Read kirikeni 1 Timoti 3 Bible Online

1 Timoti 3 - kirikeni bible

1 Timoti 3

¹Mịn ḍukoye mị kọkọmaye-ẹ na: Tomoniḅọ kuḅie chọchị tịḅịnịḅọ sọ gose chịẹ-chịẹ-chịẹ ḅara simemẹ ḅẹḅẹ, iniḅo opuma iḅi fịrị nwọ ḍọkịmẹ.

²Chọchị tịḅịnịḅọ sọḅịa ḅọ ori ḍukosimaḅịaye ḅụ oforiḅọ ọ̀ nwọ sọḅịa, gbọrị eremeniḅọ kẹngẹ mị ò simeḅịaye-ẹ, ọ̀ tọrụ kweinmaḅịa, ori ineda ḅụ ọlọḅịa, pịkị ḅụ se ọrụtọnḅịa; ori igoniapụ daọkị oria warị ḅie chuḅịa; ori ineda yeḍieḅịa;

³ori iruḅu tọrụḅaamaḅọ sọ ẹkẹ pịkị kụrọkụrọaye mịẹ ẹkẹ, ori ọ̀ ḅụnemi se pịkị deinḅịa; ori igbiki ḅẹlẹmatẹịn ẹkẹ;

⁴ori ineda iḅiọkụ ò furo mị nwọ koḅiriḅịa, pịkị mịẹse oria awọma ori osi se pịkị ọ̀ ḅịpịpokiḅịa.

⁵Anịatịḅị tomoniḅọ ò furo ḍikiḍikiḅịa ọkụ nwọ nemika ọkụma, nde iniḅọ ineda Tamụnọ chọchị mị nwọ ḍikiḍikiḅịa ọkụ?

⁶Ḅereni mị ḅụ ogulasa ḅọ ọ̀ nwọ sọḅịa mịẹse ọ̀ ḅụ dekichịẹma ẹka ḅara opuayemịẹ ḅụ, mịẹse ọ̀ ḅẹrẹsi nyana ẹka ḅara, Oru ḅe mịẹ ọkụ mị.

⁷Chọchị ḅie ofori tomoni osi se pịrị ḅọ ọ̀ nwọ sọḅịa, mịẹse ini ọ̀ ḅụgereremaka se ori Oru ḅe ḍẹịn ḅie koro ẹka ḅara.

⁸Chọchị ḅie ḅarachụa fịrịnwẹngịarị apụma ini iḅiyemịẹḅara nwọ nyana se inia kuḅie pakaḅo fịrị nwọ nwẹngị; ini opuma iruḅu ma pịkị igbiki pụkọ chụa ma;

⁹ini ḅelema pakasa gbun ḅereni mị kapụma nwọ ọlọ iḅi fịafịa kuḅie ḅụ.

¹⁰Ini tatarị ini elekima ḍiki, anịsịkị ini ḍaḍiki mị ḅọrọmẹ ḅẹḅẹ, ini sakị fịrịnwẹngị.

¹¹Inia ere ma sọnị iḅiyemịẹḅara nwọ nyana, se nweni se fiema ḅọrọma; ini kwein tọrụ nyana se yegoyegoye ḅie karakaraye ḅụ chịẹ.

¹²Chọchị ḅie ḅarachụa fịrịnwẹngịarịḅọ ḅe gbọrị eremeniḅọ nwọ sime, se ineda iḅiọkụ se oria awọma na ò furo na nwọ ḍikiḍiki.

¹³Iḅiọkụ seni inia fịrịnwẹngị ḅarachụapụ ma, ini chịẹkiri nwọ nyana inia ḅụ ma pịrịḅịa pịkị ineda kụrọ kuḅie se ini Kraịst Jizọs Ḅe ḅụ nyana ḅereni mị nwọ ḍukopakụmaḅịa.

¹⁴À mị ḍiri mị nwọ gịẹịn ị́ pịrịarị sịkị, à tọrụ se ḍikiaḅẹ na à ḅọlọka ḅo ị́rị́ na ịrịaḅịa.

¹⁵Ọkụma à ḅo ḅụ ọḅụdamẹ ḅẹḅẹ, mị ḍiri mị mịẹse ị́ nemiḅịa wa Tamụnọ Ḅe furo mị ḅie mịna ḅụ se wẹrị gbẹịn ḅara, anị ḍumo Tamụnọ Ḅe chọchị mị, ori anị ogbochịn na onu na sọ kọkọmaye mị pịrị ḅọ ḅe-ẹ.

¹⁶Mịna Tamụnọ tẹkẹ ḅara mị ḅie sime ḅọịye mị ḍụḅa laḅara mị pikiḅịa gbọrịḅọ sọnị ofori-ẹ: Tomoniḅọ ḅara ọ̀ nwọse pakaḅomẹ, Tẹmẹ Ḅe oria karakara mị nwọ ḍiepakụmamẹ enjẹlapụ pịkị ori ọrịmẹ. Sẹ ma ogboku ini oria ḅẹrẹ nwọ ḍukomẹ, bebe tomonikiri mị ò ḅerenimẹ, se ini ò se iwo soḅie mun mẹ.