Read kirikeni Kolosi 3 Bible Online

Kolosi 3 - kirikeni bible

Kolosi 3

¹Ini ó se Kraịst Ḅe na chụa sịsẹma mun ḍumo ḅie chusam, anịẹrẹchị ómine ọ́mịna kuḅie ma se soḅie yema ḅụgbana, anị Tamụnọ Ḅe amaḅara anga ḅụ, Kraịst Ḅe oria amanyana ngada ọgọnọ sime nyọ mị.

²Ómine ọ́mịna kuḅie ma seni anịanga ḅụgbana, mị tomonikiri simeye ma ḅụkẹ.

³Anịatịḅị ọ́ fịsam, ọ́mịna ḍumo ini pịkị nwọse Kraịst Ḅe na Tamụnọ Ḅe ḅie ḅụ ḅọị waraḅẹ.

⁴Ọ́mịna kọkọma ḍumo mị anị Kraịst Ḅe-ẹ, se ò tolupakaḅịa sịkị, ómine sọnị ọ̀ ḅụ sọ tolupakaḅịa se ori na oria boma nwọ ḍiaọkịḅịa!

⁵Anịgose, ọ́mịna ḅie sime fịrịnwẹngị se tomonikiri ayema ḅẹlẹma mị ọ́ nwọ ḅaa, mà ma kịkẹaye ma anị sẹfị na, fịafịaka ḍumokọn na, yeḍikipụkọsoli na, oju mị pụkọtarịarị si ayema na, pịkị ngẹrịfịḍọkị na, anịatịḅị ngẹrịfịḍọkị mị anị jịn oru tẹkẹ ḅara-ẹ.

⁶Anịatịḅị mayema gose Tamụnọ ịganị ḅo ọ̀ ḅịpịpokika apụma ọgọnọ gbanaḅịa.

⁷Ómine na mịnaḅụ na gbọrị sịkị ḅụ mà pụkọtarịye ma ḍumo nwọ kọn simemẹ, àrị ḅẹrẹtọn ọ́mịna ḍumo pịrịarị sịkị mị ḅụ.

⁸Ọkụma mịọkụ ọ́ maye mamgba ḅie ọ́mịna ḅụ ma sin: ịganị, owoi-kuḅie, taraka kuḅie, wọlọ na ḍukosima ọkwẹịn na ọ́mịna ḅịpịapẹkẹrẹ ma ḅie ngịsị pakaḅo ma.

⁹Ómine iruo kọn jịnḅọ jịnḅọ pịrịma, anịatịḅị ọ́mịna olomu oju mị na anịa mịẹmịẹyema na ó sin wokumasam

¹⁰se ịwọ oju mị nwọ chụasam. Mịn anị ịwọ tomoniḅọ ḅe-ẹ; Tamụnọ Ḅe na, anị Tẹmẹḅọ Ḅe sịkịmamgba ò sime ḅara ḍikima mịẹ ịwọmarịye mị-ẹ, ómine ọkịḅo ò nemi ḅeinma mị nwọ laḅịa ẹrẹchị.

¹¹Anịẹrẹchị, kịrịye ḅarị ofori-ẹ, Jịnsẹapụma na Juapụma na ogboku ḅụ, ḅụpẹlẹ apụma na ḅụpẹlẹka apụma na, igoniapụma na tọrụfinjika apụma na, anị ḅọrọ omoniapụ ma-o, anịkanịka furoawọ ma ogboku sọnị, ọkụma Kraịst Ḅe anị yemamgba-ẹ, Kraịst Ḅe pịkị yemamgba ḅie omi-ẹ.

¹²Ómine anị Tamụnọ-a tomonima-ẹ, ori ọ́ ḅẹlẹma, se ọ́ sẹlẹ se oria tomoni nwọ mịẹmẹ. Anịẹrẹchị ó ḍikitịḅịfoin na iḅi mịẹ na, ḅụiderima na, ḅụnemi na, pịkị ye inema na, nwọse ḅụchụaye mịẹ chụa.

¹³Ọ́ ḅakama ḅarachụa jịnḅọ jịnḅọ pịrị, ọ́mịna ḅie jịnḅọ ḅụ ḍukoye nyanaḅo simesịkị simesịkị, ọ́ ḅarasin jịnḅọ jịnḅọ pịrị Nyanaḅọ Ḅe ḅarasin ọ́ pịrịsa ọkụ mị.

¹⁴Mà mamgba ḅụ ḅẹlẹma se chụa anga yemamgba nwọ fịna gboloma gbọrị karasaye nwọ mịẹye mị.

¹⁵Kraịst Ḅe pịrị deinma mị ḅie ó simeye gose anị Tamụnọ Ḅe ọ́ chịn gboloma gbọrị oju mị ḅụ wẹrịye-ẹ. Ọ́ pịkị mịẹḅaka ḅe-ẹ.

¹⁶Kraịst oku mị anịa pẹrẹ la-ọkụ mamgba nwọse ọ́mịna kuḅie ḅụ angaḅịa. Ó ye seni jịnḅọ jịnḅọ ḍie, pịkị ye ḍuko jịnḅọ jịnḅọ pịrị ọ́mịna nemi la-ọkụ mị mgba ḅụ. Ọ́ Devid fịafịa nimema na, Tẹmẹ anga ḅe nimema na, boma nimema na nwọ chu Tamụnọ Ḅe pịrị se mịẹḅaka ḅẹ ọ́mịna kuḅie ḅụ.

¹⁷Ọ́ mịẹḅịa yegoyegoye pịkị ḍukoḅịa yegoyegoye Nyanaḅọ Jizọs Ḅe ẹrẹ ḅụ anị wẹrị mịẹ, ómine ọ̀ ḅụ ḅọrọ mịẹḅaka se Tamụnọ Ḍaḅọ Ḅe ḅẹ àrị sịkị.

¹⁸Eremeni, ọ́ ḅụiderima ọ́mịna deapụ ma pịrị, anị ọ́ mịẹ gbẹịnye-ẹ Kraịst Ḅe ḍukonwẹngịapụ ḅara ḅụ.

¹⁹Deapụ, ómine ọ́mịna eremeni ma nwọ ḅẹlẹma se ini na kụrọye mịẹ ma.

²⁰Awọmẹnị, Kraịst Ḅe ḍukonwẹngịapụ ḅara ḅụ, ọ́mịna fịrị-ẹ ó yiapụ ma ḅịpịpoki sịkịmamgba, anịatịḅị anị mị anị Nyanaḅọ Ḅe ḅụḅẹlẹye-ẹ.

²¹Nyengiapụ na Ḍapụ na ómine ọ́mịna awọma ḅụnwọnwọmaḅịaye nwọ mịẹ ma, inia ḅie ḅofa lọkọ.

²²Omoniapụ, ó tomoni ḅara ḅụ ọ́ nyanapụ ma ḍukoye nwọ mịẹ yemamgba ḅụ, ini tọrụ se ó ḍikiarị sịkị kẹngẹkẹ, se inia tọrụ iḅi fẹḅịa ẹrẹchị; ọkụma ọ́ karakara kuḅie ḅụ wẹrị anị mịẹ; ọ́ Nyanaḅọ Ḅe ḅụ nyana mangịma mị ẹrẹchị.

²³Ọ́ mịẹḅịaye goyegoye ómine ọ́mịna kuḅie laḅara mị mgba nwọse anị mịẹ, ómine anị mịẹ Nyanaḅọ Ḅe pịrịaḅẹ ọ́ mịẹ tomoni pịrịkẹ nwọ ḅẹ ḅara ḅụ.

²⁴Se ḅiekoroma na Nyanaḅọ Ḅe ò se oria tomonima wẹrịma yema nwọse gbẹịnye ḅara ḅụ ọ́ pịrịḅịa. Anịatịḅị Kraịst Ḅe mị kọkọma ọ́ nyana se ọ́ fịrịnwẹngị pịrịarị ḅọ ḅe-ẹ.

²⁵Se siye mịẹḅọ goyegoye iniḅọ mịẹ siye ḅe gbẹịnye nwọ nyanaḅịa, anịatịḅị Tamụnọ Ḅe anị gbọrị ḅara mị nwọse ḅẹrẹkọn tomoniḅọ goyegoye nwọ pịrịpịrịmẹ.