Read kirikeni Kolosi 4 Bible Online

Kolosi 4 - kirikeni bible

Kolosi 4

¹Omoniapụ nyanapụ, ó kura ḅara na karakara ḅara na nwọse ọ́mịna omoniapụ ma na anga. Ó se ḅiekoroma na ómine sọnị soḅie ọ́ Nyanaḅọ omi-ẹ.

²Ọ́ kụrọma tẹkẹ ḅụ sime, ọ́ tẹkẹarị sịkị ọ́ pịkị ọbị ḅụ sime, mịẹḅaka se Tamụnọ Ḅe ḅẹ.

³Anị gbọrị sịkị mị ḅụ ọ́ pịkị tẹkẹ wa pịrị, mịẹse Tamụnọ Ḅe ẹmbẹ finji wa pịrị se wa oria oku mị nwọ ḍukoḅịa ḅara, Kraịst Ḅe gboloma ḅọịye mị. Anịatịḅị anị mị à gose ikoli ḅie simearịye mị-ẹ.

⁴Anị-ẹ nwọ ḅẹ sịkị, ọ́ tẹkẹ mịẹse àrị ọkwẹịn gbẹịn ḅara nwọse ọkwẹịn kọnḅịa ọkụ, se anị ḅụokoroḅịa ḅara.

⁵Ó nemi ḅara se ḅerenika apụma na ama anga, iḅi ḅara nwọse ọ́ nyana sịkị mị se fịrịnwẹngị.

⁶Ye ọ́mịna ọkwẹịn sịkịmamgba ḅụḅẹlẹma pịkị ḅụ na deinkoro, ọ́ pịkị karakara pẹkẹrẹ ḅịpị nwọse tomoniḅọ goyegoye pịrịḅịa ọkụ nwọ nemi.

⁷Mịna mịnaḅọ Tikikọs ḅe, kuḅie se ḅụgbana gbẹịn fịrịnwẹngịḅọ ḅe pịkị mịna juo fịrịnwẹngịḅọ ḅe Nyanaḅọ Ḅe fịrị mị ḅie, ị̀ gboloma ḅẹrẹ mamgba nwọ ḍuko ọ́ pịrịḅịa.

⁸Anị mị à gose ò se fịrịmarịye-ẹ, mịẹse ori ọ́mịna kuḅie kụrọma se wa sime ḅara nwọ ḍuko ọ́ pịrịḅịa ọkụ.

⁹Onisimọs ḅe ọ̀ ḅụ sọ mun aḅẹ, ori yela pịkịna kuḅie se ḅụgbana gbẹịn mịnaḅọ ḅe, ọ́mịna ogbo ḅọ ḅe. Ini mịọ pakarịye goyegoye nwọ ḍuko ọ́ pịrịḅịa.

¹⁰Arịstakọs, ị̀rị̀ na ikoli ḅie simearịḅọ ḅe, kereniḅịpị seni ọ́ sẹịnmamẹ, pịkị Mak ḅe sọnị anị ḅara mị nwọ mịẹmẹ, Banabas numbireowu ḅe ini ḍuko ọ́ pịrị ḅọrọsam na ómine iḅiọkụ Mak ḅe ọkị ori ómine na ịrịamẹ ḅẹḅẹ.

¹¹Jọsụwa ini pịkị Jọstọs nwọse chịn ḅọ ḅe, pịkị kereniḅịpị seni ọ́ sẹịnmamẹ. Mịna tẹrẹ apụma kẹngẹ mị Juapụ-ẹ se vinpịkị ị̀ ḅụ sọ fịrịnwẹngị Tamụnọ Amanyanakiri mị pịrịarịye-ẹ, ini pịkị opu ḅarachụa nwọ nyana ị̀ pịrịmẹ.

¹²Ẹpafras ḅe anị ọ́mịna kpo mị ḅie sime ḅọ ḅe pịkị Kraịst Jizọs fịrịnwẹngịḅọ ḅe, kereniḅịpị seni ọ́ sẹịnmamẹ, ọ̀ sịkịmamgba ọfịrị kuḅie se tẹkẹ ọ́ pịrịpịrịmẹ, Tamụnọ Ḅe ḅara ḅiaḅẹ na ori ọ́ mịẹse ọ́ kụrọma chịẹ, ogulasa Kraịstḍukonwẹngịapụ ḅara ḅụ, ḅẹrẹ ḅụokorosa apụ ḅara ḅụ, pịkị Tamụnọ Ḅe ḅiarịye nwọ mịẹ ḅeinmasa apụ ḅara ḅụ.

¹³Àrị ineda ḅarana ọ̀ nwẹngị ómine na, Laodisia apụma na, Hẹrapọlisịapụ ma na pịrịsa kụrọ fịrị nwọ ḍuko ḅelema ọ́ pịrịḅịa.

¹⁴Luk mịna ḅụ yela ḅịrịḅọ ḅe na pịkị Dimas ḅe na inia kereniḅịpị seni ọ́ sẹịnmamẹ.

¹⁵Wa Laodisia ḅie anga mịnapụma na, Nimfa ma na, árịa warị ḅie ḅo koḅiria chọchị mịẹmịẹ apụma ḅụ nyana iḅi kuḅie mị nwọ ḍuko ini pịrị.

¹⁶Ọ́ mịn ḍiri mị gososa ḅẹḅẹ, ọ́ mịẹse ini pịkị Laodisia ḅie sime chọchị mị ḅie anị go anị gbọrị sịkị ḅụ ọ́ pịkị Laodisia ḅie sime mịnapụma se ọ́ sẹịnmaḅịa ḍiri mị sọnị nwọ go.

¹⁷Ọ́ pịkị nwọse Akịpọs ḅe ḅẹ, “Nyanaḅọ Ḅe fịrị mị ḅụ ini seni ọ̀ pịrị nwẹngị-ẹ nwọ ḅẹ fịrị mị gbarịmaka ḅara ḅụ ori anị nwẹngị.”

¹⁸Ị̀rị̀ Pọl ḅe ḅarana mị ḍiri mị gịẹịnmẹ. Àrị ó kerenimẹ. Ó se ḅiekoroma na àrị ikoli ḅie omi-ẹ! Ye Tamụnọ Ḅe ḍikiḅụgerere mị ómine na sime.