Read kirikeni Jọshụa 10 Bible Online

Jọshụa 10 - kirikeni bible

Jọshụa 10

¹Adonaị-Zidẹk, Jerusalẹm amanyanaḅọ ḅe naamẹ na Jọsụwa ḅe Eaị mị ọkị se okorona okorona anị kansin pịkị anịa amanyanaḅọ ḅe ḅaasam, anị ò se Jẹriko mị na pịkị anịa amanyanaḅọ ḅe na mịẹọkụ mị. Ọ̀ pịkị naamẹ na Gibiọn apụma ini Izrẹlapụma na deinma mịẹsam se pịkị inia ḅie anga waraḅẹ.

²Mịn mị anị opu tẹmẹ taịntaịn se Jerusalẹm apụma pịrịmẹ anịatịḅị Gibiọn mị ḍụḅa la-ọkụ anị ísí-a amanyanapụma nyana opuamama ḍụḅa la-ọkụ-ẹ anị ḍụḅatẹịn Eaị mị nẹngịmẹ, inia owunima ini iḅiọkụ owusọ ḍinmẹ.

³Anị Adonaị-Zidẹk Jerusalẹm amanyanaḅọ ḅe oku se Hibrọn, Hoham Amanyanaḅọ ḅe na Paịram, Jamọt Amanyanaḅọ ḅe na, Jafaịya, Lekish Amanyanaḅọ ḅe na, Diba, Ẹglọn Amanyanaḅọ ḅe na fịrịma se nwọse ini ḅẹmẹ:

⁴“Ó ḅo ḅarachụa ị̀ pịrị wa owuse Gibiọn mị paka, anịatịḅị anịa tomonima ini Jọsụwa ḅe na Izrẹlapụma na deinma mịẹsam.”

⁵Mịn sọnọ-a Amọraị amanyanapụma, Jerusalẹm mị na, Hibrọn mị na, Jamọt mị na, Lekish mị na, pịkị Ẹglọn mị na amanyanapụma inia owuni ọkịḅo gboloma, Gibiọn mị ḍẹkị kelema se owuse anị pakamẹ.

⁶Gibiọn apụma ḅịpị se Jọsụwa ḅe fịrịmamẹ Gilgalị mị ḅie ini ikowarịma pike sime nyọ mị ḅụ, se nwọse ọ̀ ḅẹmẹ: “Mine ị́ya fịrịnwẹngịapụma se sarakoromama! Saramaḅo ḅarachụa wa pịrị se wa ḍụaḅọrọma! Chịngị ma ọgọnọ sime Amọraị apụ mamgba inia owunima ọkịḅo gboloma se owuse wa pakasam!”

⁷Anị Jọsụwa ḅe na oria ọmụogbo mị mgba na, pịkị ọmụgbintẹịn kpo mamgba na, Gilgalị mị ḅie sakị ini damamunye-ẹ.

⁸Nyanaḅọ Ḅe nwọse Jọsụwa ḅe ḅẹmẹ, “Ini ḍiki ḅalafama. Ọmụḅaraiḅi mị à se ị́ pịrị ḅọrọsam. Iniaḅụ gbọrịḅọ sọnị ineda ị́ tọrọkọ chịẹ ẹkẹ.”

⁹Bebe ḍin mị mgba Jọsụwa ḅe na oria ọmụogbo mị na Gilgalị mị ḅụ nwẹngị Gibiọn mị mun mẹ, ini pịkị bẹkẹma owu se Amọraị apụma pakamẹ.

¹⁰Nyanaḅọ Ḅe mịẹse Amọraị apụma ḅalafamẹ, ini Izrẹl ọmụogbo mị ọrị sịkị. Izrẹlapụma ini ini ḅaamẹ, Gilgalị mị ḅie pịkị ini ḍuko mun tụndụ mị ḅọrọkoromẹ Bẹt Horọn mị ḅie ḅụ, ini pa ini na sọmun chukuda ọrụ ḅụ Azika mị na pịkị Makida mị na nwọ lamẹ.

¹¹Amọraị apụma Izrẹl ọmụogbo mị ḅụ mangị ḅọrọ nyọ mị ḅụ soarị sịkị Nyanaḅọ Ḅe ḍụparị mgbọlụ sime ọkụ sime enemgbọlụ nwọ koroma inia ọgọnọ sara nweni ini mun Azika mị lamẹ. Opu-ene-mgbọlụ ma ḅaa apụma ḅakatẹịn Izrẹlapụma ḅaa apụma nẹngịmẹ.

¹²Nyanaḅọ Ḅe ọ̀ mịẹ sarasarama Izrẹlapụma pịrị se ini Amọraị apụma nẹngịma ene mị ḅụ, Jọsụwa ḅe ori ọkwẹịn kọn Nyanaḅọ Ḅe pịrịmẹ. Izrẹlapụma tọrọkọ ḅụ ọ̀ nwọ ḅẹmẹ, “Ịrụa, Gibiọn mị ọgọnọ ḅụ chịẹ sime; Akalụ, Aịjalọn Pẹsịkiri mị ọgọnọ ḅụ chịẹ sime.”

¹³Ịrụa mị chịẹ simemẹ se akalụ mị sọnị pịkị ḅụọ pọkọka nweni Izrẹl sẹ mị anị na tarakapụma nẹngịma sịkị lamẹ. Mịn mị Jesha Ḍiri mị ḅie ini gịẹịnmẹ. Ịrụa mị sotọrụ ḅụ karakarama ogboku ḅụ chịẹ simemẹ se ngịsị binka nweni mun bebe gbọrị ene nwọ lamẹ.

¹⁴Jịn sịkị ọkọ sime enema pakakẹ, Nyanaḅọ Ḅe ọkọse tomoniḅọ ḅịpịpoki sịkị. Nyanaḅọ Ḅe ori owusọ Izrẹlapụma pịrịmẹ!

¹⁵Mịn mị ḅọrọ sịkị, Jọsụwa ḅe na oria ọmụogbo mị na vinpịkị so ini ikowarịma pike sime nyọ mị mun mẹ Gilgalị mị ḅie.

¹⁶Amọraị sọnọ amanyanapụma ini mangị somun pokolo ḅie ḅọịmẹ Makida mị ḅie.

¹⁷Gbọrịḅọ ini ḍọkịḅo, se anị ḍuko Jọsụwa ḅe pịrịmẹ ini ḅọị sime anga ḅụ.

¹⁸Se Jọsụwa ḅe nwọ ḅẹmẹ, “Ómine opu ḍụparị mbimbile pokolo mị ḅịpị gbẹịn se owuni seni anị koru,

¹⁹ọkụma ómine anịju sime ma. Ọ́ tarakapụma ḍuko se ọḅụ-owuse ini paka; ó ḅerenima ini mun inia opuamama ḅie sọ! Nyanaḅọ ọ́mịna Tamụnọ Ḅe ọ̀ mịẹ sarasarama ọ́ pịrịse ómine ini nẹngịmaḅịa.”

²⁰Jọsụwa ḅe na Izrẹlapụma na tomonima ḅaamẹ, iniaḅụ dapụ mangị mun opuama mị onuma ḅie sọḅọị se ḅarị fị̀kẹ.

²¹Anịsịkị Jọsụwa ḅe oria owuapụ mamgba vinpịkị so ọ̀ damaḅomẹ Makida ḅie ini ikowarịma pike sime nyọ mị ḅụ, gbọrịye sọnị ini laka ḅaraḅụ. Ama mị ḅie gbọrịḅọ sọnị ngịsị Izrẹlapụma ḅụ siye ḍukokẹ.

²²Anị Jọsụwa ḅe nwọḅẹye-ẹ, “Ó pokolo mị ḅịpị finji se sọnọ-a amanyanapụma pakụmaḅo ị̀ pịrị.”

²³Ini pokolo mị finji se Jerusalẹm mị na, Hibrọn mị na, Jamọt mị na, Lekish mị na, pịkị Ẹglọn mị na amanyanapụma ọkị pakụmaḅomẹ

²⁴se ini se mun Jọsụwa ḅe pịrịmẹ. Anịsịkị Jọsụwa ḅe bebe Izrẹl owuapụ mamgba chịn ọkị se ori na mun ọmụ tịḅịdapụ ma ḅẹmẹ na ini ḅo inia ḅụọma se amanyanapụma kọngọ ma nanga. Ini pịkị ọkọ mịẹmẹ.

²⁵Anịsịkị Jọsụwa ḅe nwọse oria ọmụtịḅịdapụ ma ḅẹmẹ, “Ọ́ ḅalafama ọ́ pịkị ó kuḅie lọkọmama. Ómine ịnyọchụa pịkị kụrọkuḅie nyana anịatịḅị mị Nyanaḅọ Ḅe se ómine-na-tarakapụ mamgba mịẹḅịa ọkụ-ẹ.”

²⁶Anịsịkị Jọsụwa ḅe ọ̀ sọnọ-a amanyanapụma ḅaamẹ se ini se sọnọ-a eje ọgọnọ sụka koromamẹ, anịju ḅụ inia ojuma sime mun sasoḅiri lamẹ.

²⁷Ịrụa mị bin sịkị Jọsụwa ḅe ọ̀ kụrọ pịrịmẹ, se ini inia ojuma sin koromamẹ se ini seni ini ḅọị sime pokolo mị ḅie gbin chumẹ. Opu ḍụparịma ini nwọse anịa ḅịpị gbẹịnmẹ se mịmgba sọnị árị pa omi-ẹ.

²⁸Anị ene mị ḅụ Jọsụwa ḅe ori owuse Makida mị paka se anị ọkịmẹ pịkị anịa amanyanaḅọ ḅe na. Opuama mị ḅie simeḅọ goyegoye ọ̀ ḅaamẹ; gbọrịḅọ kẹngẹ sọnị ḍumokẹ. Ò se Jẹriko amanyanaḅọ ḅe mịẹ ọkụ anị ọ̀ pịkị se Makida amanyanaḅọ ḅe mịẹ ọkụ-ẹ.

²⁹Mịn mị ḅọrọ sịkị Jọsụwa ḅe na oria ọmụogbo mị na Makida mị ḅie somun Libna mị la se owuse anị pakamẹ.

³⁰Nyanaḅọ Ḅe pịkị mịẹ sarasarama Izrẹl mị pịrị se, ini mịn opuama kan pịkịna anịa amanyanaḅọ ḅe na nẹngịmamẹ. Gbọrịḅọ kẹngẹ sọnị ini kọnmakẹ, ọkụma anịa ḅie simeḅọ goyegoye ini ḅaamẹ. Ini se Jẹriko amanyanaḅọ ḅe mịẹ ọkụ anị ini pịkị se ḅe amanyanaḅọ ḅe mịẹ ọkụ-ẹ.

³¹Mịn mị ḅọrọ sịkị, Jọsụwa ḅe na oria ọmụogbo mị na Libna mị ḅie somun Lekish mị ḍẹkịkelema se owuse anị pakamẹ.

³²Ọmụ mị gbin mama ḍin karama ene mị ḅie Nyanaḅọ Ḅe ọ̀ mịẹ sarasarama Izrẹlapụma pịrị se ini Lekish ama mị nẹngịmamẹ. Libna mị ḅie ini mịẹ gbọrị ḅara anị ini mịẹ ọkụ-ẹ, gbọrịḅọ sọnị ini kọnmakẹ, ọkụma opuama mị ḅie simeḅọ goyegoye ini ḅaamẹ.

³³Horam, Gaza Amanyanaḅọ ḅe, ò ḅo ḅarachụa Lekish mị pịrịmẹ, ọkụma Jọsụwa ḅe oria owunima na ori na nẹngịmamẹ, iniaḅụ gbọrịḅọ sọnị pịkị ḍumokẹ.

³⁴Jịnye, Jọsụwa ḅe na oria ọmụogbo mị na Lekish mị ḅie somun Ẹglọn mị ḍẹkịkelema se owuse anị pakamẹ.

³⁵Anị gbọrị ene mị ḅie ini anị ọkịmẹ pịkị tomoni mamgba ḅaasinmẹ, anị Lekish mị ḅie ini mịẹ ọkụ mị.

³⁶Mịn ḅo ḅọrọ sịkị, Jọsụwa ḅe na oria ọmụogbo mị na Ẹglọn mị ḅie somun chịngịma ọgọnọ ḅụ ḅọrọ mun Hibrọn mị la, se owuse anị paka

³⁷se pịkị anị ọkịmẹ. Ini amanyanaḅọ ḅe ḅaamẹ pịkị anịa ḅie sime apụ mamgba na pịkị anị na kpeki amama ḅie sime apụ mamgba na. Jọsụwa ḅe ọ̀ kụrọ pịrịmẹ na opuama mị ini okorona okorona anị famasin, anị ò se Ẹglọn mị mịẹ ọkụ mị. Anịa ḅie sime se ḍumo gbọrịḅọ sọnị ofori-ẹ.

³⁸Anịsịkị Jọsụwa ḅe na oria ọmụogbo mị na vinpịkị so Diba mị mun se owuse anị pakamẹ.

³⁹Ori anị ọkịmẹ anịa amanyanaḅọ ḅe na pịkị anị na kpeki ama mamgba na. Anịju ḅụ simeḅọ goyegoye ini ḅaamẹ. Jọsụwa ḅe ò se Hibrọn mị na Libna mị na pịkị anịa amanyanaḅọ ḅe na mịẹ ọkụ mị anị ọ̀ pịkị se Diba mị na anịa amanyanaḅọ ḅe na mịẹ ọkụ-ẹ.

⁴⁰Jọsụwa ḅe bebe sẹ mamgba ori árị nẹngịmamẹ. Chịngị ọgọnọ sẹma ḅe amanyanapụma ori ini nẹngịmamẹ ịrụapakapaka nyọ daọrụ ḅụ tukoro anga ma ḅụ sime amama na, pịkị chịngịma chuku sime amama na, anị ịrụasọsọ nyọ daọrụ ḅụ, pịkị kpoinkpoin kiri sẹma ḅụ, chukuju daọrụ ḅụ sime amama na. Gbọrịḅọ sọnị ọ̀ kọnmakẹ; nweni mamgba ọ̀ ḅaafamamẹ. Mịn anị Nyanaḅọ Izrẹl Tamụnọ Ḅe tọn ọkụ-ẹ.

⁴¹Jọsụwa ḅe, Kedẹsh Banea chukuju daọrụ sime sẹma ḅụ sakị ini nẹngịma mun Gaza tọrụ aka na kpekima sime-a nyọma lamẹ, pịkị Goshẹn sẹ mị mgba ḅụ ọkịmun Gibiọn ọgọnọju daọrụ sime sẹma lamẹ.

⁴²Jọsụwa ḅe mịna amanyanapụma na inia sẹma na gbọrị sịkị ḅụ ori arịmgba ọkịmẹ, anịatịḅị Nyanaḅọ Izrẹl Tamụnọ Ḅe ḅarana ọmụ mị gbin Izrẹl mị pịrịmẹ.

⁴³Mịn ḅo ḅọrọ so sịkị, Jọsụwa ḅe na oria ọmụogbo mị na vinpịkị so ini ikowarịma pike sime nyọ mị mun me Gilgalị mị ḅie ḅụ.