Read kirikeni 1 Timoti 5 Bible Online

1 Timoti 5 - kirikeni bible

1 Timoti 5

¹Ḍin se ị́ nẹngịḅọ ḍiki ịganị ma, ọkụma ḍaḅọ-ẹ nwọ ḅẹ ḅara se ọkwẹịn kọn ọ̀ pịrị. Ị́rị́ ḍin se nẹngịapụ ma ị́ya mịnapụ ḅara se ini ọkị,

²nyengiapụ ḅara nwọse sẹnịsa eremeni ma ọkị; eremeni-awọ ma ị́ya mịnapụ ḅara se ini ọkị, si nemika ḍumo ḅụ.

³Osi seni kọkọma deapụ koroma fịsa eremeni ma pịrị.

⁴Se deḅọ koroma fịsa eremeniḅọ nemikase awọ nyanamẹ anịkanịka árịa awọ yi awọ nwọ nyanamẹ ḅẹḅẹ, ini tatarị ini pakaḅo furo ḅie Tamụnọ Ḅe fịrị mị nwọ nwẹngị, mị ḅara ḅụ ini yiapụ ma, anịkanịka ini yiapụ ma yiapụ ma inia ḅụ nwẹngịsa fịrịma nwọ gbẹịn, anịatịḅị anị mị anị Tamụnọ Ḅe ḅụḅẹlẹḅẹlẹye-ẹ.

⁵Deḅọ kọkọma koroma fịsa eremeniḅọ ma, se ḍikiḍikiḅọ nyanaka ḅọ ma á tọrụ se Tamụnọ Ḅe nwọ ḍikisam, ọ̀ tẹkẹmamun se ọ̀ ḅara ḅarachụa ḅiaḅẹ ḍin na enekaka na ḅụ.

⁶Ọkụma mịnaḅụ seni ḅụtima ḅụ wẹrịsa deḅọ fịsa eremeniḅọ goyegoye árị ḅọ ma anị fịsa ḅọ-ẹ, á ḍumomẹ nwọ ḅẹ sọnị.

⁷Mà olokoma nwọse ini pịrị, mịẹse gbọrịḅọ sọnị inia ḅie ḍukosimaḅịaye nwọ nyana ẹka ḅara.

⁸Ọkụma nemikase iniḅọ mịnapụ ḍikiḍiki ḍụkụkaḅọ omi-ẹ ḅẹḅẹ, anịtẹịn anga ò furo ḅie apụma, ori ḅọ ḅe ò ḅereni mị pikisam, ori pịkị sitẹịn ḅerenika ḅọ ḅe nẹngịsam.

⁹Deḅọ fịsa eremeniḅọ ḅụ ma kụra tesi lakaḅọ se deapụ fịsa eremeni ma ḅe kịẹnḅịpị ḅụ chụa ma. Anị mị sikima, gbọrị sịkị kẹngẹ se owuḅọ simesa ḅọḅịa;

¹⁰pịkị iḅimịẹye ḅụ ẹrẹ pakaḅọ, iḅiọkụ se árịa awọ ḍikipakụmaḅo sa eremeniḅọ, igoniapụ ḅẹlẹma ḅọ; ḅarachụa iniḅọ juo Kraịst ḅereniapụ pịrịsaḅọ, ḅarachụa ḅụfụka ḅie sime apụ pịrịsaḅọ, pịkị á ḅụ mgba se iḅimịẹ mị pịrịsaḅọ.

¹¹Ọkụma deapụ fịsa iremeni ma ini se chụa kịẹn ma; anịatịḅị ini ḅiarịyema mịẹse ini owuapụ sime ḅiḅịa ḅẹḅẹ, ini Kraịst Ḅe ḍikitọrụsinsinmẹ,

¹²se ini tatarị ḅereni ọ̀ pịrịye mị kansa ḅẹrẹ ḅẹrẹsi nwọ nyanaḅịa.

¹³Ini pịkị sịkị fama ḍumo nwọ ḍawọ kọnḅịa, gbọrị warị ḅie sọ paka mun jịn warị ḅie sọḅịa nwẹngị nwọ kọnma ḅọrọḅịa sịkị; ọkụma anị sitẹịn anga ini gọlịaḅịpị nwọ ḍawọ ḅẹlẹmama ḅọrọḅịa se ḅụ se ini gbolomaka ḅẹrẹ ḅie chuma ḅọrọḅịa, ini ọkwẹịn gbẹịnka ye nwọ ḍukoma ḅọrọḅịa.

¹⁴Anịẹrẹchị anị ị̀ ḅụḅẹlẹye nwọ sọḅịa deapụ fịsa eremeni ma nemikase owuapụ simeḅịa ọkụma, awọ nyana, se inia warịma nwọ ḍikiḍikiḅịa ḅara mịẹse ini achọ se tarakapụ pịrị se ini wa ḍuko sima ẹka ọkụ.

¹⁵Anịatịḅị deapụ fịsa da eremeni gbọtụḅara vinpịkị Oru ḅe ḍukosam.

¹⁶Ọkụma Kraịst Ḅe ḅereni eremeniḅọ iniḅọ furo ḅie deḅọ fịsa eremeni nwọ nyanamẹ ḅẹḅẹ ye árị ini ḍikiḍiki, se anị ikuye mị nwọse chọchị mị ọgọnọ gbana ma, mịẹse chọchị mị sime deapụ fị se ngẹrị sime apụma nwọ ḍikiḍikiḅịa ḅara.

¹⁷Sẹnịapụ ma, ateli ịsụn apụ ḅara ḅụ iḅi fịrịnwẹngịarịapụ ma mama kiri gbẹịnye se ini pịrị na iḅimẹ, anịtẹịn anga nwọ kụrọma Tamụnọ ḅẹrẹ mị ḍuko pịkị anị ḍiearịapụ ma.

¹⁸Anịatịḅị fịafịa ḍiri mị nwọ ḅẹmẹ, “Nambulo ḅe ḅịpị fịna ma ori ịpịamgba mgbọlụma nwọ pịsịrịarị sịkị,” anị pịkị na nwọ ḅẹmẹ, “Fịrịnwẹngịḅọ ḅe oria gbẹịnye se ọ̀ pịrị na iḅimẹ.”

¹⁹Se sẹnịḅọ pụnụma ḅẹrẹ nwọ poki ma, mama apụ anịkanịka anị nẹngị onyechịẹapụ anị mịẹkụrọma sikima ọkụma.

²⁰Tomoni ogboku simịẹ apụma ḍiki ịganị mịẹse kọn apụma ḅalafa nwọ nyanaḅịa ḅara.

²¹Tamụnọ Ḅe na Kraịst Jizọs Ḅe na, pịkị fịafịa enjẹlapụma na tọrụkuḅu ḅụ na, à kụrọma ḍuko ị́ pịrịaḅẹ na ị́ ma ḍukoaye ma nwọ mịẹḅịa gbọrịḅọ sọnị tọrụḍikika, pịkị tọrụkụnka ḅụ, ị́ mịẹḅịa yegoyegoye nwọ mịẹ.

²²Tamụnọ fịrịnwẹngịḅịa ḅọ ị́ iḅiọkụ iniḅọ ḍumo nemika simeogbo ḅara se iniḅọ ọgọnọ gbana ma. Jịn apụ si mịẹmịẹye ḅụ ị́ ḅụ se chu ma; ị́ ḅụ se ọrụtọn.

²³Mengi kẹngẹ nwọ ḅu ma, ọkụma kele iru kalaye ọkị ị́ ḅụlọ mị gose ị́ nwọ sarama obiarị sịkị.

²⁴Dapụ si kikimakẹ, inia sima ini se mun ḅẹrẹ ḅie chuchumẹ, ọkụma ísíapụma ḅe sima ọḅụkọ mị àrị pakapakaye-ẹ.

²⁵Anị gbọrị ḅara mị ḅụ ini ḅelema iḅi mịẹmịẹaye ọrịrịmẹ, iḅiọkụ ḅelepakakaye ma sọnị àrị ḅọịkẹ.