Read kirikeni 1 Tẹsalonịka 4 Bible Online

1 Tẹsalonịka 4 - kirikeni bible

1 Tẹsalonịka 4

¹Anịḅe kuluma, mịnapụ, mịna ḅara ọ́ ḍawọmẹ, ó se ḍumo kọn se Tamụnọ Ḅe ḅieḅẹlẹmaḅịa ọkụ mị. Mịn ḅara mị anị ó se ḍumo kọn àrị ọkụ mị-ẹ. Kọkọmaye ḅụ, se wa mịọkụ wa Nyanaḅọ Jizọs Ḅe ẹrẹ nwọse ọ́ tẹkẹaḅẹ na ómine anị ḅara nẹngị ḅara nwọse ye mịẹ.

²Anịatịḅị, Nyanaḅọ Jizọs Ḅe se wa pịrị kụrọ ḅụ wa se ó ḍieaye ma ó nemimẹ.

³Tamụnọ Ḅe ò ḅimẹ ọ́ ḅụ se osiḅụ wẹrị, se sẹfị ḅụ okorona okorona ọ́ ḅụ sin.

⁴Ye ómine owuapụma ḅọḅọ iniḅọ ta na anga gbẹịn ọkụ nwọse anga, osiḅụ sime pịkị osi nyana ḅara ḅụ,

⁵ojumịnị mị ḍikipụkọsoliarịye ḅụkẹ, oru ḅẹrẹ nemiapụ ḅara mị, anị Tamụnọ Ḅe nemika apụma.

⁶Mịn ḅẹrẹ mị ḅụ, ye gbọrịḅọ sọnị, anịọkụma, iniḅọ pembe Kraịst Ḅe ḍukonwẹngịarịḅọ nwọ mịẹsimama, anịkanịka ọḅụ gbin ma. Wa tatarị mịn mị ḍuko ọ́ pịrị ḅọrọsam, wa pịkị kụrọma ọ́mịna ḅerijine-aḅẹ na Nyanaḅọ Ḅe ọ̀ ḅụfụka seni anị mịẹ apụma pịrịḅịa.

⁷Anịatịḅị Tamụnọ Ḅe ọ̀ wa chịnkẹ na wa ḅo sẹfị ḍumo kọn, ọkụma na wa ḅụ se osiḅụ wẹrị ḍumo ḅụ sime-ẹ.

⁸Anịẹrẹchị mị ḍieye mị sịkịḅọ goyegoye iniḅọ tomoniḅọ sịkịkẹ, ọkụma Tamụnọ Ḅe-ẹ, anị oria Fịafịa Tẹmẹ Ḅe nwọse ọ́ pịrị ḅọ ḅe.

⁹Anị ḅụpalịmaye sọkẹ se ọ́mịna juo ḅereniapụ ḅẹlẹmaḅịa ọkụ gose ḍiri gịẹịn ọ́ fịrịma. Ómine na mịnaḅụ na Tamụnọ Ḅe ó se jịnḅọ jịnḅọ ḅẹlẹma gbẹịn ọkụ nwọse ó ḍiesam.

¹⁰Karakaraye ḍuko ḅụ, ọ́ pịkị mị ḅara mị nwọ mịẹsam Masidonia ḅie sime mịnapụ mamgba ḅụ, anịẹrẹchị, mịnapụ, wa ọ́ tẹkẹmẹ na ómine ọkọ mịẹtẹịn.

¹¹Ó dein ḍumo kọnḅịa ḅara ọ́ nwọse ọ́mịna ḅụ wẹrị, tọrụ se ọ́mịna fịrị ḅụ wẹrị na, pịkị ye kọnfị ḅụ na ó sime, wa tatarị ḍuko ọ́ pịrị ḅọrọsa ḅara ḅụ.

¹²Mịn ḅara mị ḅụ, ọ́ ḅọrọ ḅerenika apụma osi nwọ nyanaḅịa, se ḅarị tọrụ seni jịnḅọ ḅụ wẹrị ẹkẹ ọ́mịna ḅụpalịmaḅịaye ma ḅụ.

¹³Mịnapụ, wa ḅimẹ ọ́ fịapụma gboloma kọkọmaye mị nwọ nemi, mịẹse ómine ngịrị ẹka ḅara tọrụseḍikiye nyanaka apụma mịẹarị ḅara mị.

¹⁴Wa ḅerenimẹ na Jizọs Ḅe fị se pịkịna fịḅụsịsẹmẹ, anị ḅara mị wa pịkị nwọ ḅerenimẹ na Tamụnọ Ḅe Jizọs Ḅe na ò ḅereni se fịapụma na nwọse chụa ọkịḅịa.

¹⁵Mịọkụ wa se ó ḍiearịye ma anị Nyanaḅọ Ḅe ḍie ọkụ-ẹ: na mine ḍumo simeogbo Nyanaḅọ Ḅe ḅoḅịa ene mị laḅịa apụma, wa ini fịḅọrọsapụ ma tọrọkọ pẹlẹma mun ẹkẹ.

¹⁶Tịḅịnị enjẹlḅọ ḅe ḅẹrẹtọn oloku pụkọ ḅụ, Tamụnọ oḍu mị fieḅịa se ori Nyanaḅọ Ḅe na mịnaḅụ na ḅarana soḅie koroḅoḅịa. Kraịst Ḅe ḅereni ḅọrọ se fịapụma tatarị fịḅụsịsẹḅịa.

¹⁷Anịsịkị mị ḍumo apụma ini nwọ koḅirima inia ḅụ chụa mun soḅuno ma ḅụ Nyanaḅọ Ḅe na fọrụ ḅie ịrịaḅịaye-ẹ. Anị wa Nyanaḅọ Ḅe na sịkịmamgba simeḅịa ọkụ-ẹ.

¹⁸Anịẹrẹchị, ọ́ mà ọkwẹịnma se jịnḅọ jịnḅọ kuḅie kụrọma.