Read kirikeni 1 Tẹsalonịka 1 Bible Online

1 Tẹsalonịka 1 - kirikeni bible

1 Tẹsalonịka 1

¹Pọl ḅe na Saịlas ḅe na pịkị Timoti ḅe na ḅara— Anị ḅo Tẹsalonaịka ama ḅie sime chọchị apụma pịrịmẹ, anị sime Tamụnọ Ḍaḅọ Ḅe na pịkị Nyanaḅọ Jizọs Kraịst Ḅe na pịrị apụma. Ye ḍikiḅụgerere na deinma na ómine na sime.

²Wa sịkịmamgba ó gose mịẹḅaka se Tamụnọ Ḅe ḅẹḅẹmẹ, pịkị sịkịmamgba ó se mịna tẹkẹma ḅie chuchumẹ.

³Anịatịḅị wa Tamụnọ mịna Ḍaḅe tọrọkọ ó se ḅiekoroma koromamẹ, ọ́ ḅara wẹrịma ọ́mịna ḅereni mị se mịẹmịẹye ḅụ chu ḅara mị na, ọ́mịna ḅẹlẹma ọ́ mịẹse ọ́ kụrọma fịrịnwẹngịarị ḅara mị na, pịkị wa Nyanaḅọ Jizọs Kraịst Ḅe ḅụ ọ́ nyana tọrụseḍikiye mị ọ́ mịẹse ó jikeka ḅara mị na.

⁴Mịna mịnapụ, wa nemimẹ na Tamụnọ Ḅe ori ọ́ ḅẹlẹmamẹ, ọ̀ pịkị ọ́ sẹlẹ seni oria tomoni nwọ mịẹsam.

⁵Anịatịḅị mine Iḅi Ḅẹrẹ mị ọkịḅo ọ́ pịrịmẹ, papa ọkwẹịn ḅụ kẹngẹkẹ, ọkụma pịkị Fịafịa Tẹmẹ Ḅe kụrọ mị na-ẹ, anị pịkị ḅụokoromẹ na mịna oku mị kọkọmaye-ẹ. Wa ómine na sime sịkị, ọ́mịna iḅi gose wa se ḍumo kọn ọkụ ó nemimẹ.

⁶Mine na Nyanaḅọ Ḅe na ọ́ nwọ ḍamẹ; se ómine opuma tọrụsiọrịmẹ nwọ ḅẹ sọnị, ọ́ Fịafịa Tẹmẹ Ḅe ḅụ wẹrị ḅo ḅieḅẹlẹ nwọse oku mị ọkịmẹ.

⁷Anị ḅụ ó ḅo ḍikiḍaye sọ Masidonia na Akaya na ḅie sime ḅereniapụ mamgba nwọ pịrịmẹ.

⁸Anịatịḅị ọ́mịna ḅụ Nyanaḅọ Ḅe oku mị ḅọrọ mun bebe Masidonia na Akaya na lamẹ nwọ ḅẹye kẹngẹkẹ, ọkụma Tamụnọ Ḅe ḅụ ọ́ nyana ḅereni mị ḅe ḅẹrẹ mị sọnị mun nyọ mamgba lasam. Anịọkụma, wa anịkanịka ḅara ḅụ nyana se ḍukoḅịaye ofori-ẹ.

⁹Ini apụ mamgba wa ḅo ọ́ lasịkị mị ḅụ ó seni wa ọkị iḅi ḅara mị gbolomaye nwọ ḍukomẹ, ọ́ pịkị ini karasa oruma ḅụ tọrụsin se vinpịkị Tamụnọ Ḅe daọkụ mị na, pịkị fịrịnwẹngị ḍumo kọkọma Tamụnọ Ḅe nwọ pịrịḅịa ḅara mị na

¹⁰pịkị soḅie ḅoḅịa oria Tọkụ Ḅe koruḅịa ḅara, oria Tọkụ Jizọs Ḅe anị ọ̀ fịḅụsịsẹma ḅọ ḅe, pịkị ḅoarị Tamụnọ ịganị ḅụ wa pẹkẹrẹ pakụmaḅọ ḅe.