Read kirikeni Jọshụa 8 Bible Online

Jọshụa 8 - kirikeni bible

Jọshụa 8

¹Nyanaḅọ Ḅe nwọse Jọsụwa ḅe ḅẹmẹ, “Owuni mamgba ọkị ị́ ḅụchụa se ini na so Eaị ama mị mun. Ḅalafama pịkị kuḅie lọkọmama. Àrị anị mịẹ sarasarama ị́ pịrịḅịa ị́ Eaị amanyanaḅọ ḅe nẹngịmaḅịa; oria tomonima na, opuama mị na, pịkị amakiri mị na ị́yaye sọḅịa.

²Ị́ se Jẹriko mị na anịa amanyanaḅọ ḅe na mịẹ ọkụ anị ị́ pịkị se Eaị mị na anịa amanyanaḅọ ḅe na mịẹḅịa ọkụ-ẹ, ọkụma mị sịkị anịa ngọma na namama na ómine árị ọkịḅịa. Ḅụkarakarama se ọḅụ owu se opuama mị paka.”

³Anị Jọsụwa ḅe na oria owuni mamgba na ḅụkarakaramaye-ẹ Eaị mị munḅịa ẹrẹchị. Oria owunima ḅie kụrọtẹịn apụma ḅụ kịnị-a tẹrẹ-a poku na jie ẹndẹ na ọ̀ nwọ sẹlẹ sikimamẹ, se ḍin ḅụ ini fịrịma pakụmamẹ

⁴se nwọse ini ḅẹmẹ: “Opuama mị ḅụ ísí saḅamanga ḅụ ọ́ ḅọị sime, ọkụma ómine opuma anịna sasama; ọ́ ḅụkarakarama owu se ini pakaḅịa ẹrẹchị.

⁵Ị̀ya tomonima na ị̀rị̀ na wa nwẹngị opuama mị daḅịa Eaị apụma pakaḅo wa dapakaḅịa sịkị, wa vinpịkị mangịḅịa tatarị sịkị ḅara mị.

⁶Ini wa ḍuko nweni wa opuama mị ḅie ini ọkị paka sikima sịkị laḅịa. Ini nwọ chịnḅịa na wa mangị ini pịrịaḅẹ, anị tatarị sịkị ḅara mị.

⁷Anịsịkị ómine ọ́ ḅọị sime anga mị ḅụ ọ́ pakaḅo opuama mị ọkịḅịa. Nyanaḅọ ọ́mịna Tamụnọ Ḅe ori anị se ọ́ pịrịḅịa.

⁸Ómine opuama mị ọkịsa ḅẹḅẹ ọ́ fịnị se anịaḅụ chụa, Nyanaḅọ Ḅe tọnsa ḅaraḅụ. Ma anị à se ọ́ pịrị kụrọma-ẹ.”

⁹Anị Jọsụwa ḅe ini fịrịma pakụmaye-ẹ, se ini mun ini ḅọị ḅịa anga mị ḅụ sime korumẹ, Eaị mị ḅụ ịrụasọsọ nyọ daọrụ mị, anị Eaị mị na Bẹtẹl mị na ogboku. Jọsụwa ḅe ini ikowarịma pike sime nyọ mị ḅụ ò simemẹ bebe ḍin mị mgba.

¹⁰Dede funfun ḅie Jọsụwa ḅe ọ̀ sịsẹ se owunima chịn koḅirimamẹ. Anịsịkị ori na Izrẹl mị ḅie ama sẹnịapụma na ini na mun Eaị mị lamẹ.

¹¹Owuni ma na ori na mun opuama mị ḅe opu ḅọkọ mị ḅụ ọgọnọju daọrụ ḅụ ikowarịma pikemẹ gbọrị pẹsịkiri ini na Eaị mị na ogboku ḅụ simemẹ.

¹²Tomonima ḅụ owuni oyi mẹndẹ fịnjị na oyiasi ọ̀ nwọse opuama mị ḅụ ịrụasọsọ nyọ daọrụ ḅụ ḅọịmẹ, anị Eaị mị na Bẹtẹl mị na ogboku.

¹³Owuni ma ini ḅụkarakarama owu pịrịmẹ se opu pẹkẹrẹ mị ini nwọse ikowarịma pike sime opuama mị ḅe ọgọnọju daọrụ ḅụ koromamẹ, ísí owuapụma pịkị ịrụasọsọ nyọ daọrụ ḅụ simemẹ. Jọsụwa ḅe, bebe ḍin mị mgba pẹsịkiri mị ḅie ò simemẹ.

¹⁴Eaị amanyanaḅọ ḅe Jọsụwa owunima ọrị sịkị, ọ̀ sịkị famakẹ. Ori na oria owuni mamgba na pakaso Jọdan Pẹsịkiri mị ḅie mun mẹ, Izrẹlapụma na ọmụgbinḅịa ẹrẹchị, anị gbọrị nyọ mị ḅụ, anị tatarị sịkị ḅara mị, ò nemikẹ na ini ọḅụ owu se ọ̀ pakaḅịa ọkụ.

¹⁵Jọsụwa ḅe na oria owunima na ini mangị Eaị apụma pịrịaḅẹ nwọḅẹ ḅara mịẹmẹ, se ini mangị ḅele ele mị damẹ.

¹⁶Bebe opuama mị ḅie sime owuapụ mamgba ini nwọ chịn gboloma ini ḍukomẹ, se ini Jọsụwa ḅe ḍukoarị sịkị ḅụ ini opuama mị ḅụ wẹrị sikima mun ḅọlọju lamẹ.

¹⁷Eaị mị ḅie sime owuḅọ goyegoye Izrẹlapụma ḍukomẹ, se opuama mị se sarakoromamẹ, ḅarị owusọ anị pịrịḅịaḅọ nyanaka ḅaraḅụ.

¹⁸Nyanaḅọ Ḅe nwọse Jọsụwa ḅe ḅẹmẹ, “Ị́ya sụḅa mị sụma Eaị mị da; àrị anị se ị́ pịrịaḅẹ.” Jọsụwa ḅe pịkị Nyanaḅọ Ḅe ḍuko ọ̀ pịrị ḅara mị mịẹmẹ,

¹⁹ori ọ́ ḅara dekichịẹma kirikiri, ḅọị sime owunima ini kirikiri sịsẹ, mangị opuama mị ḅie sọ se anị ọkịmẹ. Anị kirikiri ini fịnị se opuama mị ḅụ chụamẹ.

²⁰Eaị apụma tọrụ pịkị ọḅụ ḍiki sịkị, onwoin somun so mị la aḅẹ. Ḅọrọ sọḅịa anga ḅarị ofori-ẹ, anịatịḅị mangị ḅele ele mị damun sime Izrẹlapụma mịọkụ ini vinpịkị owu se ini pakasam.

²¹Jọsụwa ḅe na oria owunima na ini ọrịmẹ na ísíapụma opuama mị ini ọkịsam, ini pịkị fịnị se anịaḅụ chụasam nwọḅẹ sịkị, ini vinpịkị se sakị Eaị apụma ḅaamẹ.

²²Opuama mị ḅie sime Izrẹlapụma sọnị pakaḅo ọmụ mị gbinmẹ. Eaị apụma ḍọkịḅo ọrịmẹ na Izrẹlapụma ini ini ḍẹkị kelemasam, ini inimgba ḅaafamamẹ. Gbọrịḅọ sọnị sokẹ, pịkị ḍumoḅụ anịa ḅie toluḅọrọḅọ sọnị ofori-ẹ

²³Eaị amanyanaḅọ ḅe sikima ọkụma. Ini fịka ḅụ ò kun mun Jọsụwa ḅe pịrịmẹ.

²⁴Izrẹlapụma ḅele ele mị ḅie ini inina-tarakapụma ḅaafamamẹ, anị Eaị apụma ini ḍuko munyọ mị. Anịsịkị ini vinpịkị mun Eaị mị ḅie simeḅọ goyegoye ḅaafamamẹ.

²⁵Jọsụwa ḅe oria sụḅa mị se Eaị mị da nweni ini anịju ḅụ sime apụ mamgba ḅaafama sịkị lamẹ. Anị ene ḅie ini ḅaa Eaị apụ mamgba ḅe kịẹnḅịpị anị tomoni ḅụ poku na oyiẹndẹ-ẹ, owuapụ na eremeni na ḅụ.

²⁷Izrẹlapụma opuama mị ḅie ini kun namama na ngọma na ini ọkịmẹ, Nyanaḅọ Ḅe ḍuko Jọsụwa ḅe pịrịsa ḅaraḅụ.

²⁸Jọsụwa ḅe ori Eaị mị dọkịma pịkị anị se kansa ama nwọ mịẹmẹ. Mịmgba sọnị anị pa ọkọ sime waraḅẹ.

²⁹Eaị amanyanaḅọ ḅe ọ̀ nwọse eje ọgọnọ kpọḅaa se oria oju mị sololo sime mun sasoḅiri lamẹ ịrụa mị bin sịkị. Jọsụwa ḅe ọ̀ kụrọ pịrịmẹ na ini ḍụẹịn mị sin koroma, se opuama mị sọḅịa onu ḅọkọ mị ḅụ ini anị se gbin koromamẹ. Ḍụparịma ini nwọse anị gbẹịn tundurumamẹ, mịmgba sọnị anị pa omi-ẹ.

³⁰Jọsụwa ḅe Ebal Tụndụ mị ọgọnọ ḅụ gbọrị agbamịẹ ẹbẹ ọ̀ nwọ nama se Nyanaḅọ Ḅe pịrịmẹ, anị Izrẹl Tamụnọ Ḅe.

³¹Moziz, Nyanaḅọ Ḅe fịrịnwẹngịḅọ ḅe tọn ḅara, mị anị ò se anị mịẹ ọkụ-ẹ anị Moziz Oloko mị ḅie anị gịẹịn koroma ḅara mị: “ini ikulele se wolika ḍụparịma se nama agbamịẹ ẹbẹ.” Anị ọgọnọ ḅụ ini dọkịma agbama mịẹ se Nyanaḅọ Ḅe pịrịmẹ, pịkị gboloma agbamịẹ ḍiepịrịayema sọnị ini se ḅomẹ.

³²Anịju ḅụ, Izrẹlapụ mamgba ò ḍikiarị ogbo Moziz ḅe gịẹịn koroma Oloko mị, Jọsụwa ḅe nwọse ḍụparịma ọgọnọ ḅụ gịẹịnmẹ.

³³Izrẹlapụma na, inia ama sẹnịapụma na, fịrịtịḅịnị ma na, ḅẹrẹkọn apụma na, pịkị ini na anga igoniapụma na, mun Nyanaḅọ Ḅe Ọḅọkụ Igbe mị ḅụ mama akasịkị ma ḅụ chịẹ se tọrụ se Livaị agbamịẹapụma ọrụ mị ḅụ anị deki agbamịẹapụma damẹ. Tomonima ḅụ gbọrị pẹkẹrẹ ọḅụ se Gẹrizim Tụndụ mị damẹ ini chịẹ sime nyọ mị ḅụ, ísí gbọrị pẹkẹrẹ mị pịkị ọḅụ se Ebal Tụndụ mị damẹ. Moziz, Nyanaḅọ Ḅe fịrịnwẹngịḅọ ḅe tọn ini pịrịmẹ na ini ọkọ mịẹ mịẹse Izrẹlapụma ḅẹlẹma da ọkịḅịa ḅara.

³⁴Anịsịkị Jọsụwa ḅe gele pụkọ se Nyanaḅọ Ḅe Oloko mị gomẹ, ḅẹlẹma ma na worinime ma na, oloko ḍiri mị ḅie gịẹịnsa ḅaraḅụ.

³⁵Jọsụwa ḅe bebe Moziz oloko mamgba ò go tomoni kpo mị pịrịmẹ, anị eremeni ma na awọmẹnịma na pịkị inia ḅie anga igoniapụma na.