịaye tịḅị nwọ nyanatẹịnmẹ.

⁵À ḅụpẹlẹmẹ, sọnọma ḍin ị̀ tịḅị ḅọrọ sịkị ini ị̀ yi ḅara ḅụ, ị̀rị̀ Izrẹlḅọ-ẹ, ị̀rị̀ Bẹnjamin furo ḅọ-ẹ, jokoma Hibru pulo mị ḅie ḅọ-ẹ, Juapụ Oloko koko mị gbolomaye ḅụ, à Farisiḅọ nwọ sọ ḅọrọsam,

⁶ị̀ kuḅie pịkị ọfịrị so ọkụma à tọrụsiọrị seni chọchị mị pịrịmẹ, tomoniḅọ Oloko mị tọnye ma mịẹ ḅụ wẹrị karakaraḅọ nwọ sọ mị, ọkụma ḍukosimaye nyanaka ḅọ à nwọ sọmẹ.

⁷Ọkụma à seni sọye kịẹnma ḍọkịye mamgba mịọkụ à nwọse faye nwọ kịẹnmasam Kraịst Ḅe gose.

⁸Àrịaye ma kẹngẹkẹ, à yegoyegoye nwọse gbọtụḅara fasaye nwọ kịẹnmamẹ, opuma yelatẹịnye mị gose, anị mị anị Kraịst Jizọs ị̀ Nyanaḅọ Ḅe ḍawọnemi mị-ẹ. Ọ̀ tịḅị gose à yegoyegoye nwọse gbin wokumamẹ; àrị àrịmgba se sara ọgọnọ wokumaḅịaye nwọ kịẹnmasam, mịẹse à Kraịst Ḅe nwọ nyanaḅịa ḅara sọye ḅara ḅụ,

⁹se ori na gbọtụḅara gbọrịye mịẹḅịa ḅara, à ḅarị ị̀ ḅarakuḅu karakaramịẹye nyanakẹ, anị Oloko mị ḅịpịpoki ḅụ ini ḅọrọ nyana nyana sọye mị. Mịọkụ Kraịst Ḅe ḅereni ḅụ ini ḅọrọ nyana nyana karakara mịẹmịẹye mị anị à nyanasaye mị-ẹ, anị Tamụnọ Ḅe ḅara ḅo karakara mịẹmịẹye mị-ẹ anị pịkị ḅereni ḅụ sẹrẹrẹmẹ.

¹⁰Ị̀rị̀ bebema ḅiarịye, anị Kraịst Ḅe nemi mị na pịkị oria fịḅụsịsẹ kụrọ mị nwọ ḍawọnemiḅịa ọkụ mị na-ẹ, oria tọrụsiọrịma ḅụ ḍiekiri nyanaḅịa ọkụ na pịkị orina gbọrị fị ḅara nwọ kọnḅịa ọkụ na,

¹¹à tọrụseḍikiaḅẹ na ị̀rị̀ sọnị fị ḅụ ini ị̀ sịsẹmaḅịa.

¹²À ḅẹkẹ na à ḅọrọsam anịkanịka na à karasam ọkụma à pa mangịmamun-aḅẹ mịẹse à ḍiepịrịye mị nyana ọkịḅịa ẹrẹchị anị Kraịst Jizọs Ḅe gose ị̀ ọkị ọ̀ ḅụ pịrịye mị.

¹³Anị sime ḅara ḅụ, ị̀ya mịnapụ, à sosikima anị ị̀ ḅara lasam nwọ ḅẹ ḅara se anị koromakẹ; anị-ẹ ḅẹ sọnị, à mịẹarị gbọrịye, anị ị̀ya ọḅụju simeye mị nwọse ḅieḅarama, se ị̀ya ịnyọ laḅara nwọse mun ị̀ tọrọkọ simeye mị laḅịa ọkụ ḍọkị mị-ẹ.

¹⁴Anịẹrẹchị, à gbụkụkụma mangị eke mị damunmẹ mịẹse àrị ọmụḅaraiḅi ḍiepịrịye mị nwọ nyanaḅoḅịa ḅara anị Tamụnọ Ḅe Kraịst Jizọs Ḅe ḅụ ḅọrọ ị̀ chịn mun ọgọnọju kọnḅịa ḍumo mị.

¹⁵Mine mgba, nwọ tẹmẹ anga ḅụ ogulasa apụma ye wa gbọrị yemịẹḅara mị nwọ nyana. Ọkụma ọ́mịna ḅụ dapụ nemikase jịn kịrị mịẹmịẹye nwọ nyanamẹ ḅẹḅẹ, Tamụnọ Ḅe anị mịẹ ḅelema ọ́ pịrịḅịa.

¹⁶Ye wẹrị simeọkụ simeọkụ sọnị, ó ye wa ḍukonwẹngịsime ḅo mịọkụ la gbọrị olokoma wa nwọ ḍukonwẹngịma tọrọkọ mun.

¹⁷Ị̀ya mịnapụ, ómine ị̀ ḅụọ ḍikiḍa, ọ́ tọrụ se da gbẹịn iḅi mịẹmịẹye nyana apụma ḅụ wẹrị, wa se ó ḍie ḅara mị, nwọ ḍukonwẹngị apụma.

¹⁸À tọn-a sịkị nwọse tarị mịn mị ḍuko ọ́ pịrịsam, à pịkị owu mengi tọrụ sara ḅụ ḅarị anị ḍukoaḅẹ; tọn apụ omi-ẹ, inia ḍumo ma ini seni Kraịst Ḅe mgbẹsẹchịn ọgọnọ kọn fị mị na tarakaye nwọ mịẹmẹ.

¹⁹Inia ḍumo kulumaḅịa anga anị kọrị fịnị mị ḅie-ẹ, anịatịḅị inia oru anị inia ojumịnị mị ḅiarịye ma-ẹ. Ḅụgererema gbẹịnye mịn ini seni opuaye mịẹarịye-ẹ, sime mịn tomonikiri mị pịrịye ma, mịn ini se ḅiekoromarịye-ẹ.

²⁰Anị simeọkụ simeọkụ sọnị, mine soḅie ama apụ-ẹ, wa pịkị kuḅie chịẹ-chịẹ-chịẹ ḅara ḅụ mịna ḍụaḅọrọmaḅọ, Nyanaḅọ Jizọs Kraịst Ḅe koruaḅẹ, soḅie koroḅoḅịa ḅọ ḅe.

²¹Ori mịna ịnyọ nyanaka fịfị ojuma nwọ ḍinma se àrị seni oria boma nyana oju mị kịkẹye nwọ mịẹḅịa, ò seni ineda yemamgba nwọ ọkị oria ḅẹrẹtọn mị chuku koromaḅịa kụrọ mị ọ̀ nwọse anị mịẹḅịa.