Read kirikeni 1 Tẹsalonịka 2 Bible Online

1 Tẹsalonịka 2 - kirikeni bible

1 Tẹsalonịka 2

¹Ómine sọnị ḅarana nemimẹ, mịnapụ, na wa ḅo ómine laye mị papa faye sọkẹ.

²Ó nemimẹ ini Filipaị ḅie wa mịẹsima pịkị wa wọlọ la-ọkụ mị na, ma wa ḅo Tẹsalonaịka ḅie ómine laka simeogbo. Se opu kikichụaye pakamẹ nwọ ḅẹ sọnị mịna Tamụnọ Ḅe kụrọ kuḅie seni wa pịrịmẹ wa se ọ̀ ḅara ḅụ ḅo Iḅi Ḅẹrẹ mị nwọ ḍuko ọ́ pịrị.

³Wa ọ́mịna ḅara ḅiarịye mị wa ḅi irimakẹ, pịkị si kuḅie ḅụkẹ, wa pịkị epele seni gbọrịḅọ sọnị tikẹ.

⁴Anịnakaraka, Tamụnọ Ḅe ḅi na wa ọkwẹịn nwọ ḅẹ ḅara mị wa nwọse ọkwẹịnmẹ, anịatịḅị Iḅi Ḅẹrẹ mị se ḅara ḅụ chụa gbẹịn apụ ḅara ọ̀ nwọ seni wa kịẹnma ọkịsam. Tomoni-a ḅụḅẹlẹḅịaye mịẹḅara wa nwọ ḍọkịkẹ, ọkụma Tamụnọ Ḅe ḅụḅẹlẹḅịaye re-ẹ, mịna kuḅie nemiḅọ ḅe.

⁵Ómine iḅiọkụma nemimẹ na ḅịpị ḅẹlẹ wa nwọse ọ́ damaḅokẹ, wa pịkị pụkọḍọkị ọkwẹịn kọn ọ́ pịrịkẹ—Tamụnọ Ḅe mịna onyechịẹḅọ-ẹ.

⁶Gbọrịḅọ ḅara sọnị wa tokoni ḍọkịkẹ, ọ́mịna ḅara sọnị wa ḍọkịkẹ pịkị jịn apụ ḅara sọnị,

⁷wa ineda ọ́mịna ḅara ọkị gbẹịnye omi-ẹ nwọ ḅẹ sọnị, Kraịst okufịrịnwẹngịapụ ḅara ḅụ. Ọkụma wa mịna ḅụ ma nemimẹ wa ómine na simearị sịkị, mịna awọ ḍikiḍikiarị nyengiḅọ ḅara.

⁸Wa ọ́mịna ḅụ nyana ḅẹlẹma mị gose wa ómine na Iḅi Ḅẹrẹ mị kẹngẹ nwọ ḍiaọkịkẹ, wa pịkị mịna ḍumo ma seni ómine na ḍiamẹ. Ómine opuma mịna ḅụ yelamẹ!

⁹Pikipikiye ofori-ẹ, mịnapụ, ó se ḅiekoroma waraḅẹ, wa ḅara wẹrịma kụrọma fịrịnwẹngị ọkụ mị! Wa ḍin na enekaka na nwọse fịrịnwẹngịmẹ, mịẹse wa ḅụfụka nwọ sọ ọ́ pịrị ẹka ḅara wa Tamụnọ Ḅe ḅara ḅo Iḅi Ḅẹrẹ mị nwọ ḍuko ọ́ pịrịarị sịkị ḅụ.

¹⁰Ómine mịna onyechịẹapụ-ẹ, pịkị Tamụnọ Ḅe sọnị-ẹ, na wa seni ómine ḅereniapụma na anga ḅara mị fịafịa pịkị karakaramẹ, anị pịkị ḍukosimaḅịaye nyanakẹ.

¹¹Ó nemimẹ na ḍaḅọ se oria awọ na anga ọkụ mị wa se ọ́mịna ḅụ ḅọḅọ na anga ọkụ-ẹ.

¹²Wa ọ́mịna kuḅie kụrọmamẹ, wa ọ́mịna kuḅie deinmamẹ, wa pịkị ọ́ ḅẹaḅẹ na ọ́ Tamụnọ Ḅe ḅiarị ọkụ mị nwọse ḍumo kọn, anị ọ́ chịn na ó ḅo ori na oria Amanyanakiri mị na boma mị na nwọ ḍiaọkị-ẹ nwọ ḅẹ ḅọ ḅe.

¹³Wa gose pịkị sịkịmamgba mịẹḅaka se Tamụnọ Ḅe ḅẹarị jịnye omi-ẹ. Wa Tamụnọ oku mị ọkịḅo ọ́ pịrị sịkị, ómine anị naa se pịkị anị ọkịmẹ, tomoniḅọ oku ḅara ọ́ nwọse anị ọkịkẹ, ọkụma Tamụnọ oku ḅara ọ́ nwọse anị ọkịmẹ, anị anị pịkị kọkọma simeọkụ-ẹ. Anịatịḅị Tamụnọ Ḅe ómine ḅereniapụma ḅie ọ̀ fịrịnwẹngịaḅẹ.

¹⁴Mịna mịnapụ, nwọ ọ́ ḅụ pakaye ma anị pịkị Judia ḅie sime Tamụnọ-a chọchị ma ḅie pakaye ma-ẹ, anị sime Kraịst Jizọs Ḅe pịrị apụma. Ọ́mịna sẹ mị ḅie apụma ḅara ómine ọrị gbọrị tọrụsiọrị ma anị ini sọnị Juapụma ḅara ọrịarịye-ẹ.

¹⁵Anị Nyanaḅọ Jizọs Ḅe na pịkị ịkịankoroapụma na ḅaa apụma, ini anị pịkị mịna tọrụsiọrị ma apụma-ẹ. Ini Tamụnọ Ḅe ḅụḅẹlẹka ọkụ ḍiki! Ini tomoni mamgba na kụrọye mịẹarị ọkụ ḍiki!

¹⁶Ini pịkị wa kiki ḍọkịmẹ ḍụaḅọrọma ọkịḅo Jịnsẹapụma pịrịḅịa oku mị ḍuko ini pịrị ḅụ. Mịn kuluma ḅara ḅụ, ini sịkịmamgba mịẹarị sima ḅo mịẹḅeinmaye nwọ sọarị ọkụ-ẹ. Se mịọkụ anị ḅe kuluma, Tamụnọ ịganị mị ḅo inia ọgọnọ gbanasam!

¹⁷Mine ọkụma, mịnapụ, ini kalasịkị ḅụ ọ́mịna ḅụ wa pu sikima sịkị—mịna koroma ḅụkẹ, ọkụma oju ḅụ-ẹ—wa ḅarị ómine ọrịka sịkị, wa pịkị opuma kpalakpalamẹ ḅo ómine ọrịḅịa ẹrẹchị!

¹⁸Wa ḅimẹ wa vinpịkị ómine damaḅo, ị̀rị̀ na mịnaḅụ na gbọrị sịkị nẹngị maye nwọse kpalakpalamẹ vinpịkị ọ́ damaḅoḅịa ẹrẹchị; ọkụma Oru ḅe ḅereni wa pịrịkẹ.

¹⁹Anịḅe kuluma, ómine-ẹ—jịn-apụkẹ! Ómine mị wa tọrụseḍikiarịapụ ma-ẹ, pịkị mịna ḅieḅẹlẹ mị-ẹ, wa se ḅụbomarị ọmụḅaraiḅi mị-ẹ, wa Nyanaḅọ Jizọs Ḅe tọrọkọ ḅụ, anị ò ḅoḅịa sịkị.

²⁰Kọkọmaye-ẹ, ómine anị mịna ḅụdekichịẹma mị na ḅieḅẹlẹ mị na-ẹ!