Read kirikeni Jọshụa 13 Bible Online

Jọshụa 13 - kirikeni bible

Jọshụa 13

¹Mịọkụ Jọsụwa ḅe ori opuma olomusam. Nyanaḅọ Ḅe nwọse ọ̀ ḅẹmẹ, “Ị́ opuma olomusam, ọkụma ómine ọkịḅịa kiri pa pịkị ḅaka waraḅẹ:

²bebe Filistia mị na pịkị Gẹshọ mị na pẹkẹrẹ mamgba na,

³pịkị Avim pẹkẹrẹ mị ḅụ ọkịmun chuku daọrụ mị mgba la. (Shaịhọ ideri mengi mị ḅụ sime kiri mị ḅụ ọkịmun Ijipt apụ eke mị ḅụ la, pịkị ọgọnọ daọrụ mị ḅụ mun Ẹkrọn apụ eke mị la, anịmgba Kenan apụ nyọ-ẹ; Filistia amanyanapụma anga nyọ anị Gaza mị na, Ashdọd mị na Ashkẹlọn mị na, Gat mị na, pịkị Ẹkrọn na-ẹ.)

⁴Mịọkụ sọnị Kenan apụ sẹ pa kọn waraḅẹ ómine ọkịḅịaye, Meara (anị Saịdọn apụ ama mị na), pịkị ọkịmun Efẹk mị la, anị Amọraị apụma eke ḅụ simeye mị;

⁵Gẹbal apụ ama mị na, bebe Lẹbanọn mị ḅụ ọkịmun ịrụapakapaka nyọ daọrụ mun Bealgad mị ḅụ sakị, anị chuku daọrụ mị ḅụ ọkịmun Hamọn Tụndụ mị la, ọkịmun Hamat Ḅọrọnyọ mị la.

⁶Mịn mị bebe Saịdọn apụ pẹkẹrẹ mị mgba anịa ḅụ omi-ẹ, anị Lẹbanọn Tụndụ ma na pịkị Misrẹfọt Meim mị na ogboku anga chịngị ọgọnọ sẹ mị ḅe apụ ma-ẹ. Izrẹlapụma nwẹngị sọmun-arị sịkị à mịna sẹma ḅie anga apụ mamgba depakụmaḅịa. À tọn ị́ pịrị ḅọrọsa ḅaraḅụ, kiri mị ị́ ḍie Izrẹlapụma pịrịḅịa.

⁷Anịẹrẹchị mịọkụ, mịn kiri mị ḍie se ísí esenie-a furoma na pịkị Manasẹ furo mị ḅụ gbọrị pẹkẹrẹ mị na nwọ pịrị, mịẹse ini anị ḍiaọkị se anị iniaye sọḅịa ḅara.”

⁸Rubẹnị na Gadị na sẹma na pịkị Manasẹ sẹ mị ḅụ gbọrị pẹkẹrẹ mị na, Moziz, Nyanaḅọ Ḅe fịrịnwẹngịḅọ ḅe ḍie ini pịrị kiri mị ini ọkịsam, Jọdan Tọrụ mị ḅụ ịrụapakapaka nyọ daọrụ ḅụ anị simemẹ.

⁹Inia pẹkẹrẹ mị anị mun Aroa mị lamẹ (Anọn Pẹsịkiri mị aka sime sẹ mị) pịkị anị pẹsịkiri mị ogboku sime opuama mị na pịkị sẹrẹrẹ kiri mị mgba se chụa anị Mẹdiba mị ḅụ ọkịmun Dibọn mị la.

¹⁰Anị ọkịmun Amọn mị eke mị sọnị lamẹ, pịkị Amọraị amanyanaḅọ Saịhọn ḅe da ḅọrọsa opuama mamgba ḅie omi-ẹ, anị Hẹshbọn da ḅọrọsaḅọ ḅe.

¹¹Pịkị Giledị na, Gẹshọ na Meaka pẹkẹrẹ ma na, Hamọn Tụndụ mị mgba na, pịkị bebe Bashan mị mgba ḅụ ọkịmun Saleka mị la.

¹²Pịkị Ọg ḅe oria amanyanakiri mị na, Rifeim apụma ḅụ kulumaḅọ ḅe, anị Ashtarọt na Edreị na amanyanaḅọ ḅe. Moziz ḅe ọ́mịna apụma nẹngịma se ini depakụmamẹ.

¹³Ọkụma Izrẹlapụma ini Gẹshọ apụma na Meaka apụma na depakụmakẹ; ini pa Izrẹlapụma ḅie anga waraḅẹ.

¹⁴Livaị furo ḅie apụma Moziz ḅe ò kiri se ini pịrịkẹ. Anị Nyanaḅọ Ḅe ḍuko Moziz ḅe pịrịsa ḅaraḅụ, ini se dọkịma agbamịẹ Izrẹl mị Nyana Tamụnọ Ḅe pịrịayema ḅụ anị inia ḍiekiri mị simeye-ẹ.

¹⁵Moziz ḅe kiri mị ḅụ gbọrị pẹkẹrẹ ọ̀ nwọse Rubẹnị sẹ mị pịrị ḅọrọsam, anị sime ini pịrịmẹ.

¹⁶Inia pẹkẹrẹ mị ọkịmun Aroa mị lamẹ (Anọn Pẹsịkiri mị aka ḅụ) pịkị anị pẹsịkiri mị ḅie ogboku sime opuama mị na pịkị bebe Mẹdiba mị kelema koro gele sẹrẹrẹ kiri mị mgba.

¹⁷Pịkị Hẹshbọn mị na, bebe gele sẹrẹrẹ kiri mị ọgọnọ sime opuama mamgba na, Dibọn mị na, Bemọt Beal mị na, Bẹt-Beal-Miọn mị na,

¹⁸Jehaz mị na, Kẹdemọt mị na, Mẹfat mị na,

¹⁹Kiriateim mị na, Sibma mị na, Zirẹtsheha mị na, anị chịngị mị ọgọnọ ḅụ sime kiri mị, pẹsịkiri mị ḅie ḅụ,

²⁰Bẹt Piọ mị na, Pisga Tụndụ mị ḅụ tukoro nyọma na, pịkị Bẹt-Jeshimọt mị na.

²¹Pịkị gele sẹrẹrẹ kiri mị ọgọnọ ḅụ sime opuama mamgba na pịkị bebe Amọraị amanyanaḅọ Saịhọn amanyanakiri mị mgba na, anị Hẹshbọn mị ḅie sime ḅẹrẹtọn ḅọrọsa ḅọ ḅe. Moziz ḅe ọ̀ nẹngịmamẹ pịkị Midia mị ḅie ḅẹrẹtọn apụma na: anị Ivaị ḅe na, Rekẹm ḅe na, Zọ ḅe na, Họ ḅe na, pịkị Riba ḅe na. Mịna apụ mamgba ini ama mị da Saịhọn amanyanaḅọ ḅe pịrị ḅọrọsam.

²²Izrẹlapụma ḅaa apụma ḅụ gbọrịḅọ anị Belam, Beọ ya tọrụtoluḅọ ḅe-ẹ.

²³Jọdan mị, anị Rubẹnị awọma eke mị-ẹ, ịrụasọsọ nyọ daọrụ ḅụ mịna opuamama na pịkị amama na ini se Rubẹnị awọma pịrịmẹ, inia ḍiekiriye-ẹ anị ini wẹrị furofuro ḅụ paka ḅaraḅụ.

²⁴Moziz ḅe, ọ̀ pịkị kiri mị ḅụ gbọrị pẹkẹrẹ se Gadị sẹ mị pịrịsam, inia ḍiekiriye-ẹ, anị ini wẹrị furofuro ḅụ paka ḅaraḅụ.

²⁵Inia pẹkẹrẹ mị anị Jiza mị na pịkị bebe Giledị opuama mamgba na, Amọn mị ḅụ gbọrị pẹkẹrẹ ḅụ ọkịmun Aroa mị la, anị Raba mị ḅụ ịrụapakapaka nyọ daọrụ ḅụ simeye mị;

²⁶inia ama mị Hẹshbọn mị ḅụ ọkịmun Remat Mizpẹ mị na Bẹtonim mị na lamẹ; Mahaneim mị ḅụ ọkịmun Lodiba eke mị la.

²⁷Jọdan Pẹsịkiri mị ḅie ḅụ ma amama sọ ḅie omi-ẹ, Bẹt Heram mị na, Bẹt Nimra mị na, Sọkọt mị na, pịkị Zefọn mị na, anị Amanyanaḅọ Saịhọn, Hẹshbọn amanyanaḅọ ḅe oria amanyanakiri ma ḅụ kọn aye ma-ẹ. Jọdan Tọrụ mị anị inia eke mị-ẹ, ịrụasọsọ nyọ daọrụ ḅụ, pịkị ọgọnọju daọrụ ḅụ ọkịmun Galili Ḍapa mị sọnị nwọ lamẹ.

²⁸Ma anị ini se Gadị sẹ mị pịrị opuamama na amama na-ẹ, ini wẹrị furofuro ḅụ paka ḅaraḅụ inia ḍiekiriye-ẹ.

²⁹Moziz ḅe kiri mị ḅụ ọ̀ gbọrị pẹkẹrẹ se Manasẹ awọma ḅụ gbọrị pẹkẹrẹ nwọ pịrịsam inia ḍiekiriye-ẹ ini wẹrị furofuro ḅụ paka ḅaraḅụ.

³⁰Inia pẹkẹrẹ mị anị mun Mahaneim mị na pịkị bebe Bashan mị mgba nwọ lamẹ—anị Ọg ḅe oria amanyanakiri mị mgba na, pịkị bebe Jea mị ḅụ sime ịwọama tesi mamgba na anị Bashan mị ḅụ simeayema.

³¹Giledị mị ḅụ gbọrị pẹkẹrẹ sọnị anịaḅụ omi-ẹ, pịkị Ashtarọt mị na, Edreị mị na, anị Ọg ḅe oria amanyanakiri mị ḅụ tịḅịda opuama ma-ẹ Bashan mị ḅieḅụ. Ma mamgba ini se Meka furo ḅie gbọrị apụ pịrịmẹ, Manasẹ yaḅe.

³²Mị anị Moziz ḅe kiri mị ḍie ọkụ mị-ẹ, Jẹriko mị ḅụ ịrụapakapaka nyọ daọrụ mị na pịkị Jọdan mị na, anị Moab ama sẹrẹrẹ nyọ mị ḅụ ò sime sịkị ḅụ.

³³Ọkụma Moziz ḅe gbọrị ama sọnị ò se Livaị awọma pịrịkẹ. Ọ̀ nwọse ini ḅẹmẹ na ini se agbamịẹ Izrẹl mị Nyana Tamụnọ Ḅe pịrịayema ḅụ anị ini ḍiekiri nyanaye-ẹ.