Read kirikeni 2 Tẹsalonịka 3 Bible Online

2 Tẹsalonịka 3 - kirikeni bible

2 Tẹsalonịka 3

¹Kuluma ḅụ, mịnapụ, ọ́ tẹkẹ mine pịrị, mịẹse Nyanaḅọ Ḅe oku mị sarama wasamaḅịa ḅara, ini pịkị osiḅụ wẹrị anị ọkịḅịa ọkụ anị ọ́mịna ogboku mịẹ ḅara mị.

²Ọ́ pịkị tẹkẹ mịẹse Tamụnọ Ḅe sitịḅị na si apụ na ḅara ḅie wa ọkịpakụmaḅoḅịa ọkụ anịatịḅị nweni mamgba oku mị ḅerenikẹ.

³Ọkụma Nyanaḅọ Ḅe kuḅie seni ḅụgbana gbẹịnḅọ-ẹ, ọ̀ pịkị ịnyọ seni ọ́mịna ḅie chụaḅịa se ye ọ́ laka ḅara ḅụ si ḅọ ḅe ḅara ḅie ó kokopakụmaḅoḅịa.

⁴Nyanaḅọ Ḅe pịkị kuḅie kụrọ se wa pịrịmẹ ọ́mịna ḅụ, wa nemi kpaịnmamẹ na wa ḍuko ọ́ pịrị ḅara mị ọ́ nwọ mịẹ-aḅẹ ọ́ pịkị ọkọ mịẹmamunḅịa.

⁵Ye Nyanaḅọ Ḅe ọ́mịna kuḅiemgbọlụma dagbụkụkụma se ọ́ Tamụnọ Ḅe ḅẹlẹma mị nwọ kaịnḅotẹịn pịkị Kraịst Ḅe pịrị ye-inema mị na.

⁶Wa Nyanaḅọ Jizọs Kraịst Ḅe ẹrẹ ḅụ wa tọn ọ́ pịrịaḅẹ mịna mịnapụ, ini nwọ ikula ḍumo kọn-arị apụma ḅụ ọ́ ḅụsin, anị wa se ini pịrị tetema ma ọkị ḍụkụka apụma.

⁷Ómine na mịnaḅụ na iḅiọkụ nemimẹ na wa se ye mịẹ ḅara mị ọ́ nwọse ye mịẹ gbẹịnmẹ. Wa ómine na sime sịkị wa ikulakẹ.

⁸Wa gbọrịḅọ ḅara sọ ḅarachụa daọkịkẹ gbẹịnye ọkịka ḅara ḅụ. Anịnakaraka, wa fị ḅereni fịrịnwẹngịmẹ, ḍin na enekaka na wa ịnyọsarakẹ, mịẹse wa igbikifa ọkịḅo ọ́mịna ḅie gbọrịḅọ sọ pịrị ẹka ḅara.

⁹Wa mịn mị nwọ mịẹmẹ, ọ́ ḅarachụa wa pịrị-ẹ nwọ ḅe kụrọ ọ́mịna ḅụ wa nwọ nyanakẹ nwọ ḅẹye gosekẹ; wa ḍikiḍaḅịaye nwọ sọ ọ́ pịrịḅịaye gose wa ọkọ mịẹmẹ.

¹⁰Wa ómine na sime sịkị wa ḍuko ọ́ pịrịmẹ na “Fịrịnwẹngị ḍọkịka ḅọ goyegoye ó ḅereni se iniḅọ yefị ma.”

¹¹Wa gose mịn mị nwọ ḍukoye, anịatịḅị wa naamẹ na ọ́mịna ḅie dapụ ikula ḍumo kọn-aḅẹ, gbọrịye sọ mịẹ ḍụkụka se ḅụ seni jịn apụ ḅẹrẹ ḅie chuma ḅọrọ sikima ọkụma.

¹²Wa Nyanaḅọ Jizọs Kraịst Ḅe ẹrẹ ḅụ, wa tọn mịna tomonima pịrị se inia ḅerijine-aḅẹ ọ́mịna ogboku na, ini inia ḍumo ma nwọ seni ọrụtọn, se fịrịnwẹngị ini fịḅịaye nyana inia ḅụ ma pịrị.

¹³Ọkụma ómine, mịnapụma, iḅiye mịẹ ḅụ ịnyọ ọ́ ḅụ fa ma.

¹⁴Sosi ọ́mịna ḅie wa seni ọ́ fịrịmarị oku mị mịẹka ḅọ pakaḅịa, nemikase anị ọkọ pakamẹ ḅẹḅẹ, ómine ọ̀ ḅụ elekima chụa, se ori na gbọrịye sọ mịẹ gbolomama, mịẹse ọ̀ ḅụgerereḅịa ḅara.

¹⁵Ọkụma ọ́ tarakaḅọ ḅara nwọ seni ọ̀ wẹrịma anịnakaraka, ọ́ mịnaḅọ ḅara nwọse ò ḅerijine.

¹⁶Ye Nyanaḅọ Ḅe na mịnaḅụ na, mịna deinma mị ḅe chuku ḅe, sịkịmamgba ḅụ deinma se ọ́ pịrị, pịkị ḅọkọ ḅọkọ ḅụ na. Nyanaḅọ Ḅe ómine mgba na sime.

¹⁷Ị̀rị̀ ḅarana ị̀ ḅara se mị Pọl ḅe ḅara ḅo kereniḅịpị mị gịẹịnmẹ. Mịn à se ḍiri goyegoye ḅie ị̀ya ẹrẹ gịẹịn ọkụ-ẹ, mịn à gịẹịn gịẹịn ọkụ mị-ẹ.

¹⁸Ye wa Nyanaḅọ Jizọs Kraịst Ḅe ḍikiḅụgerere mị ómine mgba na sime.