Read kirikeni Kolosi 2 Bible Online

Kolosi 2 - kirikeni bible

Kolosi 2

¹Ye à kụrọma fịrịnwẹngị ómine na Laodisia na ḅie sime apụma na pịrị ọkụ mị à nwọ ḍuko ọ́ pịrị.

²À gose ọkọ mịẹye anị mịẹse ini iḅiọkụma kụrọ kuḅie nyana, se ḅẹlẹma ḅụ ḅo gbolomaḅịa ọkụ, anị kọkọma yekaịnḅo mị ọkịḅoḅoye mị, ḅeinma nwọ nyanaḅịa ḅara. Mịn ḅara ḅụ, ini Tamụnọ Ḅe ḅọịye mị nwọ nemiḅịa, anị Kraịst Ḅe na mịnaḅụ na-ẹ.

³Ori anị Tamụnọ Ḅe nemi mị na ḍawọnemi mị na ḅe ḅọị ḅụ sime ngọ mamgba finjifinji sambị Ḅe-ẹ.

⁴Anịọkụma, à ḍuko ọ́ pịrịaḅẹ ó ḅereni se gbọrịḅọ sọnị iruoaye se ḅo ómine na ḅẹrẹ piki-a se oḅori se ọ́ chịnma, anị ḅẹrẹ nyanakẹ anị iḅi la-ọkụ la-ọkụ sọnị.

⁵Anịatịḅị àrị ojumịnị ḅụ ómine na ofori-ẹ nwọ ḅẹ sọnị, tẹmẹ ḅụ àrị ómine na omi-ẹ, anị pịkị ị̀ ḅieḅẹlẹmamẹ ọ́mịna ḅịpịogbosọ mị na pịkị kụrọma Kraịst Ḅe ḅereni ḅara mị à nwọ ọrị sịkị.

⁶Nyanaḅọ ḅara ọ́ nwọse Kraịst Jizọs Ḅe ọkịsam nwọ ḅẹ sịkị, ómine ori na gbọrịye mịẹ ḅụ ḍumo kọn.

⁷Ómine ọ́mịna ḅereni mị ḅe kunoma se gbunma ò ḅie ḍipi, ọ́mịna ḍumo ma seni oria ọgọnọ nama chịẹma, se ọ́mịna ḅereni ḅụ kụrọma chịẹtẹịn, ini se ó ḍie ḅọrọsa ọkụ mị. Se mịẹḅaka ḅẹ gbaso.

⁸Ómine ọrị na gbọrịḅọ sọnị tomonikiri mị ḅe ofori ofori nemi nwọse ó seni omoniapụ mịẹ ma, anị tomoni-a ḅaraḅo ḍieaye na tomonikiri mị ḅie ḅẹrẹtọn àrị tẹmẹma ḅara ḅoye ma, anị Kraịst Ḅe ḅara ḅokaye ma.

⁹Anịatịḅị Tamụnọ Ḅe sime ḅara mị mgba Kraịst Ḅe ḅie anị omi-ẹ, ori ḅe tomoniḅọ sọ mị ḅụ,

¹⁰se ori na gbọrịye mịẹ mị ḅụ ini ḅeinsa ḍumo nwọse ọ́ pịrịsam. Tẹmẹ anga ḅe ḅẹrẹtọn apụ na kụrọ nyanapụ ma na ḅụ ori tịḅịnịḅọ-ẹ.

¹¹Kraịst Ḅe na gbọrịye mịẹ ḅụ ọ́ ḅụpẹlẹapụ sọsam, tomoniḅọ ḅụpẹlẹḅụkẹ, ọkụma Kraịst Ḅe ḅụpẹlẹ mị-ẹ, anị mị si ḅụ sime oju mị ḅarị iniḅọ ḅụ kụrọ nyanakẹ nwọ ḅẹye ḅụ simeye mị-ẹ.

¹²Anịatịḅị ini mengi se ọ́ sara sịkị, ini ó seni Kraịst Ḅe na chụa ḍipimẹ, se mengi seni ọ́ sara mị ḅụ ini pịkị ó se Kraịst Ḅe na chụa sịsẹmamẹ anị ó ḅereni Tamụnọ fịrịnwẹngị kụrọ mị ḅụ, anị fị ḅụ ọ̀ sịsẹmaḅọ ḅe.

¹³Gbọrị sịkị tẹmẹ anga ḅụ ọ́ fịmẹ, ọ́mịna sima gose, ómine pịkị Jịnsẹapụ ye gose Oloko mị nwọ nyanaka ḅụ, ọkụma mịọkụ Tamụnọ Ḅe ómine ọkịḅo Kraịst Ḅe na ḍumo ḅie chusam. Tamụnọ Ḅe mịna si mamgba ḅụ ḅarasin wa pịrịsam;

¹⁴wa fị sa ma na anị se nweni ọlọlọ olokoma na ọ̀ nwọ wọlọma sinmẹ ḍiri mị ḅie, pịkị anị se sọmun mgbẹsẹchịn ḅụ churu se anị ḅakụ palị ḅụ okorona okorona anị ḍikitọrụsinmẹ.

¹⁵Se anị mgbẹsẹchịn mị ọgọnọ Kraịst Ḅe tẹmẹ anga ḅụ ḅẹrẹtọn apụma na kụrọ nyana apụma na kụrọma ọ̀ ḅụ nwọ pọkọsinmẹ, ori ini se amaogbo ḍikiye nwọ mịẹmẹ, ọmụḅaraiḅi ḅụ ori ini seni ọmụ ḅie kun apụ ḅara se sụngụma nwẹngịarị sịkị.

¹⁶Anịẹrẹchị ye gbọrịḅọ sọnị oloko chụa ọ́ pịrịma ọ́ fịḅịaye na ḅuḅịaye na gbolomaye ḅụ pịkị fịafịa ene na gbolomaye ḅụ anịkanịka Ịwọ Akalụ anịkanịka Ịnyọsara Ene mị sọnị.

¹⁷Àrị kịkẹye yemamgba tọrọkọ ḅoḅịaye ma tẹmẹ-ẹ; anịa kọkọmaye mị anị Kraịst Ḅe-ẹ.

¹⁸Ó ḅereni ma gbọrịḅọ sọnị ḅẹrẹsi kọn ọ́ pịrị, iniḅọ iḅitẹịnmẹ nwọ ḅẹ ḅara se mịnaḅụ wẹrị, iniḅọ kịrị elekima ọrịye gose, pịkị iruo ḅụiderima na enjẹlapụ tẹkẹ mị na nwọse ọ́ ḅụfụkama. Ọkọ simeḅọ gose iniḅọ ojumịnị ḅe koroma kọn ḅara ḅụ mịna ḅụdekichịẹma-chịẹmaye ngịsị ofori-ẹ.

¹⁹Iniḅọ pịkị ḅarị Kraịst Ḅe ọlọ chịẹmakẹ, anị oju mị ḅe tịḅịnịḅọ ḅe, Kraịst Ḅe ḅẹrẹtọn chuku mị ḅie ini bebe oju mị mgba nwọ koko pakụmamẹ, se anịa anda-na ikoli-na ma na pịkị ịsịanma na ḅụ ḅọrọ anị ọlọḅo gboloma, se anị Tamụnọ Ḅe ḅi ḅara mị nwọse sẹnịmẹ.

²⁰Ọ́ Kraịst Ḅe na fịsam tomonikiri mị ḅie ḅẹrẹtọn àrị tẹmẹma ḅara ḅie ini ọ́ mịẹse ómine ọ́ ḅụ nyanasam. Nde anịọkụma, ó gose, ó sime mị tomonikiri mị pịrịmẹ nwọ ḅẹ ḅara nwọse ḍumo kọn àrịye? Nde ó gose ọkọ sime oloko ọlọarịye

²¹“Ḅara se mịn mị ọlọ ma,” “Ḅịpị se mịn mị lamama,” “Ḅara se ísíye mị lamama?”

²²Mà mamgba, anị ini àrị se yemịẹ so sịkị papaye sọḅịa ḅẹrẹ mị àrị ḍukoarịye-ẹ, tomoniḅọ papa tọn koroma oloko-ẹ pịkị ḍiearịye-ẹ.

²³Anị sime ḅara ọkọ sime olokoma kụrọ ḅara se tomoni mịẹse ini enjẹlapụ tẹkẹ na epele ḅụiderima na pịkị kụrọye se ojumịnị mị mịẹ mị na ḅe nemi ḅụ mị àrị sẹrẹrẹye-ẹ, ọkụma tomoniḅọ mịẹse ojumịnị pụkọtarịaye ma ḅie nweniḅọ ḅụọlọ mị ḅụ àrịye ḅụ sọkẹ.