Read kirikeni 1 Timoti 4 Bible Online

1 Timoti 4 - kirikeni bible

1 Timoti 4

¹Tẹmẹ Ḅe gaịnma ḍukomẹ na dapụ kuluma sikima ḅie ḅereni mị ḅụ ḅarasinḅịa, ini iruo-a tẹmẹma ḍukoarịye nwọ mịẹḅịa, se si-a-tẹmẹma ḍiearịye ma nwọ ḍukonwẹngịḅịa.

²Oḅori se nweni chịn iruokọn apụ, nwọ sime ḍieaye nwọ wasamasam, inia sina iḅina nemi kuḅie ma fịsam, ini ọfịrị ikulele seni dọkịmasaye simeọkụ.

³Ọkọ sime apụma mị ḅara mị nwọse yeḍiemẹ na anị karakarakẹ deḅọ na ịrọḅọ na sime, pịkị karakarakẹ da fịaye nwọ fị. Ọkụma Tamụnọ Ḅe àrị fịayema nwọ tẹmẹmẹ fịḅịa ẹrẹchị, mịẹḅaka ḅẹ tẹkẹ nwọ kọn so sịkị, anị ḅereni apụ ma-ẹ, ini kọkọmaye mị nwọ nemi so sịkị ḅụ.

⁴Tamụnọ Ḅe tẹmẹye goyegoye anị iḅimẹ; sịkịḅịaye ofori-ẹ, ọkụma mịẹḅaka ḅẹ tẹkẹ ḅụ ini yegoyegoye nwọ fịḅịa,

⁵anịatịḅị Tamụnọ ọkwẹịn mị na tẹkẹ mị na mịẹse Tamụnọ Ḅe wa fị gbẹịn fịye ḅara se anị ọkịmẹ.

⁶Ị́ nemikase ma ḍieaye ma nwọse mịnapụma ḍiemẹ ḅẹḅẹ, ị́ iḅi fịrịnwẹngịḅọ sọ Kraịst Jizọs Ḅe pịrịḅịa, ị́ nwọ ḅereni mị ọkwẹịnma na ị́ ḍukonwẹngịsa kọkọma ḍieaye ma na nwọse tẹmẹ anga fịye mịẹ ị́ ḅụ kokoarị sịkị.

⁷Ọkụma àrị Tamụnọ mịẹmịẹaye ḅụ ofori ḅẹrẹma ḅie ị́ ḅụ sin, anị ḍuko na gbẹịnkaye ma. Ị́ ḅụ se Tamụnọ kịkẹ ḍumo mị ḅe ḍawọye ḅụ wẹrị.

⁸Oju ḍakaḍiki mị nyana sọye omi-ẹ, ọkụma tẹmẹ anga ḅe oju ḍakaḍiki mị anga na anga na ḅụ anị sọye nyanamẹ, anịatịḅị anịa ḅụ ḍumo omi-ẹ mịọkụ na pịkị ḅoḅịa sịkị ḅụ na.

⁹Mịn mị kọkọmaye-ẹ, tomoniḅọ okorona okorona anị ọkị pịkị ḅereni gbẹịnye-ẹ.

¹⁰Wa kpalakpala pịkị gagama fịrịnwẹngịaḅẹ, anịatịḅị wa tọrụ se ḍumo Tamụnọ Ḅe ḍikiaḅẹ, anị nweni mamgba Ḍụaḅọrọmaḅọ Ḅe, anịtẹịn anga ò ḅereni apụma.

¹¹Mayema tọn se pịkị àrị ḍie.

¹²Ḅereni se gbọrịḅọ sọnị ị́ ḍikisimama ị́rị́ asẹmẹnị tọkụ-ẹ gose, ọkụma ḅereni apụma ḍikiḍaḅịa ḅọ nwọ sọ-ọ, ị́ya ọkwẹịn ḅụ na, ị́ya yemịẹḅara ḅụ na, ị́ya ḅẹlẹma ḅụ na, ḅereni ḅụ na, pịkị karakaraye ḅụ na.

¹³Ị́ya sịkị na ịnyọ na nwọ fama tomoni ogbo mị ḅie Tamụnọ Ḅe ḅẹrẹ mị ḍuko ini pịrị, pịkị ye se ini ḍie ọkịmun à ḅoḅịa sịkị la.

¹⁴Ị́ ḅie sime tẹmẹ anga ḍiepịrịye mị anị sịkị ma, anị ịkịankoroapụma ḍukopakụma se sẹnịapụma inia ḅarama se ị́ ọgọnọ gbana sịkị ḅụ ini se ị́ pịrịye mị.

¹⁵Mayema seni mịẹmịẹye ḅụ chu se ị́ ḅụ seni àrị pịrị, mịẹse nweni mgba ị́ya tọrọkọ mun mị nwọ ọrịḅịa ḅara.

¹⁶Ị́ ḅụ ọbị, pịkị ị́ ḍiearịye ma ọbị. Mayema nwọ mịẹmamun, anịatịḅị ị́ ọkọ mịẹmẹ ḅẹḅẹ, ị́ ị́ ḅụ na ị́ ḍukoye naarịapụ ma na nwọ ḍụaḅọrọmaḅịa.