Read kirikeni 1 Tẹsalonịka 3 Bible Online

1 Tẹsalonịka 3 - kirikeni bible

1 Tẹsalonịka 3

¹Anịḅe kuluma, wa ḅarị ineda anị inema ḅọlọmakẹ. Anị wa ḍukopẹlẹye-ẹ na wa ọkọ wẹrị ngẹrị sime ma munḅịa Atẹns ama mị ḅie

²wa Timoti, mịna mịnaḅọ ḅe nwọse sẹịn àrị sịkị, mine na fịrịnwẹngị Tamụnọ Ḅe pịrịarịḅọ ḅe, Iḅi Ḅẹrẹ mị nwọ ḍukopakụma mị ḅụ, anị Kraịst Ḅe gbolomaye mị. Wa ọ̀ fịrịmamẹ ịnyọ seni ọ́mịna ḅụ chụaḅịaye gose pịkị ọ́mịna ḅereni nwọ mịẹ kụrọmaḅịa ẹrẹchị.

³Mịẹse ọ́mịna ḅie gbọrịḅọ sọnị ma tọrụsiọrịma gose vinpịkị ọḅụda ẹka ḅara. Ómine sọnị ḅarana nemimẹ na, nwọ sime tọrụsiọrịma anị Tamụnọ Ḅe ḅereni wa pịrịye ma ḅe daye-ẹ.

⁴Anịatịḅị wa ómine na pa simearị sịkị, wa tatarị ḍuko ọ́ pịrịmẹ na ini mine seni tọrụsiọrị ḅie chuḅịa, se ómine iḅiọkụma nemi ḅara ḅụ anị mịọkụ, gbọtụḅara pakasaye mị-ẹ.

⁵Anị mị à gose Timoti ḅe se fịrịmaye-ẹ. À ḅarị ineda anị inema ḅọlọmakẹ, anịẹrẹchị àrị ò se fịrịmamẹ, ọ́mịna ḅereni la-ọkụ nwọ ḍọkị nemiḅịa ẹrẹchị. Pikipikiye ofori-ẹ anị ineda ọkọ paka ẹkẹ na Oru ḅe ó telima so ọkụma, mịna fịrị mị mgba ḅo papaye nwọ sọmẹ!

⁶Mịọkụ Timoti ḅe ò vinpịkị ḅosam, se ọ́mịna iḅi ḅereni mị na ḅẹlẹma mị na ḅẹrẹ nwọ ḍuko wa pịrịsam. Ò ḍuko wa pịrịmẹ na ọ́ sịkịmamgba iḅi koroma nyana wa pịrịmẹ, na ọ́ pịkị wa ọrịḅịa ẹrẹchị ḅimẹ, mine sọnị ómine ọrịḅịa ẹrẹchị ḅiarị ḅara mị.

⁷Anị ḅara mị ḅụ, mịna ḅụfụkama na mịna tọrụsiọrịma na ḅie mgba ḅụ, wa ó gbolomaye nwọse kuḅie kụrọmamẹ, mịnapụ. Ọ́mịna ḅereni mị mịna kuḅie kụrọmaye-ẹ.

⁸Anịatịḅị mịọkụ mị wa kọkọma ḍumo aḅẹ, ó nemikase ọ́mịna ḍumo ḅụ Nyanaḅọ Ḅe na gbọrịye mịẹ ḅụ kụrọma chịẹ waraḅẹ ḅẹḅẹ.

⁹Mịọkụ wa ọ́ tịḅị gose mịẹḅaka se mịna Tamụnọ Ḅe ḅẹḅịa. Wa ọ̀ tọrọkọ nyana ḅieḅẹlẹ mị gose wa mịẹḅaka seni ọ̀ ḅẹmẹ ọ́ tịḅị gose.

¹⁰Ḍin na enekaka na ḅụ, wa mịna kuḅie mgba se ọ̀ ḅara ḅimẹ na ò ḅereni wa pịrị wa tọrụ na ịrịa se mà ọ́ ḅụpalịmaye ma se ọ́mịna ḅereni ḅụ chụa ọ́ pịrịḅịa ọkụ.

¹¹Ye mịna Tamụnọ pịkị Ḍaḅọ Ḅe na mịnaḅụ na, pịkị Nyanaḅọ Jizọs Ḅe na, ḅarana ateli mị karakarama wa pịrị se wa ḅo ọ́ la!

¹²Ye Nyanaḅọ Ḅe ọ́ nyana jịnḅọ jịnḅọ pịrị ḅẹlẹma na, pịkịna ọ́ nyana jịn-a tomoni mamgba na pịrị ḅẹlẹma mị mịẹse anị sẹnịma sẹnịma mun, se anị ḅo wa nyana ọ́ pịrị opu ḅẹlẹma mị la-ọkụ la.

¹³Mịn ḅara mị ḅụ, ori ọ́ mịẹkụrọmaḅịa, se ḍukoḅịaye ofori, pịkị fịafịaḅụ sọḅịa mịna Tamụnọ pịkị mịna Ḍaḅe tọrụkuḅu, se wa Nyanaḅọ Jizọs Ḅe sime ọ̀ pịrịapụ mamgba na ḅoḅịa sịkị.