Read kirikeni Jọshụa 2 Bible Online

Jọshụa 2 - kirikeni bible

Jọshụa 2

¹Anịsịkị Jọsụwa ḅe mama ama ẹnyẹ apụ Akasia[1] mị ḅie ḅụ ini ikowarịma pike sime nyọ ḅụ nwọ fịrịmamẹ na ini mun ḅọịma Kenan ama mị ẹnyẹ kelema, anịtẹịn anga Jẹriko opuama mị. Ini ḅo opuama mị lasịkị, ini mun Rehab nwọ chịn gbọrị sẹ fị ḅọ ma warị mọnọmẹ.

²Ini ḍuko Jẹriko amanyanaḅọ ḅe pịrịmẹ na Izrẹlapụ anị ḍin mị ḅie ḅo sẹ mị ẹnyẹ-o ḅomẹ,

³anị ọ̀ ḅịpị se Rehab ma fịrịma se nwọse á ḅẹmẹ; “Ị́ya warị ḅie sime owuapụma, ḅo bebe sẹ mị mgba ẹnyẹḅịa ẹrẹchị ini ḅomẹ! Ini ọkị pakụma ḅo!”

⁴Á nwọse ọ̀ pẹkẹrẹmẹ; “Kọkọmaye ḅụ owuapụ ị̀ya warị ḅomẹ,” “ọkụma ini sime ḅo nyọ à nemikẹ. Saso ḅiri ḅụ opuama mị onu ḅọkọ mị ma palịka simeogbo ini pakasomẹ. Ini mun-arị anga à nemikẹ, ọkụma ó nemikase be ini ḍukomẹ ḅẹḅẹ ómine ineda ini kunḅịa.” (Ọkụma Rehab ma ini mama ama ẹnyẹ apụma se ochu mị ọgọnọ, á se ise koroma osueinma chuku ḅie ḅọịmẹ.)

⁷Amanyanaḅọ ḅe oria tomonima opuama mị ḅie pakamẹ, anịsịkị ini pịkị ama mị onu ḅọkọ mị palịmẹ. Ini ama ẹnyẹ Izrẹlapụma ḍọkị nweni mun ateli mị Jọdan tọrụ mị saḅakoro nyọ lamẹ.

⁸Ama ẹnyẹ apụma ḍin mị ḅie ma ḅọlọlọ mọnọka simeogbo anị Rehab ma so ini damamunye-ẹ ochu mị ọgọnọ

⁹se nwọse ini ḅẹmẹ, “À nemimẹ na Nyanaḅọ Ḅe mị ama mị ò se ọ́ pịrịsam. Sẹ mị ḅie simeḅọ goyegoye ọ́mịna ḅalafa nụḅọ ḅụ sọsam.

¹⁰Ómine Ijipt mị ḅie pakasoarị sịkị Nyanaḅọ Ḅe Awụ Tọrụ mị se kpoinkpoin kiri mịẹ ọ́ pịrị ọkụ mị wa naamẹ. Ọ́ Saịhọn ḅe na Ọg ḅe na ḅaa ọkụ mị sọnị, wa pịkị naamẹ, anị Amọraị mama amanyanapụma Jọdan mị ḅụ ịrụapakapaka nyọ daọrụ ḅụ.

¹¹Mịna ḅalafamẹ wa anị naa kirikiri; mine mgba mịna kuḅie lọkọsam ómine gose; Nyanaḅọ ọ́mịna Tamụnọ Ḅe ori anị Tamụnọ Ḅe-ẹ, ọgọnọju so mị ḅie, pịkị mị sẹkiri mị ḅie sọnị.

¹²Mịọkụ ómine oria ẹrẹ ḅụ yekarịfị ị̀ pịrị na ómine iḅi se ị̀ furo mị mịẹḅịa anị ị̀rị̀ nwọ iḅi se ọ́ mịẹ ọkụ mị, pịkị àrị ineda kuḅie se ọ́ ḅụ gbanaḅịa elekima ọ́ nwọse ị̀ pịrị.

¹³Ó yeḅereni ị̀ pịrị na ómine ị̀ ḍaḅe na ị̀ nyengima na ḍụaḅọrọmaḅịa, ị̀ya mịnapụ owuapụma na eremeni ma na, pịkị inia furo mamgba na. Ó ḅereni ini wa ḅaa ma!”

¹⁴Owuapụma nwọse á ḅẹmẹ, “Ye Tamụnọ Ḅe mịna ḍumo ma ọkị wa nemikase wa ḍukoye mị nwọ mịẹkẹ ḅẹḅẹ! Ị́ nemikase mịanga wa nwọ kọn àrị nwẹngị mị ḅẹlẹma gbọrịḅọ sọnị pịrịkẹ ḅẹḅẹ, wa yeḅereni ị́ pịrịmẹ na Nyanaḅọ Ḅe mị ama mị se wa pịrịsa ḅẹḅẹ, wa iḅiọkụma ị́rị́ na angaḅịa.”

¹⁵Rehab ma anga warị mị ini anị nama mun opuama mị onu mị ḅụ oḅolomẹ, anịẹrẹchị á ḍiki se ini pịrị se ini se pẹlẹḅọkọ mị ḅie tolukoro somẹ.

¹⁶Á nwọse ini ḅẹmẹ, “Ó so chịngị ọgọnọ sẹ mị ḅie mun, anịka ọkụma amanyanaḅọ ḅe oria tomonima ini ómine ọrịḅịa. Ómine anịju ḅọị mun tẹrẹ-a ḍin la; ọkịmun ini vinpịkịḅo sịkị la. Anịsịkị mị ḅọrọsa ḅẹḅẹ ómine ineda soḅịa.”

¹⁷Owuapụma nwọse á ḅẹmẹ, “Ị́ wa mịẹse wa ḅereni ị́ pịrịsaye mị wa anị mịẹḅịa.

¹⁸Mịn gbarịmaka ḅaraḅụ ị́ mịẹḅịaye-ẹ. Wa ḅo ọ́mịna ama mị gbẹịnmachịẹsa ḅẹḅẹ, mịn pulo-pulo ḍiki mị se ị́ wa se tolukoroma pẹlẹḅọkọ mị ḅụ kpọ. Ị́ ḍaḅe na ị́ nyengima na, ị́ya mịnapụ owuapụma na pịkị ị́ ḍaḅe furo mị mgba na koḅiri ḅo ị́ya warị ḅie wẹrị.

¹⁹Inia ḅụ, warị mị ḅie pakaḅo omi-ẹ ḅẹḅẹ, oria fị mị ọ̀ ḅara ḅomẹ, nụḅọ tịḅị pulo mịna ọgọnọ gbana ẹkẹ, mine mịẹkẹ; ọkụma ị́rị́ na warị ḅie simeḅọ ye nụḅọ lamẹ ḅẹḅẹ, anị mịna ḅara ḅomẹ, nụḅọ pulo mị mịna ọgọnọ gbanaḅịa.

²⁰Anị sime ḅaraḅụ, ị́ nemikase wa karịfịye mị nwọ ḅẹlẹma nweni pịrịmẹ ḅẹḅẹ, anịọkụma ị́ wa mịẹse wa karịfịye mị wa ḅarị anị koko ẹkẹ.”

²¹Á ḅerenimẹ “Ye ó ḍuko ọkụ anị ọkọ sime” se árị ini wẹrịso se ini somẹ. Ini so sịkị, á pulo-pulo ḍiki mị se arịa pẹlẹḅọkọ mị ḅụ kpọ koromamẹ.

²²Ama ẹnyẹ apụma ini mun chịngịma ḅie ḅọịmẹ. Amanyanaḅọ ḅe oria tomonima tẹrẹ-a ḍin ini nwọse ini ḍọkịmẹ bebe chịngị ọgọnọ sẹ mị pẹkẹrẹ mgba, ọkụma ini ini ọrịkẹ, anị ini vinpịkị so Jẹriko mị mun ye-ẹ.

²³Se mama ama ẹnyẹ apụma chịngịma ọgọnọ ḅụ koroḅo tọrụ mị saḅa, se so Jọsụwa ḅe damamunmẹ. Pakaye goyegoye ini ḍuko ọ̀ pịrịmẹ,

²⁴se nwọ ḅẹmẹ, “Wa iḅiọkụ nemimẹ na Nyanaḅọ Ḅe bebe sẹ mị mgba ò se wa pịrịsam. Anịju ḅụ sime apụ mamgba ḅalafa inia ḅụ sọsam mine gose.”