Read kirikeni Jọshụa 17 Bible Online

Jọshụa 17 - kirikeni bible

Jọshụa 17

¹Jọdan mị ḅụ ịrụasọsọ nyọ daọrụ mị ḅụ gbọrị pẹkẹrẹ ini nwọ ḍie Manasẹ furoma ḅụ daye nwọ pịrịmẹ anị Josẹf ḅe oria tatarị tọkụ ḅe Meka, Giledị ḍaḅe, anị Manasẹ tatarị tọkụ-ẹ, pịkị ọmụgbin ḅụ ẹrẹpakaḅọ-ẹ, anịẹrẹchị Giledị mị na Bashan mị na ini se ọ̀ pịrịmẹ, anị Jọdan mị ḅụ ịrụapakapaka nyọ daọrụ mị.

²Jọdan mị ḅụ ịrụasọsọ nyọ daọrụ mị ḅụ sime amama sime ísí kirikọn Manasẹ furoma pịrịmẹ: anị Abaịeza ḅe na, Hilẹk ḅe na, Asriẹl ḅe na, Shẹkẹm ḅe na, Hifa ḅe na, pịkị Shẹmaịda ḅe na. Mịna apụma Manasẹ furo ḅe owuapụ-ẹ, Josẹf yaḅe, ini anị pịkị furoma ḅie tịḅịnịma-ẹ.

³Zẹlofẹhad, Hifa yaḅe, anị Giledị yaḅe anị Meka yaḅe, anị Manasẹ yaḅe, ori owuapụ awọ yikẹ, ọkụma eremeni-awọ kẹngẹ-ẹ. Inia ẹrẹ anị Mala, Noa, Hogla, Milka, pịkị Tiaza ma na.

⁴Ini so Ẹleaza agbamịẹḅọ ḅe na Jọsụwa Nọn yaḅe na, pịkị tịḅịnịma na damamun se nwọse ini ḅẹmẹ, “Nyanaḅọ Ḅe tọn Moziz ḅe pịrịmẹ na mịna mịnapụ owuapụma, ḍiekiri ama mị ḅie nwọ nyana ọkụ mị, mine sọnị ọkọ seni ḍiekiri nwọ nyana.” Anịẹrẹchị Nyanaḅọ Ḅe tọnsa ḅaraḅụ, inia mịnapụ owuapụma ḍiekiri nyana ọkụ mị, ini sọnị inia ḍiekiri se ini pịrịmẹ ama mị ḅie ḅụ.

⁵Anị mị mịẹse Manasẹ ḅe oyi-a ḍiekiri nwọ ọkị se Giledị mị na Bashan mị na ḅụ chụamẹ Jọdan mị ḅụ ịrụapakapaka nyọ daọrụ mị ḅụ,

⁶ini nwọ ama se oria owuapụ awọma na eremeni-awọ ma na pịrị wara sịkị. Giledị ama mị ini anị ḍie se Manasẹ furo ḅie apụma ḅụ kirikọn apụma pịrịmẹ.

⁷Manasẹ eke mị Asha mị ḅụ ọkịmun Mikmẹtat mị lamẹ, Shẹkẹm mị ḅụ ịrụapakapaka nyọ daọrụ ḅụ. Eke mị pịkị chukuju daọrụ ḅụ mun Entapua apụma sọnị se chụa ọkịmẹ.

⁸Tapua mị kelema kiri mị sime Manasẹ ḅe pịrịmẹ, ọkụma jokoma Tapua ama mị sime Ifrem ḅie apụma pịrịmẹ.

⁹Eke mị pịkị tukoro mun Kana ideri mengi mị lamẹ. Ideri mengi mị ḅụ chuku daọrụ ḅụ sime opuamama sime Ifrem ḅe pịrịmẹ, Manasẹ eke mị ḅụ àrị omi-ẹ nwọḅẹ sọnị. Manasẹ eke mị ideri mengi mị ḅụ ọgọnọju daọrụ ḅụ anị sakịmẹ, se Mẹditirenia Opu Tọrụ mị ḅụ anị kulumamẹ.

¹⁰Ifrem ḅe chukuju daọrụ mị nyanamẹ, se Manasẹ ḅe ọgọnọju daọrụ mị nyanamẹ, Mẹditirenia Opu Tọrụ mị anị inia eke mị-ẹ ịrụasọsọ nyọ daọrụ ḅụ. Asha ḅe ọgọnọju ḅụ ịrụasọsọ nyọ daọrụ mị nyanamẹ, se Ịsaka ḅe pịkị ọgọnọju ḅụ ịrụapakapaka nyọ daọrụ mị nyanamẹ.

¹¹Ịsaka ḅe na Asha ḅe na ogboku sime eke ma ḅie ḅụ mịna amama sime Manasẹ ḅe pịrịmẹ: Bẹt Shan mị na Ibleam mị na pịkị àrị kelema amama na, pịkị Do mị na (anị tọrụ aka ḅụ simeye mị), Ẹndọ mị na, Teanak mị na, Mẹgido mị na, pịkị àrị kelema amama na.

¹²Manasẹ apụma, anị sime ḅaraḅụ, ini ineda àrị opuamama ḅie anga apụma depakụmakẹ, anịẹrẹchị Kenan apụma pa pịkị anịju ḅụ anga waraḅẹ.

¹³Izrẹlapụma ḅo kụrọ ini nẹngịtẹịn sịkị sọnị Kenan apụ mamgba ini nwọ depakụmakẹ, ọkụma ini ini mịẹse ini fịrịnwẹngị ini pịrịmẹ kụrọ ḅaraḅụ.

¹⁴Josẹf furo ḅie apụma nwọse Jọsụwa ḅe ḅẹmẹ, “Cheye ẹrẹchị ama mị ḅụ gbọrị pẹkẹrẹ kẹngẹ ị́ nwọse wa pịrị na anị mịnaye-ẹ? Wa opuma ḅakamẹ anịatịḅị Nyanaḅọ Ḅe ọ̀ ḅẹlẹma se wa pịrịsam.”

¹⁵Jọsụwa ḅe nwọse ini pẹkẹrẹmẹ, “Nemikase ómine opuma ḅakamẹ, se Ifrem chịngị-ọgọnọ-sẹ mị ọ́ ḅụ opuma ịrụmẹ ḅẹḅẹ, anịọkụma ó piri ma ḅie sọmun se piri pẹlẹ ọ́mịnaḅụ pịrị, anị Pẹrizaị apụma na pịkị Rifeim apụma na kiri mị ḅụ.”

¹⁶Ini nwọse ọ̀ pẹkẹrẹmẹ, “Chịngị-ọgọnọ-sẹ mị anị wa karakẹ, ọkụma Kenan apụma ḅụ ḅele kiri mị ọgọnọ anga apụma ini ikulele owuni-a kporokporo nyanamẹ, anị Bẹt Shan mị na, anị kelema amama ḅie apụma na pịkị Jezriẹl Pẹsịkiri mị ḅie ḅụ anga apụma na sọ nyana ọkụ-ẹ.”

¹⁷Jọsụwa ḅe nwọse Ifrem furo mị na pịkị Manasẹ furo mị ḅụ ịrụasọsọ nyọ daọrụ mị ḅụ sime apụma na ḅẹmẹ, “Ọ́ ḅaka lamamẹ, ọ́ pịkị kụrọ lamamẹ, kọkọmayeḅụ. Ọ́ gbọrịye nẹngị ḍiekiri nwọ nyanaḅịa.

¹⁸Chịngị-ọgọnọ-sẹ mị sime ọ́ pịrịḅịa. Anị mị piri-ẹ nwọḅẹ sọnị, ómine anị pẹlẹ se anị ọkịḅịa anị la-ọkụ la-ọkụ mị mgba. Kenan apụma ọkụma, ómine ini depakụmaḅịa ini kporokporo nyanamẹ pịkị kụrọ apụ-ẹ nwọḅẹ sọnị.”