Read kirikeni 2 Tẹsalonịka 2 Bible Online

2 Tẹsalonịka 2 - kirikeni bible

2 Tẹsalonịka 2

¹Wa Nyanaḅọ Jizọs Kraịst Ḅe oria ḅo mị na pịkị mịna koḅiria mun ori na sime mị gbolomaye ḅụ: àrị ọ́ tẹkẹmẹ, ị̀ya mịnapụ,

²kirikiri mịẹḅịaye nemikapụ ọ́ nwọ sọ ma ọ́mịna koroma ma ḅụ anịkanịka na Nyanaḅọ Ḅe Ene mị anị ḅosam nwọ ḅẹye mị anị ó kuḅie lọkọmama. Sosi, mine mị anị ḍukoye-ẹ ini nwọ ḅẹḅịa, wa ịkịankoroarị sịkị, anịkanịka na wa anị se ḍiri ḅie gịẹịn sẹịnmẹ.

³Ó ḅereni se gbọrịḅọ sọnị gbọrị ḅọkọ ḅụ ḅọrọ oḅori se ọ́ chịnma. Anịatịḅị Ene mị anị ḅo ẹkẹ ọkịmun kuluma Ininachịn mị kiri ọkị pịkị Sitịḅịnyanaḅọ ḅe mịna ḅụ ḍiepakụmaḅịa sịkị laḅịa, ini tọn ḅene-ḅene kọrị fịnị pịrị sa ḅọ ḅe.

⁴Tomoni tẹkẹarịye goyegoye ori anị na tụḅụrụḅịa, pịkị tomoni seni oru kịẹnma ọkịye goyegoye na. Ori ọ̀ ḅụ deki gelematẹịn arịmgba nẹngịḅịa, pịkị so mun Tamụnọ Oputẹkẹwarị mị ḅie kpọnjị simeḅịa se ḅẹḅịa na ori Tamụnọ-ẹ.

⁵Ó se ḅiekoromaka na maye mamgba à ḍuko ọ́ pịrị ḅọrọsam, àrị ómine na simearị sịkị ḅụ.

⁶Anị sọnị mịn mị gose ma mịọkụ pakaye omi-ẹ, ọ́ pịkị anị nemi waraḅẹ. Anịọkụma, anịḅe karakara sịkị ḅụ sitịḅịnyanaḅọ ḅe ḅụḍiepakụmaḅịa.

⁷Tomoni chuku nemika sitịḅị mị anị sakị anịa fịrịnwẹngịsam, ọkụma pakaḅịaye mị ma anị ḅụpakụma ẹkẹ, ọkịmun anị ọlọ chịẹmaḅọ ḅe ateli mị ḅie ini nwọ sumasin sịkị laḅịa.

⁸Anịsịkị, Sitịḅịnyanaḅọ ḅe ḅụpakụmaḅịa, ọkụma Nyanaḅọ Jizọs Ḅe ḅo sa ḅẹḅẹ, ori ọ̀ ḅịpị ḅie ọwụ mị se sitịḅịnyanaḅọ ḅe ḅaa, se oria boma nyana tọrụkuḅu mị nwọse ọ̀ famaḅịa.

⁹Sitịḅịnyanaḅọ ḅe Oru ḅe kụrọ na ḅoḅịa se tọrụkịrịkịrị iruo-a ḅụgbiripumaye nwọ mịẹḅịa,

¹⁰se oḅori se nweni chama sitịḅịaye nwọ mịẹḅịa faḅịa apụma ḅụ. Ini gose faḅịaye anị ini kọkọmaye mị daọkịkẹ ini pịkị anị ḅẹlẹmakẹ anị ḍụaḅọrọma se ini pịrịḅịaye mị.

¹¹Anịẹrẹchị Tamụnọ Ḅe inia tọrụirima kụrọ nwọ seni ini sẹịnmamẹ mịẹse ini iruoye mị ḅereniḅịa ḅara.

¹²Anị mị ọkịḅoḅịaye anị, nwọ kọkọmaye mị ḅereni ḍụkụka, se si mị ḅie sime ḅieḅẹlẹarịapụ mamgba, ḅẹrẹ ḅarasi nwọ nyanaḅịa.

¹³Mịnapụ, wa ómine gose sịkịmamgba mịẹḅaka se Tamụnọ Ḅe ḅẹḅịa, ómine Nyanaḅọ Ḅe ḅẹlẹmasa apụma. Anịatịḅị Tamụnọ Ḅe Tẹmẹ Ḅe kụrọ ḅụ ḅọrọ ọ́ sẹlẹọkịmẹ ḅo tarị ḍụaḅọrọma nyanaḅịa apụ nwọ sọḅịa ẹrẹchị ó se oria osiḅụ sime-a tomoni nwọ mịẹḅịa ọkụ, anị ọ́ kọkọmaye mị nwọ ḅereniye gose.

¹⁴Wa ḍuko ọ́ pịrị Iḅi Ḅẹrẹ mị ḅụ Tamụnọ Ḅe ḅọrọ ọ́ chịn mịn mị ḅie chumẹ; ori ọ́ chịnmẹ mịẹse ọ́ lalamaye ọ́ nwọ ḍiaọkịḅịa ḅara wa Nyanaḅọ Jizọs Kraịst Ḅe boma mị ḅụ.

¹⁵Anịẹrẹchị ọ́ kụrọma chịẹ wa seni ó ḍie sa kọkọmaye ma ḅụ na, mịna Tamụnọ ḅẹrẹ ḍuko sịkị ḅụ na, wa pịkị gịẹịn fịrịfịrịmaḍiri ma ḅie na.

¹⁶Ye wa Nyanaḅọ Jizọs Kraịst Ḅe na mịnaḅụ na, pịkị mịna Ḍa Tamụnọ Ḅe na, wa ḅẹlẹma ḅọ ḅe, pịkị oria ḍikiḅụgerere ḅụ ḅọrọ simegbaso kuḅie kụrọ na iḅi tọrụseḍikiye na nwọ seni wa pịrị ḅọ ḅe,

¹⁷ó kuḅie kụrọma pịkị ọ́ mịẹ kụrọma se ọ́ sịkịmamgba iḅiye mịẹ pịkị iḅiye ḍuko.